1. Kwalye lya tunda eparu?

JEHOVA “Karunga gomwenyo.” (Jeremiya 10:10) Age Musiti gwetu yige ga tu pa eparu. Bibeli kutanta asi: “Nyove wa sita nayinye, ano mpango zoge yizo za pakesa po nayinye, yi pwe kusita.” (Ehororo 4:11) Jehova kwa tu harera tu paruke, morwa eparu ndi mwenyo kwendi ya tunda.—Resa Episarome 36:9.

2. Yisinke natu rugana yipo yi tu tompoke meparu?

² Jehova kutupa nondya nomema yipo tu paruke. (Yirugana 17:28) Age ana hara hena tu hafere eparu. (Yirugana 14:15-17) Mokututompoka meparu, twa hepa kulimburukwa konoveta daKarunga.—Jesaya 48:17, 18.

3. Yisinke Jehova ga rugene apa Kaini ga dipagere Abeli?

³ Bibeli kuturonga asi eparu lyetu neli lyovakwetetu mulyo kwaJehova. Pasihonena, apa Kaini ga handukilire mumbyendi Abeli, Jehova kwa mu rondwere a pangere ehandu lyendi. Nye Kaini kapi ga purakenene, age kwa handukire unene ta “mbindumukire mumbyendi, ta mu dipaga.” (Genesis 4:3-8) Jehova kwa futisire Kaini morwa ga dipagere Abeli. (Genesis 4:9-11) Ehandu nonyengo yidona morwa kuvhura kutuninkisa tu kare nonyanya. Muntu gwangoso kapi nga gwana mwenyo gwanarunye. (Resa 1 Johanesa 3:15.)  Mokuhafesa Jehova, twa hepa kuhara vantu navenye.—1 Johanesa 3:11, 12.

4. Yisinke asi tu rongo simwe soyipango eyi Karunga ga geve koVaisraeli?

⁴ Konyima zonomvhura mayovi, Jehova kwa likidire asi eparu mulyo kwendi apa ga pere Mosesa Yipango Murongo. Simwe soyipango kuna kara asi: “Walye o dipaga.” (Deuteronomium 5:17) Nsene muntu a dipaga mukwawo mowina nage va hepere kumudipaga.

5. Ngapi Jehova a lizuvhu kuhamena kuligusa ezimo?

⁵ Ngapi a lizuvhu Karunga kuhamena kuligusa ezimo? Mukeke ana kara mezimo, eparu lyendi mulyo kwaJehova. MoVeta ezi Jehova ga geve koVaisraeli kwa likidire asi nsene muntu a remeka mukadi gomarutu gavali ano munona a fe, muntu ogo nage va hepere kumudipaga. (Resa Exodus 21:22, 23; Episarome 127:3.) Eyi kuturonga asi epuko kuligusa ezimo.—Tara Mauzera 28.

6, 7. Ngapi natu likida kwaJehova asi eparu mulyo?

⁶ Ngapi natu likida kwaJehova asi eparu lyetu neli lyovakwetetu mulyo? Pokudira kurugana yininke eyi nayi tura eparu lyetu neli lyawo mosiponga. Kapi ngatu koka makanya ndi epangwe, morwa ayo kuvhura kuzonagwisa marutu getu naga govakwetetu.

⁷ Karunga kwa tu pa mwenyo norutu ano twa hepa kuyiruganesa moomu ga yi harera. Twa hepa kupakera sinka marutu getu. Nsene tu dira kuyirugana, tatu nyata kosipara saKarunga. (Varoma 6:19; 12:1; 2 Vakolinte 7:1) Kapi tatu karere Jehova ogu ga tu pa eparu  nsene kapi atu fumadeke eparu. Nampili yi kare udigu kuhageka nonkareso donondona, Jehova nga tu vatera nsene tu litura mo.

