1, 2. Yisinke ava lipura vantu wovanzi?

VANTU wovanzi kuhepa nokufa morwa kuligwanekera noyimpagwa ndi ehudi ndi mauvera ndi kuvadipaga.

² Apa simpagwa ndi ehudi ali horoka vantu wovanzi kulipura asi: “Morwasinke?” Vantu wovanzi kulipura eyi uzuni una vhukire nyengo noruhepo. Nove wa lipura rumwe ngoso ndi?

3, 4. (a) Mapuro musinke ga pulire Habakuku? (b) Ngapi omu Jehova ga mu limbwilire?

³ MoBibeli va tumbura mo asi vagara ava va kere nepuro lyenene mwaKarunga nawo yimo va lipulire. Pasihonena, muporofete Habakuku kwa pulire Jehova asi: ‘Yinke ono ninkire nge ni mone udigu wokufana ngesi? Ezonauko nepiyagano kuna kundurukida nge. Mwarwanambo nonomutangu, kuna kara nakunye.’—Habakuku 1:3.

⁴ MwaHabakuku 2:2, 3, Karunga ga limbwilire mapuro gaHabakuku ntani ga mu tumbwidilire asi nga rugana ko yuma. Jehova ga hara unene vantu. Bibeli kutanta asi: “Age kumupakera mbili.” (1 Peturusa 5:7) Karunga ga nyenga unene ruhepo kutupita ose. (Jesaya 55:8, 9) Tu konakoneni epuro eli: Morwasinke runa vhukire ruhepo mouzuni?

5. Yisinke ava rongo varongi womomaukarelikarunga kuhamena ruhepo? Yisinke azi rongo Bibeli?

⁵ Varongi womomaukarelikarunga kuronga asi Karunga kwa hara vantu va hepe. Vamwe kuronga asi nayinye eyi ayi tu horokere nare ga yi tokora Karunga ntani kapi tatu kwata egano eyi yina kuhorokera. Ano vamwe kuronga asi vantu kufa, kukwatera mo vanona, morwa Karunga a va zigida va ka kare nendi meguru. Nye oyo kapisi usili. Jehova kapi a retesa po yininke yoyidona yi horoke. Bibeli kutanta asi: “Karunga Munankondo kapi a rugana yoyidona.”—Joba 34:12.

6. Morwasinke vantu wovanzi ava pere usima Karunga kweyi yina kuhoroka mouzuni?

⁶ Vantu wovanzi kupa Karunga usima kweyi yina kuhoroka mouzuni morwa awo kugazara asi yige ana kuupangera. Nye twa lirongere mEgaununo 3 asi Satana Muzonaguli yige ana kupangera uzuni.

7, 8. Morwasinke runa vhukire ruhepo mouzuni?

⁷ Bibeli kututantera asi “uzuni mudima kwa kara mepangero lyoMuzonaguli.” (1 Johanesa 5:19) Satana age mupangeli gonyanya. Age kuna ‘kupukisa uzuni naunye.’ (Ehororo 12:9) Vantu wovanzi kumuhonena. Mouzuni yiyo muna vhukire yimpempa nonyengo nonyanya.

⁸ Eyi hena runa vhukire ruhepo mouzuni morwa ose kwa pinga nzo kwaAdamu naEva. Morwa nzo ozo, vantu kulinenepeka nokuhepeka vakwaawo. Awo kurwanangana nokuza koyita. (Muudisi 4:1; 8:9) Pamwe vantu kuhepa morwa  “ehudi kuhorokera nkenye ogu.” (Muudisi 9:11) Awo kukara pevango lyongandi posiruwo sosimpagwa.

9. Ngapi omu tuna yi diva asi Jehova ga kara nokonda zongwa zeyi a pulisilire ruhepo ru twikire?

⁹ Jehova kapi a retesa po yita noukorokotji noruhepo. Age hena kapisi yige a retesa po yimpagwa ngwendi makankamo gevhu nomakundungu noruhanzo. Nye kuvhura o lipure asi: ‘Nsene asi age Munankondo nadinye, morwasinke a dilire kukandana po yininke yoyidona?’ Karunga ga tu hara unene, age hena ga kara nokonda zongwa zeyi a pulisilire ruhepo ru twikire.—1 Johanesa 4:8.

10. Ngapi Satana ga rundilire Jehova?

¹⁰ Mosikunino saEdeni, Muzonaguli kwa pukisire Adamu naEva. Age kwa rundilire Karunga asi Mupangeli gomudona. Satana kwa tente asi Karunga kwa horekerere yininke yoyiwa kwaAdamu naEva. Age kwa here va pure asi age mupangeli gomuwa kupitakana Jehova, ntani kapi va hepa evatero lyaKarunga.—Genesis 3:2-5; tara Mauzera 27.

11. Epuro musinke twa hepa kulipura?

¹¹ Adamu naEva va rwanesere Jehova pokudira kumulimburukwa. Awo kwa gazarere asi va diva kutokora nawa yoyiwa neyi yoyidona. Ngapi ngano Jehova ga vhulire kulikida asi awo mepuko va kere ntani age yige ga diva eyi twa hepa?

12, 13. (a) Morwasinke Jehova ga dilire kuzonagura Adamu naEva poopo? (b) Morwasinke Jehova ga pulisira Satana a pangere uzuni, ntani vantu va lipangere vene?

