1. Kupi natu vhura kulironga kuhamena meho?

WA PURAKENA rumwe kombudi nokulipura asi: ‘Ou uzuni kupi una tamba?’ Maudigu noukorokotji kuna kuninkisa vantu va gazare asi uhura wouzuni pepi una kara. Egano olyo usili ndi? Pwa kara nkedi ezi nazi tu vatera tu dive eyi ngayi horoka komeho ndi? Nhi. Jehova ga diva eyi ngayi horoka komeho, ntani age kututantera kupitira moBibeli.—Jesaya 46:10; Jakopo 4:14.

2, 3. Yisinke va here kudiva varongwa Jesus, ntani ngapi ga va limbwilire?

² Apa azi uyunga Bibeli kuhamena uhura wouzuni, kapi azi tamba kouhura wevhu, nye kouhura wovadinikarunga. Jesus kwa rongere asi Uhompa waKarunga ngau ka pangera pevhu. (Rukasa 4:43) Varongwa vendi kwa here kudiva siruwo esi ngau wiza Uhompa, makura tava mu pura asi: “Ezuvake ngayi horoka yene eyi? Sidiviso sewizo lyoge nesi souhura wouzuni sipi so?” (Mateusa 24:3) Jesus kapi ga va tanterere ezuva, nye yininke eyi ngayi horoka komeho zouhura wouzuni. Yininke oyo kuna kuhoroka ngesi.

³ Megaununo eli tatu ka lironga yininke yina kulikida asi ose kuna kuparuka pepi nouhura wouzuni. Nye pomuhowo tatu ka lironga kuhamena yita eyi ya horokere meguru yipo tu kwate egano eyi una donapere uzuni.

4, 5. (a) Yisinke ya horokere meguru konyima zapa va mu tumbire Jesus ngaHompa? (b) Kuliza nEhororo 12:12, yisinke ya horoka morwa Satana va mu zugumina pevhu?

⁴ MEgaununo 8 twa lirongere asi Jesus kwa mu tumbire ngaHompa meguru mo-1914. (Ndaniyera 7:13, 14) Buke zEhororo kufaturura eyi ya horokere asi: “Meguru tamu sikama yita: Mikayera novaengeli vendi va rwise emukongoro novaengeli valyo. Emukongoro nalyo tali va rwisa novaengeli valyo.” * Satana nonompepo donondona kwa va zuguminine pevhu. Vaengeli meguru kwa hefe unene. Nye ngapi pevhu? Bibeli kutanta asi vantu kwa ligwanekera noudigu. Morwasinke? Morwa Muzonaguli kwa handuka unene “morwa ana diva asi siruwo sendi esi sina hupu ko, sisupi!”—Ehororo 12:7, 9, 12.

⁵ Muzonaguli kuna kuretesa po maudigu pevhu. Age ana handuka unene yeeyi siruwo sisupi sina mu hupire ko komeho Karunga nga mu guse po. Tu konakone eyi ga tente Jesus ngayi horoka pomazuva gopouhura.—Tara Mauzera 24.

6, 7. Ngapi nzara noyita yina vhuka?

⁶ Yita. Jesus kwa tente asi: “Nomuhoko ngadi lilimba-limba, ano yi kare yirongo, nayo ngayi lilimba-limba.” (Mateusa 24:7) Vantu wovanzi kwa va dipaga unene moyita mosiruwo setu kupitakana posiruwo sanare. Mbunga zimwe kwa tanta asi kutundilira mo-1914 vantu wokupitakana pemiliyona 100 kwa va  dipaga moyita, vanzi unene kupitakana ava va dipagere monomvhura 1 900 komeho zomvhura 1914. Gazara tupu ruguwo nokukora oku va ligwanekera nako vantu morwa yita!

⁷ Nzara. Jesus kwa tente asi “ngapa kara marumbu.” (Mateusa 24:7) Nampili ngomu pana kara nondya dononzi naina, vantu wovanzi kapi ava gwana nondya dokugwanena po. Morwasinke? Morwa kapi va kara noyimaliwa yokuranda nondya ndi epya lyokulima. Mbunga zoUhaku zomoUzuni kwa tanta asi nkenye mvhura mamiliyona govanona kufa morwa kudira kugwana nondya dokugwanena po.

