1, 2. Yisinke Jehova ana harere mapata?

JEHOVA KARUNGA yige ga kwarekere vantu wokuhova. Bibeli kutanta asi age ta rugana mukadi ‘ta mu reta’ komugara. Adamu kwa hefe unene yiyo ga tente asi: “Sisupa somoyisupa yange, nonyama zomonyama zange.” (Genesis 2:22, 23) Eyi kulikida asi Jehova kuna hara valikwali va hafe.

² Nye momapata gomanzi mwato ruhafo. MoBibeli mwa kara nompango dononzi edi nadi vatera vemepata va gwane ruhafo.—Rukasa 11:28.

3, 4. (a) Ngapi omu mugara na tekura mukadendi? (b) Morwasinke ya karera nomulyo mugara nomukadi va lidongwenene po?

³ Bibeli kuuyunga asi mugara gomuwa, kwa hara mukadendi nokumufumadeka. Resa Vaefeso 5:25-29. Mugara ga hepa kutekura nawa mukadendi. Ntani nga mu popera nokumupakera mbili ntani kapi nga mu rugana yuma yokumukoresa.

⁴ Yisinke na rugana mugara nsene mukadendi ana lipuka? Vagara kuna kuvatantera asi: “Omu hare vakadi veni, nokuvapakera si nyanya.” (Vakorosi 3:19) Vagara, diworokeni asi none kurugana mapuko. Nsene ono hara Karunga a ku dongwenene po, wa hepa kudongwenena po mukadoge. (Mateusa 6:12, 14, 15) Mugara nomukadi nsene va lidongwenena po, nonkwara dawo ngadi kara doruhafo.

5. Morwasinke mugara na tarera mukadendi asi mulyo?

 ⁵ Jehova kuna hara mugara a tare mukadendi asi mulyo. Ga hepa kugazadara ko unene koyihepwa yamukadendi. Ayo mulyo unene, morwa nsene mugara a tekura mukadendi momudona, Jehova kapi nga purakena komakanderero gendi. (1 Peturusa 3:7) Jehova kapi ga hara vagara kupitakana vakadi. Yomulyo po kwendi kuna kara asi vantu va mu hare.

6. Yisinke ayi tanta kukara “rutu rumwe tupu”?

⁶ Jesus kwa uyungire asi mugara nomukadi “kapisi vavali hena, hawe, awo rutu rumwe tupu.” (Mateusa 19:6) Awo kufumadeka nonkwara dawo pokudira kuhondera. (Yisewe 5:15-21; Vahebeli 13:4) Kombinga zeligwanekero panyama, mugara nomukadi va hepa kulipa eyi ya va fira. (1 Vakolinte 7:3-5) Mugara ga hepa kudiworoka asi “nagumwe si ogu ga nyenga rutu rwamwene, nye age kurutekura oku ta ru pakere mbili.” Yipo nye ga hepa kuhara nokuhafera mukadendi. Mukadi kwa hara mugara gwendi a mu tekure nonkenda neharo.—Vaefeso 5:29.

7. Morwasinke epata lya hepera mupangeli?

⁷ Mwankenye epata mwa hepa mupangeli, ogu na vhura kuvagendesa va ruganene mouumwe. Mo-1 Vakolinte 11:3 Bibeli kwa uyunga asi: “Kristusa yige mupangeli gwankenye mugara, mugara mupangeli gomukadi, ano Karunga yige mupangeli gwaKristusa.”

8. Ngapi omu mukadi na fumadeka yendi?

⁸ Nkenye mugara kulipuka. Nye nsene mukadi a kwatesa ko matokoro gayendi nokuruganena kumwe nendi, epata ngali gwanena mo mauwa. (1 Peturusa  3:1-6) Bibeli kwa tanta asi: ‘Mukadi a fumadeke yendi.’ (Vaefeso 5:33) Nye ngapi nsene epuliro lyendi lya lisiga neli lyamugara gwendi? Simpe mukadi ga hepa kufumadeka yendi. Bibeli kuuyunga asi: “Vakadi, omu limburukwe kovagara veni, asi vamwe mo ava va dira kupura nonkango daKarunga, ngayi va tezwilise po yikara yovakadi vawo, awo va hana kuuyunga, nsene va mona ukuhuki netjirokarunga lyeni.” (1 Peturusa 3:1, 2) Sihonena sosiwa somukadi kuvhura kuvatera mugara gwendi a kwate egano nokufumadeka epuliro lyendi.

9. (a) Ngapi nsene mukadi kapi lina mu hafesa etokoro lyamugara gwendi? (b) Epukururo musinke lya kara mwaTitusa 2:4, 5 lya tamba kovakadi?

⁹ Ngapi nsene mukadi kapi lina mu hafesa etokoro lyamugara gwendi? Kuvhura a pwagese magano gendi monkedi zefumadeko. Pasihonena, Sara kwa uyungire eyi ga dilire kutambura Abirahamu, nye Jehova kwa mu tanterere asi: “Nkenye eyi na ku tantera  Sara, yi rugana.” (Genesis 21:9-12) Mugara goMukriste kapi nga tura po matokoro aga aga lilimbi noBibeli, yipo nye mukadi ga hepa kugakwatesa ko. (Yirugana 5:29; Vaefeso 5:24) Mukadi gomuwa kurera nawa epata lyendi. (Resa Titusa 2:4, 5.) Nsene mugara novana vendi va mona asi age kuna kurugana unene, awo ngava mu hara nokumufumadeka unene.—Yisewe 31:10, 28.

