1, 2. Yisinke ayi ku tumangeda mokuhara Jehova Karunga?

WA HARA Karunga ndi? Nsene wa ligava nare nyamoge kwaJehova Karunga, pwa hana esinganyeko ove ngo limburura asi nhi. Ayo ya hungama kwetu mokuhara Jehova, morwa yige ga hova kutulikida eharo. Bibeli kwa tanta asi: “Ose kwa hara vakwetetu, yeeyi Karunga yige ga hova kutuhara.”—1 Johanesa 4:19.

² Jehova yige ga hova kutulikida eharo. Age kwa tu pa embo lyewa apa pevhu. Age kufira sinka yihepwa yetu yopanyama. (Mateusa 5:43-48) Unene po, age kufira hena sinka yihepwa yetu yopampepo. Age kwa tu pa Nonkango dendi, Bibeli. Mokugwederera ko, age kuna kutuzigida mokukanderera kwendi nehuguvareso asi nga tu zuvha ntani nga tu tumina mpepo zendi zokupongoka zi tu vatere. (Episarome 65:2; Rukasa 11:13) Somulyo po unene, age kwa tumine Munwendi ogu ga hara po unene mokuyatuzowora mononzo ntani nomonomfa. Ee, eharo musi lyenene eli ga tu likida Jehova!—Resa Johanesa 3:16; Varoma 5:8.

3. (a) Mokukara meharo lyaKarunga, yisinke twa hepa kurugana? (b) Epuro musinke lyomulyo twa hepa kukonakona, ntani kupi ko natu gwana elimbururo?

³ Jehova kuna hara tu gwanene mo uwa wanarunye  meharo lyendi. Alyo kuna kara etokoro lyetu nsene tuna hara kugwanena mo uwa ndi hawe. Nonkango daKarunga kuna kutupamperekeda asi: ‘Omu kare meharo lyaKarunga eli ngali mu twaresa komwenyo gwanarunye.’ (Juda 21) Nkango “omu kare” kulikida asi twa hepa kurugana ko yuma mokukara meharo lyaKarunga. Twa hepa kulimburura eharo lyendi mononkedi dokulikarera. Yipo nye, epuro lyomulyo eli twa hepa kukonakona kuna kara asi: ‘Ngapi omu nani vhura kulikida eharo lyange kwaKarunga?’ Elimbururo kuligwana mononkango domupositoli Johanesa asi: “Eharo lyetu lyokuhara Karunga lyeli asi, ose atu sikise mo yipango yendi. Ano yipango yendi, kapi ya paka udigu.” (1 Johanesa 5:3) Twa hepa kukonakona nawa  eyi adi tanta nonkango edi, morwa tuna hara kulikida Karunga gwetu asi twa mu hara unene.

4, 5.  Singonona omu eharo lyoge lyokuhara Jehova lya tamekere kukura momutjima goge.

⁴ Yisinke ga tembe mupositoli Johanesa apa ga tjenge nonkango edi asi: “Eharo lyetu lyokuhara Karunga”? Kuvhura o diworoke siruwo apa eharo lyoge lyokuhara Jehova lya tamekere kukura momutjima goge ndi?

⁵ Diworoka apa wa lirongere pomuhowo usili kuhamena Jehova nositambo sendi ntani nokutameka kulikida epuro. Ove wa ya kwete egano asi nampili ngomu va ku retere munanzo ogu ga kara ure naKarunga, kupitira mwaKristusa, Jehova ga wapaika nzira yipo ngo ka sike kesikiliromo eli ga zumbanesere Adamu ntani nokukagwana mwenyo gwanarunye. (Mateusa 20:28; Varoma 5:12, 18) Ove wa ya tamekere kukwata egano elizambero lyenene eli ga tulire po Jehova pokutuma Munwendi ogu ga hara po unene mokuyakufira. Ayo kwa ku gumine komutjima, ntani wa tamekere kukara neharo lyokuhara Karunga ogu ga ku likida eharo lyenene ngoso.—Resa 1 Johanesa 4:9, 10.

