1, 2. Wolye vamwe va kere vakaume vaJehova?

MUNTU musinke no horowora a kare kaume koge? Googu wa hara ntani omu lizuvhu nage. Ga kara noyikara yoyiwa eyi wa hara.

² Jehova Karunga kuhorowora vantu vamwe va kare vakaume vendi. Pasihonena, Abirahamu kwa kere kaume kaJehova. (Jesaya 41:8; Jakopo 2:23) Jehova kwa here hena Ndafita, age kwa mu tumbwire asi “mugara ga za nge komutjima.” (Yirugana 13:22) Ntani Jehova kwa ‘here’ muporofete Ndaniyera.—Ndaniyera 9:23.

3. Morwasinke Abirahamu naNdafita ntani naNdaniyera va karerere vakaume vaJehova?

³ Morwasinke Abirahamu naNdafita ntani naNdaniyera va karerere vakaume vaJehova? Age kwa tanterere Abirahamu asi: “Ono purakene ezwi lyange.” (Genesis 22:18) Jehova kutura po ukaume nava ava mu limburukwa. Nampili muhoko kuvhura kukara kaume kendi. Age kwa tanterere muhoko goVaisraeli asi: ‘Limburukweni kwange, asi ngani kare Karunga gweni, ano one mu kare vantu vange.’ (Jeremiya 7:23) Nose nsene tuna hara Jehova a kare kaume ketu twa hepa kumulimburukwa.

4, 5. Ngapi Jehova a popere vakaume vendi?

⁴ Bibeli kutanta asi Jehova “kugava nonkondo kwanavenye  ava ava hama kwendi nomutjima nagunye.” (2 Histoli 16:9) MEpisarome 32:8 Jehova kwa tumbwidira vakaume vendi asi: “Ame tani ku rongo nzira ezi no genda; ngani ku pukurura oku tani ku takamesa.”

⁵ Nkore zononkondo ana hara kutukondera mokukara vakaume vaKarunga. Nye Jehova ana hara kutupopera. (Resa Episarome 55:22.) Ngovakaume vaJehova, ose kumukarera nomutjima nagunye nokumulimburukwa nampili momaudigu. Ngwendi Ndafita, ose kwa huguvara asi Jehova nga tu popera. Age kwa tjenge asi Jehova kwa “kara korulyo rwange, neisi hena ngayi nyunganga nge.” (Episarome 16:8; 63:8) Ngapi Satana a tu kondere mokukara vakaume vaJehova?

6. Yisinke Satana ga rundira vantu?

⁶ MEgaununo 11 twa lirongere asi Satana kwa tumbwire Jehova munayimpempa ntani asi mudona morwa kapi ga pulisilire Adamu naEva va tokore vene yoyiwa neyi yoyidona. Buke zaJoba kutanta asi Satana kurundira hena vantu ava vana hara kukara vakaume vaJehova. Age kurundira vantu asi awo kukarera Jehova, kapisi morwa va mu hara, nye morwa kuhara kugwana yuma. Satana kutanta hena asi age kuvhura kugusa nkenye ogu kwaKarunga. Ngesi tatu ka konakona eyi natu lirongera ko kwaJoba, ntani omu ga mu poperere Jehova.

7, 8. (a) Ngapi ga lizuvhire Jehova kuhamena Joba? (b) Yisinke ga tente Satana kuhamena Joba?

⁷ Joba kwa kere mugara gomuwa ogu ga parukire nare nomvhura 3 600 da ka pita. Jehova kwa tente asi  posiruwo oso, kapi pwa kere muntu pevhu ngwendi Joba. Age kwa fumadekere Karunga nokunyenga udona. (Joba 1:8) Joba kwa kere kaume kaJehova.

⁸ Satana kwa rundilire Joba asi kukarera Karunga morwa kugwana yuma. Age kwa tente asi: “Ove kumugamena narunye kumwe nepata lyendi noyiweka yendi. Ove hena kutungika nkenye eyi a rugana, yiyo wa mu pa noyimuna yoyinzi eyi ya zwida sirongo nasinye. Nye nsene omu gusa nkenye aka ga weka, ngano ta teka koge, ove kuna kutara.”—Joba 1:10, 11.

9. Yisinke Jehova ga pulisilire Satana a rugane?

⁹ Satana kwa rundilire Joba asi age kukarera Karunga morwa kumupa yininke. Satana kwa tente hena asi kuvhura a hagekese Joba mokukarera Karunga. Jehova kapi ga pulire eyi ga tente Satana, nye ga mu pulisilire a heteke Joba yipo a likide asi age sili kwa here Karunga.

