1. Yisinke ga nkondopekere Jesus momasiku gendi gokuhulilira apa pevhu ngomuntu?

MASIKU gendi gokuhulilira apa pevhu ngomuntu, Jesus kwa likidire sinka sosinene soukalinawa wokomeho wovasikuli vendi. Age kwa yi tulire mekanderero lyendi, pokuuyunga naGuhwe asi: “Kapi na kukanderera asi o va guse mo mouzuni, nye asi o va kunge koMudona. Awo kapisi wouzuni, moomu na dira kukara ame gouzuni.” (Johanesa 17:15, 16) Mekanderero lyendi eli, Jesus kwa likidire eharo lyendi lyenene kovasikuli vendi ntani nomulyo gononkango dendi edi ga uyungire muhowo kwawo masiku gena asi: ‘Kapi mwa hamena kouzuni.’ (Johanesa 15:19) Yosili, ayo kwa kere nomulyo gomunene kwaJesus asi vasikuli vendi va liguse ko kouzuni!

2. Yisinke ‘uzuni’ ou ga tembe Jesus?

² ‘Uzuni’ ou ga tumbwire Jesus kwa tamba kovantu ava va ligusa kwaKarunga, nokukara moupika wompepo zelinenepeko zokulihafesa nyamwawo ezi azi tundu komupangeli gwawo Satana. (Johanesa 14:30; Vaefeso 2:2; 1 Johanesa 5:19) Yosili, “ukwawo nouzuni unkore naKarunga.” (Jakopo 4:4) Navenye ava va hara kukara meharo lyaKarunga, ngapi omu nava kara mouzuni nye va vhure kuligusa ko? Tatu ka tarurura nonkedi ntano: mokukara noulimburukwi koUhompa waKarunga mepitisiro lyaKristusa ntani nokupira kukara mbinga momaupolitika gouzuni, mokunyokera mpepo zouzuni ou, mokukara nondwareso nomaliwapaiko gomawa,  mokukara nokurerupika eparu lyetu ntani mokudwara yirwiso yetu yopampepo.

3. (a) Ngapi omu ga tere Jesus upolitika momazuva gendi? (b) Morwasinke natu uyungira asi vasikuli vaJesus wovagwaveka kwa kara ngwendi vakarelipo? (Kuna kwaterere mo nondanda dokonhi.)

³ Mevango lyokulihameka moupolitika momazuva gendi, Jesus, Hompa goUhompa waKarunga, kwa demenenene kokuzuvhisa kuhamena epangero lina lyemeguru. (Ndaniyera 7:13, 14; Rukasa 4:43; 17:20, 21) Yipo nye, komeho zahompa gwaRoma Pontius Piratusa, Jesus ga tente asi: “Uhompa wange kapisi wouzuni ou.” (Johanesa 18:36) Vasikuli vendi wovalimburukwi kutemwinina sihonena sendi pokulikida ulimburukwi wawo kwaKristusa nokoUhompa wendi ntani nokudivisa Uhompa owo kouzuni. (Mateusa 24:14) Paurusa kwa tjenge asi: ‘Ose nyose vakarelipo vaKristusa. Ngovakarelipo vaKristusa tatu mu kanderere asi: sigeni a mu kwatakanese naKarunga.’ *—2 Vakolinte 5:20, hetakanesa NW.

4. Ngapi omu nava likida Vakriste navenye wousili ulimburukwi koUhompa waKarunga? (Tara kakende “ Vakriste vanare kapi va lihamekere moupolitika.”)

⁴ Mokumona asi vakarelipo kukarera po tupu sirongo sawo mosirongo sapeke, makura awo kapi ava lihameke moyinka yomoyirongo omu vana kukaruganena. Ya lifana novasikuli vaKristusa wovagwavekwa, awo “vanaUntungi weguru.” (Vafilipi 3:20) Morwa kuzuvhisa kwawo Uhompa noupampi, awo kwa vatera mamiliyona ‘gononzwi dapeke’ daKristusa ‘mokuvakwatakanesa naKarunga.’ (Johanesa 10:16;  Mateusa 25:31-40) Nonzwi edi dapeke nado kukwatesa ko vamumbya vaJesus wovagwavekwa. Ngosiunda sokulipakerera mokukwatesa ko Uhompa woUmesiyasa, nombunga edi nadinye kapi adi lihameke moyinka youpolitika wouzuni.—Resa Jesaya 2:2-4.

5. Ngapi omu za lisiga mbungakriste zantani nezi zoVaisraeli vanare, ntani monkedi musinke Vakriste ava likida elisigo eli?