6. Ngapi omu eharo lyosili ava li likida, ntani yisinke lya ku tumangedere eharo lyoge kwaKarunga o rugane?

⁶ Nye nampili ngoso, elizuvho olyo kwa kere tupu etamekero lyeharo lyosili lyokuhara Jehova. Eharo kapisi malizuvho tupu. Eharo lyosili kwaKarunga kwa kwatera mo yoyinzi kupitakana pokutanta tupu asi: “Ame kwa hara Jehova.” Ngwendi moomu tupu lya kara epuro, eharo lyosili kulilikida kupitira moyirugana. (Jakopo 2:26) Unene po, ose kulikida eharo lyetu pokurugana yininke eyi ayi hafesa muntu ogu twa hara. Yipo nye, apa eharo lyokuhara Jehova lya tamekere kukura momutjima goge, ayo ya ku tumangedere mokuhara kuparuka monkedi ezi azi hafesa  Guho gemeguru. Nove Mbangi ezi za gwana ekuho ndi? Nsene yimo, eharo eli lyenene ntani noulimburukwi kwaJehova ya ku ninkisire mokutura po etokoro lyomulyo po meparu lyoge. Ove wa ligeve nyamoge kwaJehova mokurugana mpango zendi, ntani yiyo wa likidire eligawo lyoge kupitira mekuho. (Resa Varoma 14:7, 8.) Kusikisa mo eligawo lyoge kwaJehova kwa kwatera mo eyi ga tumbwire mupositoli Johanesa mononkango edi dina kukwama ko.

7. Yipango musinke yimwe yaKarunga, ntani yisinke ya kwatera mo mokuyisikisa mo?

⁷ Johanesa kwa fatwilire eyi ali tanta eharo lyokuhara Karunga asi: “Atu sikise mo yipango yendi.” Yisinke yipango yaKarunga? Jehova kwa tu pa yipango yimwe yokuvyukilira kupitira moNonkango dendi, Bibeli. Pasihonena, age kwa nyokesa nomukaro ngwendi unkorwe noruhonda nokukarera mafano nowidi ntani noyimpempa. (1 Vakolinte 5:11; 6:18; 10:14; Vaefeso 4:28; Vakorosi 3:9) Kusikisa mo yipango yaKarunga kwa kwatera mo kuparuka kuliza nonompango dokuvyukilira doBibeli.

8, 9. Ngapi omu natu diva eyi ayi hafesa Jehova nampili monomukaro edi da dira kukara nonoveta doBibeli dokuvyukilira? Gava sihonena.

⁸ Nye nampili ngoso, nsene tuna hara kuhafesa Jehova, twa hepa kurugana ko yoyinzi kupitakana tupu kulimburukwa yipango eyi yokuvyukilira. Jehova kapi ga tu tura monomango donoveta edi adi pangere nkenye karuha keparu lyetu lyankenye ezuva. Yipo nye, ose kuvhura kuligwanekera nonomukaro dononzi nkenye ezuva edi da dira kukara noyipango yokuvyukilira yomoBibeli. Monomukaro dangoso, ngapi omu natu vhura kudiva eyi ayi hafesa Jehova? Bibeli kutulikida nawa-nawa magazaro gaKarunga. Ngomu natu ka resa Bibeli, ose natu ka lironga  kuhamena eyi ga hara neyi ga nyenga Jehova. (Resa Episarome 97:10; Yisewe 6:16-19) Ose natu ka diva nomukaro ntani noyirugana eyi ga hara Karunga. Ngomu natu ka lironga momunene yikara yaJehova nononzira dendi, yimo tupu hena natu ka pulisira magazaro gendi mokupitisira matokoro getu ntani nokukundama yirugana yetu. Yipo nye, nampili monomukaro edi da dira kukara nonoveta doBibeli dokuvyukilira, ose ngatu vhura kudiva ‘eyi ana tu harere’ Jehova.—Vaefeso 5:17.

⁹ Pasihonena, Bibeli kapi za kara nosipango sokuvyukilira esi asi tu tantere asi kapisi tu tare malikwamo gokotivi ndi novidiyo nonodividi edi adi likida nyanya ndi ruhonda. Nye kapi twa hepa veta zokuvyukilira ezi azi nyokesa kutara yininke yangoso. Ose twa diva omu Jehova a tara yininke yangesi. Nonkango dendi kututantera asi: “HOMPA kwa nyenga ava va hana Veta.” (Episarome 11:5) Ntani hena ado kututantera asi: “Karunga nga pangura vahondedi.” (Vahebeli 13:4) Pokutarurura ko kononkango odo, ose kuvhura kudiva eyi ana tu harere Jehova asi tu rugane. Yipo nye ose kapi natu ka horowora mokukalihafesa pokutara mafano aga aga likida yininke eyi ga nyenga Karunga gwetu. Ose twa diva asi ayo kuhafesa Jehova apa atu nyokere malihafeso gokunyata aga au likida uzuni ou asi mawa. *

10, 11. Morwasinke atu limburukwire Jehova, ntani ulimburukwi musinke atu mu pe?

