1. Yisinke sitambo saKarunga kovantu?

KARUNGA ga kara nositambo sosiwa kovantu. Apa ga sitire vantu wokuhova Adamu naEva, age kwa va tulire mosipata sosiwa. Sitambo sendi kwa kere asi Adamu naEva va rete vana, va ninke evhu nalinye li kare paradisa ntani va takamese yikorama.—Genesis 1:28; 2:8, 9, 15; tara Mauzera 6.

2. (a) Ngapi twa yi diva asi Jehova nga sikisa mo sitambo sendi? (b) Vantu musinke ngava paruka pevhu, ntani siruwo sokuhura kupi?

² Ngatu paruka hena moparadisa ndi? Jehova kwa tanta asi: “Nyame na yi uyunga, nye yiyo kusika mo.” (Jesaya 46:9-11; 55:11) Yimo, Jehova nga sikisa mo eyi ga tumbwidira, kwato eyi ngayi mu kondera. Age kwa tanta asi uzuni “kapi ga u sita u kare ngorooro siporongwa.” (Jesaya 45:18) Jehova kwa hara vantu va kare pevhu. Vantu musinke, ntani siruwo sokuhura kupi? Bibeli kulimburura asi: “Muhungami nga gusa sirongo nga tunge mo narunye-narunye.”—Episarome 37:29; Ehororo 21:3, 4.

3. Morwa vantu kuvera nokufa, epuro musinke natu lipura?

³ Nye ngesi vantu kuvera nokufa. Vamwe kurwana nokulidipaga. Eyi kapi ya liza nositambo saKarunga. Yisinke ya horokere? Bibeli zelike zokugava elimbururo.

4, 5. (a) Yilye ga uyungire naEva kupitira mezoka? (b) Ngapi muntu gomuwa na ya vhura kukara muwidi?

⁴ Bibeli kutanta asi “Muzonaguli ndi Satana” nkore zaKarunga. Satana yige ga uyungire naEva kupitira mezoka. (Ehororo 12:9; Genesis 3:1) Age kwa ninkire ezoka li moneke ngwendi yilyo lina kuuyunga.—Tara Mauzera 7.

⁵ Karunga kwa sitire Satana Muzonaguli ndi? Hawe! Muengeli ogu ga kere meguru apa ga sitire Karunga evhu nokutura po Adamu naEva yige ga donapere nokuyakara Muzonaguli. (Joba 38:4, 7) Ngapi omu ya horokere? Ngwendi moomu muntu gomuwa a donapa nokukara muwidi. Ta tameka kudovaukira yininke yovantu wopeke. Ngomu ana kutwikira kuyigazara, edowo lyendi tali kuru, ano apa na gwana mpito ta vaka. Makura ta kara muwidi.—Resa Jakopo 1:13-15; tara Mauzera 8.

6. Ngapi muengeli gumwe ga ya kara nkore zaKarunga?

⁶ Eyi yiyo ya horokerere muengeli gwina. Konyima zapa Jehova ga sitire Adamu naEva, age kwa va tanterere asi va livhare va “zwide evhu.” (Genesis 1:27, 28) Muengeli gwina kwa here vantu navenye va mu karere mevango lyokukarera Jehova. Ngomu ga twikilire kuyigazara, edowo lyendi lyokuhara kumukarera tali kuru. Makura ta kumbagere Eva nokumupukisa. (Resa Genesis 3:1-5.) Yipo ga ya donapere ta kara Satana Muzonaguli, nkore zaKarunga.

7. (a) Morwasinke Adamu naEva va fililire? (b) Morwasinke atu kurupire nokufa?

⁷ Adamu naEva kapi va limburukwire kwaKarunga  makura tava li kositji. (Genesis 2:17; 3:6) Awo kwa zonene kwaJehova, makura konyima va ya fire, moomu ga tente. (Genesis 3:17-19) Vana vaAdamu naEva kufa morwa nzo ezi va pinga. (Resa Varoma 5:12.) Mokutuvatera tu yi kwate egano, tarurura sihonena esi. Nsene sipana sa myantuka, yinke nayi horokera kwankenye munhwi gomboroto ogu nava kangera mo? Nkenye munhwi tagu myantuka. Apa Adamu ga zonene age kwa ya kere munanzo. Morwa ose vana vaAdamu ose twa “myantuka” ndi twa pinga nzo. Yiyo atu kurupire nokufa.—Varoma 3:23; tara Mauzera 9.

8, 9. (a) Yisinke ga here Satana va pure Adamu naEva? (b) Morwasinke Jehova ga dilire kuzonagura po varwanesi vena poopo?

