1. Yisinke no lipura konyima zokulironga buke ezi?

WA LIRONGA mausili gomanzi mobuke ezi, ngwendi etumbwidiro lyaKarunga lyomwenyo gwanarunye, noukaro wovafe ntani evhumbuko. (Muudisi 9:5; Rukasa 23:43; Johanesa 5:28, 29; Ehororo 21:3, 4) Nampo wa tameka kuza komapongo goNombangi daJehova ntani wa dimburura asi ukareli wawo usili. (Johanesa 13:35) Pamwe wa tameka kutunga po ukaume naJehova Karunga nokutokora kumukarera. Makura  kuvhura o lipure asi: ‘Yisinke nani rugana ngesi ni karere Karunga?’

2. Morwasinke mugara gomoEtiyopiya ga harerere kumukuhwa?

² Olyo yilyo epuro ga lipulire mugara gomoEtiyopiya ogu ga parukire mosiruwo saJesus. Konyima zapa ga vhumbukire Jesus, murongwa gwendi Filipusa kwa zuvhisilire mugara ogo nokumulikida asi Jesus yige Mesiyasa. Mugara ogo ya mu gumine komutjima eyi ga lirongere, makura ta tanta asi: “Mema gaga, yinke hena nayi limba po kukuhwa nge?”—Yirugana 8:26-36.

3. (a) Yisinke ga tanterere Jesus varongwa vendi? (b) Ngapi omu muntu va hepa kumukuhwa?

³ Bibeli kuronga asi nsene tuna hara kukarera Jehova twa hepa kugwana ekuho. Jesus kwa tanterere varongwa vendi asi: ‘Ka ninkeni varongwa nokukavakuhwa.’ (Mateusa 28:19) Jesus mwene ga tulire po sihonena mokugwana ekuho. Age kapi va mu sansere tupu mema, nye kwa mu dividire rutu narunye. (Mateusa 3:16) Yipo nye Vakriste naina kuvakuhwa pokuvadivida momema.

4. Yisinke no likida pokugwana ekuho?

⁴ Pokugwana ekuho to likida moyitarameho asi ono hara kukara kaume kaKarunga nokumukarera. (Episarome 40:7, 8) Yipo nye kuvhura o lipure asi: ‘Yisinke na hepa kurugana mokugwana ekuho?’

5. (a) Yisinke wa hepa kurugana komeho zokugwana ekuho? (b) Morwasinke mapongo ga karera nomulyo?

⁵ Komeho zokugwana ekuho wa hepa kudiva Jehova naJesus. Ove wa tameka kuvadiva pokulironga  Bibeli. (Resa Johanesa 17:3.) Nye yinzi simpe yokulironga. Bibeli kutanta asi wa hepa ‘kuzura nediwo’ lyompango zaJehova. (Vakorosi 1:9) Kuza nkenye apa komapongo goNombangi daJehova ngayi ku vatera o ture po ukaume naJehova. Yipo nye mulyo kuza komapongo nagenye.—Vahebeli 10:24, 25.

6. Ediwo lyoBibeli lyokuhura kupi wa hepa kukara nalyo komeho zokugwana ekuho?

⁶ Nampili ngoso, Jehova kapi ana kundindira asi o dive nayinye yomoBibeli ntani ngo gwana ekuho. Age kapi ga ndindilire mugara gomoEtiyopiya a dive nayinye komeho zokugwana ekuho. (Yirugana 8:30, 31) Kapi ngatu hageka kulironga kuhamena Karunga. (Muudisi 3:11) Nye komeho zokugwana ekuho, wa hepa kudiva nokutambura marongo gopomuhowo goBibeli.—Vahebeli 5:12.

7. Ngapi lya ku vatera elirongo lyoBibeli?

⁷ Bibeli kutanta asi: “Nsene o pira epuro, nokuza si Karunga komutjima.” (Vahebeli 11:6) Yipo nye komeho zokugwana ekuho wa hepa kukara nepuro. Bibeli kututantera asi vantu womositata saKolinte apa va zuvhire mbudi zongwa ezi va zuvhisire varongwa vaJesus awo kwa “pulire, makura tava va kuhu.” (Yirugana 18:8) Nove elirongo lyoBibeli lya ku vatera o ture epuro momatumbwidiro gaKarunga ntani monzambo zaJesus ezi za tu zowora kononzo nokonomfa.—Josuwa 23:14; Yirugana 4:12; 2 Timoteusa 3:16, 17.

8. Yisinke ngayi ku tumangeda o tantere ko wopeke eyi wa lironga?

⁸ Ngomu ono kulironga yoyinzi moBibeli nokumona omu zina kukuvatera meparu, epuro lyoge ngali  pama. Ngo hara kutantera ko wopeke eyi wa lironga. (Jeremiya 20:9; 2 Vakolinte 4:13) Nye wolye no tantera ko mbudi zongwa?

9, 10. (a) Wolye no tameka kutantera ko mbudi zongwa? (b) Yisinke no rugana nsene ono hara kutameka kuzuvhisa kumwe nombungakriste?

⁹ Kuvhura o tameke kutantera ko vekoro novakaume novamusinda, ntani nava o rugana nawo. Nye yi rugana monkedi zongwa. Makura konyima ngo ya tameka kuzuvhisa kumwe nombungakriste. Nsene ono hara nove kutameka kuzuvhisa kumwe nombungakriste, tantera ogu a ku rongo Bibeli. Nsene nga mona asi ono wapere kukara muzuvhisi ntani nove kuna kuparuka kuliza nonompango doBibeli, makura namuvenye ngomu ka hingira kumwe novakuronambunga vavali womombungakriste.