8, 9. Ngapi mauporofete gaJesus kuhamena makankamo gevhu ntani mauvera ga sika mo?

⁸ Makankamo gevhu. Jesus kwa pumbire hena asi: “Ngaku kara makankamo gomanene gevhu.” (Rukasa 21:11) Makankamo gomanene kuhoroka nkenye mvhura. Kutundilira momvhura 1900, vantu wokupitakana pomamiliyona gavali  kwa va dipaga makankamo gevhu. Nampili ngomu pwa kara mahina aga aga likida asi ngesi ekankamo lyevhu tali ka horoka, simpe sinzi sovantu kufa.

⁹ Mauvera. Jesus kwa pumbire asi: ‘Ngaku kara mahamba gomukagu.’ Ago kulihana usimbu ntani kudipaga vantu wovanzi. (Rukasa 21:11) Nampili ngomu vandokotora va lironga unene, nye simpe pana kara mauvera gomanzi aga ga dira uhaku. Erapoto limwe kwa tanta asi nkenye mvhura vantu mamiliyona kufa koTB nomalaria ntani ezimo lyokusinsana. Monomvhura 40 da ka pita vandokotora kwa gwene mauvera 30 gomape ano gamwe kapi ga kara nouhaku.

10. Ngapi eyi va tjanga mwa-2 Timoteusa 3:1-5 yina ku sika mo naina?

¹⁰ Mwa-2 Timoteusa 3:1-5 kutanta asi: “Pomazuva gopouhura ngapa kara yiruwo yoyidigu.” Mupositoli Paurusa kwa fatwilire nkareso ezi ngava kara  nazo vantu pomazuva gopouhura. Age kwa tente asi vantu

• ngava lihara tupu vene

• ngava dowokera yimaliwa

• ngava linenepeka

• kapi ngava zuvha yovakurona vawo

• kapi ngava paka nkenda

• ngava nyenga yoyiwa

• ngava kara woyimbokauka

• ngava hara mahafo goparutu kupitakanesa omu va hara Karunga

• ngava moneka ngwendi vakareli Karunga nye ngava nyoka kumulimburukwa

11. Kuliza nEpisarome 92:7 yisinke ngayi horokera vadinikarunga?

¹¹ Vantu womomukunda gweni kulikida nonkareso edi ndi? Nonkareso odo, dina vhuka mouzuni mudima. Nye Karunga ntaantani nga ka rugane ko yuma. Age kwa tumbwidira asi: “Mudinikarunga nampili a kure ngwendi  wayi, vadona navenye va ragope, ngava hanagura po navenye nu.”—Episarome 92:7.

12, 13. Yisinke ga tu ronga Jehova momazuva aga gopouhura?

¹² Bibeli kwa pumba asi pomazuva gopouhura mouzuni ngamu zura maudigu noruhepo. Nye Bibeli kwa tanta hena asi ngapa horoka yininke yoyiwa.

¹³ Kukwata egano Bibeli. Muporofete Ndaniyera kwa tjenge asi pomazuva gopouhura ‘wonondunge ngava kwata egano’ usili womoBibeli. (Ndaniyera 12:9, 10) Karunga kuvatera vakareli vendi va kwate nawa egano Bibeli. Jehova kwa yirugana eyi kutundilira mo-1914. Pasihonena age kwa tu ronga tu dive edina nositambo sendi kevhu nosizoweseso neyi ayi horoka ponomfa ntani evhumbuko. Twa lironga hena asi Uhompa waKarunga welike ngau gusa po maudigu getu. Twa lironga omu natu vhura kugwana ruhafo ntani omu natu hafesa Karunga. Nye yisinke atu ruganesa ediwo olyo? Uporofete umwe hena kugava elimbururo.—Tara Mauzera 21 ntani 25.

14. Kupi vana kuzuvhisira mbudi zongwa, ntani wolye vana kuzizuvhisa?

¹⁴ Kuzuvhisira mouzuni mudima. Jesus kwa tente hena kuhamena mazuva gopouhura asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima.” (Mateusa 24:3, 14) Mbudi ezi zongwa kuna kuzizuvhisira moyirongo yokupitakana 230 ntani momaraka gokupitakana 700. Mouzuni mudima Nombangi daJehova edi da tunda “momarudi nagenye nomomakoro nagenye” kuna kuvatera vantu va kwate egano Uhompa waKarunga neyi ngau ka  va ruganena. (Ehororo 7:9) Awo kapi ava pura mfuto. Ngwendi moomu ga yi pumbire Jesus awo kwa va nyenga nokuvahepeka, nye kapi ngava hageka kuzuvhisa.—Rukasa 21:17.