8. Yisinke natu rugana yipo tu dire kutura eparu lyetu ndi lyovakwetetu mosiponga?

⁸ Tuna lirongo asi eparu mulyo. Jehova kuna hara tu dire kutura eparu lyetu ndi lyovakwetetu mosiponga. Ose kulikida efumadeko keparu monkedi omu atu singi matuwa ndi yimoto yetu. Ntani ngatu nyokera po maudano gonyanya. Ntani pomambo getu kapi ngapa kara yininke yosiponga yokuremeka vantu. Jehova kwa pangerere Vaisraeli asi: ‘Nsene to tungu nzugo zompe, kara nosinka o kundurukide eguru lyonzugo nomukindiro gekuma. Yimo nye ngoso ngo pira nzo zogu nga liganda ko, a fe.’—Deuteronomium 22:8.

9. Ngapi natu tekura yikorama?

⁹ Omu atu tekura yikorama nayo mulyo kwaJehova. Age kutupulisira tu dipage yikorama tu gwane nondya noyidwara ndi mokulipopera kosiponga. (Genesis 3:21; 9:3; Exodus 21:28) Kapi tatu vhuru kutekura yikorama nonyanya ndi tu yi dipage mawoko-woko.—Yisewe 12:10.

10. Ngapi omu tuna yi diva asi eparu kwa kara mohonde?

¹⁰ Honde kwa pongoka kosipara saJehova morwa eparu kwa kara mohonde. Apa Kaini ga dipagere Abeli, Jehova yipo ga mu tanterere asi: “Honde zamumbyoge kuna kukuga nge mevhu.” (Genesis 4:10) Honde zaAbeli kwa fanekesere eparu lyendi, ano Jehova ga futisire Kaini mokudipaga mumbyendi. Konyima zoRuhanzo  momazuva gaNowa, Jehova ga likidire hena asi eparu kwa kara mohonde. Jehova kwa pulisilire Nowa nepata lyendi mokulya nyama zoyikorama. Age kwa tente asi: “Yikorama nayinye noyimeno yoyitarara kulya tupu, tani yi mu pe yi kare nondya deni.” Nye kosili esi ga va silikire Jehova asi: “Posili sininke simwe sokudira kulya one: azo nyama zina kara nohonde, ntundiliro zomwenyo.”—Genesis 1:29; 9:3, 4.

11. Mpangera musinke ga geve Karunga kovantu vendi?

¹¹ Konyima zonomvhura 800 kutunda pwaNowa, Jehova kwa geve mpangera kovantu vendi asi: “Nsene to li nyama, honde nokuzilya si, yeeyi asi mwenyo kwa kara mohonde . . . Honde zazo zelike ngomu dira kulya, azo ngomu zi tjisire pevhu ngwendi mema.” (Deuteronomium 12:23, 24) Jehova kwa here vantu vendi va tare honde asi za pongoka. Kuvhura va lye nyama nye kapisi honde. Apa ngava dipaga yikorama va gwane mberera, honde ngava zi tjisire pevhu.

12. Ngapi Vakriste ava tara honde?

¹² Konyima zonomfa daJesus, vapositoli novakuronambunga moJerusarema kwa hingilire va tokore noveta edi va pere Vaisraeli edi va hepere kukwama Vakriste. (Resa Yirugana 15:28, 29; 21:25.) Jehova kwa va vaterere va kwate egano asi honde simpe kwa pongokere kwendi, ntani nawo va hepere kuzifumadeka. Vakriste wokuhova kapi ngava li honde ndi va lye nyama ezi zina dili kuzoza nawa honde. Kulya honde kwa kere nzo zonene ngwendi kukarera yikarunga yoyimpempa ndi kuhondera. Kutunda opo, Vakriste wousili kwa nyoka kulya ndi kunwa honde. Ngapi  kuhamena naina? Jehova simpe ana hara tu fumadeke honde.

13. Morwasinke Vakriste ava dilire kuvatura honde?

¹³ Ngoso Vakriste kapi ava va tura honde ndi? Nhi. Jehova kwa tu pangera asi twa ha lya ndi tu nwe honde. Nsene ndokotora a ku tantera asi wa ha nwa marovhu, kuvhura simpe va ga ku vendwe morutu roge ndi? Hawe. Mokulifana, mpangera zokudira kulya ndi kunwa honde kwa tamba asi kapi tava tu tura honde.—Tara Mauzera 29.