⁸ Satana kwa rwanesere Jehova apa ga pukisire Adamu naEva. Age kwa here Adamu naEva va pure asi Jehova munayimpempa ntani mupangeli gomudona ogu ga dilire kuvaharera uwa. Satana kwa tente asi vantu kapi va hepa kulimburukwa Karunga ntani Adamu naEva va tokore vene asi yipi yoyiwa neyi yoyidona. Yisinke ga rugene Jehova? Ngano ga zonagwire po varwanesi vena, ngano kapi ya likidire asi Satana munayimpempa.

⁹ Yipo nye Jehova kapi ga zonagwire po varwanesi poopo. Nye age kwa pulisira vantu va lipangere vene siruwo songandi, yipo a likide asi Satana munayimpempa ntani Jehova gelike gokuvhura kupangera vantu. Ngatu ka yi zogera mEgaununo 11. Nye ngapi etokoro eli va tulire po Adamu naEva? Va rugene nawa mokupura yaSatana nokudira kulimburukwa Karunga ndi? Jehova kwa pere Adamu naEva nayinye eyi va kere nayo. Age kwa va pere eparu lyokusikilira  mo mosikunino sosiwa, ntani yirugana eyi ya va reterere ruhafo. Nye Satana kwato eyi ga va pere. Ngano nyove ngano yilye ogu wa limburukwire po?

10. Etokoro musinke twa hepa kutura po?

¹⁰ Nose twa hepa kutokora ogu natu karera, ano  etokoro lyetu kuvhura ngali tu retere mwenyo ndi nomfa. Ose kuvhura kuhorowora Jehova ngomupangeli gwetu nokulikida asi Satana munayimpempa. Ndi kuvhura tu horowore Satana ngomupangeli gwetu. (Episarome 73:28; resa Yisewe 27:11.) Nye vantu wovasesu tupu ava tokora kulimburukwa Karunga. Age hena kapisi mupangeli gouzuni ou. Yilye ana kupangera uzuni?

11, 12. (a) Ngapi omu Satana ga yi likidire asi yige mupangeli gouzuni? (b) Matjangwa musinke aga likida asi Satana mupangeli gouzuni?

¹¹ Jesus ga divire mupangeli gouzuni. Ezuva limwe, Satana kwa likidire Jesus “mauntungi gouzuni nomaufuuli gamo.” Ta mu tantere asi: “Nayinye eyi ono kumona ngano nani yi ku pa, nsene o twa nongoro pevhu o tongamene nge.” (Mateusa 4:8, 9; Rukasa 4:5, 6) Lipura asi: ‘Ngano mauntungi gena kapi ga kere gaSatana ngano ga vhulire kugagava kwaJesus ndi?’ Hawe. Satana yige mupangeli gwago.

¹² Kuvhura o lipure asi: ‘Ngapi Satana na kara mupangeli gouzuni, nsene Jehova yige Munankondo nadinye ogu ga sita uzuni?’ (Ehororo 4:11) Yimo, Jehova yige Musiti, nye Jesus kwa tumbwire Satana asi “Mupangeli gouzuni.” (Johanesa 12:31; 14:30; 16:11) Ano mupositoli Paurusa kwa tumbwire Satana asi “mupangeli gomudona gouzuni ou.” (2 Vakolinte 4:3, 4) Ntani mupositoli Johanesa kwa tjenge asi “uzuni mudima kwa kara mepangero lyoMuzonaguli”—1 Johanesa 5:19.

13. Morwasinke tuna hepere uzuni woupe?

¹³ Uzuni kuna kudonapa, kuna kara mo yita noufuki nouyilipaki ntani nyanya. Vantu kapi tava vhuru kugusa po maudigu ogo. Nye Karunga ntaantani nga ya zonagure po uzuni ou poyita yendi yaHarumagedoni nokuyapinganesera po woupe.—Ehororo 16:14-16; tara Mauzera 10.

14. Yilye ga horowora Karunga a kare Hompa goUhompa wendi? Yisinke za pumbire Bibeli kuhamena Jesus?

¹⁴ Jehova kwa horowora Jesus a kare Hompa goUhompa ndi gepangero lyendi lyemeguru. Bibeli kwa pumbire asi Jesus nga kara “Hompa gombili” ntani epangero lyendi kapi ngali haga. (Jesaya 9:6, 7) Jesus kwa rongere varongwa vendi va kanderere epangero olyo apa ga uyungire asi: ‘Uhompa woge au wize. Mpango zoge ava zi sikise mo pevhu ngwendi meguru.’ (Mateusa 6:10) MEgaununo 8 ngatu ka lironga omu Uhompa waKarunga ngau gusa po mapangero gouzuni. (Resa Ndaniyera 2:44.) Makura Uhompa waKarunga ngau ka ninka evhu li kare paradisa.—Tara Mauzera 11.

