Kudjamena erembe. Nombangi daJehova kwa pura asi kunyongamena erembe ndi kulidjamena, rorunzi kumwe nokudimba rusumo rosirongo, kuna kara sirugana soukareli sokuhuguvara ezoworo lyokutunda kosirongo ndi kovampitilisi, mevango lyokuhuguvara mezoworo lyaKarunga. (Jesaya 43:11; 1 Vakolinte 10:14; 1 Johanesa 5:21) Mupitilisi gumwe gwangoso kwa kere hompa Nebukadenesara gwaBabironi zanare. Mokumonekesa mfumwa noupampi womaukarelikarunga gendi, hompa ogu gononkondo kwa dikire efano lyemunene nokusininika vantu vendi va li tongamene siruwo oso musika, ngwendi rusumo rosirongo, kuna kuhagara. Nampili ngoso, Vahebeli vatatu, oSaduraka naMesaka naAbetenego, kwa nyokere kutongamena efano, nampili yi va twaredese konomfa.—Ndaniyera, egaununo 3.

Munahistoli gedina Carlton Hayes kwa tjenge asi mosiruwo setu “erembe kuna kara sinongweneso somulyo sepuro nesi soukareli kwava va gava ulimburukwi wawo kosirongo sawo. . . . Vagara kugusa ko mambare gawo nsene tava pitisa erembe; vatangi kuhamberera erembe monomutango dawo ano vanona kulitanga mononsumo.” Ga gwederere ko asi ava va gava ulimburukwi wawo kosirongo kwa kara hena nomazuva gawo “gokupongoka,” ngwendi  ezuva lyaune lyaPembankuru moAmelika ntani awo kufumadeka “vapongoki nomapenda” nomavango gomadiworokero ngwendi “nontembeli.” Mosipito sanavenye moBrasilia, ministeli govakwayita kwa nongwenene asi: “Erembe kulifumadeka nokulikarera . . . ngwendi moomu tupu ava karere sirongo somvharerwa.” The Encyclopedia Americana kwa tumbwire asi “erembe kwa pongoka ngwendi sikuruse.”

Encyclopedia ezi kwa konekere hena asi marusumo gosirongo “kwa kara malikido gokulinenepekera geligawo kosirongo ntani rorunzi kwa hamena mo ehundiro kwaKarunga mokuvyukisa nokupopera vantu ndi vapangeli vawo.” Yipo nye, kuvhura tu yi kwate egano eyi vakareli vaJehova ava tarere yipito yokuhamberera sirongo kukwatera mo kudjamena erembe nokudimba rusumo rosirongo, ngwendi youkarelikarunga. Mousili, apa va kumbwilire ko kenyoko lyovanona woNombangi daJehova lyokukarera erembe ndi lyokutumbwidira eligawo lyawo kosirongo konosure domoAmelika, buke The American Character kwa tumbura asi: “Monompanguro dawo, Mpanguro Zonene kwa yi kwatesa ko ngesi asi yirugana eyi yankenye ezuva kuna kara yirugana youkarelikarunga.”

Nampili ngomu va dira kulihameka moyipito eyi ava tara asi kwa lilimba noBibeli, vantu vaJehova kufumadeka matokoro gava wopeke mokulihameka mo. Awo kufumadeka marembe gosirongo ngoyidiviso ntani nokunongonona asi ‘mapangero’ kuna kurugana ‘ngomukwafi gwaKarunga.’ (Varoma 13:1-4) Yipo nye Nombangi daJehova kutambura epukururo lyokukanderera po “nohompa nava va kara momapangero navenye.” Konda zetu kuna kara asi “atu kare mompora nomombili, ose hena atu tjireni Karunga, tu pire nonkango mwanayinye.”—1 Timoteusa 2:2.