 ⁵ Kugusa ko kulimburukwa kwaKristusa, pwa kara konda zimwe hena eyi Vakriste wousili ava dili kukara mbinga. Posiruwo soVaisraeli vanare, Karunga kwa pere vakareli vendi sirongo simwe tupu, nye Vakriste wousili vanaina kwa tundilira konomuhoko nadinye mouzuni mudima. (Mateusa 28:19; 1 Peturusa 2:9) Yipo nye, nsene tu hama kwankenye mbunga politika, umanguruki wetu wokuuyunga kuhamena mbudi zoUhompa ntani nouumwe wetu wopaSikriste ngau kara mosiponga. (1 Vakolinte 1:10) Nsene ngapa kara yita, ngano ngatu lirwanesa novapuli vakwetu, ava ngano twa hepa kuhara. (Johanesa 13:34, 35; 1 Johanesa 3:10-12) Nokonda zomulyo, Jesus ga tanterere varongwa vendi va dire kuruganesa rufuro. Ntani age ga va tanterere mokuhara nonkore dawo.—Mateusa 5:44; 26:52; tara kakende “ Ame kwato mbinga ndi?”

6. Ngapi omu ali kundama eligawo lyoge kwaKarunga elikwatakano lyoge kumwe nahompa?

⁶ NgoVakriste wousili, ose twa ligava kwaKarunga, kapisi kwankenye muntu ndi kombunga ndi komuhoko. Mo-1 Vakolinte 6:19, 20 kwa tanta asi: “One hena kapi mwa liweka nyamweni? One kwa mu randa ndiro.” Yipo nye, posiruwo sokufutira “hompa” eyi ya mu tumbukira pokumufumadeka nokufuta mutero nokulimburukwa konoveta dendi edi adi dili kulirwanesa naKarunga, vasikuli vaJesus kufutira “Karunga yeeyi ya tumbukira Karunga.” (Marukusa 12:17; Varoma 13:1-7) Eyi kwa kwatera mo ukareli wawo neharo lyawo lyomutjima nagunye ntani noulimburukwi wawo. Nsene hepero, awo va liwapaikira nare mokugava eparu lyawo kwaKarunga.—Rukasa 4:8; 10:27; resa Yirugana 5:29; Varoma 14:8.

7, 8. Yisinke “mpepo zouzuni,” ntani ngapi omu azi ‘rugana’ movantu ava ava dili kulimburukwa?

⁷ Nkedi zimwe hena omu Vakriste va ligusa ko kouzuni ou kuna kara mokunyokera po mpepo zouzuni zondona.  Paurusa kwa tjenge asi: “Ose kapi va tu pa mpepo zouzuni, kwa tu pa Mpepo zokutunda mwaKarunga.” (1 Vakolinte 2:12) KoVaefeso, age kwa tente asi: ‘One ngomu kwama uzuni. Ngomu pura yomupangeli gonompepo dononkondo mompepo. Age yige mpepo ezi zina kurugana ntaantani movantu ava ava dili kulimburukwa kwaKarunga.’—Vaefeso 2:2, 3.

⁸ “Mpepo” zouzuni yizo nonkondo da ha moneka edi adi tumangeda vantu va dire kulimburukwa kwaKarunga nokukwama “edowo lyorutu nedowo lyomeho.” (1 Johanesa 2:16; 1 Timoteusa 6:9, 10) Mpepo ezi kwa kara ‘nononkondo’ mokukorangeda madowo gononzo, ntani azo kwa fana ngwendi mpepo ezi za tu kundurukida azo hena udigu kuzidimburura. Azo “kurugana” hena momuntu mokutunga kanunu-kanunu yikara yoyidona mwendi, ngwendi kuligazara tupu pwamwene nokulinenepeka nokudowokera emona ntani nonkareso zoumanguruki nokurwanesa. * Monkango zimwe, mpepo zouzuni kutulisa po yikara yoMuzonaguli yi kure monomutjima dovantu.—Johanesa 8:44; Yirugana 13:10; 1 Johanesa 3:8, 10.

9. Monkedi musinke nazi vhura mpepo zouzuni kukura momagano nomonomutjima detu?

⁹ Kuvhura mpepo zouzuni zi kure momagano nomomutjima goge ndi? Nhi, nye nsene tupu o zi pulisira zi pangere yigazo yoge. (Resa Yisewe 4:23.) Wa hana kuyidimburura, azo kuvhura kukupukisa mononkedi dongandi, nampo kupitira melikwatakano nava ava moneka ngwendi vantu wovawa, nye awo kapi va kara neharo lyaJehova. (Yisewe 13:20; 1 Vakolinte 15:33) Mpepo ozo zondona kuvhura zi ku hwilire kupitira moyimbapiratjangwa noyilihafeso yokunyata nomarongo goyimpempa, nomomafano goruhonda, nomokompiuta nomokulihameka unene momaudano gomarumbasano, yimo kupitira mwankenye gumwe ndi mwankenye eyi ayi korangeda magano gaSatana ndi gouzuni wendi.