¹⁰ Konda musinke zomulyo po zeyi atu sikisire mo yipango yaKarunga? Morwasinke tuna harere kuparuka nkenye ezuva kuliza neyi twa diva asi kwa liza nomagazaro gaKarunga? Kapi tupu atu yi ruganene morwa kuhara tupu kuhenduka etengeko ndi mokunyokera po yitundwamo yoyidona eyi ava ligwanekere nayo ava ava  ncenuna yipango yaKarunga. (Vagarata 6:7) Nye morwa ose kutara ulimburukwi kwaJehova ngompito zongwa mokulikida eharo lyetu kwendi. Ngwendi moomu munona a kondjo mokugwana ehafero lyoguhwe, nose yimo tuna hara kugwana ehafero lyaJehova. (Episarome 5:12) Age yige Guhyetu, ntani twa mu hara. Kwato eyi ayi tu retere ruhafo rorunene kupitakana yokudiva asi ose kuna kuparuka monkedi ezi a ‘hafere’ Jehova.—Yisewe 12:2.

¹¹ Yipo nye kapi atu mu limburukwa nomutjimakoka ndi tu horowore asi nompango musinke natu kwama. * Ntani hena kapi tupu atu di limburukwa nsene kuna tu wapere ndi nsene ureru kwetu mokudilimburukwa. Mokulisiga, ose ‘kulimburukwa nonomutjima nadinye.’ (Varoma 6:17) Ose kulizuvha ngwendi moomu ga lizuvhire muepisarome ogu ga tjenge asi: “Ame kwa hafera kulimburukwa koyipango yoge, yeeyi ame kwa yi hara.” (Episarome 119:47) Yimo, ose kwa hara kulimburukwa Jehova. Ose kuyadimburura asi age ga wapera ntani ga hepa ulimburukwi wetu wokuzulilira. (Deuteronomium 12:32) Ose tuna hara Jehova nga tu uyunge ngwendi moomu Nonkango dendi da uyunga kuhamena Nowa. Bibeli kwa uyunga kuhamena esimbi eli lyokulimburukwa, eli lya likidire eharo kwaKarunga pokukara noulimburukwi monomvhura dononzi asi: “Nowa nage ta rugana nayinye moomu ga mu pangerere Karunga.”—Genesis 6:22.

12. Ulimburukwi musinke au hafesa Jehova?

¹² Ngapi omu a lizuvhu Jehova kuhamena ulimburukwi wetu wokutunda komutjima? Nonkango dendi kuuyunga asi ose ‘kumuhafesa’ pokurugana ngesi. (Yisewe  27:11) Ulimburukwi wetu yosili kuhafesa Hompa Mupangeli gwanayinye ndi? Yimo, ntani Jehova ga kara nokonda zomulyo zokumuhafesa. Jehova kwa tu sita nemanguruko lyokutura po matokoro. Eyi kutanta asi ose kuvhura kutokora nsene tuna hara kulimburukwa Karunga ndi kumunyokera. (Deuteronomium 30:15, 16, 19, 20) Nsene tu horowora kulimburukwa Jehova ntani etokoro lyetu kuna li tumangeda eharo lyetu lyokuhara Karunga, ose kuretera ruhafo rorunene Guhyetu gemeguru. (Yisewe 11:20) Ntani hena ose kuhorowora nkedi zongwa zeparu.

13, 14. Morwasinke natu uyungira asi ‘yipango yaKarunga kapi ya paka udigu,’ ntani ngapi omu natu vhura kuyifanekesa eyi?

¹³ Mupositoli Johanesa kuna kututantera yimwe yokutuhuguvaresa kuhamena yipango yaJehova asi: “Yipango yendi, kapi ya paka udigu.” Noveta dendi kapi da pitakana nonkondo dovantu wokudira kusikilira mo mokudilimburukwa.

