1-3. Mapuro musinke ava pura vantu kuhamena vafe, ntani malimbururo musinke aga gava maukarelikarunga?

BIBELI kutanta asi ezuva limwe “nomfa kapi hena ngadi kara ko.” (Ehororo 21:4) MEgaununo 5 katu lirongere asi morwa sizoweseso ngatu ka paruka narunye. Nye vantu simpe kuna kufa. (Muudisi 9:5) Epuro atu lipura lyeli asi: Nsene muntu ana fu kupi a zi?

² Ose kulipura epuro olyo unene po nsene muntu ogu twa hara ana fu. Kuvhura tu lipure asi: ‘Kupi ko ana kara? Age kuna kutumona ndi? Kuvhura a tu vatere ndi? Ngatu mu mona hena ndi?’

³ Maukarelikarunga kulimburura mapuro ogo mononkedi dokulisiga-siga. Gamwe kuronga asi vantu wovawa kuza meguru, ano wovadona kuza momundiro gwanarunye. Gamwe kuronga asi vafe kukara vadimu nokukalipakerera kumwe nekoro lyawo eli lya fa. Ano gamwe kuronga asi vafe kukavapangura nokukavahampukurura hena.

4. Egano musinke limwe aga rongo maukarelikarunga kuhamena nomfa?

⁴ Maukarelikarunga kuronga yininke yoyinzi. Nye nagenye konyara kuronga egano limwe. Ago kuronga asi apa a fu muntu mwenyo ndi mpepo kutwikira kuparuka. Erongo olyo usili ndi?

5, 6. Yisinke ayi horoka apa a fu muntu?

⁵ Jehova ga diva eyi ayi horoka apa a fu muntu. Age kutanta asi apa a fu muntu, kuhageka kuparuka. Yipo nye apa a fu muntu magazaro nomalizuvho gendi kuhaga po. * Apa a fu muntu kapi a mono ndi a zuvhe ndi a gazare yuma.

⁶ Hompa Saromo kwa tjenge asi “vafe kutupu eyi va diva.” Eharo nonyengo zawo kuhaga po morwa ‘mosirongo sovafe, mutupu magazaro ndi unongo ndi ediwo.’ (Resa Muudisi 9:5, 6, 10.) Episarome 146:4 kutanta asi nsene vana fu “yigazo yawo” kufa.

7. Yisinke ga tente Jesus kuhamena nomfa?

⁷ Apa ga fire Rasarusa, Jesus kwa tente asi: “Rasarusa mukwetetu kuna ponyoka.” Nye Jesus kapi ga tembe asi Rasarusa kwa rere nompofu. Jesus ga fatwilire asi: “Rasarusa ana fu.” (Johanesa 11:11-14) Jesus kwa fanekesere nomfa konompofu. Kapi ga uyungire asi Rasarusa ana zi meguru ndi ana kara mudimu. Ntani Jesus kapi ga tente asi Rasarusa kuna kuhepa momundiro gwanarunye ndi asi va mu hampurukurura ngomuntu gwapeke. Nye apa ga fire Rasarusa age kwa rere ngwendi nompofu dononene. Ntani apa ga pindwire koufe munwaJairusa, Jesus kwa fanekesere hena nomfa kokurara. Age kwa tente asi: “Kapi ana fu, kuna rara.”—Rukasa 8:52.

8. Ngapi twa yi diva asi Karunga kapi ga sitire vantu va fe?

 ⁸ Karunga kwa sitire Adamu naEva yipo va fe hena ndi? Hawe! Jehova kwa va sitire yipo va paruke narunye pevhu. Age kwa va sitire neharo lyokuparuka narunye. Moomu vakondi va dira kuharera vana vawo va vere nokufa ndi va kurupe, Jehova nage yimo a lizuvhu. Nsene Karunga kwa sitire vantu va paruke narunye, morwasinke atu fire?

9. Morwasinke Jehova ga gaverere mpangera kwaAdamu naEva?

⁹ Mosikunino saEdeni Jehova kwa tanterere Adamu asi: “Yiyimwa yokoyitji nayinye yomosikunino kulya tupu, ntudi yokositji esi asi gava ediwo lyeyi yoyiwa neyi yoyidona no. Siyimwa saso nokanunu si asi o si lye. Nsene ngo yi hetekera, ngo fa lyoolyo ezuva.” (Genesis 2:9, 16, 17) Jehova ga kere nounankondo wokutantera Adamu naEva asi yipi yoyiwa neyi yoyidona, ntani mpangera ozo kapi za kere udigu. Pokuzilimburukwa, ngano va likidire asi va tambwire upangeli waJehova. Ntani ngano va likidire asi va mu pandwire kwanayinye eyi ga va pere.

10, 11. (a) Ngapi omu Satana ga pukisire Adamu naEva? (b) Morwasinke eyi va rugene Adamu naEva ya karere nzo zonene?

¹⁰ Nye Adamu naEva kapi va limburukwire Jehova. Satana kwa pulire Eva asi: “Enye sili Karunga ga mu tantera asi walye omu li yiyimwa yokoyitji eyi ya kara mosikunino ndi?” Eva ta limburura asi: “Ose kuvhura kulya yiyimwa yokoyitji eyi yomosikunino ntudi yokositji sopokatji no. Karunga kwa tanta asi, ‘nokulya si siyimwa sokositji oso, ndi nampili kuguma kooku nokusiguma si; nsene tu yi hetekera, ngano ngatu fa.’”—Genesis 3:1-3.