10. Ngapi omu natu vhura kunyokera po mpepo zouzuni?

 ¹⁰ Ngapi omu natu vhura kunyokera po mpepo zondona zouzuni nokukara meharo lyaKarunga? Kupitira tupu mokulihameka mo nomutjima nagunye momawapaiko gaJehova gopampepo ntani nomokukanderera nkenye apa kompepo zendi zokupongoka. Jehova munene, ga pitakana Muzonaguli ndi uzuni woudona ou wa kara mepangero lyaSatana. (1 Johanesa 4:4) Ee, omu tupu ya kara nomulyo yokuhedera pepi Jehova mekanderero!

11. Ngapi omu mpepo zouzuni zina zonagura nkareso zondwareso?

¹¹ Ndwareso nomaliwapaiko noukuhuki ayo kulikida asi mpepo musinke ga kara nazo muntu. Morwa ndwareso kuna kudonapa unene moyirongo yoyinzi, mupitisili gelikwamo lyokotivi kwa tente asi ntaantani kapi ngatu vhura kudimburura yikumbu. Nampili vanonagona wovakadona nawo kuna gwire monkareso ezi. Saitunga zimwe kwa tanta asi: “Awo kuna kudwara yokumonekesa rutu.” Ano vamwe kuna kudwara umbondo nokulindjambaika, eyi ayi likida mpepo zourwanesi nokudira efumadeko.

12, 13. Nompango musinke nadi vhura kupangera ndwareso nomaliwapaiko getu?

¹² Ngovakareli vaJehova, ose twa hara kumoneka nawa kupitira mondwareso zokuzera zongwa zokuhafesa, ntani zokuwapera silika. Poyiruwo nayinye, emoneko lyetu li lize ‘nonkareso zongwa,’ kumwe ‘noyirugana yoyiwa’ zi wapere nkenye ogu, a kare asi mugara ndi mukadi ogu a “gava undipo asi kwa tjira Karunga.” Nampili ngoso, sinka setu sosinene kuna kara ‘mokukara kwetu meharo lyaKarunga’ kapisi sokuliretera nyamwetu mfumwa. (1 Timoteusa 2:9, 10; Juda 21) Yimo, tuna hara maliwapaiko getu gomawa unene ga kare “gomuntu gomonda. . . . Yigo ga fumana po kosipara saKarunga.”—1 Peturusa 3:3, 4.

¹³ Diworoka asi monkedi omu atu dwara nomu atu liwapaike kuvhura kukundama omu nava tara wopeke ukareli wousili. Nkango zoRugereka va toroka “nkareso zongwa” kutanta asi kulikida efumadeko komalizuvho ndi komagano gava wopeke. Sitambo setu sa hepa kukara nye asi tu tare ezwi lyokomutjima lyava wopeke asi kwa kara nomulyo kupitakana magano getu. Mwanayinye, ose tuna hara kugava efumadeko kwaJehova nokovantu vendi nomokumoneka asi tu vakereli vaKarunga, nomokurugana nayinye “mokufumadekesa ko Karunga.”—1 Vakolinte 4:9; 10:31; 2 Vakolinte 6:3, 4; 7:1.

14. Kombinga zemoneko noukuhuki wetu, mapuro musinke twa hepa kulipura nyamwetu?

 ¹⁴ Ndwareso nomaliwapaiko noukuhuki wetu kuna kara nomulyo unene nsene tatu lihameke moyirugana yomomapya ndi mokukara komapongo goSikriste. Lipura nyamoge asi: ‘Emoneko lyange kuninkisa vantu va tarurure nge ndi alyo kuswaukisa vapeke? Ame kugazara tupu asi magano gange kuhamena ndwareso nomaliwapaiko kwa kara nomulyo kupitakana kugwana yitumbukira yopampepo mombungakriste ndi?—Episarome 68:6; Vafilipi 4:5; 1 Peturusa 5:6.

