1, 2. Wolye ayi retere ruhafo yilika yekuho?

NSENE ove kwa karera Jehova nomvhura dononzi, ove sili wa zuvha rorunzi yiuyungwa yokuhamena ekuho koyigongi yoNombangi daJehova. Yi kare asi rungapi wa kara po poyilika yangoso, ove kukuguma komutjima nkenye apa o mono owo vana hingire koyipundi yokomeho kuna kusikama va ligave vene kekuho. Posiruwo oso vakalimo kuhafa unene nokusakerera nomukumo. Nampo mahodi kuzura momeho goge apa o mono mbunga zompe zina horowora mokukwatesa ko Jehova. Ee, ruhafo musi atu lizuvhu poyiruwo yangoso!

² Siruwo esi atu mono makuho yikando yongandi tupu momvhura, vaengeli awo kumona makuho gomanzi. Gazara tupu ‘koruhafo meguru’ apa ava mono mayovi govantu mouzuni naunye kuna kugagwederera kombunga zaJehova nkenye sivike. (Rukasa 15:7, 10) Vaengeli kuhafa unene pokumona eligwederero eli!—Hagayi 2:7.

3. Morwasinke a gendagwire Satana “ngwendi nyime gokununga,” ntani yinke ana hara kurugana?

³ Mokulisiga, pwa kara yisitwa yopampepo eyi ayi tarere makuho nehandu. Satana nonompepo dendi donondona kuvanyegenyesa pokumona mayovi govantu kuna kunyokera uzuni ou wonkoha-konhi. Morwa Satana kwa likangangere asi kwato muntu gokukarera Jehova kutundilira  meharo ntani asi kwato ogu nga kara noulimburukwi momaheteko gomanene. (Resa Joba 2:4, 5.) Nkenye apa muntu a ligava mwene kwaJehova, Satana kumulikida asi age munayimpempa. Kumoneka ngwendi Satana kuguva yikando mayovi nkenye sivike. Age yiyo a ‘gendagura ngwendi nyime gokununga, a papare ogu na lipapagwira.’ (1 Peturusa 5:8) “Nyime” ogu kuna hara kutupapagura pampepo, kutuninkisa tu zonagwise po elikwatakano lyetu naKarunga.—Episarome 7:1, 2; 2 Timoteusa 3:12.

4, 5. (a) Mononkedi musinke mbali domulyo omu ga kondera Jehova nonkondo daSatana? (b) Ehuguvaro musinke nava kara nalyo Vakriste wousili?

⁴ Nampili tu ligwanekere nonkore ezi zonene, kwato hepero tu kare nowoma. Morwasinke? Morwa Jehova kwa kondera  nonkondo ‘danyime gokununga’ ogu mononkedi mbali domulyo. Nonkedi musinke odo? Zopomuhowo, Jehova kwa pumbire asi “emukurumbunga” lyoVakriste wousili ngali paruka “momahepeko gomanene.” (Ehororo 7:9, 14) Mauporofete gaKarunga narunye kusika mo. Yipo nye, nampili Satana ga diva asi kapi nga vhura kukwata vantu navenye vaKarunga.

⁵ Zauvali kwa moneka kousili ou ga uyungire muntu gwanare gwaKarunga gomulimburukwi. Muporofete Asaliya kwa tanterere hompa Asa asi: “HOMPA ta kara noge sinene o kara ove nove nendi.” (2 Histoli 15:2; resa 1 Vakolinte 10:13.) Yihonena yoyinzi eyi va tjanga kwa likida asi pwanare, Satana ya mu sumpilire mokupapagura nkenye mukareli gwaKarunga ogu ga kere pepi naKarunga. (Vahebeli 11:4-40) Naina, Mukriste ogu a kara pepi naKarunga nga vhura kunyokera nokufunda Muzonaguli. Nonkango daKarunga kutuhuguvaresa asi: ‘Nyokereni Muzonaguli, makura age ta mu suwurukwa.’—Jakopo 4:7.

6. Ngapi omu a rwanesa Satana nkenye Mukriste?

⁶ Satana nokuvhura si kufunda yita, nye age kuvhura kutufunda pwanyoselike nsene tu hageka kukara tuna vangarara. Satana ga diva asi age kuvhura kutupapagura nsene age kuvhura kuzonagwisa po elikwatakano lyetu naJehova. Ngapi omu a heteke Satana mokumutompoka eyi? Pokutuhomona momunene, pwanyoselike ntani nomakoto goumbudi. Tu zeni tu konakone nongendeseso edi dononene daSatana.