¹⁴ Ayo kuvhura kuyifanekesa ngesi. Kaume koge gomunene ta ku pura o ka mu vatere ko kutunga nzugo zendi. Apo kuna kara po yitji yoyinzi mwa hepa kututa. Yitji yimwe ureru pokuyisimba muntu gumwe tupu, ano yimwe udigu ayo ya hepa kuyisimba vantu vavali. Kaume koge ta horowora po eyi ana ku harere o simbe. Kuvhura nye a ku ninke o damune nyovelike eyi ana diva asi udigu ndi? Hawe. Age ngano kapi na hara o zuvhe kukora pokukuninka o yi damune nyovelike. Mokulifana, Karunga gwetu geharo gomufenkenda kapi a tu pura mokusikisa mo yipango eyi ya kara asi udigu unene mokuyisikisa mo. (Deuteronomium 30:11-14) Age kapi nga tu pura mokusimba mudigo gwangoso. Jehova ga diva maupirankondo getu, morwa “ga yi diva eyi ga tu ruganesa; age kudiworoka asi ose mbundu zevhu.”—Episarome 103:14.

15. Morwasinke natu huguvarera asi yipango yaJehova kuturetera uwa?

 ¹⁵ Yipango yaJehova kapi ya paka udigu, ayo kuturetera uwa wounene. (Resa Jesaya 48:17.) Yiyo nye ga tanterere Mosesa Vaisraeli asi: ‘Ga tu pangera HOMPA Karunga gwetu asi tu limburukwe koyipango nayinye eyi, ose tu mu tjire. Nsene tu yi sikisa mo, age ngano nga kunga nkenye apa muhoko gwetu, ta gu ragopeke.’ (Deuteronomium 6:24) Nose kuvhura tu kare nehuguvaro asi Jehova kwa tu pa noveta dendi morwa kwa litura mo moukalinawa wetu wanarunye. Mousili, ayo ngano kapi tayi wapa Jehova mokutupangera tu rugane nkenye eyi nayi tu koresa. Jehova Karunga kwa kara nounongo wokudira kuyereka. (Varoma 11:33) Yipo nye asi, age ga diva eyi yoyiwa po kwetu. Jehova yige sihonena sosiwa po seharo. (1 Johanesa 4:8) Eharo, sikara sendi esi sa likarera, kukundama nkenye eyi a tanta ndi a rugana. Aso kuna kara etateko lyoyipango yendi nayinye eyi ga pa vakareli vendi.

16. Nampili ngomu twa kara nomazedo gouzuni ou woudona ntani kudira kusikilira mo kwetu, morwasinke nayi tu tompokera mokukondjera ulimburukwi?

¹⁶ Nye eyi kapi yina kutanta asi ulimburukwi kwaKarunga kuna kara sininke soureru kurugana. Twa hepa kurwanesa mazedo gouzuni ou woudona, ou una “kara mepangero lyoMuzonaguli.” (1 Johanesa 5:19) Ose kwa kara hena nezedagwiro lyokuteza po veta zaKarunga morwa kudira kusikilira mo kwetu. (Varoma 7:21-25) Nye eharo lyetu lyokuhara Karunga kuvhura kutuninka yi tu tompoke. Jehova kutungika owo ava likida eharo lyawo kwendi kupitira moulimburukwi wawo. Age kupa mpepo zokupongoka “kwava ava mu zuvhu.” (Yirugana 5:32) Mpepo ozo kureta yiyimwa yoyiwa mwetu, ayo yikara yomulyo yokuvhura kutuvatera mokukondjera ulimburukwi.—Vagarata 5:22, 23.

17, 18. (a) Yisinke ngatu ka konakona mobuke ezi, ntani ngomu natu ka yi rugana, yisinke twa hepa kudiworoka? (b) Yisinke ngava ka zogera megaununo lyokukwama ko?

 ¹⁷ Mobuke ezi, ngatu ka konakona nompango daJehova ntani neyi ana hepa ko kwetu. Ngomu natu ka konakona nompango daJehova, twa hepa kudiworoka yininke yimwe yomulyo. Twa hepa kudiworoka asi Jehova kapi a tu sininike mokulimburukwa noveta nonompango dendi, nye kuna hara ulimburukwi wokutunda komutjima. Ngano kapisi tu divare asi Jehova kuna tu harere tu paruke monkedi ezi ngazi tu retera mauwa gomanzi ngesi ntani nomwenyo gwanarunye komeho. Twa hepa hena kutara ulimburukwi wetu wokomutjima ngompito zongwa mokulikida Jehova omu twa mu hara.

¹⁸ Mokutuvatera tu dimburure uwa koudona, Jehova kwa tu pa ezwi lyokomutjima. Nye nampili ngoso, mokuninka asi tu li huguvare, twa hepa kulideura ngamoomu nali ka yi zogera egaununo lyokukwama ko.