15. Morwasinke da dira kutura po Nonkango daKarunga elikwamo lyonoveta kuhamena ndwareso nomaliwapaiko noukuhuki wetu?

¹⁵ Bibeli kapi za tura po elikwamo lyonoveta koVakriste kuhamena ndwareso nomaliwapaiko noukuhuki. Jehova kapi ga kara neharo lyokutunyokesa umanguruki wetu mokuhorowora ndi kuruganesa evhuliko lyomagazaro getu. Mokulisiga, age kwa tu harera tu kure pampepo nokuteda nompango doBibeli tu kare “wonondunge va yika kuhangura uwa koudona.” (Vahebeli 5:14) Mwanayinye, age kuna tu harere li tu pangere eharo lyokuhara Karunga novakwetu. (Resa Marukusa 12:30, 31.) Nsene tu kwama nompango edi, ose kuvhura simpe kuhorowora ndwareso nomaliwapaiko aga ga zira mo.  Ose kuvhura kuyimona asi eyi usili, morwa nkenye oku ava pongere vantu woruhafo vaJehova mouzuni mudima, awo kudwara nawa.

16. Ngapi omu azi lirwanesa mpepo zouzuni nomarongo gaJesus, ntani mapuro musinke twa hepa kulipura nyamwetu?

¹⁶ Mpepo zouzuni kuna kupukisa mamiliyona govantu mokuhuguvara yimaliwa noyiweka mokugwana ruhafo. Nye, Jesus kwa tente asi: “Mwenyo gomuntu kapi agu paruka kemona lyendi, mpili li kare lyenzi unene.” (Rukasa 12:15) Jesus kapi ga uyungire asi twa ha kara noyininke, nye age kwa rongere asi eparu noruhafo rosili kuwiza kowo ava “nongonona yihepwa yawo yopampepo” ntani nowo ava rerupike eparu lyawo mokudemenena kelikwatakano lyawo naKarunga. (Mateusa 5:3, NW; 6:22) Lipura nyamoge asi: ‘Ame  na pura nawa-nawa eyi ga rongere Jesus ndi ame kupukisa nge “guhya goyimpempa”? (Johanesa 8:44) Yinke adi likida nonkango dange noyitambo yange neyi ani tura muhowo meparu ntani mparukiso zange?’—Rukasa 6:45; 21:34-36; 2 Johanesa 6.

17. Tumbura ko mauwa gamwe aga ava hafere ava ava rerupike eparu lyawo.

¹⁷ Jesus kwa uyungire asi: “Ukonentu waKarunga kumoneka moyirugana yawo asi awo kwa hungama.” (Mateusa 11:19) Tarurura mauwa gamwe aga ava hafere ava ava rerupike eparu lyawo. Awo kugwana rufuwo rousili mosirugana soUhompa. (Mateusa 11:29, 30) Awo kunyokera yinka ya hana hepero ntani nokukandana po kukora kopanandunge nopamalizuvho. (Resa 1 Timoteusa 6:9, 10.) Morwa ya va gwanena po eyi va kara nayo, awo kwa kara nosiruwo sosinzi sokukara nomapata gawo noVakriste vakwawo. Ngoyitundwamo, awo kurara pokoso. (Muudisi 5:12) Awo kulimonena ruhafo rorunene rokutundu mokugava paapa va vhulira. (Yirugana 20:35) Ntani awo ‘ehuguvaro lyawo kusikilira mo’ nokukara nombili zomomutjima noruhafo. (Varoma 15:13; Mateusa 6:31, 32) Matungiko ogo kwa kara nomulyo gwene-gwene!

18. Ngapi omu za singonona Bibeli nkore zetu nonongendeseso dendi ntani ‘nerwano’ lyetu?

¹⁸ Ava ava kara meharo lyaKarunga kwa va popera pampepo kwaSatana, ogu ana hara kuzonagwisa Vakriste mokudira kugwana ruhafo nomwenyo gwanarunye. (1 Peturusa 5:8) Paurusa kwa uyungire asi: “Kapisi vantu atu rwanesa, nani nye mapangero gonompepo atu rwanesa novanankondo novapangeli wouzuni ou womundema, nonompepo donondona dekeguru-guru.” (Vaefeso 6:12) Nkango zoRugereka va toroka ‘kurwana’ kuna tamba apa vantu ava lindundanesa. Mokugwederera ko, nonkango edi “mapangero,” “novanankondo,” ntani “novapangeli wouzuni” kulikida asi mahomokero gokutunda konompepo donondona kwa ga wapaika.

