1, 2. Ngapi omu ga yi gendesere Baramu mokutura vantu vaJehova mosiponga?

MUROVELI ta zi posiroverero esi ga hara. Morwa ana hara kukakwata rudi rumwe ronomfi, ta horowora ndjo ta tura kerowo nokulizugumina momema. Konyima zokaruwogona, erowo tali digopa makura ta tameke kukoka mfi zendi, oku ta menya-menya morwa ana diva asi ana horowora ndjo zouhunga.

² Momvhura 1473 K.S.N., mugara gedina Baramu kwa gazarere nawa asi ndjo musinke na ruganesa. Nye, kapi ga here kukwata nomfi, age ga here kukwata vantu vaKarunga ava va kere momazana gaMowaba pepi noSirongo sEtumbwidiro. Baramu kwa lininkisire asi age muporofete gwaJehova, nye age kwa kere mugara gokudowokera yimaliwa ogu va kutire mokufinga Vaisraeli. Nye nampili ngoso, morwa elihamekomo lyaJehova, Baramu ya ya mu vhulikire mokutungika tupu Vaisraeli. Netokomeno lyokusikisa mo yirugana yendi, Baramu ga yi dimbwilire asi nsene a vhura kuheteka vantu vaKarunga va ture nzo zonene, Karunga mwene kuvhura nga va finge. Nositambo sangoso, Baramu kwa ruganesere ndjo zokulikarera, azo kuna kara vakadi woVamowaba.—Numeri 22:1-7; 31:15, 16; Ehororo 2:14.

3. Ngapi omu ya mu tompokere Baramu?

³ Ndjo zina za rugene ndi? Nhi, vagara woVaisraeli wokusika pomayovi nomurongo va gwililire meheteko olyo ‘pokulirara-rara novakadi woVamowaba.’ Awo hena kwa tamekere kukerera yikarunga yoVamowaba, kukwatera mo  yikarunga yawo yoruvharo Bara naPeoro. Ngoyitundwamo, Vaisraeli 24 000 va fililire poopo pomururani goSirongo sEtumbwidiro. Eh, simpagwa musi sosinene sa kere!—Numeri 25:1-9.

4. Morwasinke va gwililire mayovi goVaisraeli moruhonda?

⁴ Yisinke ya twaredesere kosimpagwa esi? Sinzi sovantu kwa kere nonomutjima donondona nokuzumba Jehova, Karunga ogu ga va zowere moEgipite nokuvakutika apa va kere momburundu ntani nokuvatakamesa dogoro va ya sikire nawa kosirongo setumbwidiro. (Vahebeli 3:12) Mupositoli Paurusa kwa tjenge kuhamena sihorokwa esi asi: “Walye atu hondereni moomu ngava rugana mo vamwe, makura pa fe vantu mayovi nomurongo mbali nagatatu mezuva limwe tupu.” *—1 Vakolinte 10:8.

5, 6. Sihorokwa sokuhamena nzo zoVaisraeli apa va kere momazana gaMowaba, morwasinke sa karera nomulyo kwetu naina?

⁵ Sihorokwa esi va tjanga mwaNumeri kuronga yoyinzi vantu vaKarunga naina, ava vana kuhara kuhwilira mosirongo setumbwidiro sokomeho. (1 Vakolinte 10:11) Pasihonena, evhuko lyenene lyoruhonda mouzuni kuna kulikida mukaro gokupitakanena ngogu gwa kere moVamowaba vanare. Mokugwederera ko, nkenye mvhura mayovi goVakriste  kugwira moruhonda, ndjo zokulifana nezi za kwete Vaisraeli. (2 Vakolinte 2:11) Ano, ngwendi Simuli, ogu ga retere mukadi goMumidiyani mokamba zoVaisraeli nokumutwara moyitarameho motenta zendi, vamwe ava ava likwatakana novantu vaKarunga naina kuna kupukisa momudona mbungakriste.—Numeri 25:6, 14; Juda 4.

⁶ Ono diva asi ove ono kara moukaro wa fanekesa eyi ya horokere momazana gaMowaba ndi? Ove kuna kumona asi ntaantani ngo ka gwane mfeto zoge ezi wa ndindira zouzuni woupe ndi? Nsene yimo, rugana paapa wa hulira mokukara meharo lyaKarunga pokukwama mpango ezi asi: “Nyokeni ruhonda.”—1 Vakolinte 6:18.

7, 8. Yisinke “ruhonda,” ntani ngapi omu ava ava hondere ava zangura eyi ava kunu?