15. (a) Ono yi pura asi ose kuna kuparuka pomazuva gopouhura ndi? Morwasinke? (b) Yisinke ngayi horokera vantu ava ava limburukwa Jehova ntani nava ava dili kumulimburukwa?

¹⁵ Ono yi pura asi ose kuna kuparuka pomazuva gopouhura ndi? Mauporofete gomanzi goBibeli kuna kusika mo. Ntaantani Jehova nga ka hagekese po sirugana sokuzuvhisa mbudi zongwa makura “uhura” ngau wiza. (Mateusa 24:14) Nye yisinke uhura? Awo kuna kara siruwo apa Karunga nga hagekesa po udona poHarumagedoni. Jehova nga ruganesa Jesus novaengeli vendi ngava ya zonagure po nkenye gumwe ogu a dili kulimburukwa naMunwendi. (2 Vatesaronika 1:6-9) Kutunda opo, Satana nonompepo dendi donondona kapi ngava pukisa vantu. Makura navenye ava limburukwa Karunga nokukwatesa koUhompa wendi ngava ka mona omu matumbwidiro gendi gana kusika mo.—Ehororo 20:1-3; 21:3-5.

16. Yisinke no rugana ngomu “uhura” una kuhedera pepi?

¹⁶ Uzuni ou ana kupangera Satana ntaantani u ka hage. Twa hepa nye kulipura asi: ‘Yisinke na hepa kurugana?’ Jehova ana hara o liture mo unene kulironga Bibeli. (Johanesa 17:3) Nombangi daJehova kukara nomapongo nkenye sivike mokuvatera vantu va dive yoyinzi moBibeli. Hetekera ko kuza komapongo nkenye apa. (Resa Vahebeli 10:24, 25.) Nsene ono dimburura asi ono hepa kutura po marunduruko wa  ha tjira kuyirugana. Nsene o tura po marunduruko, elikwatakano lyoge naJehova ngali pama.—Jakopo 4:8.

17. Morwasinke uhura ngau gwanena sinzi sovantu hararasi?

¹⁷ Mupositoli Paurusa kwa tente asi uhura ngau wiza “moomu a wiza muwidi.” (1 Vatesaronika 5:2) Jesus kwa pumbire asi vantu ngava sensa yihorokwa eyi yina kulikida asi ose kuna kuparuka pomazuva gopouhura. Age kwa tente asi: “Moomu tupu ya kere momazuva gaNowa, newizo lyaMunwaMuntu yimo ngali kara. Moomu tupu ngava li tava nu momazuva aga ga hovere ekuruhanzo, nomu tupu ngava likwara-kwara dogoro nekezuva eli ga peramene Nowa memuwato, nye awo va hana kuyikwata egano dogoro noku rwa va gwanenene mo rukuruhanzo, ru va tware navenye, newizo lyaMunwaMuntu yimo ngorooro ngali kara.”—Mateusa 24:37-39.

18. Erondoro musinke ga geve Jesus?

¹⁸ Jesus kwa rondwere asi vantu kapisi va “lizumbilire moyipito nomoyinwa yononkondo noyinka youzuni ou.” Age kwa tente asi uhura ngau wiza hararasi “moomu aru mahuka rutenda.” Yipo ga rondwere asi: “Omu takamese oku tomu kanderere nkenye apa, asi mu gwane nonkondo dokuyoworoka kwanayinye eyi ngayi wiza, nkumwe ngomu ka sikame komeho zaMunwaMuntu.” (Rukasa 21:34-36) Morwasinke ya karera nomulyo tu limburukwe erondoro olyo? Morwa ntaantani uzuni waSatana ngava u zonagure po. Vaava tupu ava limburukwa Jehova naJesus yiwo ngava paruka uhura nokugwana mwenyo gwanarunye mouzuni woupe.—Johanesa 3:16; 2 Peturusa 3:13.