Apa gekoro ndi kaume gomunene ava mu gusa mo mombunga kutukoresa unene. Monkedi omu atu tambura mavyukiso gomoBibeli kombinga zeyi kuvhura kuhorora eharo lyetu lyenene kwaKarunga ntani noulimburukwi kewapaiko lyendi. * Tarurura mapuro gamwe va pura kuhamena kombinga zeyi.

Ngapi omu natu tekura muntu va gusa mo mombunga? Bibeli kuuyunga asi: “Walye omu kara sinanga nankenye ogu, yooyo asi mukweni, age nye munaruhonda ndi munaruho ndi mukereli govakarunga peke ndi muswauli ndi nkorwe ndi munamahaka; gwangoso nampili kulya nokulya si nendi.” (1 Vakolinte 5:11) Kuhamena nkenye muntu “ogu a zapuka a dire kukara merongo lyaKristusa,” tatu resa asi: “Mwa ha mu tambura membo ndi asi mu mu kunde. Yeeyi ogu ana kulikunda nendi, nage kwa hamena koyirugana yendi yoyidona.” (2 Johanesa 9-11) Kapi tatu vhuru kuuyunga nendi nampili kuhamena yininke yopampepo. Ruhungu 15 Sitarara 1981, pepenuno 25 kwa tente asi: “Kumorora muntu ogu va gusa mombunga yizo ntambo zokuhova zokutwaredesera dogoro mu ka tameke kukauyunga nokukatulisa po ukaume. Yipo nye, kapi tuna hara nampili kumororara ogu va gusa mo mombunga.”

Ayo hepero sili mokunyokera po nkenye elikwatakano nogu va gusa mo mombunga ndi? Yimo, morwa nokonda dongandi. Zomuhowo twa hepa kulikida ulimburukwi wetu kwaKarunga nokoNonkango dendi. Ose kulimburukwa Jehova kapisi nsene kuna kara ureru tupu, nye hena nampili kuna kara udigu kuyirugana. Eharo lyetu lyokuhara Karunga kututumangeda tu limburukwe yipango yendi nayinye, nokunongonona asi age muhungami nomuneharo ntani noveta dendi kureta mauwa gomanene. (Jesaya 48:17; 1 Johanesa 5:3) Zauvali kukara ure nogu ana kudira kulitezurura kutupopera nyamwetu ntani nombungakriste koukaro wawo wokunyata kosipara saKarunga ntani ayo kulikida edina  lyewa kombungakriste. (1 Vakolinte 5:6, 7) Zautatu, kukwaterera kwetu konompango doBibeli kuvhura kuninkisa ogu vana gusa mo mombunga a gwanene mo uwa. Pokukwatesa ko matokoro govakuronambunga, kuvhura tu gume mutjima gomunzoni ogu siruwo sina ga dira kutambura elituromo lyovakuronambunga lyokumuvatera. Kuzumbanesa po malikwatakano nava twa hara kuvhura kuvavatera ‘va lisimonene vene,’ va dimburure unene wepuko lyawo ntani nokurugana ko yuma va tengure kwaJehova.—Rukasa 15:17.

Ngapi nsene gekoro lyetu vana mu gusa mo mombunga? Mosihorokwa sangoso, ayo sili kuheteka ulimburukwi wetu weharo konoveta daJehova. Ngapi omu natu vhura kutekura ekoro lyetu va gusa mo mombunga? Mobuke ezi kapi tatu vhuru kuuyunga kuhamena yihorokwa nayinye, nye tatu demenene kwa yivali tupu.

Moyihorokwa yimwe, gekoro ogu va gusa mo mombunga kuvhura a kare asi age simpe kuna kutunga kumwe nose membo lyetu. Kapi yina kutanta asi nsene vana mu gusa mo mombunga makura ekoro tali haga, yirugana yankenye ezuva yemepata kuvhura simpe kutwikira. Nye, mweyi ga rugana, ogu va gusa mo mombunga ga tokora mokuteza po malikwatakano gopampepo aga ga kere po pokatji kendi nepata lyendi. Yipo nye, vemepata kapi tava vhura kumupulisira a lihameke mo moyininke yopampepo kumwe nawo. Pasihonena, nsene ogu va gusa mo mombunga pweli, kapi ta vhuru kulihameka mo apa epata lina kukara poukareli wepata. Nye, nsene ogu va gusa mo mombunga simpe munona, vakurona va kara simpe nositumbukira sokuronga nokupisura munwawo. Yipo, vakurona veharo kuvhura va ture po mawapaiko mokulironga Bibeli kumwe namunwawo. *—Yisewe 6:20-22; 29:17.

Moyihorokwa yimwe, gekoro ogu vana gusa mo mombunga kapi ga tunga kumwe nose membo. Nampili ngomu poyiruwo yimwe kuvhura pa kare hepero mokuuyunga kumwe nendi morwa yininke yimwe yemepata, nye nzogera kapisi zi pitakanene. Vakriste vemepata kapisi va papare nokonda dongandi mokuhara tupu  kulikwatakana kumwe nomunekoro ogu va gusa mo mombunga ga dira kutunga nawo membo. Nye, ulimburukwi kwaJehova ntani nokombunga zendi kuvatumangeda pokukwaterera kewapaiko lyomoBibeli lyokuhamena egusomo mombunga. Yirugana yawo youlimburukwi kuretera uwa kogu ana zono ntani kuvhura kumuvatera a gwanene mo uwa kepisuro eli ana kugwana. *—Vahebeli 12:11.