15. Yisinke ‘evhu lyepe’?

¹⁵ Bibeli kwa tumbwidira asi: “Ose kuna kundindira, moomu ga yi tumbwidira Karunga, eguru lyepe nevhu lyepe, omu ngamu kara uhungami.” (2 Peturusa 3:13; Jesaya 65:17) Pamwe apa azi tumbura Bibeli ‘evhu’ kutamba kovantu. (Genesis 11:1) ‘Evhu lyepe’ kwa tamba kovantu ava nga tungika Karunga morwa kumulimburukwa.

16. Yisinke ngava ka gwana owo ngava ka paruka mouzuni woupe? Yisinke natu rugana yipo tu ka gu gwane?

 ¹⁶ Jesus kwa tente asi owo ngava ka paruka mouzuni woupe ngava ka gwana “mwenyo gwanarunye.” (Marukusa 10:30) Yisinke natu rugana yipo tu ka gu gwane? Mokugwana elimbururo resa Johanesa 3:16 ntani 17:3. Tu tareni eyi za uyunga Bibeli kuhamena omu ngali ka kara eparu moParadisa.

17, 18. Ngapi tuna yi diva asi ngaku kara mbili pevhu nalinye ntani kapi ngatu kara nowoma?

¹⁷ Udona noyita noukorokotji ntani nyanya kapi ngayi kara ko. Pevhu kapi ngapa kara hena vantu wovadona. (Episarome 37:10, 11) Karunga nga “hageka yita mouzuni mudima.” (Episarome 46:9; Jesaya 2:4) Pevhu ngapa ka vhuka vantu ava va hara Karunga nokumulimburukwa. Mbili ngazi kara pevhu dogoro narunye.—Episarome 72:7.

¹⁸ Vantu vaJehova kapi ngava kara nowoma. Vaisraeli apa va limburukwire Karunga, age kwa va poperere. (Levitikus 25:18, 19) MoParadisa kwato eyi ngayi ka tu tjilisa. Ngatu ka tunga mombili!—Resa Jesaya 32:18; Mika 4:4.

19. Ngapi twa yi diva asi ngaku kara nondya dononzi mouzuni woupe?

¹⁹ Nondya dononzi. “Ewogo lyoyisima ngano tali kara mosirongo; nondundu ngano tadi zura muzangu.” (Episarome 72:16) Jehova ‘Karunga gwetu nga tu tungika’ ntani ‘mapya ngaga tunda muzangu gwago.’—Episarome 67:6.

20. Ngapi tuna yi diva asi evhu nalinye ngali ka kara paradisa?

²⁰ Evhu nalinye ngali kara paradisa. Vantu ngava ka kara nomambo gomawa noyipata. (Resa Jesaya  65:21-24; Ehororo 11:18.) Evhu nalinye ngali ka fuura ngwendi sipata saEdeni. Jehova nga ka tu pa nayinye eyi twa hepa. Kuhamena yinamwenyo, Bibeli kutanta asi: “Ove kuyipa yoyinzi, to kutike nayinye moufenkenda woge.”—Episarome 145:16.

21. Ngapi tuna yi diva asi ngapa ka kara mbili pokatji koyikorama novantu?

²¹ Mbili pokatji kovantu noyikorama. Yikorama kapi hena ngayi ka remeka vantu. Vanona ngava ka danauka noyikorama eyi yina kara ngesi siponga.—Resa Jesaya 11:6-9; 65:25.

22. Yisinke nga ka rugana Jesus kuhamena uvera?

²² Kwato ogu nga ka vera. Apa ga kere Jesus pevhu kwa verwire vantu wovanzi. (Mateusa 9:35; Marukusa 1:40-42; Johanesa 5:5-9) Nye apa nga ka pangera moUhompa waKarunga nga ka verura nkenye gumwe. Kwato gumwe nga ka sivana asi “ta vere.”—Jesaya 33:24; 35:5, 6.

23. Yisinke nga ka rugana Karunga kuhamena vafe?

²³ Vafe ngava ka paruka hena. Karunga kwa tumbwidira asi nga ka pindura vantu ava va fa. “Navenye, va kare vawa ndi vadona, ngava va pindura koufe”—Resa Johanesa 5:28, 29; Yirugana 24:15.

24. Ngapi ono kulizuvha kukaparuka moParadisa?

²⁴ Natuvenye kuvhura kutokora mokulironga kuhamena Jehova nokumukarera ndi hawe. Nsene tu tokora kukarera Jehova nga tu tungika. Jesus kwa tumbwidilire mugara ogu va mu dipagere nendi asi nga kara ‘kumwe nendi moParadisa.’ (Rukasa 23:43) Ngatu lironga yoyinzi kuhamena Jesus Kristusa nomu nga ka sikisa mo matumbwidiro gaKarunga.