1, 2. Morwasinke ekanderero lya karera mfumwa zonene, ntani morwasinke twa hepera kudiva ko eyi azi uyunga ko Bibeli?

EVHU enunu unene. Apa Jehova a tara pevhu, vantu womonomuhoko nadinye kumoneka kwendi ngwendi eta lyomema. (Episarome 115:15; Jesaya 40:15) Nampili ngomu atu moneka ngoso, Episarome 145:18, 19 kututantera asi Jehova “kwa kara pepi nava navenye ava mu zigida, ava ava mu zigida mousili. Age kuhepurura maruhepo gava ava mu tjira; age kuzuvha nkugo zawo, ta va parura.” Ozo kuna kara mfumwa zonene. Jehova, Musiti gwanayinye, ana hara kukara pepi nose ntani ana hara kuzuvha makanderero getu. Ntani nkenye muntu kuvhura kukanderera kwaJehova.

² Nye mokuninka asi Jehova a zuvhe makanderero getu, ntudi twa hepa kukanderera monkedi ezi a hafere. Ngapi omu natu kanderera? Tu tareni eyi za uyunga ko Bibeli.

3. Morwasinke natu kanderera kwaJehova?

³ Jehova ana hara o kanderere ndi o uyunge nendi. Ngapi omu tuna yi diva oyo? Resa Vafilipi 4:6, 7. Mupangeli gwanayinye ga ku hara ntani kuna kukuzigida o mu tantere malizuvho nomaudigu goge.

4. Ngapi kukanderera nkenye apa nayi nkondopeka ukaume woge naJehova?

⁴ Kupitira mekanderero kuvhura tu ture po ukaume wounene naJehova. Apa vakaume ava lipwagesere nkenye  apa malizuvho nomaudigu gawo, ukaume wawo kunkondopara. Ya lifana nekanderero. Kupitira moBibeli Jehova ga ku tantera magazaro nomalizuvho gendi ntani neyi nga ka rugana komeho. Mu pwagesera maudigu nomalizuvho goge gokomutjima pokuuyunga nendi nkenye ezuva. Nsene ngo yi rugana, ukaume woge naJehova ngau nkondopara.—Jakopo 4:8.

5. Ngapi tuna yi diva asi Jehova kapi a purakene komakanderero nagenye?

⁵ Jehova kupurakena makanderero nagenye ndi? Hawe. Kupitira mwaJesaya, Jehova kwa tanterere Vaisraeli asi: “Nampili mu kanderere makanderero gomanzi, ame nokumupurakena si, yeeyi asi mawoko geni kuna zura honde.” (Jesaya 1:15) Nsene kapi tuna kutakamesa, kuvhura tu rugane yininke eyi nayi ninkisa Jehova a dire kupurakena makanderero getu.

6. Morwasinke twa hepera kukara nepuro? Ngapi no yi likida asi wa kara nepuro?

 ⁶ Nsene tuna hara Jehova a zuvhe makanderero getu, twa hepa kupura mwendi. (Marukusa 11:24) Mupositoli Paurusa kwa uyungire asi: “Nsene o pira epuro, nokuza si Karunga komutjima, yeeyi ogu a zi kwaKarunga, a pure ntani asi Karunga kweli, age hena asi yige a futu ava ava mu papara.” (Vahebeli 11:6) Kapi ya gwanena po tupu kutanta asi twa kara nepuro. Nye epuro lyetu twa hepa kulilikida pokulimburukwa Jehova nkenye ezuva.—Resa Jakopo 2:26.

7. (a) Morwasinke twa hepera kulinunupika nokukara nefumadeko pokukanderera kwaJehova? (b) Monkedi musinke hena twa hepa kukanderera?

⁷ Pokukanderera kwaJehova twa hepa kulinunupika nokukara nefumadeko. Morwasinke? Nsene tatu ka uyunga nahompa ndi peresidende, ose natu ka yi rugana monkedi zefumadeko. Jehova, age Karunga Munankondo nadinye, yipo nye twa hepa kulinunupika nokumufumadeka nsene tatu kanderere kwendi. (Genesis 17:1; Episarome 138:6) Twa hepa hena kukanderera kutundilira komutjima kapisi kuruguruka tupu nonkango dononzi.—Mateusa 6:7, 8.

8. Nsene tatu hundire yuma kwaJehova, yisinke hena twa hepa kurugana?

⁸ Ntani nsene tatu kanderere twa hepa kurugana paapa twa hulira mokusikisa mo eyi tuna hundire. Pasihonena, nsene tatu hundire Jehova a tu pe nondya, kapi tatu kara noudwa nokundindira asi a tu pe eyi tuna hepa. Nye twa hepa kurugana. (Mateusa 6:11; 2 Vatesaronika 3:10) Ndi nsene tatu hundire Jehova a tu vatere tu hageke nkareso zondona, twa hepa kunyokera po maukaro aga naga vhura kutuzeda. (Vakorosi 3:5) Tu konakone  mapuro gamwe ava pura kuhamena kukanderera.

