1-3. Sininke musinke atu dili kuvhura kuhenduka natuvenye, ntani ngapi Jehova ga tu zowora?

NGAPI nsene va ku tomena eparu lyoge nalinye modorongo morwa unzoni ou wa dira kurugana? To lizuvhu asi kwato eyi no vhura kurugana ko, yimo ngo fira moomo. Makura konyima to zuvhu asi pweli gumwe ga kara nounankondo wokukuzowora ntani ta ku tumbwidire asi ta ya ku zowora mo. Ngapi no lizuvha?

² Natuvenye vanadorongo ndi vapika wonomfa. Kapi tatu vhuru kuhenduka nomfa. Nye Jehova ga kara nononkondo dokutuzowora mo monomfa. Age kwa tumbwidira asi: “Nkore zokuhulilira ezi ngava zonagura, nomfa.”—1 Vakolinte 15:26.

³ Gazara ruhafo oru ngatu ka kara naro kukaparuka twa hana kufa. Jehova nga tu zowora mo monomfa ntani nga ka vhumbura hena vantu ava va fa nare. Gazadara ko tupu komauwa ogo. Jehova kwa tumbwidira asi “ava vana rara monontoko” ngava paruka hena. (Jesaya 26:19) Eyi yiyo azi tumbura Bibeli asi evhumbuko.

4. (a) Kupi natu gwana ehengagwido nsene tuna fisa gekoro ndi mukwetu? (b) Wolye va kere vakaume vamwe vaJesus?

⁴ Apa atu fisa gekoro ndi mukwetu ose kuguva unene. Kapi atu vhuru kupindura muntu ogo koufe.  Nye Bibeli kutuhengagwida nokutukwafa. (Resa 2 Vakolinte 1:3, 4.) Tu konakone sihorokwa esi sa likida asi Jehova naJesus nawo kuna hara kukapindura vafe keparu. Apa ga kere pevhu, Jesus nga dingura Rasarusa novampanza vendi Malita naMariya. Awo kwa kere vakaume vaJesus. Bibeli kutanta asi: “Jesus kwa here Malita namukurwendi gomukadi naRasarusa.” Nye ezuva limwe Rasarusa ga fire.—Johanesa 11:3-5.

5, 6. (a) Yisinke ga rugene Jesus apa ga mwene ekoro novakaume vaRasarusa kuna kulira? (b) Ngapi tuna kulizuvha pokudiva omu ga lizuvhire Jesus kuhamena nomfa?

⁵ Jesus kwa zire a ka hengagwide Malita naMariya. Apa Malita ga zuvhire asi Jesus kuna kuwiza, yipo ga zire a ka gwanekere nage. Age kwa hefe apa ga mwene Jesus, nye ta mu tantere asi: “Ngano yipo ko kere, ngano mpanzange kapi ka fire.” Malita kwa gazarere asi Jesus ga hulilire kuwiza. Konyima Jesus ta mono Mariya kuna kulira. Apa ga mwene asi vana guwu, nage ya mu gumine unene komutjima makura ta lili. (Johanesa 11:21, 33, 35) Nage ga lizuvhire kukora oku atu ligwanekere nako nsene tuna fisa.

⁶ Ayo kutuhengagwida kudiva asi Jesus nage kulizuvha kukora kuhamena nomfa. Ntani Jesus ga lifana noGuhwe. (Johanesa 14:9) Jehova ga kara nononkondo dokugusa po nomfa, ntaantani nga ka di guse po.

7, 8. Morwasinke Malita ga dilire kuhara va guse ko emanya kontoko zaRasarusa, nye yisinke ga rugene Jesus?

⁷ Apa Jesus ga zire kontoko ezi va rangekere simpu saRasarusa kwa ka gwene vana zedire ko emanya. Jesus  ta tanta asi: “Tundiseni ko emanya!” Malita kapi ga here, morwa simpu saRasarusa kwa kere mo mazuva gane. (Johanesa 11:39) Malita kapi ga divire eyi ga here kurugana Jesus.

⁸ Jesus ta tantere Rasarusa asi: “Pwaga mo!” Malita naMariya kwa va tetukisire. “Nakufa makura ta pwaga mo, nompadi nomawoko kuna yi dingi nomakehe.” (Johanesa 11:43, 44) Rasarusa kwa mu pindwire koufe! Vakaume nekoro lyendi tava mu hamberere nokumulidingira. Aso kwa kere sitetu sosinene esi ga rugene Jesus.

9, 10. (a) Kupi ga gwene Jesus nonkondo dokupindura vantu koufe? (b) Morwasinke ya karera nomulyo yihorokwa yomavhumbuko?