⁷ Kuliza noBibeli “ruhonda” “(moRugereka porneya) kutanta asi eligwanekero lyopanyama lya hana asi mononkwara doPatjangwa. Aro kwa kwatera mo kuligwanekera panyama nagumwe ga hana asi mulikwali goge, eligwanekero panyama pokatji kovadike noukumbu, ntani kulisipa koyilyo yonomuga ndi kuligwanekera panyama kupitira konyima ndi kulidanesa koyilyo yonomuga nomuntu ga hana asi mulikwali goge. Ruhonda kuna kwatere mo hena nampili kuna kuyirugana mugara nomugara ndi mukadi nomukadi ndi nosimuna. *

⁸ Matjangwa kwa yi zeresa nawa-nawa asi: Ava ava hondere kapi tava vhuru kukara mombungakriste ntani kapi ngava gwana mwenyo gwanarunye. (1 Vakolinte 6:9; Ehororo 22:15) Mokugwederera ko, nampili ngesi awo kulizonagura vene momunene, ngwendi pokuzumbanesa mfumwa nomulyo gwawo nomaudigu mononkwara, nezwi lyokunyata lyokomutjima, nomazimo gokudira kundindira, nomauvera ntani  nonomfa. (Resa Vagarata 6:7, 8.) Ayo ugova mokurugana yininke eyi nayi vhura kukakuretera ruguwo rorunene. Nye ehudi, wovanzi kapi ava gazadara ko koyitundwamo apa ava gusa ntambo zokuhova, omu mwa hwa mafano goruhonda.

9. Mafano goruhonda kapi ga kara nosiponga ngamoomu ava yi uyunga vamwe ndi? Yi faturura.

⁹ Moyirongo yoyinzi, mafano goruhonda kugalikida monosaitunga nomonovidiyo nomotivi ntani nomokompiuta. * Nye ago sili kutupu siponga ngamoomu ava yi uyunga vamwe ndi? Hawe! Ava ava tara mafano goruhonda kuvhura kukara moupika wokulidanesa koyilyo yonomuga ntani nokutunga po ‘madowo gomadona,’ aga naga vhura kuvatura va kare vapika vago nokuretesa po maudigu mononkwara ntani nampili nelizumbo. * (Varoma 1:24-27; Vaefeso 4:19) Gumwe ogu nga rugana epaparo mokuhakura udigu ou, kwa u fanekesere kouvera wokankera. Age kwa tente asi: “Ayo kutwikira kukura nokunenepa ntani kapi ya hwa mokuhaga po pwayene, ntani ayo hena udigu mokuyikohonona po.”

10. Ngapi omu natu vhura kuruganesa mpango ezi za kara mwaJakopo 1:14, 15? (Tara hena kakende pepenuno 101“ gwana nonkondo mokukara ono kuhuka pamukaro.”.)

¹⁰ Tarurura nonkango edi va didilika mwaJakopo 1:14, 15, edi da uyunga asi: “Nkenye ogu kumuzeda edowo lyendi lyedona, eli ali mu koko tali mu kumbagere. Edowo lyedona ntene lina kuru, tali tulisa muntu nzo, ano nzo nazo ntene zina kuru, tazi retere muntu nomfa.” Yipo nye, nsene edowo lyedona li hwilira monondunge doge, rugana ko yuma usimbu-simbu mokuligusa mo! Pasihonena, nsene o mona mafano gokupindura madowo gomadona wa hana kuyindindira,  dimisa tivi ndi kompiuta zoge. Rugana ko eyi ya hepa po mokunyokera po madowo goruhonda komeho ga kure nokukupangera!—Resa Mateusa 5:29, 30.

11. Pokurwanesa po madowo gomadona, ngapi omu natu vhura kulikida ehuguvaro lyetu mwaJehova?

¹¹ Konda zomulyo kuna kara asi Karunga ogu ga tu diva nawa kupitakana omu twa lidiva nyamwetu kwa pamperekeda asi: “Omu dipage madowo aga aga rugana mweni, ngwendi gaga: ruhonda, nonyata noruho nomadowo gomadona nedowo lyokufukira yininke, kuninka asi ukereli wovakarunga woyimpempa.” (Vakorosi 3:5) Yosili, kurugana ngoso kuvhura kukara udigu. Nye diworoka asi ose kwa kara naGuhyetu gemeguru geharo ntani gomulididimiki.  (Episarome 68:19) Kuvhura kumuhedera mekanderero nsene magano gokunyata gana hwilire monondunge doge. Kanderera a ku pe “nonkondo edi dononene,” ntani hetekera ko kulisininika nyamoge mokugazara yininke nayopeke.—2 Vakolinte 4:7; 1 Vakolinte 9:27; tara kakende “ Ngapi omu nani vhura kuhageka nkareso zondona?”