7. Morwasinke ana kuhomokera Satana unene vantu vaJehova?

⁷ Mahomokero gomanene. Mupositoli Johanesa kwa tente asi: “Uzuni mudima kwa kara mepangero lyoMuzonaguli.” (1 Johanesa 5:19) Nonkango odo kwa kara nerondoro koVakriste navenye wousili. Mokumona asi Satana nare  ga papagura uzuni naunye woudona wovantu, age ngesi kuvhura a demenene ntani nokunenepeka mahomono gendi kowo va mu henduka, vantu vaJehova. (Mika 4:1; Johanesa 15:19; Ehororo 12:12, 17) Age kwa kara nehandu lyenene morwa age ga diva asi siruwo sendi sisupi. Yipo nye age kwa nenepeka mahomokero gendi. Naina, ose kuna kuligwanekera nomahomokero gendi gonyanya gokuzonagura po elikwatakano lyetu naKarunga.

8. Yisinke ga tembe mupositoli Paurusa apa ga uyungire asi ose ‘kurwanesa’ nompepo donondona?

⁸ Erwo lyopanyoselike. Mupositoli Paurusa kwa rondwere Vakriste vakwawo asi: ‘Kapisi vantu atu rwanesa, nompepo donondona dekeguru-guru.’ (Vaefeso 6:12) Nkango zoRugereka va toroka “kurwana” kuna tamba apa vantu ava lindundanesa. Pokuruganesa nkango ozo, Paurusa kwa didilikire asi nkenye gumwe gwetu kurwa ndi kukondja nonompepo donondona. Yi kare asi ose kwa tunga mosirongo omu epuliro lyonompepo donondona kwa vhuka ndi hawe, twa hepa kudiworoka asi apa twa ligeve nyamwetu kwaJehova, ose twa litulire nyamwetu merwano. Yiyo yooyo Paurusa ga tere hepero zokutumangeda Vakriste womoEfeso va “sikame ndjikiti,” ‘nokukara vana liwapaike,’ mokurwanesa nompepo donondona—Vaefeso 6:11, 13, 14.

9. (a) Morwasinke Satana nonompepo dendi donondona ava ruganesere “makoto goumbudi” gokulisiga-siga? (b) Morwasinke a hetekere Satana kupukisa magano getu, ntani ngapi omu natu vhura kunyokera po makondjeso gendi? (Tara kakende “ Takamesa yineya yasatana!”) (c) Ekoto musinke lyoumbudi tuna kukakonakona ngesi?

⁹ Makoto goumbudi. Paurusa kwa tumangedere Vakriste va sikame ndjikiti mokurwanesa ‘makoto gaSatana goumbudi.’ (Vaefeso 6:11) Koneka asi Paurusa kwa ruganesere nkango zopayinzi. Nompepo donondona kuruganesa makoto goumbudi gomanzi. Moomu sina kupita siruwo, Vakriste vamwe owo va vhulire kufunda po eheteko limwe va ya ligeve apa va ligwanekerere neheteko lyapeke. Muzonaguli ntani nonompepo donondona kunomena nawa-nawa nonkareso  dankenye gumwe gwetu yipo va mone apa twa pilira nonkondo. Awo makura kuruganesa maupiranonkondo getu va zonagure po elikwatakano lyetu naKarunga. Nampili ngoso, ose kuvhura kunongonona nongendeseso dononzi doMuzonaguli, morwa ado kwa di singonona moBibeli. (2 Vakolinte 2:11) Mobuke ezi, twa zogera nongendeseso odo dimwe ngwendi siraha semona, vakaume wovadona ntani ruhonda. Tu zeni tu konakone hena ekoto lyoumbudi limwe hena lyaSatana, umpure.

10. (a) Yisinke umpure? (b) Ngapi omu a tara Jehova umpure, ntani ngapi omu o u tara?