 ¹² Jehova kapi ga zonagwire Adamu naEva poopo. Age kwa va pulisilire va rete vana. Jehova kwa here kupa vana vawo mpito va horowore ogu na kara mupangeli gwawo. Sitambo saJehova kwa kere asi pevhu pa kare vantu wokusikilira mo. Ntani Satana kwato eyi ga vhulire kurugana mokukondera sitambo oso.—Genesis 1:28; Jesaya 55:10, 11.

¹³ Satana kwa rwanesere Jehova komeho zovaengeli mamiliyona. (Joba 38:7; Ndaniyera 7:10) Jehova yipo nye ga mu pere siruwo a likide nsene eyi ga uyungire usili. Age hena kwa pa vantu siruwo sokutura po mapangero gavene mepitisiro lyaSatana yipo va vhure kulikida nsene kuvhura yi va tompoke pwa hana evatero lyaKarunga.

14. Mokumona asi vantu kapi ya va tompoka kupangera, yisinke ya likida?

¹⁴ Nomvhura nonomvhura, vantu kwa hetekera ko kupangera, nye kapi ya va tompoka. Ayo kwa likida asi Satana munayimpempa. Ntani ose vantu twa hepa evatero lyaKarunga. Mouhunga ga kere muporofete Jeremiya apa ga tente asi: “HOMPA, ame na diva asi nzira zovantu kapi za kara mepangero lyamwene; kutupu ogu a pangere kukaramwenyo kwamwene.”—Jeremiya 10:23.

15, 16. (a) Morwasinke Jehova ga pulisira ruhepo ru twikire siruwo sosire? (b) Morwasinke Jehova ga dilira kugusa po maudigu aga ga retesa po Satana?

¹⁵ Morwasinke Jehova ga pulisilira ruhepo ru twikire siruwo sosire? Morwa ayo kwa gusa siruwo sosire mokulikida asi Satana kapi ga wapera kupangera. Vantu kwa hetekera ko kutulisa po nonkedi dononzi dokupangera nye kapi ya va tompoka. Nampili ngomu vantu va kara nediwo lyenene lyoukonentu, ruhepo noukorokotji noyita kuna kuligwederera unene. Kapi tayi tu tompoka kulipangera nyamwetu pwa hana evatero lyaKarunga.

¹⁶ Morwasinke Jehova ga dilira kugusa po maudigu aga ga retesa po Satana? Nsene a gusa po maudigu aga ga retesa po Satana, tayi likida asi age kuna kukwatesa ko upangeli waSatana. Ntani vantu kuvhura va gazare asi tayi va tompoka kulipangera vene, nye oyo kuna kara yimpempa. Ntani Jehova kapi tayi kwatesa ko.—Vahebeli 6:18.

17, 18. Yisinke Jehova nga rugana komaudigu aga ga reta po Satana?

¹⁷ Kuvhura Jehova a guse po maudigu aga ga retesa po Satana novantu ndi? Nhi. Kwato yokumuvhura. Age ga diva siruwo esi nga hagekesa po urwanesi waSatana. Makura evhu nga li ninka li kare paradisa, moomu ga li harerere. Navenye “va kara monontoko” ngava pwaga mo. (Johanesa 5:28, 29) Vantu kapi ngava vera hena ndi va fe. Jehova nga ka ruganesa Jesus a “haraganese po yirugana yoMuzonaguli.” (1 Johanesa 3:8) Tu pandure Jehova, morwa kulididimikira  kwendi kwa tu pa mpito zokulironga kumuhamena nokumutambura ngoMupangeli gwetu. (Resa 2 Peturusa 3:9, 10.) Nampili moruhepo rwetu, age kutuvatera tu lididimike.—Johanesa 4:23; resa 1 Vakolinte 10:13.

¹⁸ Jehova kapi a tu sininike tu mu tambure ngoMupangeli gwetu. Age kwa tu sita nevhuliko lyokutura po matokoro. Tu konakoneni eyi ayi tanta oyo.

19. Monkedi musinke ga tu sita Jehova? Morwasinke nayi tu hafesera oyo?

¹⁹ Jehova kwa tu sita tu lisige noyikorama. Ose vantu kuvhura kutokora eyi tuna hara kurugana ndi nsene tuna hara kuhafesa Jehova. Ose kapisi ngwendi mahina. Ose kuvhura kutokora kuhamena vakaume vetu ntani eyi tuna hara kurugana meparu. Jehova kuna hara tu hafere eparu.

20, 21. Etokoro musinke lyewa no tura po ngesi?

²⁰ Jehova kuna hara tu mu hare. (Mateusa 22:37, 38) Age ngwendi guhya ogu a hafa nsene munwendi a uyunga asi: “Na mu hara tate,” va hana kumusininika. Jehova kwa tu sita nevhuliko lyokutokora kumukarera ndi hawe. Satana naAdamu naEva va tokwere kunyoka Jehova. Ove yisinke ono tokora kurugana?

²¹ Tokora kukarera Jehova. Pwa kara vantu wovanzi ava va tokora mokuhafesa Karunga nokunyoka Satana. (Yisewe 27:11) Yisinke no vhura kurugana ngesi yipo ngo ka kare mouzuni woupe waKarunga apa nga ka gusa po ruhepo? Ngatu ka gwana elimbururo megaununo lyokukwama ko.