12. “Ukaro” musinke vana tamba moYisewe, ntani morwasinke natu u takamesera?

¹² Mugara gonondunge Saromo kwa tjenge asi: “O takamese asi ngapi omu no gazara; ukaro woge yigazo yoge yiyo ayi u pangere.” (Yisewe 4:23) “Ukaro” ou vana tamba apa kuna kara omu Karunga a tu tara, kapisi ngwendi moomu ava tu mono vantu. Mokugwederera ko, mokuliza noukaro wetu, Karunga nga tokora asi nsene tuna wapere ngatu ka gwane mwenyo gwanarunye ndi hawe. Ayo ya zera nawa-nawa. Hena eparu lyetu lya hamena mo. Joba gomulimburukwi kwa tulire po etumbwidiro lyomugano nomeho gendi asi yipo a dire kutara mukadi nokumuhora. (Joba 31:1) Ee, sihonena musi sosiwa kwetu! Mokulifana, muepisarome nage kwa kanderere asi: “Nyokesa nge kokupakera mbili eyi ya hana edumba.”—Episarome 119:37.

13. Yilye ga kere Dina, ntani morwasinke ehoroworo lyendi lyovakaume lya kerere lyougova?

¹³ Ngomu twa yi mwene mEgaununo 3, vakaume vetu kuvhura kutukundama momuwa ndi momudona. (Yisewe 13:20; resa 1 Vakolinte 15:33.) Tarurura kosihonena saDina, muna gesimbi Jakopo. Nampili ngomu ga gwene edeuro lyewa kutunda unona wendi, Dina kwa tulire po ukaume kumwe novakadona woVakanani. Ngwendi Vamowaba, Vakanani nawo kwa divikwire moyirugana yokunyata. (Levitikus 18:6-25) Kovagara woVakanani, kukwatera mo Sikemu ogu ‘ga fumanene mepata’ lyoguhwe, Dina kwa monekere asi ureru kumugombeka mokuligwanekera nendi panyama.—Genesis 34:18, 19.

14. Ngapi omu ehoroworo lyaDina lyovakaume ya twaredesere koudigu?

 ¹⁴ Apa Dina ga mwene Sikemu kapi nampo ga kere negano lyomaligwanekero panyama. Nye, Sikemu ga rugene eyi ngava rugana Vakanani wovanzi nsene edowo lyokuligwanekera panyama lya pinduka. Nampili ngomu ga kambadarere Dina kunyoka moruhura, Sikemu “ta mu kwatere mononkondo, ta mu rara.” Ayo kwa moneka asi konyima Sikemu “ga here” Dina, nye eyi kapi ya gusire po udona ou ga mu rugene. (Resa Genesis 34:1-4.) Ntani Dina kapisi yige gelike ga heperere yitundwamo yoyirugana yendi. Ehoroworo lyendi lyovakaume kwa retesere po yihorokwa eyi ya reterere eswau kepata lyawo nalinye.—Genesis 34:7, 25-31; Vagarata 6:7, 8.

15, 16. Ngapi omu natu vhura kugwana unongo wousili? (Tara hena kakende “ Matjangwa gokuvhura kuteda ko.”)

¹⁵ Nsene Dina kwa lirongere sirongwa somulyo, age kwa si lirongere monkedi zondigu. Owo va hara nokumulimburukwa Jehova kapi va hepa kulironga yirongwa monkedi  zondigu. Morwa awo kupurakena kwaKarunga, awo kuhorowora ‘mokukara ukwawo novanongo.’ (Yisewe 13:20a) Awo kuyadiva “eyi va hepa kurugana” ntani nokunyokera po maudigu ga hana hepero.—Yisewe 2:6-9; Episarome 1:1-3.

¹⁶ Unongo waKarunga kuvhura kuugwana ava va u tokomena nokuparuka kuliza netokomeno lyawo pokukovekeda mekanderero ntani nokulironga Nonkango daKarunga nkenye  apa noyimbapiratjangwa eyi a gava mukareli gokulimburukwa gonondunge. (Mateusa 24:45; Jakopo 1:5) Elinunupiko, eli ali moneka meharo lyetu lyokutambura mapukururo gomoMatjangwa, nalyo mulyo. (2 Vahompa 22:18, 19) Pasihonena, Mukriste kuvhura a tambure mpango ezi asi mutjima kwa kara noyimpempa ntani kwa vera. (Jeremiya 17:9) Nye apa a rugana epuko age kulinunupika nokutambura mapukururo gomawa ntani nevatero ndi?