¹⁰ Pokurugana umpure, muntu kuna kuruganena kumwe nonompepo donondona. Mazanekedo nourodi nomafeno ntani nokupura movadimu kuna kara marupe goumpure. Ngamoomu twa yi diva, Jehova kutara umpure asi “yininke yoyidona.” (Deuteronomium 18:10-12; Ehororo 21:8) Mokumona asi nose twa hepa ‘kunyenga udona,’ ayo kapi ya wapa kwetu mokulikwatakana kumwe nonompepo donondona. (Varoma 12:9) Aso sili kuna kara sirugana sokugombeka Guhyetu gemeguru, Jehova.

11. Morwasinke nali karera efundo lyenene kwaSatana nsene a tu zeda tu lihameke moumpure? Yi fanekesa.

¹¹ Nampili ngoso, morwa kulihameka moumpure kuna kara sininke sosidona kwaJehova, yiyo Satana ga tokomena mokuninka vamwe vetu va hamene mo. Nkenye apa a zeda Mukriste mokulihameka monompepo donondona, Satana kugwana efundo lyenene. Morwasinke? Gazadara kosifanekeso esi: Nsene mukwayita va mu zeda a sige nokugombeka mbunga zawo zovakwayita a ka hame kwezi zononkore dawo, mupitisili gononkore dawo ta hafa. Age kuvhura a gendagwise muheti ogu mokuswaura mupitisili gwendi gwanare. Mokulifana, nsene Mukriste a lihameka moumpure, age kuna kunyoka Jehova mowina ntani nokulitura mwene  mepangero lyaSatana. Gazara tupu omu Satana na hafa nsene a ruganesa muheti gwangoso mokuswaura Jehova. Ose tuna hara nye kupa Muzonaguli efundo lyenene lyangoso ndi? Hawe! Ose kapisi vaheti.

12. Ngendeseso musinke a ruganesa Satana mokupukisa mutaro gwetu goumpure?

¹² Moomu tuna kunyokera umpure, Satana kapi ngayi mu tompoka mokutuninka tu u ruganese. Nye age ga diva asi ga hepa kurundurura magazaro getu. Ngapi omu a yi rugana? Age kupapara nonzira mokupiyaganesa Vakriste dogoro vamwe va ka gazare “udona asi uwa nouwa asi udona.” (Jesaya 5:20) Mokuyirugana oyo, Satana kuruganesa ngendeseso zendi zimwe zanare, mapuro gokuretesa po masinganyeko.

13. Ngapi omu ga ruganesa Satana ngendeseso zomapuro gokuretesa po masinganyeko?

¹³ Koneka omu ga ruganesere Satana ngendeseso ozo pwanare. MoEdeni ga pulire Eva asi: ‘Enye sili Karunga ga mu tantera asi walye omu li yiyimwa yokoyitji eyi ya kara mosikunino ndi?’ Mosiruwo saJoba, apa vaengeli va pongere meguru, Satana kwa pulire asi: ‘Joba nye kwa hara kukukerera ga hana kukara noyuma?’ Apa Jesus ga tamekere nosirugana sendi sokuzuvhisa pevhu, Satana kwa homokerere Kristusa pokutanta asi: ‘Nsenesi o MunwaKarunga, ninka mamanya aga, ga lisitunuke nomboroto no.’ Mosihorokwa saJesus, Satana kwa swawire Jehova mokuruganesa nonkango edi ga uyungire Jehova mwene nare asi: “Ogu yige Munwange ogu na hara, ga za nge komutjima.”—Genesis 3:1; Joba 1:9; Mateusa 3:17; 4:3.

14. (a) Ngapi a ruganesa Satana makoto gendi mokuretesa po masinganyeko kuhamena umpure? (b) Yisinke tuna kukakonakona ngesi?

¹⁴ Naina, Muzonaguli kuna kuruganesa ngendeseso zokulifana mokuheteka kutura po masinganyeko kuhamena  udona woumpure. Eguwo, age ya mu tompoka mokutura masinganyeko momagano govapuli vamwe. Awo va tameka mokusinganyeka nsene asi marupe gamwe goumpure yosili madona. (2 Vakolinte 11:3) Ngapi omu natu vhura kuvatera vantu vangoso mokuwapukurura magano gawo? Ngapi omu natu vhura kudivilisa asi makoto gaSatana ga ha tu pukisa? Mokulimburura mapuro ogo, tu zeni tu konakone maruha gavali meparu aga ga nyatekesa Satana noumpure. Ago kuna kara yilihafeso nouhaku.