⁹ Jesus kwa pindwire vantu koufe nononkondo damwene ndi? Hawe. Jesus kwa kanderere kwaJehova komeho a pindure Rasarusa koufe, ntani Jehova ga mu pere nonkondo dokumuvhumbura. (Resa Johanesa 11:41, 42.) Rasarusa kapisi yige gelike ga pindwire koufe. Bibeli kututantera hena kuhamena mukadona gonomvhura 12 ogu ga verere. Oguhwe Jairusa kwa likwamberere kwaJesus a ka mu verure. Mukadona ogu yige gelike munwendi ga kere. Age simpe kuna kuuyunga naJesus, vantu tava wiza tava mu tantere asi: “Munoge ana dogoroka. Yinke hena ono kurorwera Murongi?” Nye Jesus ta tantere Jairusa asi: “Gwa ha ku pwaga, pura tupu.” Makura Jesus ta zi kembo lyaJairusa. Apa ga ya sikire, Jesus kwa ya gwene vantu kuna kulira makura ta va tantere asi:  “Mwa ha lira, kapi ana fu, kuna rara.” Oguhwe nozina kapi va kwete egano eyi ga tembe Jesus. Makura Jesus novakurona womukadona tava hwilire monzugo omu sa kere simpu somukadona, makura Jesus ta mu kwata kewoko ta tanta asi: “Mukadona, pinduka.” Gazara tupu omu va hefe vakurona vendi apa ga pindukire nokugenda. Jesus kwa pindwire munwawo koufe! (Marukusa 5:22-24, 35-42; Rukasa 8:49-56) Kutunda ezuva olyo nkenye apa ngava tara munwawo vakurona ngava diworoka eyi ga va ruganena Jehova kupitira mwaJesus. *

¹⁰ Vantu ava ga pindwire Jesus koufe konyima va ya fire hena. Nye kuresa yihorokwa oyo mulyo morwa kutupa ehuguvaro. Ayo kuturonga asi Jehova ana hara kukavhumbura vantu.

11. Yisinke Muudisi 9:5 za faturura eyi ya horokerere Rasarusa?

¹¹ Bibeli kutanta asi “vafe kutupu eyi va diva.” Rasarusa nage kwato eyi ga divire apa ga fire. (Muudisi 9:5) Kwa fene ngwendi kwa rere moomu ga tente Jesus. (Johanesa 11:11) ‘Kutupu eyi ga divire’ apa ga kere montoko.

12. Yisinke ya likidire asi Rasarusa sili va mu pindwire koufe?

¹² Apa Jesus ga pindwire Rasarusa koufe, sinzi sovantu va yi mwene, nampili nonkore dendi. Rasarusa ga  kere hena muzuni, eyi ya likidire sili asi age va mu pindwire koufe. (Johanesa 11:47) Vantu ava va zire va ka dingure Rasarusa yipo va yi pulire asi Jesus kwa mu tumine Karunga. Nye vamwe ava va nyengere Jesus kwa here kudipaga Jesus naRasarusa.—Johanesa 11:53; 12:9-11.

13. Morwasinke natu pulira asi Jehova nga ka pindura vantu koufe?

¹³ Jesus kwa tente asi “navenye ava va kara monontoko” ngava pwaga mo. (Johanesa 5:28) Navenye ava nga diworoka Jehova ngava va pindura koufe. Nye Jehova sili nga vhura kuvadiworoka ndi? Nampili ngomu pwa kara nombungururu dononzi, Bibeli kutanta asi Jehova kuditumbura nkenye zimwe kedina lyazo. (Resa Jesaya 40:26.) Nsene Jehova kuvhura kudiworoka nkenye mbungururu, age nga vhura hena kudiworoka vantu ava nga ka pindura koufe. Ntani Jehova yige Musiti, age ga kara nononkondo dokuyirugana.

14, 15. Yisinke adi tu rongo nonkango daJoba kuhamena evhumbuko?

¹⁴ Mugara gomulimburukwi Joba ga yi pulire asi vafe ngava va pindura koufe. Age kwa pulire asi: “Muntu nsene ana fu, kuvhura hena a tengwire komwenyo ndi?” Makura ta tantere Jehova asi: “Ngo zigide nge, ame ngani ku limburure makura ngo hafere nge ame siungwa soge.” Joba ga yi divire asi Jehova kuna hara kukapindura vantu koufe.—Joba 14:13-15.

¹⁵ Ngapi ono kulizuvha kuhamena evhumbuko? Kuvhura o lipure asi: ‘Vanekoro novakwetu ava va fa, nawo ngava ka va pindura koufe ndi?’ Ayo kutuhengagwida pokudiva asi Jehova ana hara kukapindura  vantu koufe. Tu konakone eyi za uyunga ko Bibeli oku ngava ka kara ntani nava ngava ka vhumbura.

16. Eparu musinke ngava ka hafera ava ngava ka pindura koufe?

¹⁶ Vantu owo va pindwire nare koufe kwa tungire hena nomakoro gawo paapa pevhu. Eyi yiyo ngayi ka horoka hena komeho. Nye evhumbuko lyokomeho ngali pitakana lyanare. Morwa vantu ava ngava pindura koufe ngava paruka narunye pevhu, kapi ngava fa hena. Ntani ngava paruka mouzuni wouwa kupitakana ou tuna kara ngesi. Amo kapi ngamu kara yita noukorokotji ntani uvera.

