1, 2. Kupi natu vhura kugwana epopero?

GAZARA asi ove kuna kugenda ako kuna kara ekundungu lyenene. Maremo taga tameke kusovagana nomaruvadi taga vema. Makura mvhura tazi tameke kuroka unene. To duka o papare uvando. Ngapi omu no lizuvha apa no gwana evango lyokuvanda?

² Ose kuna kuparuka moukaro wokulifana. Uzuni una donapa unene. Kuvhura o lipure asi: ‘Kupi nani gwana epopero?’ Mutjangi gEpisarome kwa uyungire asi: “Kuvhura ni tantere HOMPA asi: ‘Ove mugameni gwange nomupopeli gwange! Ove Karunga gwange, nyove na huguvara.’” (Episarome 91:2) Jehova kuvhura a tu popere komaudigu getu, ntani age kutupa ehuguvaro lyomeho zongwa.

3. Yisinke twa hepa kurugana yipo Jehova a tu vatere?

³ Ngapi omu Jehova na vhura kutupopera? Age kuvhura kutuvatera tu lididimikire maudigu getu morwa age munankondo unene kupitakana nkenye ogu na hara kutukoresa. Nampili yoyidona yi tu horokere ngesi, Jehova age nga ka gusa po udona owo komeho. Bibeli kutukorangeda asi: “Omu kare meharo lyaKarunga.” (Juda 21) Twa hepa kukara pepi naJehova yipo a tu vatere moyiruwo yomaudigu. Ngapi natu vhura kuyirugana?

4, 5. Ngapi omu Jehova ga likida asi ga tu hara?

⁴ Mokukara pepi naJehova, twa hepa kunongonona  omu ga tu hara. Gazadara ko kweyi ga tu ruganena. Age kwa tu pa evhu, eli lya kara noyikorama noyitji yokulisiga-siga. Ga tu pa hena nondya donongwa nomema gomawa gokunwa. Kupitira moBibeli, Jehova ga tu ronga edina lyendi noyikara yendi yoyiwa. Age ga tu likidire eharo lyendi lyenene pokutuma Munwendi Jesus ogu ga hara pevhu, a ya tu fire. (Johanesa 3:16) Morwa Jesus ga tu fira, ose kuna kundindira meho zongwa.

⁵ Jehova ga tura po Uhompa woUmesiyasa, epangero lyemeguru eli ngali ya gusa po ruhepo. Uhompa owo ngau ya ninka evhu li kare paradisa, omu vantu ngava tunga mombili nomoruhafo rwanarunye. (Episarome 37:29) Jehova ga tu likida hena eharo pokuturonga omu natu paruka yipo tu hafe ngesi. Age hena ana hara tu kanderere kwendi ntani ga liwapaikira kuzuvha makanderero getu. Jehova ga yi likida omu ga tu hara natuvenye.

6. Ngapi omu no yi likida asi wa tambura eharo lyaJehova?

⁶ Ngapi omu no yi likida asi wa tambura eharo lyaJehova? Likida rupandu kwanayinye eyi ga ku ruganena. Sinzi sovantu kapi va kara norupandu. Jesus ga yi mwene oyo apa ga kere pevhu. Sikando simwe age kwa verwire vanayingondwe murongo, nye gumwe tupu ga mu pandwire. (Rukasa 17:12-17) Tu honeneni mugara gwina ga pandwire Jesus. Nose twa hepa kupandura Jehova nkenye apa.

7. Monkedi musinke natu hara Jehova?

⁷ Twa hepa hena kulikida eharo lyetu kwaJehova. Jesus kwa tanterere varongwa vendi asi va hepa kuhara Jehova nomutjima nomwenyo nonondunge  dawo nadinye. (Resa Mateusa 22:37.) Yisinke ayi tanta oyo?

8, 9. Ngapi natu likida Jehova asi twa mu hara?

⁸ Ayo ya gwanena po tupu kuuyunga asi twa hara Jehova ndi? Hawe. Nsene twa hara Jehova nomutjima nomwenyo nonondunge detu nadinye, ngatu yi likida moyirugana yetu. (Mateusa 7:16-20) Bibeli kuturonga asi nsene twa hara Karunga, ngatu limburukwa yipango yendi. Udigu kuyirugana ndi? Hawe, morwa “yipango yendi, kapi ya paka udigu.”—Resa 1 Johanesa 5:3.

⁹ Nsene tu limburukwa Jehova, ngatu gwana ruhafo meparu. (Jesaya 48:17, 18) Nye yisinke nayi tu vatera tu kare pepi naJehova? Tu zeni tu ka yi konakone.