10. Ngapi Satana ga hetekere Joba, ntani yisinke ga rugene Joba?

¹⁰ Pomuhowo Satana kwa veke ntani kwa dipagere yimuna yaJoba. Makura ta ya dipaga vakareli vaJoba. Joba kwa zumbanesere nayinye. Makura ta ya dipaga vana murongo vaJoba. Nye Joba ga twikilire kulimburukwa Karunga. “Nayinye eyi ya horokere, Joba kapi ga zonene asi a pe Karunga usima.”—Joba 1:12-19, 22.

11. (a) Yisinke hena ga rugene Satana kwaJoba? (b) Nye yisinke ga rugene Joba?

¹¹ Satana kapi ga hagekere. Age kwa tanterere Jehova asi: “Nsene asi o guma rutu rwendi ntaantani, ngano ta teka koge ove kuna kutara.” Makura Satana ta zuguma Joba uvera wokukora unene. (Joba 2:5, 7) Nye Joba simpe ga twikilire kulimburukwa Karunga. Joba kwa tente  asi: “Ame ngani kara ngorooro mokupira unzoni wange dogoro kezuva lyonomfa dange.”—Joba 27:5.

12. Ngapi ga likidire Joba asi Satana munayimpempa?

¹² Joba kapi ga divire asi Satana yige ga retesere po maudigu gendi. Age kwa gazarere asi Jehova yige ga ga retesere po. (Joba 6:4; 16:11-14) Nye nampili ngoso Joba ga twikilire kulimburukwa Karunga. Erundiro lyaSatana asi Joba kukerera Karunga morwa kugwana yuma kapi lya kere usili. Joba kwa kere kaume kaKarunga morwa kwa mu here.

13. Yisinke Jehova ga rugene morwa Joba ga limburukwire?

¹³ Nampili ngomu Joba ga dilire kudiva eyi ya horokere meguru, age ga limburukwire Karunga ntani ga likidire asi Satana munayimpempa. Jehova ga tungikire kaume kendi Joba gomulimburukwi.—Joba 42:12-17.

14, 15. Yisinke ga tente Satana kuhamena vantu navenye?

¹⁴ Kuvhura o lirongere ko kweyi ya horokerere Joba. Satana kuturundira asi ose kukarera Karunga morwa kuhara kugwana yuma. MwaJoba 2:4, Satana kwa tente asi: “Muntu kugava nkenye eyi morwa kuhara a paruke.” Mokuuyunga nonkango odo Satana kwa tembe kovantu navenye. Konyima zapa ga fire Joba, Satana kwa twikilire kuswaura Karunga ntani kurundira vakareli vendi. Pasihonena Yisewe 27:11 kutanta asi: “Munwange kara munongo, makura ame tani hafa. Ame ngani limburura nkenye ogu nga pa nge usima.”

¹⁵ Nsene o tokora kulimburukwa Karunga nokukara kaume kendi, ngo likida asi Satana munayimpempa. Alyo etokoro lyewa, nampili nsene wa hepa kutura po marunduruko gomanene meparu lyoge yipo o  kare kaume kaKarunga. Satana kukurundira asi nsene ngo ligwanekera nomaudigu kapi ngo karera Karunga. Age kutuzeda yipo tu dire kulimburukwa Karunga. Ngapi a yi rugana?

16. (a) Nonkedi musinke a ruganesa Satana mokuhagekesa vantu va dire kukarera Jehova? (b) Ngapi Muzonaguli na hetekera ko kukuhagekesa mokukarera Jehova?

¹⁶ Satana kuruganesa nonkedi dononzi yipo tu teze po ukaume wetu naKarunga. Age kuhomokera “ngwendi nyime gokununga, a papare ogu na lipapagwira.” (1 Peturusa 5:8) Kapisi ngayi ku tetukise nsene vakweni novanekoro ndi vapeke ngava hetekera ko kukuhagekesa mokulironga Bibeli nokurugana yoyiwa. Kuvhura ngo lizuvhe asi kuna kukuhomokera. * (Johanesa 15:19, 20) Satana hena kulipirura a kare “ngwendi muengeli gouzera.” Yipo nye age kuvhura kutugenda yineya yipo tu dire kulimburukwa Jehova. (2 Vakolinte 11:14) Satana kuheteka hena kutuhagekesa mokukarera Jehova pokutuninkisa tu lizuvhe unzoni asi kapi tatu vhuru kukarera Karunga.—Yisewe 24:10.