10. Yisinke azi uyunga ko Bibeli kuhamena kuligaunuka nokulizumba?

¹⁰ Valikwali vamwe kutokora usimbu kuligaunuka ndi kulizumba. Nye Bibeli kuuyunga asi “mukadi nokuzumba si yendi” ntani asi “mugara nage ga ha zumba mukadendi.” (1 Vakolinte 7:10, 11) Ntudi pana kara maudigu gomanene gokufa nokutara ntani nampo nava tokora kuligaunuka. Ngapi kuhamena kulizumba? Bibeli kwa likida asi konda zelike zokutokora kulizumba nsene gumwe gwawo ana ka hondera.—Mateusa 19:9.

11. Yisinke va hepa vanona kupitakana nayinye?

¹¹ Vakurona, litulireni po siruwo sosinzi sokukara novana veni. Vana veni va na mu hepa, ano kupitakana nayinye, awo vana hepa mu va ronge kuhamena Jehova.—Deuteronomium 6:4-9.

12. Yisinke vakurona va hepa kurugana mokupopera vana vawo?

¹² Uzuni waSatana una donapa unene, ntani pana kara vantu vamwe ava vana hara kukoresa vana veni, nampili kuvakwatera kononkondo. Vakurona vamwe nomuga kuzogera novana vawo kuhamena eligwanekero panyama. Nye vakurona va hepa kurondora vana  vawo kuhamena vantu wovadona ntani kuvaronga omu nava va henduka. Vakurona, mwa hepa kupopera vana veni. *—1 Peturusa 5:8.

13. Ngapi omu vakurona nava vhura kuronga vana vawo?

¹³ Aso situmbukira sovakurona mokuronga vana vawo nkareso zongwa. Ngapi no vhura kuronga vana woge? Wa hepa kuvapisura, nye kapisi nonyanya ndi nougara. (Jeremiya 30:11) Wa ha pisura vana woge nsene ono handuka. Ntani wa ha uyunga nonkango  ‘dokuwurura ngwendi rufuro’ edi nadi va koresa. (Yisewe 12:18) Ronga vana woge va kwate egano eyi va hepera kulimburukwa.—Vaefeso 6:4; Vahebeli 12:9-11; tara Mauzera 30.

14, 15. Morwasinke vanona va hepera kulimburukwa vakurona vawo?

¹⁴ Jesus nkenye apa nga limburukwa oGuhwe, nampili apa ya kere udigu. (Rukasa 22:42; Johanesa 8:28, 29) Jehova kuna hara vanona nawo va limburukwe kovakurona vawo.—Vaefeso 6:1-3.

¹⁵ Vanona, nampili mu lizuvhe asi udigu kulimburukwa vakurona veni, diworokeni asi apa omu limburukwa, Jehova novakurona veni kuvahafesa. *—Yisewe 1:8; 6:20; 23:22-25.

16. (a) Ngapi omu Satana a heteke kuzeda vadinkantu va rugane yoyidona? (b) Morwasinke ya karera nomulyo o tulise po ukaume nava va hara Jehova?

¹⁶ Muzonaguli kuvhura a ruganese vakaume woge ndi vadinkantu vapeke va ku zede o rugane yoyidona. Ga yi diva asi udigu kunyoka makondjeso govakaume. Pasihonena, Dina munwaJakopo kwa kere novakaume ava ngava dili kukarera Jehova. Ayo ya mu tulire moudigu nepata lyawo. (Genesis 34:1, 2) Nsene vakaume woge kapi va hara Jehova, kuvhura va ku zede o rugane eyi ayi dili kumuhafesa, makura ngayi ku retere kukora nepata lyeni ntani ngayi guvisa Karunga. (Yisewe 17:21, 25) Eyi yiyo ya karera mulyo unene o tulise po ukaume nava va hara Jehova.—1 Vakolinte 15:33.

17. Situmbukira musinke ga kara naso nkenye ogu gemepata?

¹⁷ Vemepata nsene va kwama mapukururo gaKarunga, kapi ngava kara nomaudigu gomanzi. Mugara, wa hepa kuhara mukadoge nokumutekura neharo. Mukadi, wa hepa kufumadeka nokuzuvha yamugara goge ntani honena sihonena somukadi va tumbura moYisewe 31:10-31. Vakurona, rongeni vana veni va hare Karunga. (Yisewe 22:6) Vaguhya, gendeseni “nawa” mapata geni. (1 Timoteusa 3:4, 5; 5:8) Vanona, limburukweni kovakurona veni. (Vakorosi 3:20) Diworokeni asi nkenye ogu mepata kutura mapuko, yipo nye mwa hepa kulinunupika nokulidongwenena po. MoBibeli kwa kara mo mavyukiso gaJehova kwankenye gumwe gemepata.