10. Morwasinke no twikilira kulironga kuhamena Jehova?

¹⁰ Ngapi omu wa tamekere kutura po ukaume naJehova? Kupitira mokulironga Bibeli, wa ya diva nawa Jehova nokutura po ukaume nendi. Ukaume ou kuna kara ngwendi mundiro ogu ono hara gu twikire kutwera. Ngwendi moomu mundiro gwa hepa yitare, wa hepa kutwikira kulironga kuhamena Jehova yipo ukaume weni u nkondopare.—Yisewe 2:1-5.

11. Yisinke ngayi horoka nsene o twikira kulironga Bibeli?

¹¹ Ngamoomu ono kutwikira kulironga Bibeli, ngo ya lironga yininke eyi ngayi ku guma komutjima. Koneka omu varongwa vavali vaJesus va lizuvhire apa ga va fatwilire mauporofete gomoBibeli. Awo kwa tente asi: “Ngapi tupu omu kadi hwama nomutjima detu apa ka uyunga nose monzira, a tu fwatwire matjangwa?”—Rukasa 24:32.

12, 13. (a) Yisinke nayi vhura kuhorokera eharo lyetu lyokuhara Karunga? (b) Ngapi natu vhura kunkondopeka eharo lyetu lyokuhara Jehova?

 ¹² Ngamoomu tupu da hweme nomutjima dovarongwa apa va kwete egano Matjangwa, nampo nove yimo wa lizuvhire apa wa tamekere kukwata egano Bibeli. Ayo ya ku vatera o dive Jehova nokumuhara. Wa ha pulisira eharo olyo li tende.—Mateusa 24:12.

¹³ Nsene ono kara kaume kaKarunga, wa hepa kurugana unene o nkondopeke ukaume weni. Wa hepa kutwikira kulironga kuhamena Jehova naJesus nokuteda ko kweyi ono kulironga nokugazadara ko omu no yi tura pasirugana. (Johanesa 17:3) Nsene to resa ndi to lirongo Bibeli, lipura asi: ‘Yisinke yina kuronga nge eyi kuhamena Jehova Karunga? Morwasinke nani mu harera nomutjima nomwenyo gwange nagunye?’—1 Timoteusa 4:15.

14. Ngapi omu kukanderera aku nkondopeke eharo lyetu lyokuhara Jehova?

 ¹⁴ Nsene wa kara nakaume gomunene, ove kuuyunga nendi nkenye apa ntani ayo kunkondopeka ukaume weni. Mokulifana, kuuyunga naJehova nkenye apa mekanderero kunkondopeka eharo lyetu kwendi. (Resa 1 Vatesaronika 5:17.) Ekanderero kuna kara uhwi wouwa wokutunda kwaGuhyetu gemeguru. Twa hepa kuuyunga nendi nkenye apa kutundilira komutjima. (Episarome 62:8) Kapisi tu rugurure makanderero getu. Nsene tu twikira kulironga Bibeli nokukanderera kutundilira komutjima, eharo lyetu lyokuhara Jehova ngali nkondopara.

15, 16. Ngapi no tara sirugana sokuzuvhisa?

¹⁵ Nsene tuna hara kukara pepi naJehova, twa hepa kutantera ko vakwetetu eyi twa pura. Azo mfumwa zonene kutantera ko wopeke kuhamena Jehova. Ntani aso situmbukira ga gava Jesus koVakriste navenye wousili. Nkenye gumwe gwetu ga hepa kuzuvhisa mbudi zongwa zoUhompa waKarunga. Wa tameka kuzuvhisa ndi?—Mateusa 24:14; 28:19, 20.

¹⁶ Sirugana sokuzuvhisa kwa kere nomulyo komupositoli Paurusa, age kwa si tumbwire asi “ugawo.” (2 Vakolinte 4:7) Kutantera ko wopeke kuhamena Jehova nositambo sendi kuna kara sirugana somulyo po. Yizo nkedi no vhura kukarera Jehova ntani eyi o mu ruganene mulyo kwendi. (Vahebeli 6:10) Kuzuvhisa ngaku ku retera uwa kumwe nava vana kukupurakena morwa ngo vatera wopeke nanyaamoge mu hedere pepi naJehova nokukagwana mwenyo gwanarunye.  (Resa 1 Vakolinte 15:58.) Kwato sirugana sapeke esi nasi ku retera ruhafo rorunene!