9. Kwalye natu kanderera? Yisinke ava tu rongo mwaJohanesa 14:6 kuhamena kukanderera?

⁹ Kwalye natu kanderera? Jesus kwa rongere vasikuli vendi va kanderere ‘kwaGuhyetu gemeguru.’ (Mateusa 6:9) Age kwa tente hena asi: “Nyame nzira nousili nomwenyo. Nagumwe si a wiza kwaTate, age ga hana kupitira pwange.” (Johanesa 14:6) Twa hepa kukanderera kwaJehova kupitira mwaJesus. Yisinke ayi tanta kukanderera kupitira mwaJesus? Mokuninka asi Jehova a tambure makanderero getu, twa hepa kulikida efumadeko kositumbukira somulyo esi ga pa Jesus. Ngamoomu twa yi lirongere, Jesus kwa wizire pevhu mokuyatuzowora kononzo nokonomfa. (Johanesa 3:16; Varoma 5:12) Jehova kwa tura hena Jesus a kare Mupristeli gomunene noMupanguli.—Johanesa 5:22; Vahebeli 6:20.

10. Ngapi omu natu kara nsene tatu kanderere?

¹⁰ Ngapi omu natu kara nsene tatu kanderere? Jehova kapi a tu tantere tu tongamene ndi tu hingire ndi tu sikame. Bibeli kuturonga asi kuvhura tu uyunge naJehova mwankenye mukaro gwefumadeko. (1 Histoli 17:16; Nehemiya 8:6; Ndaniyera 6:10; Marukusa 11:25) Yomulyo po Jehova, twa hepa kuuyunga nendi monkareso zongwa. Kuvhura tu kanderere kuziguruka ndi momutjima, nkenye oku tuna kara ndi nkenye siruwo. Pokukanderera, tu kare nehuguvaro asi Jehova ta tu zuvhu nampili vapeke va dire kutuzuvha.—Nehemiya 2:1-6.

11. Yininke musinke yimwe natu vhura kuuyunga momakanderero getu?

 ¹¹ Yisinke natu uyunga mekanderero? Nkenye eyi ya za Jehova komutjima. Bibeli kutanta asi: “Ta tu zuvhu ntene tu mu hundira eyi yokuliza nompango zendi.” (1 Johanesa 5:14) Kuvhura tu pwagese yinka yetu ndi? Nhi. Kukanderera kwaJehova kuna kara ngwendi kuna kuuyunga nakaume koge gomunene. Kuvhura tu tantere Jehova nkenye eyi yina tu kara komutjima. (Episarome 62:8) Kuvhura tu mu hundire a tu pe mpepo zendi zokupongoka zononkondo zi tu vatere tu rugane youhunga. (Rukasa 11:13) Kuvhura tu hundire hena Jehova nondunge tu ture po matokoro gomawa ntani nononkondo tu lididimikire maudigu. (Jakopo 1:5) Ntani kuvhura tu mu hundire a tu dongwenene po nonzo detu. (Vaefeso 1:3, 7) Kuvhura tu tumbure momakanderero getu vakwetetu nepata lyetu novanavazinyetu mombungakriste.—Yirugana 12:5; Vakorosi 4:12.

12. Yininke musinke yomulyo po natu tumbura momakanderero getu?

¹² Yininke musinke yomulyo po natu tumbura momakanderero getu? Jehova ntani nompango zendi. Twa hepa kumupandura kutundilira komutjima kwanayinye eyi a tu ruganene. (1 Histoli 29:10-13) Twa yi diva oyo, morwa apa Jesus ga kere pevhu, kwa rongere varongwa vendi omu nava kanderera. (Resa Mateusa 6:9-13.) Age kwa va rongere asi pomuhowo va kanderere edina lyaKarunga va li pongere. Ntani ga likidire asi twa hepa kukanderera Uhompa waKarunga u wize yipo mpango zendi zi sike mo pevhu. Konyima zoyo, Jesus ntani ga uyungire nye asi tu kanderere kuhamena yihepwa yetu. Nsene tu tura Jehova nompango zendi muhowo momakanderero getu, tatu likida eyi ya kara nomulyo kwetu.

13. Siruwo sokuhura kupi naga gusa makanderero getu?

 ¹³ Siruwo sokuhura kupi naga gusa makanderero getu? Bibeli kapi za yi uyunga. Kuvhura ga kare makanderero gomasupi ndi gomare, kuliza tupu noukaro. Pasihonena, kuvhura tu gave ekanderero lyesupi komeho zokulya nye lyere nsene tatu pandura Jehova ndi tatu mu tantere maudigu getu. (1 Samwere 1:12, 15) Kapi tuna hara kugava makanderero gomare tu limonekese  komeho zovantu, ngwendi moomu ngava yi rugana vamwe momazuva gaJesus. (Rukasa 20:46, 47) Jehova kapi a hafere makanderero gangoso. Yomulyo po kwendi, tu kanderere kutundilira komutjima.