¹¹ Makura Satana ta tanta asi: “Ndangako asi ngomu fe one. Karunga kwa yi tantera eyi morwa ga diva asi nsene ngomu lya ko, neisi ngomu gwana nondunge, ngomu mu fane mokudiva yoyiwa neyi yoyidona.” (Genesis 3:4-6) Satana kwa here Eva a tokore mwene asi yipi yoyiwa neyi yoyidona. Satana kwa kumbagerere Eva asi kapi nga fa nsene a lya kosiyimwa.  Makura Eva ta li siyimwa ga ninka ta pe ko Adamu. Awo va yi divire asi Jehova kwa va silikire kulya ko. Apa va lire kositji awo kwa tezere po mpango zaJehova mowina. Ntani va yi likidire asi kapi va fumadekere Guhyawo gomuwa gemeguru. Awo va tulire nzo zonene!

12. Ngapi omu ga lizuvhire Jehova apa Adamu naEva va dilire kulimburukwa?

¹² Eyi va rugene Adamu naEva kwa guvisire Musiti gwawo. Ngapi no lizuvha nsene wa kondja paapa wa hulira kurera munoge gomumati nogu gomukadona, makura konyima tava ku rwanesa nokudira kukulimburukwa? Tayi ku koresa unene komutjima!

13. Yisinke ga tembe Jehova apa ga tente asi “ngo kara hena evhu”?

¹³ Apa Adamu naEva va dilire kulimburukwa, va zumbanesere mpito zokuparuka narunye. Jehova kwa tanterere Adamu asi: “Ove kwa tunda mevhu makura ngo kara hena evhu.” (Resa Genesis 3:19.) Jehova kwa tembe asi Adamu nga kara hena evhu nokudongonoka po. (Genesis 2:7) Konyima zapa ga zonene Adamu, age kwa fire ntani kapi ga parukire hena.

14. Morwasinke atu fire?

¹⁴ Ngano Adamu naEva va limburukwire Karunga, awo ngano poveli. Nye awo va fa morwa nzo. Nzo kuna kara  ngwendi uvera wokukagura ou twa pinga kovakurona vetu wokuhova. Natuvenye kufa morwa twa pinga nzo ozo. (Varoma 5:12) Nye kapisi yimo ga yi harerere Karunga. Karunga kapi ga here asi vantu va fe, ntani Bibeli kutumbura nomfa asi “nkore.”—1 Vakolinte 15:26.

15. Kudiva usili kuhamena nomfa, kosinke ayi tu vatere?

¹⁵ Kudiva usili kuhamena nomfa kutuvatera ga dire kutupukisa marongo goyimpempa. Bibeli kuronga asi vafe kapi ava zuvhu kukora ndi va guve. Kapi tatu vhuru kuuyunga nawo, ndi va uyunge nose. Kapi tatu vhuru kuvavatera, ndi nawo va tu vatere. Kapi tava vhuru kuturugana yoyidona, yipo nye kapisi hepero kuvatjira. Nye maukarelikarunga gomanzi kuronga asi vafe kuna kuparuka ntani asi kuvhura tu va vatere nsene tu futa vampitisili wongereka yimaliwa yipo va gwaveke simpu. Nye kudiva usili kuhamena vafe, kapi ngayi tu pukisa yimpempa oyo.

16. Marongo musinke goyimpempa adi rongo nongereka dononzi kuhamena vafe?

¹⁶ Satana kuruganesa maukareli goyimpempa mokutupukisa tu pure asi vafe kuna kuparuka. Pasihonena, nongereka dimwe kuronga asi apa a fu muntu mwenyo ndi mpepo kutwikira kuparuka. Yiyo ava mu rongo kongereka zeni ndi? Ndi azo kuronga eyi azi rongo Bibeli? Satana kuna kukumbagera vantu yipo a va guse ko kwaJehova.

17. Morwasinke erongo lyomundiro gwanarunye ali swaukisire Jehova?

¹⁷ Marongo gamwe gomaukarelikarunga kutjilisa. Pasihonena gamwe kuronga asi vantu wovadona  ngava ka pya momundiro gwanarunye. Erongo olyo kuswaukisa Jehova. Age kapi ta hepeke vantu pokuvahwika momundiro. (Resa 1 Johanesa 4:8.) Ngapi ngano omu no lizuvha kuhamena muntu gokutengeka munona pokutura ewoko lyendi momundiro? Ngo gazara asi age nyanya unene. Ntani kapi ngo hara a kare mukweni. Satana kuna hara nose tu nyenge Jehova!

18. Morwasinke natu dilira kutjira vafe?

¹⁸ Maukarelikarunga gamwe kuronga asi apa ava fu vantu kukara vadimu. Ago kuronga asi twa hepa kufumadeka vadimu, morwa kuvhura va tu rugane yoyiwa ndi yoyidona. Sinzi sovantu kwa pura yimpempa oyo. Awo kutjira vafe ntani kuvafumadeka mevango lyokufumadeka ndi kukarera Jehova. Diworoka asi vafe kapi va kara nomalizuvho ntani kwato eyi va diva, kapisi hepero tu va tjire. Jehova yige ga tu sita. Yige gelike Karunga gosili, ntani twa hepa kumukarera gelike.—Ehororo 4:11.

19. Ngapi kudiva usili kuhamena vafe ayi tu vatere?

¹⁹ Nsene twa diva usili kuhamena vafe kapi ngayi tu pukisa yimpempa yomaukarelikarunga. Eyi kutuvatera tu kwate egano eyi ga tumbwidira Jehova kuhamena eparu lyokomeho.

20. Yisinke ngatu ka zogera megaununo lyokukwama ko?

²⁰ Posiruwo sanare mukareli gwaJehova Joba kwa pulire asi: “Muntu nsene ana fu, kuvhura hena a tengwire komwenyo ndi?” (Joba 14:14) Kuvhura muntu ogu ga fa nga ka paruke hena ndi? Karunga kutupa elimbururo lyewa moBibeli. Ngatu ka yi zogera megaununo lyokukwama ko.