17. Wolye ngava ka pindura koufe?

¹⁷ Wolye ngava ka pindura koufe? Jesus kwa tente asi “ngava zuvha ezwi lyendi navenye ava va kara monontoko makura tava pwaga mo.” (Johanesa 5:28, 29) Ntani Ehororo 20:13 kutanta asi: “Efuta makura tali gava vafe ava va kere mo.” Vantu wovanzi ngava ka va pindura koufe. Mupositoli Paurusa kwa tente asi “vantu navenye, va kare vawa ndi vadona, ngava va pindura koufe.” (Resa Yirugana 24:15.) Yisinke adi tanta nonkango odo?

18. Wolye “vawa” ava ngava ka pindura koufe?

¹⁸ “Vawa” kwa tamba kovakareli wovalimburukwi vaJehova ava va parukire komeho a wize Jesus pevhu. Nowa naAbirahamu naSara naMosesa naRutu ntani Esitera ngava ka va pindura koufe nokukaparuka paapa pevhu. Kuvhura kuresa kuhamena vagara  novakadi owo moVahebeli egaununo 11. Ngapi kuhamena vakareli wovalimburukwi vaJehova ava vana kufa ngesi? Nawo kuna kara “vawa” ava ngava ka pindura koufe.

19. Wolye “vadona”? Mpito musinke nga ka va pa Jehova?

¹⁹ “Vadona” kwa tamba kovantu wovanzi ava va  fire awo va hana kugwana mpito zokudiva Jehova. Nye Jehova kapi ga divara vantu owo. Age nga ka va pindura koufe yipo ngava ka gwane mpito zokulironga kumuhamena nokumukarera.

20. Morwasinke vantu vamwe ngava dilira kuvapindura koufe?

²⁰ Ngoso vantu navenye ava va fa ngava ka va pindura koufe ndi? Hawe. Jesus kwa tente asi vantu vamwe kapi ngava va vhumbura. (Rukasa 12:5) Nye yilye ogu nga tokora asi muntu va mu pindure koufe? Jehova yige nga tokora, nye ga gava hena nonkondo kwaJesus “a kare Mupanguli govanamwenyo novafe.” (Yirugana 10:42) Nkenye ogu va pangura asi mudinikarunga ntani kapi ga hara kulitezurura kapi ngava mu pindura koufe.—Tara Mauzera 19.

21, 22. (a) Rutu musinke ngava kara naro ava ngava pindwira meguru? (b) Yilye muntu gokuhova kugwana evhumbuko lyemeguru?

²¹ Bibeli kutanta asi vantu vamwe ngava ka kara meguru. Ava ngava ka kara meguru kapi ngava va pindura nomarutu gopanyama. Nye awo ngava va pindura nomarutu gopampepo nokukakara meguru.

²² Jesus yige muntu gokuhova kugwana evhumbuko lyemeguru. (Johanesa 3:13) Konyima zapa ga fire Jesus mazuva gatatu, Jehova ga mu pindwire koufe. (Episarome 16:10; Yirugana 13:34, 35) Jesus kapi va mu pindwire norutu ropanyama. Mupositoli Peturusa kwa faturura asi “age kwa mu dipagere parutu, nye Karunga kwa mu pindwire koufe pampepo.” (1 Peturusa 3:18) Jesus kwa mu pindwire koufe ngomuntu  gopampepo. (1 Vakolinte 15:3-6) Bibeli kutanta asi kapisi yige gelike nga gwana evhumbuko eli.

23, 24. Wolye “mbungagona” ezi ga tumbwire Jesus, ntani awo vangapi?

²³ Komeho va ka mu dipage, Jesus kwa tanterere varongwa vendi wovalimburukwi asi: “Ame kuna kuza ni ka mu wapaikire uturo.” (Johanesa 14:2) Eyi kutanta asi varongwa vamwe vaJesus ngava ka kara kumwe nage meguru. Vangapi? Jesus kwa tente asi sivaro sawo sisesu, awo “mbungagona.” (Rukasa 12:32) Mupositoli Johanesa ga tumbwire sivaro oso apa ga mwene Jesus ‘kuna sikama pondundu zaSiyoni meguru kumwe novantu mayovi efere nonomurongo ne nane.’—Ehororo 14:1.

²⁴ Siruwoke ngava gwana evhumbuko ava 144 000? Bibeli kutanta asi eyi kwa horokere konyima zapa ga tamekere Jesus kupangera meguru. (1 Vakolinte 15:23) Ose kuna kuparuka mosiruwo oso, sinzi sowo 144 000 va va pindwira nare keparu lyemeguru. Ano ava vana hupu po pevhu nsene va fa kuvapindwira poopo keparu lyemeguru. Nye sinzi sovantu ngava va pindwira keparu lyepevhu moParadisa.

25. Yisinke ngatu ka lironga megaununo lyokukwama ko?

²⁵ Ntaantani Jehova nga ka tu zowore mo monomfa nokudihanagura po dogoro narunye. (Resa Jesaya 25:8.) Nye yisinke ngava ka rugana mo ava ngava za meguru? Bibeli kutanta asi ngava ka pangera kumwe naJesus mepangero lyoUhompa. Ngatu ka lironga epangero olyo megaununo lyokukwama ko.