17. Morwasinke twa hepera kukovekeda kuzuvhisa?

¹⁷ Sirugana sokuzuvhisa kuna kara mulyo unene. Twa hepa ‘kuudisa nonkango’ ntani tu “kovekede” kuyirugana. (2 Timoteusa 4:2) Vantu va hepa kuzuvha kuhamena Uhompa waKarunga. Bibeli kutanta asi: “Ezuva lyaHOMPA lyenene pepi lina kara, pepi-pepi kuna kugenderera kuwiza!” Uhura kapi ngau ‘liranga.’ (Sefaniya 1:14; Habakuku 2:3) Jehova ntaantani nga ya zonagure po uzuni woudona waSatana. Komeho nga ka yi rugane, twa hepa kurondora vantu yipo va tokore nsene vana hara kukarera Jehova.

18. Morwasinke natu karera Jehova kumwe noVakriste wousili?

¹⁸ Jehova ana hara tu mu karere kumwe noVakriste wousili. Bibeli kutanta asi: “Atu likoraike-koraikeni mokulihara-hara nomokurugana yirugana yoyiwa. Twa ha zumbeni yigongi yomombungakriste zetu, moomu va yi yika vamwe, nye atu likorangedeni, unene pokumona asi ezuva lyaHompa tali hedere pepi.” (Vahebeli 10:24, 25) Twa hepa kurugana paapa twa hulira tu ze komapongo nagenye. Mapongo kutupa mpito tu ka likorangede-korangede.

19. Yisinke ngayi tu vatera tu hare vapuli vakwetetu?

¹⁹ Nsene o za komapongo, ngo ka gwana vakaume wovawa ava ngava ku vatera o karere Jehova. Ngo ka gwana ko vamwe ava vana kurugana paapa va hulira mokumukarera. Nawo kapi va sikilira mo ngwendi nyove ntani awo kurugana mapuko. Nsene vana ku zonene, va dongwenena po. (Resa Vakorosi 3:13.) Demenena koyikara yawo yoyiwa, nsene ngo yi rugana nga yi ku vatera o va hare ntani o hedere pepi naJehova.

20, 21. Yisinke “mwenyo gwanarunye gosili”?

²⁰ Jehova kuna hara vakaume vendi navenye ngava ka gwane nomwenyo gosili. Bibeli kuturonga asi komeho mwenyo ndi eparu ngali ka lisiga neli tuna kara nalyo ngesi.

²¹ Komeho, ngatu ka paruka narunye, kapisi nomvhura 70 ndi 80 tupu. Ngatu ka hafera “mwenyo gwanarunye” noukanguki wouwa nombili noruhafo moparadisa. Bibeli kutumbura eparu olyo asi “mwenyo gwanarunye gosili.” Jehova nga ka tu pa mwenyo gosili nye twa hepa kurugana ko yuma yipo tu ka gu “gwane.”—1 Timoteusa 6:12, 19.

22. (a) Yisinke twa hepa kurugana yipo tu ka ‘gwane mwenyo gwanarunye gosili’? (b) Kuvhura tu ruganene mwenyo gwanarunye ndi?

²² Yisinke twa hepa kurugana yipo tu ka ‘gwane mwenyo gwanarunye gosili’? Twa hepa ‘kurugana yoyiwa’ ntani tu “gawope moyirugana yoyiwa.” (1 Timoteusa 6:18) Eyi kutanta asi twa hepa kusikisa mo eyi tuna kulironga moBibeli. Nye, mwenyo gosili kapi gwa korera moyirugana yetu. Kapi tatu vhuru kuruganena mwenyo gwanarunye. Awo kuna kara uhwi ou nga pa Jehova vakareli vendi wovalimburukwi morwa ‘nkenda zendi.’ (Varoma 5:15) Guhyetu gemeguru ana hara kugava uhwi owo kovakareli vendi wovalimburukwi.

23. Morwasinke no tulira po matokoro gomawa ngesi?

²³ Lipura asi: ‘Ame kuna kukarera Karunga monkedi ezi a tambura ndi?’ Nsene o mona asi ono hepa kutura po marunduruko, rugana ko yuma ngesi. Nsene tu huguvara mwaJehova nokumulimburukwa, age nga tu gamena. Age nga gamena vantu vendi wovalimburukwi momazuva aga gomadona gouzuni waSatana.  Makura ngatu vhure kukaparuka narunye moParadisa, ngamoomu ga yi tu tumbwidira Jehova. Nsene o tura po ngesi matokoro gomawa, ngo ka gwana mwenyo gwanarunye gosili!