14, 15. Morwasinke ya karera mulyo koVakriste va fumadeke eparu ntani va limburukwe Jehova?

¹⁴ Ngapi nsene ndokotora a ku tantera asi to fu nsene kapi nava ku tura honde? Nkenye gumwe gwetu ga hepa kutokora nsene ta limburukwa mpangera zaKarunga kuhamena honde. Vakriste va fumadeka eparu, ntani ose kupapara mauhaku gapeke yipo tu paruke, nye kapi ava tu tura honde.

¹⁵ Ose kukondja kukara tuna kanguka, morwa eparu mulyo kwaKarunga, nye kapi atu tambura honde. Mulyo unene kulimburukwa Jehova mevango lyokuteza po mpango zendi morwa tuna hara kuparuka. Jesus kwa tente asi: “Ogu ga hara kuparura mwenyo gwendi, nga gu zumbanesa; ano ogu a zumbanesere mwenyo gwendi mwarwange, yige nye nga gu gwana.” (Mateusa 16:25) Ose tuna hara kulimburukwa Jehova morwa twa mu hara. Age kwa tu harera uwa ntani ose kutara eparu asi mulyo ntani kwa pongoka kwendi.—Vahebeli 11:6.

16. Morwasinke vakareli vaJehova ava mu limburukwire?

¹⁶ Vakareli vaJehova va tokomena kulimburukwa  mpangera zendi kuhamena honde. Kapi ava zi li ntani kapi ava zi va tura. * Awo kutambura uhaku wapeke yipo va paruke. Awo va yi diva asi Musiti gwawo kwa va harera uwa. Nove wa yi pura oyo ndi?

17. Nkedi musinke ezi Jehova ga pulisilire Vaisraeli va ruganese honde?

¹⁷ MoVeta ezi ga geve kwaMosesa, Jehova kwa tanterere Vaisraeli asi: “Mwenyo gwankenye sinamwenyo kwa kara mohonde, yiyo nye ga pangerere HOMPA asi, honde nazinye va zi tjisire kosizambero, zi guse po nonzo dombunga.” (Levitikus 17:11) Apa ngava zono Vaisraeli, awo ngava hundire Jehova ava dongwenene po pokuzamba sikorama nokuhundira mupristeli a tjisire honde zimwe posizambero pontembeli. Yizo nkedi zelike Jehova ga pulisilire Vaisraeli va ruganese honde.

18. Mpito musinke za tu pa zambo zaJesus?

¹⁸ Apa Jesus ga wizire pevhu, age kwa ya pinganesere po veta zokuzamba yikorama pokugava eparu ndi honde zendi mokudongonona po nonzo. (Mateusa 20:28; Vahebeli 10:1) Eparu lyaJesus kwa kere nomulyo, morwa apa Jehova ga mu vhumbwire keparu lyemeguru, Jehova kwa geve mpito kovantu va paruke narunye.—Johanesa 3:16; Vahebeli 9:11, 12; 1 Peturusa 1:18, 19.

19. Yisinke twa hepa kurugana yipo tu dire “nzo” kovantu?

¹⁹ Tuna hafa kweyi Jehova ga tu pa eparu. Ntani  tuna hara kutantera vantu asi nsene va tura epuro mwaJesus, ngava ka paruka narunye. Ose twa hara vantu, ntani ngatu rugana paapa twa hulira tu va ronge yipo va ka gwane eparu. (Hesekiyeli 3:17-21) Ngwendi mupositoli Paurusa, ose ngatu vhura kutanta asi: “Nsene pweli ogu nga ka zumbana, kapisi nzo zange. Ame nayimwe si eyi na mu hupisira ko, nye na mu zuvhisira mpango nazinye zaKarunga zeparu.” (Yirugana 20:26, 27) Ose kulikida asi twa fumadeka eparu nohonde pokutantera ko vantu kuhamena Jehova nomu a tara eparu.