17. Singonona sihorokwa esi nasi vhura kuwiza po mepata, ntani likida omu guhya na vhura kuteda namunwendi.

¹⁷ Gazadara ko kosihorokwa esi. Guhya kapi ana kupulisira munwendi gomukadona va ze velike namumati gwendi. Mukadona ta pura oguhwe asi: “Tate kapi mwa huguvara nge ndi? Kapi natu ka rugana yoyidona!” Mukadona kuvhura a kare neharo lyokuhara Jehova nokukara nomagano gomawa, nye age kuna ‘kukwama unongo waKarunga’ ndi? Age kuna ‘kunyoka ruhonda’ ndi? Ndi age kuna ‘kukwama magazaro gamwene’? (Yisewe 28:26, hetakanesa NW.) Nampo kuvhura o gazadare ko nompango dokugwederera ko edi nadi vhura kuvatera guhya namunwendi mokuteda ko koyuma eyi.—Tara Yisewe 22:3; Mateusa 6:13; 26:41.

18, 19. Eheteko musinke ga ligwanekerere nalyo Josefa, ntani ngapi omu ga likohwenene po?

¹⁸ Josefa, mumbyagona gwaDina, kwa kere mudinkantu ogu ga here Jehova ntani ga nyokerere ruhonda. (Genesis 30:20-24) Josefa ga mwene yitundwamo yougova wamukurwendi Dina. Yininke eyi ntani neharo lyaJosefa mokukara meharo lyaKarunga, kwa mu vaterere konyima apa ga ya kere moEgipite ntani mukadahekurwendi nga mu kondjesa “nkenye ezuva” va lirare. Josefa mupika ga kere, kapi ga vhulire kusiga yirugana yendi. Age ga hepere kukara nonondunge ntani nouradi. Eyi yiyo ga rugene pokunyokera MukadaPotifara nkenye apa, ntani moruhura ta ya mu duka.—Resa Genesis 39:7-12.

 ¹⁹ Gazadara ko tupu: Ngano Josefa ga yikire yigazo yokurara vakadi ndi mukadi gwina, ngano ga vhulire kukara mulimburukwi ndi? Hawe. Mevango lyokugazara yininke yoyidona, Josefa kwa tere elikwatakano lyendi naJehova asi sininke somulyo unene, eyi ya lilikidire mononkango dendi edi ga tanterere mukadaPotifara. Age kwa tente asi: ‘Hekurwange neisi ga silika ntudi nyovelike, morwa ove mukadendi. Ngapi omu nani rugana-rugana udona wa hura opo, ni zone kwaKarunga gwange!’—Genesis 39:8, 9.

20. Ngapi omu ga gendesere Jehova sihorokwa esi saJosefa?

²⁰ Gazadara ko koruhafo oru ga lizuvhire Jehova apa ga mwene ulimburukwi waJosefa wankenye ezuva, namplili ngomu ga kere ure nepata lyawo. (Yisewe 27:11) Konyima, Jehova kwa yi gendesere yipo va mangurure Josefa ntani nokumutura a kare mupangeli nomugendesi gonondya moEgipite! (Genesis 41:39-49) Ee, omu tupu da sikilira mo nonkango demEpisarome 97:10: “HOMPA kwa hara ava va nyenga udona; age kupopera nomwenyo dovantu vendi, age kuvayoworora mo mononkondo dovadinikarunga.”

21. Ngapi omu munazinyetu gomugara mosirongo simwe somoAfrika ga likidire uradi mokukuhuka pamukaro?

²¹ Mokulifana nanaina, sinzi sovakareli vaKarunga kulikida asi awo ‘va nyenga eyi ya yipa, nokuhara yoyiwa.’ (Amosa 5:15) Munazinyetu gomugara mosirongo simwe somoAfrika  kwa simwitilire asi mukadona gokosure kwa mu hundilire nononkondo asi nsene na mu vatera mekonakono lyoyivaruro, age ngano na mu futa pokuligwanekera kumwe panyama. Munazinyetu ta tanta asi: “Ame na nyokere poopo. Pokukara noulimburukwi, ya ninkisa nge ni kare nomfumwa ntani ni lifumadeke nyamwange, yininke eyi ya pitakana ngorodo nosisiliveli.” Yimo, nonzo ‘kuhafesa karuwogona’ nye ruhafo rwangoso narunye kureta kukora kokunene. (Vahebeli 11:25) Mokugwedererera ko, ayo mulyo musesu pokuyihetakanesa noruhafo rwanarunye oru aru tundu mokulimburukwa kwaJehova.—Yisewe 10:22.