15. (a) Moyirongo yimwe, ngapi omu ava tara sinzi sawo umpure? (b) Ngapi Vakriste vamwe lya va pukisa egano lyouzuni kuhamena umpure?

¹⁵ Moyirongo yimwe urodi nounganga ntani nomarupe gamwe goumpure kuyitara asi kwato siponga. Kotivi nomonovidiyo nomonodividi nomonobuke ntani nokomaudano gokompiuta kulikida yirugana yonompepo donondona asi yiwawa ntani kwato siponga. Yosili, nompepo donondona da yi tompoka mokuhoreka siponga soumpure. Nkareso ezi zokutara asi umpure kwato siponga za kundama Vakriste ndi? Ya kundama magazaro gavamwe. Monkedi musinke? Mokugava sihonena, apa Mukriste gumwe ga mene kutara elikwamo eli lya likidire youmpure, age kwa tente asi: “Ame kwa tere elikwamo, nye kapi na lihamekere moumpure.” Morwasinke kugazara ngoso ya karera siponga?

16. Morwasinke ya karera nosiponga mokuhorowora yilihafeso eyi ayi likida umpure?

¹⁶ Nampili ngomu pwa kara elisigo lyenene pokatji kokulihameka moumpure ntani nokuutarera, kapi ayi tanta asi mokutarera yininke youmpure kwato siponga. Morwasinke? Koneka eyi asi: Nonkango daKarunga kwa likida asi Satana nonompepo dendi donondona kapi  da kara nevhuliko lyokudiva magazaro getu. * Yipo nye, ngamoomu vana yi tumbura nare, mokudiva magazaro nomaupirankondo getu gopampepo, ntudi da hepa kunomena nawa-nawa yirugana yetu, ano eyi kwa kwatera mo mahoroworo getu goyilihafeso. Apa a likida Mukriste asi age kuhafera kutara malikwamo ndi kuresa nobuke kuhamena younganga ndi yomafeno ndi yirugana yonompepo donondona, age kuna kugava mbudi konompepo donondona. Age kuna kuvadivisa upirankondo wendi! Makura nompepo donondona kuvhura di nenepeke erwaneso lyado nogo Mukriste yipo va pukise upirankondo wendi ou ana horora dogoro va mu funde. Vamwe ava va pindwire eharo lyawo lyoumpure kupitira moyilihafeso, moruhura va ya lihameka moumpure.—Resa Vagarata 6:7.

17. Kupitira mekoto lyoumbudi musinke na vhura Satana kupukisa owo vana kuvera?

¹⁷ Satana kapi tupu a hetekere ko kupikisa madowo getu koyilihafeso nye hena hepero zetu zouhaku. Ngapi omu a yi rugana? Mukriste kuvhura a roroke kuza kosipangero ndi kovandokotora, nye awo nokuvhura si kumuhakura. (Marukusa 5:25, 26) Ayo kuvhura kugava mpito kwaSatana nonompepo dendi donondona mokumupukisa. Nompepo donondona kuvhura di heteke muveli a kare nosinka sosinene souvera wendi ntani a tokore mokuza kononganga ndi kuruganesa uhaku ou wa likwatakana ‘noumpure.’ (Levitikus 19:26) Nsene ekoto olyo lyoumbudi lyonompepo donondona li tompoka, kuvhura li zonagwise po elikwatakano lyomuveli naKarunga. Monkedi musinke?

18. Nongendeseso musinke douhaku ga hepa kunyokera Mukriste, ntani morwasinke?

 ¹⁸ Jehova kurondora ava wokuteza po veta zendi asi: “Nsene kapi o limburukwa koVeta, Karunga nga tara makanderero goge noutondwe mokugapurakena.” (Yisewe 28: 9) Ose tuna hara kunyokera po nkenye eyi nayi lilimba nomakanderero getu ntani eyi nayi hagekesa po evatero eli atu gwana kwaJehova, unene po nsene mouvera tuna kara. (Episarome 41:3) Nsene nongendeseso dimwe douhaku kwa hamena mo umpure, Mukriste gousili ga hepa kudinyokera. * (Mateusa 6:13) Monkedi zangoso, age kuvhura kukara nehuguvaro mokugwana evatero lyaJehova.—Tara kakende “ Ou sili umpure ndi?”