17. Morwasinke atu limburukwire Jehova?

¹⁷ Apa atu limburukwa Jehova, ose kulikida asi Satana munayimpempa. Yisinke ngayi tu vatera tu mu limburukwe? Bibeli kutanta asi: “O hare HOMPA Karunga goge nomutjima goge nagunye nomwenyo goge nagunye nononkondo doge nadinye.”  (Deuteronomium 6:5) Ose kulimburukwa Jehova morwa twa mu hara. Ngomu eharo lyetu lyokuhara Jehova lina kukura, ngatu hara kurugana nayinye eyi ga tu pura. Mupositoli Johanesa kwa tjenge asi: “Eharo lyetu lyokuhara Karunga lyeli asi, ose atu sikise mo yipango yendi. Ano yipango yendi, kapi ya paka udigu.”—1 Johanesa 5:3.

18, 19. (a) Yininke musinke a tanta Jehova asi yidona? (b) Ngapi twa diva asi Jehova kapi a tu pura tu rugane yininke yokupitakana nonkondo detu?

¹⁸ Yininke musinke a tu tantere Jehova asi yidona? Muna kara yihonena yimwe mokakende: “ Nyoka eyi ga nyenga Jehova.” Nampo no gazara asi yininke eyi kapisi yidona. Nye pokuresa novelise domoBibeli nokugazadara ko, ngo mona mulyo gokulimburukwa noveta daJehova. Nampo no yi dimburura asi wa hepa kutura  po marunduruko meparu lyoge. Nampili yi kare udigu kuyirugana, ngo gwana mbili noruhafo mokukara kaume kaKarunga. (Jesaya 48:17, 18) Ngapi twa diva asi kuvhura tu ture po marunduruko?

¹⁹ Jehova kapi a tu pura tu rugane yininke yokupitakana nonkondo detu. (Deuteronomium 30:11-14) Ngakaume gomuwa, age ga tu diva unene kupitakana omu twa lidiva nyamwetu. Ga diva maupirankondo getu. (Episarome 103:14) Mupositoli Paurusa kwa tu korangeda asi: “Karunga mulimburukwi, age nokumutarerera si asi ga mu gwane maheteko aga ga pitakana nonkondo deni, nye kumwe nomaheteko age kumuwapaikira evega lyokugahenduka, mu vhure kugadiinina po.” (1 Vakolinte 10:13) Twa kara nehuguvaro asi Jehova nga tu pa nonkondo tu rugane youhunga. Age nga tu pa ‘nonkondo dononene’ yipo tu lididimikire  maudigu. (2 Vakolinte 4:7) Konyima zapa ga mwene omu ga mu nkondopekere Jehova, Paurusa kwa tente asi: “Ame kuvhura nayinye nononkondo dogu a pameke nge.”—Vafilipi 4:13.

20. Yikara musinke no honena, ntani morwasinke?

²⁰ Mokukara vakaume vaJehova kapi tupu ya gwanena po kuhageka kurugana yoyidona. (Varoma 12:9) Vakaume vaKarunga kwa hara eyi ga hara. Awo kwa va singonona mEpisarome 15:1-5 (Resa.) Vakaume vaJehova kuhonena yikara yendi ntani kulikida “eharo nehafo nombili nezaverero nounongo nouwa noulimburukwi nougomoki nelipangero.”—Vagarata 5:22, 23.

21. Ngapi no lironga kulikida yikara eyi ga hara Karunga?

²¹ Ngapi no lironga kulikida yikara oyo? Lironga eyi ga hara Jehova pokuresa nokulironga Bibeli nkenye ezuva. (Jesaya 30:20, 21) Nsene ngo yi rugana, eharo lyoge lyokuhara Jehova ngali kura makura ngo hara kumulimburukwa.

22. Yisinke ngo gwana nsene o limburukwa Jehova?

²² Kutura po marunduruko kwa fana ngwendi kuhutura yikoverero yoyikuru-kuru nokudwara yoyipe. Bibeli kutanta asi ‘hutura muntu gomukuru-kuru’ o dware “muntu gomupe.” (Vakorosi 3:9, 10) Nampili yi kare udigu kutura po marunduruko, Jehova ga tumbwidira asi nga ‘futa’ ava ava tura po marunduruko nokumulimburukwa. (Episarome 19:11) Limburukwa Jehova nokulikida asi Satana munayimpempa. Karera Jehova morwa eharo, kapisi morwa mfuto ezi ngo gwana komeho. Nsene ngo yi rugana oyo, ngo kara sili kaume kaKarunga!