22, 23. (a) Nsene Mukriste a tura nzo zonene, morwasinke na dilira kugazara asi kapi tava mu dongwenene po? (b) Evatero musinke lya kara po komuntu ogu ana tura nzo?

²² Morwa kapi twa sikilira mo, ose natuvenye kukondja mokupangera madowo gopanyama ntani nomokurugana eyi ya hungama kosipara saKarunga. (Varoma 7:21-25) Jehova ga yi diva ntani “kudiworoka asi ose mbundu zevhu.” (Episarome 103:14) Nye, poyiruwo yimwe, Mukriste kuvhura a ture nzo zonene. Ngoso kuna kutanta nye asi kapi tava mu dongwenene po ndi? Hawe, ogu ana tura nzo kuvhura a ligwanekere noyitundwamo yoyidona yonzo zendi, ngamoomu ya horokerere hompa Ndafita. Nampili ngoso, Karunga narunye ‘kudongonona po nonzo’ dowo ava livere ntani ava ‘ava tongonona’ nonzo dawo.—Episarome 86:5; Jakopo 5:16; resa Yisewe 28:13.

²³ Mokugwederera ko, Karunga kwa gava “mauhwi” mombungakriste, kutanta asi vatareli ava va kura pampepo owo va wapera ntani va kara neharo lyokuvatera. (Vaefeso 4:8, 12; Jakopo 5:14, 15) Sitambo sovakuronambunga kuna kara mokuvatera munanzo mokuwapukurura elikwatakano lyendi naJehova, ‘nokukara munongo’ yipo a dire kurugwira nonzo dendi ngomu ga yi tente Saromo.—Yisewe 15:32.

24, 25. (a) Ngapi omu mumati ogu va singonona moYisewe 7:6-23 ga likidire asi age kwa kere ‘mugova’? (b) Ngapi omu natu vhura ‘kukara tu vanongo’?

²⁴ Bibeli kwa uyunga kuhamena vantu ‘wovagova’ ntani nava ‘wovanongo.’ (Yisewe 7:7) Morwa kudira kukura pampepo ntani kudira ediwo moyirugana yaKarunga, muntu “gomugova” kuvhura a dire kukara nounongo ntani nonondunge. Ngwendi mumati ogu va simwitira moYisewe 7:6-23, muntu gwangoso usimbu kutura nonzo dononene. Nye “munongo” kukonakona muntu gomonda kupitira melirongo lyoNonkango daKarunga nomokukanderera nkenye apa. Nampili ngomu ga dira kusikilira mo, age kukondja mokurundurura magazaro nomalizuvho noyitambo yendi neyi ga hara kuliza neyi ga hara Karunga. Omu mwangesi age kuna ‘kulihara nyamwendi,’ ntani ‘nga ragopa.’—Yisewe 19:8.

²⁵ Lipura nyamoge asi: ‘Ame na yi kwatesa ko asi nompango daKarunga uhunga ndi? Ame na yi pura nawa-nawa asi kukwama nompango edi kureta ruhafo rorunene ndi?’ (Episarome 19:7-10; Jesaya 48:17, 18) Nsene o kara nomasinganyeko gongandi, hetekera kugagusa po. Teda ko koyitundwamo yokuncenuna noveta daKarunga. Mokugwederera ko, ‘heteka o tare asi HOMPA ngapi omu ga wapa,’ pokuparuka kuliza nousili ntani nokuzwida nondunge doge nomagazaro gomawa, yininke yosili youhunga ya kuhuka neyi ya wapa. (Episarome 34:8; Vafilipi 4:8, 9) Ngomu no ka rugana ngoso nelituromo, yimo hena ngo kura mokuhara Karunga nokuhara eyi ga hara ntani nokunyenga eyi ga nyenga. Josefa kapi ga sikililire mo. Nye nampili ngoso, age ya mu vhulikilire ‘mokunyoka ruhonda’ morwa ga pulisilire Jehova mokumuhonga monomvhura dononzi, yipo a kare neharo lyokuhafesa Karunga. Ngano nove o fane ngwendi Josefa.—Jesaya 64:8.

26. Sirongwa musinke somulyo ngava ka zogera momagaununo gavali gokukwama ko?

 ²⁶ Musiti gwetu kwa tu unga nomaruha aga gonomuga, kapisi ngoyidaneso, nye gokuvhura kutuninkisa tu livhare ntani nokuhafera malikwatakano mononkwara. (Yisewe 5:18) Omu a tara Karunga nonkwara ngava ka yi zogera momagaununo gavali gana kukwama ko.