19. (a) Yisinke ga kumbagera Muzonaguli wovanzi va pure kuhamena nonkondo dendi? (b) Masimwititi musinke va hepa kunyokera Vakriste wousili?

¹⁹ Moyirongo yimwe, sinzi sovantu kutara nonkondo daSatana asi kwato siponga, ano momaruha gamwe gomouzuni kuyitara mwapeke. Moyirongo oyo Muzonaguli ga kumbagera vantu wovanzi va pure asi age kwa kara nononkondo dononene unene. Vantu vamwe  kuparuka nokulya nokurugana nokurara moutjirwe wonompepo donondona. Masimwititi kuhamena yirugana yononkondo yonompepo donondona kuna vhuka. Masimwititi gangoso vantu kugahafera mokugasimwitira nokugapurakena. Nose kuvhura tu lihameke mokuhanesa masimwititi gangoso ndi? Hawe, vakareli vaKarunga gosili kunyokera kuyirugana morwa nokonda mbali domulyo.

20. Ngapi omu muntu, nampo ga hana kuyidivira, na hanesa yimpempa yaSatana?

²⁰ Konda zokuhova, pokusimwitira masimwitili kuhamena eyi da tompora nompepo donondona, muntu gwangoso kuna kukwatesa ko Satana mekondjo lyendi. Monkedi musinke? Nonkango daKarunga da yi kwatesa ko asi Satana kuvhura kurugana yirugana yononkondo nye ado kurondora hena asi age kuruganesa ‘yidiviso yoyimpempa’ ntani ‘egombeko.’ (2 Vatesaronika 2:9, 10) Mokumona asi Satana mukumbageli gomunene, age ga diva omu na pukisa magano  gowo va hara umpure ntani nokuvaninkisa va pure moyininke ya hana asi usili. Vantu vangoso kuvhura va pure sili asi awo va mwene ndi va zuvhire yininke yimwe ntani awo kuvhura kusimwitira yilimonena yawo asi usili. Mwa za siruwo, masimwitili gawo kuyagatamununa pokuyagasimwitirura. Nsene Mukriste a hanesa masimwititi gangoso, age kuna kulikwatakana kumwe noMuzonaguli ‘guhya yimpempa.’ Age ngano ta hanesa yimpempa yaSatana.—Johanesa 8:44; 2 Timoteusa 2:16.

21. Koyininke musinke tuna hara kundemenena nonzogera detu?

²¹ Konda zauvali, nampili ngomu asi Mukriste nare ga ligwanekerere nonompepo donondona, age ga hepa kunyokera kusimwitirura vapuli vakwawo yininke yangoso. Morwasinke? Kuna kututumangeda: ‘Tu nwike meho getu kwaJesus, yeeyi epuro kwa litameka nendi, age hena ga li sikisilira mo.’ (Vahebeli 12:2) Yimo, ose twa hepa kunwika magano getu kwaKristusa, kapisi kwaSatana. Apa ga kere Jesus pevhu, kapi ga simwitilire varongwa vendi masimwititi gokuhamena nompepo donondona, nampili ngomu ga vhulire kuuyunga yoyinzi kuhamena eyi a vhuru kurugana Satana. Mevango lyoyo, Jesus kwa demenene kombudi zoUhompa. Yipo nye, mokuhonena Jesus novapositoli, twa hara kudemenena nonzogera detu ‘koyirugana yoyinene yaKarunga!’—Yirugana 2:11; Rukasa 8:1; Varoma 1:11, 12.

22. Ngapi omu natu twikira kugwederera ‘koruhafo meguru’?

²² Yosili, Satana kuruganesa makoto goumbudi gokulisiga-siga, kukwatera mo umpure, mokuhetekera kuzonagwisa po elikwatakano lyetu naJehova. Nampili ngoso, pokunyenga yoyidona ntani nokukwaterera kweyi yoyiwa, ose kapi ngatu pa Muzonaguli mpito zokuzonagwisa etokomeno lyetu lyokunyokera po umpure momarupe nagenye. (Resa Vaefeso 4:27.) Gazara tupu ‘koruhafo’ rorunene oru ngaru kara meguru nsene tu twikira ‘kukondjesa makoto goumbudi goMuzonaguli,’ dogoro nga tunde po!—Rukasa 15:7; Vaefeso 6:11.