19. Singonona yirwiso yoVakriste yopampepo.

 ¹⁹ Nampili momaunkundi getu, ose kuvhura kugwana efundo. Ngapi? Pokudwara “yirwiso nayinye yaKarunga.” (Vaefeso 6:13) Pokusingonona yirwiso eyi, tatu resa moVaefeso 6:14-18 asi: “Kareni nye muna liwapaike. Usili u kare liva romonombunda deni, ano uhungami yiwo sikoverero sosivera pononturo deni. Ano maliwapaikiro gokuudisa Mbudi zoNgwa zombili ga kare nonkaku dokonompadi deni. Unene po damuneni silikandwiso sepuro sokudimisisa yikutji yomundiro, eyi a ponyesa Mudona. Tambureni uhwi weparu u kare ekoli lyeni, ano nonkango daKarunga edi azi mu pe Mpepo, di kare rufuro rweni. Omu kanderere nkenye apa oku tomu hundire ekwafo kwaKarunga. Omu kanderere omu azi mu pitisire Mpepo.”

20. Ngapi omu mukaro gwetu gwa lisiga nogu govakwayita womouzuni?

²⁰ Mokumona asi alyo kuna kara ewapaiko lyaKarunga, yirwiso yopampepo ngayi tu popera, nsene tu yi dwara yiruwo nayinye. Vakwayita womouzuni kapi ava kara moyita nkenye apa, nye Vakriste va hepa kutwikira kurwa mokupopera eparu lyawo ano yita eyi kapi ngayi haga dogoro Karunga nga zonagure po uzuni waSatana nokutura nompepo donondona nadinye monomango. (Ehororo 12:17; 20:1-3) Yipo nye asi ya ha ku dwapesa nsene ove kuna kukondja nomadowo gepuko, morwa natuvenye twa hepa ‘kuliyomberesa’ nyamwetu yipo tu kare ngorooro noulimburukwi kwaJehova. (1 Vakolinte 9:27) Yosili, twa hepa kukara nosinka nsene kapi tuna kurwana.

21. Ngapi omu natu vhura kufunda moyita yetu yopampepo?

²¹ Mokugwederera ko, ose kapi tatu vhuru kufunda erwano eli mononkondo danyamwetu. Yipo nye, Paurusa ga tu diworokesa hepero zokukanderera kwaJehova ‘nkenye apa moMpepo.’ Twa hepa hena kupurakena  kwaJehova pokulironga Nonkango dendi ntani nokulikwatakana novakwayita vakwetetu wopampepo pwankenye mpito, morwa kapisi nyoselike tuna kara merwano eli! (Firemoni 2; Vahebeli 10:24, 25) Ava va kara noulimburukwi momaruha nagenye kapi tupu ngava funda, nye hena ngava kara nononkondo dokupopera epuro lyawo apa ngava ligwanekera nomarwaneso.

22, 23. (a) Morwasinke natu karera tuna liwapaikire poyiruwo nayinye mokupopera epuro lyetu, ntani mapuro musinke twa hepa kulipura nyamwetu? (b) Sirongwa musinke natu ka tarurura megaununo lyokukwama ko?

²² Jesus kwa tente asi: ‘Kapi mwa hamena kouzuni, yipo nye wa mu nyengera uzuni opo.’ (Johanesa 15:19) Yipo nye asi Vakriste va hepa kuliwapaikira mokupopera epuro lyawo ntani nokuyirugana nefumadeko nombili. (Resa 1 Peturusa 3:15.) Lipura nyamoge asi: ‘Ame na yi kwata egano eyi Nombangi daJehova adi dilire pamwe kukwatesa ko magano aga va tambura mouzuni ndi? Apa ani tokora mokurwanesa magano aga ga hwa mouzuni, ame kudivilisa nawa-nawa asi eyi azi uyunga Bibeli nomukareli gokulimburukwa kuna kara uhunga ndi? (Mateusa 24:45; Johanesa 17:17) Apa ani rugana eyi ya hungama kosipara saJehova, ame kapi ani liwapaikire tupu mokukara nelisigo kouzuni nye hena kuhafa mokulisiga nawo ndi?’—Episarome 34:2; Mateusa 10:32, 33.

²³ Nye, twa hana kuyidimburura, eharo lyetu lyokuligusa ko kouzuni kuvhura kuliheteka mononkedi dokulikarera. Pasihonena, ngomu vana yi tumbura nare, Muzonaguli kuhetekera kukokera vakareli vaJehova mouzuni kupitira moyilihafeso youzuni. Ngapi omu natu vhura kuhorowora yilihafeso yoyiwa eyi nayi tu pa rufuwo nezwi lyewa lyokomutjima? Sirongwa esi tatu ka si tarurura megaununo lyokukwama ko.