14. Rungapi natu kanderera, ntani yisinke yina kuturonga eyi kuhamena Jehova?

¹⁴ Rungapi natu kanderera? Jehova kuna hara tu uyunge nendi nkenye apa. Bibeli kuuyunga asi “omu kanderere narunye.” (Mateusa 26:41; Varoma 12:12; 1 Vatesaronika 5:17) Jehova ga liwapaikira kutupurakena. Kuvhura tu mu pandure nkenye ezuva keharo nougavi wendi. Kuvhura tu mu pure hena a tu vyukise nokutunkondopeka nokutuhengagwida. Nsene tu mona mulyo  gokukanderera kwaJehova, ose ngatu ruganesa nkenye mpito tu uyunge nendi.

15. Morwasinke atu uyungire asi “amen” kehagero lyekanderero?

¹⁵ Morwasinke atu uyungire asi “amen” kehagero lyekanderero? Nkango “amen” kutanta asi “yimo” ndi “yi kare ngorooro.” Kuna kara nkedi zokulikida asi eyi tuna uyunga mekanderero usili ntani kuna tundu komutjima. (Episarome 41:13) Bibeli kuturonga asi ya wapa asi kuuyunga “amen” kudameka ndi momutjima kehagero lyekanderero lyomombunga mokulikida asi tuna kwatesa ko eyi vana uyunga.—1 Histoli 16:36; 1 Vakolinte 14:16.

16. Jehova kulimburura makanderero getu ndi?

¹⁶ Jehova kulimburura makanderero getu ndi? Nhi. Bibeli kututantera asi age “kuzuvha makanderero.” (Episarome 65:2) Jehova kuzuvha nokulimburura makanderero govantu wovanzi ntani kugalimburura mononkedi dokulisiga-siga.

17. Ngapi omu Jehova a ruganesa vaengeli novakareli vendi vepevhu mokulimburura makanderero getu?

¹⁷ Pokulimburura makanderero getu, Jehova kuruganesa vaengeli novakareli vendi vepevhu. (Vahebeli 1:13, 14) Pwa kara vantu wovanzi ava va kandererere va pure evatero mokukwata egano Bibeli ano konyima Nombangi daJehova tadi ya va dingura. Bibeli kulikida asi vaengeli nawo kulihameka mo mokudivisa ‘mbudi zongwa’ evhu mudima. (Resa Ehororo 14:6.) Sinzi setu twa kanderera kwaJehova kuhamena udigu wongandi ntani twa gwana evatero kovapuli vakwetetu.—Yisewe 12:25; Jakopo 2:16.

18. Ngapi omu Jehova a ruganese mpepo zendi zokupongoka noBibeli mokulimburura makanderero getu?

 ¹⁸ Jehova kuruganesa mpepo zendi zokupongoka mokulimburura makanderero getu. Apa atu kanderere tu lididimikire maudigu, age kuruganesa mpepo zendi zokupongoka zi tu vyukise nokutunkondopeka. (2 Vakolinte 4:7) Jehova kuruganesa hena Bibeli mokulimburura makanderero getu nokutuvatera tu ture po matokoro gomawa. Apa atu resa Bibeli, kuvhura tu gwane novelise edi nadi tu vatera. Jehova kuvhura hena a tumangede gumwe a gave elimbururo kepongo pokuuyunga yininke eyi tuna hepa ndi pamwe mukuronambunga kuvhura a rese nose etjangwa moBibeli.—Vagarata 6:1.

19. Morwasinke pamwe ayi monekere asi Jehova kapi ana kulimburura makanderero getu?

¹⁹ Pamwe kuvhura tu lipure asi: ‘Morwasinke Jehova ana kudilira kulimburura makanderero gange?’ Diworoka asi age ga diva siruwo esi na limburura nomu na limburura. Age ga diva eyi tuna hepa. Twa hepa kutwikira kukanderera mokulikida asi eyi tuna hundire sili tuna yi hepa ntani asi twa pura mwendi. (Rukasa 11:5-10) Pamwe Jehova kulimburura makanderero getu monkedi omu tuna dili kuyindindira. Pasihonena, kuvhura tu kanderere morwa tuna kara noudigu wounene, nye mevango lyokuugusa po, age kuvhura a tu pe nonkondo tu lididimikire.—Resa Vafilipi 4:13.

20. Morwasinke natu twikilira kukanderera kwaJehova?

²⁰ Ekanderero kuna kara mfumwa zonene ga tu pa Jehova. Tu kareni nye nehuguvaro asi age nga tu zuvha. (Episarome 145:18) Nsene tu twikira kukanderera kwaJehova kutundilira komutjima, ukaume wetu nendi ngau nkondopara.