Kulihameka momahoroworo goupolitika. Vakiriste wousili kufumadeka matokoro gava wopeke. Awo kapi ava rwanesa mahoroworo, ntani awo kutambura ava va horowora mokupangera. Nampili ngoso, awo kapi va kara mbinga kombinga zoyinka youpolitika yomuhoko. (Mateusa 22:21; 1 Peturusa 3:16) Yinke nava rugana Vakriste moyirongo omu ava sininike navenye va horowore ndi moukaro omu malizuvho aga zeruka gokurwanesa ava vana dili kuza kevango lyokuhorowera? Diworoka asi oSaduraka  naMesaka naAbetenego kwa zire kevango oku lya kere efano, yipo nye, moukaro wokulifana, Mukriste kuvhura kutokora mokuza kevango lyomahoroworo nsene ezwi lyendi lyokomutjima kuna kumupulisira. Nampili ngoso, ga hepa kudivilisa asi kapisi a teze po upirambinga wendi. Ga hepa kudiworoka nompango ntazimwe edi dina kukwama ko:

1. Vasikuli vaJesus kapi va ‘hamena kouzuni.’—Johanesa 15:19.

2. Vakriste kwa karera po Kristusa noUhompa wendi.—Johanesa 18:36; 2 Vakolinte 5:20.

3. Mbungakriste kwa likwatakana mepuro, ntani vahameni vamo kwa va kwatakanesa eharo lyoSikriste.—1 Vakolinte 1:10; Vakorosi 3:14.

4. Ava ava horowora mupitisili kukara nousima woyirugana yendi. Koneka nompango dononkango edi va tjanga mwa-1 Samwere 8:5, 10-18 ntani mwa-1 Timoteusa 5:22.

5. Jehova kwa tere eharo lyoVaisraeli lyokukara nomupangeli gomuntu ngosidiviso asi awo kuna mu nyoka.—1 Samwere 8:7.

6. Vakriste va hepa kukara nemanguruko lyokuuyunga novantu womonombungapolitika nadinye kuhamena epangero lyoUhompa waKarunga.—Mateusa 24:14; 28:19, 20; Vahebeli 10:35.

Yirugana yokupinganena po ukwayita. Moyirongo yimwe, epangero kuhepa asi ava va nyoka mokulihamena mosirugana soukwayita va rugane yirugana yapeke posiruwo songandi. Apa atu tura po matokoro koyuma eyi, twa hepa kuyitura momakanderero getu, nampo nokuyizogera kumwe noMukriste mukwetu ogu ga kura pampepo, ntani tuna kutura po etokoro lyokuliza nezwi lyetu lyokomutjima eli twa deura.—Yisewe 2:1-5; Vafilipi 4:5.

Nonkango daKarunga kututantera asi tu ‘zuvhe yovapangeli noVeta zosirongo, atu liwapaikire nkenye apa kurugana yoyiwa. Tu kare nombili.’ (Titusa 3:1, 2) Mokutura eyi megano, kuvhura tu lipure nyamwetu mapuro aga gana kukwama ko asi: ‘Sirugana esi va hara kupa nge ngasi zonagura epirombinga lyange ndi kuninkisa nge ni lihameke moukarelikarunga woyimpempa?’ (Mika 4:3, 5; 2 Vakolinte 6:16, 17) ‘Kurugana sirunga esi ngasi digopekesa nge mokusikisa mo yitumbukira yange yopampepo ndi pamwe kukandana nge mokuyisikisa mo ndi?’ (Mateusa 28:19, 20; Vaefeso 6:4;  Vahebeli 10:24, 25) ‘Mokulihameka mosirugana sangoso kuvhura ngasi pe nge siruwo sokunenepeka yirugana yange yopampepo, nampo mokulihameka mosirugana soUhompa sosiruwo nasinye ndi?’—Vahebeli 6:11, 12.

Nsene ezwi lyokomutjima lyoMukriste kumupulisira a rugane yirugana yangoso mevango lyokuza modorongo, Vakriste vakwawo va hepa kufumadeka etokoro lyendi. (Varoma 14:10) Nye, nsene ta lizuvhu asi kapi ta vhuru kurugana sirugana sangoso, vapeke va hepa kufumadeka hena etokoro olyo.—1 Vakolinte 10:29; 2 Vakolinte 1:24.