¹⁰ Yisinke ngomu zogera novakuronambunga? Vakuronambunga ngava zogera nove va tare nsene wa kwata egano nokupura marongo gopomuhowo goBibeli, nsene kuna kuparuka kuliza neyi azi rongo, ntani nsene sili ono hara kukara gumwe goNombangi daJehova. Vakuronambunga kwa hara navenye mombungakriste, kukwatera mo nove, yipo nye wa ha tjira kuzogera nawo. (Yirugana 20:28; 1 Peturusa 5:2, 3) Konyima zokuhingira novakuronambunga, ngava ku divisa nsene asi ono wapere kutameka kuzuvhisa kumwe nombungakriste.

11. Morwasinke no tulira po marunduruko komeho zokutameka kuzuvhisa kumwe nombungakriste?

¹¹ Pamwe vakuronambunga kuvhura va ku fatwilire asi wa hepa kutura po marunduruko komeho zokutameka  kuzuvhisa kumwe nombungakriste. Morwasinke ya karera nomulyo asi o ture po marunduruko ogo? Morwa apa atu tantere vantu kuhamena Jehova, ose kumukarera po. Yipo nye ya karera nomulyo asi tu paruke monkedi ezi azi mu fumadeke—1 Vakolinte 6:9, 10; Vagarata 5:19-21.

12. Morwasinke natuvenye twa hepera kulitezurura?

¹² Koyili yimwe wa hepa simpe kurugana komeho zokugwana ekuho. Mupositoli Peturusa ga uyungire asi: “Litezurureni nye, mu tengure kwaKarunga, nonzo deni ngadi dongonoke po.” (Yirugana 3:19) Kulitezurura kutanta yininke yivali. Sokuhova, twa hepa kulivera koyininke yoyidona eyi twa rugana. Pasihonena nsene muntu nga hondere ga hepa kulitezurura. Nampili wa hetekera ko kurugana yoyiwa simpe wa hepa kulitezurura, morwa natuvenye kuzona ntani twa hepa kuhundira Karunga a tu gusire po.—Varoma 3:23; 5:1.

13. Yisinke ayi tanta hena kulitezurura?

¹³ Sauvali, kulitezurura kutanta hena asi wa hepa kunyokera yirugana yoyidona nokutameka kurugana yoyiwa. Ngomu ono kulironga Bibeli kuvhura o dimburure asi kodili nonkareso dimwe wa hepa kusiga. Wa ha liranga kutura po marunduruko nokutameka kurugana yoyiwa.

14. Ngapi omu no ligava kwaKarunga?

¹⁴ Sininke somulyo no hepa kurugana komeho zokugwana ekuho kuna kara kuligava kwaJehova.  Muntu kuligava kwaJehova pokukanderera kwendi nokumutumbwidira asi ngo mu karera gelike nokutura muhowo eyi ga hepa meparu lyoge.—Deuteronomium 6:15.

15, 16. Yisinke ayi tumangeda muntu a ligave kwaKarunga?

¹⁵ Kutumbwidira kukarera Jehova gelike kwa fana ngwendi kutumbwidira muntu ogu wa hara mokukara nage eparu lyoge nalinye. Tu ninkeni nye asi mukadi nomugara kuna kulivandekera. Ngomu mugara ana kudiva nawa mukadi ta mu hara unene, nokuhara kumukwara. Nampili ngomu alyo etokoro lyenene nye mugara ta yi rugana morwa ga hara mukadi ogo.

¹⁶ Ngomu ono kulironga kuhamena Jehova ngo mu hara ntani ngo hara kumukarera. Eyi ngayi ku tumangeda mokumutumbwidira kumukarera gelike mekanderero. Bibeli kutanta asi nkenye ogu ana hara kukwama Jesus ga hepa “kulidina mwene.” (Marukusa 8:34) Yisinke ayi tanta oyo? Ayo kutanta asi to limburukwa Jehova mevango lyokukwama yitambo nomadowo ganyamoge, morwa kumulimburukwa kuna kara sininke somulyo po meparu lyoge.—Resa 1 Peturusa 4:2.

17. Morwasinke vamwe ava dilire kuligava kwaJehova?

¹⁷ Vamwe kapi ava ligava kwaJehova, morwa kukara nosinka asi kapi ngava sikisa mo etumbwidiro lyawo, makura tava mu guvisa. Ntani vamwe kugazara asi kuvhura va rugane nkenye eyi vana hara, ano Jehova kapi nga va pangura morwa kapi va ligava kwendi.

18. Yisinke ngayi ku vatera o dire kukara nosinka asi to guvisa Jehova?

 ¹⁸ Eharo lyoge lyokuhara Jehova ngali ku vatera o dire kukara nosinka asi ngo mu guvisa. Morwa wa mu hara ove ngo rugana paapa wa hulira mokusikisa mo etumbwidiro lyoge. (Muudisi 5:4; Vakorosi 1:10) Kapi ngo gazara asi ayo udigu unene kusikisa mo nompango daJehova. Mupositoli Johanesa kwa tjenge asi: “Eharo lyetu lyokuhara Karunga lyeli asi, ose atu sikise mo yipango yendi. Ano yipango yendi, kapi ya paka udigu.”—1 Johanesa 5:3.

19. Morwasinke no dilira kukara nowoma wokuligava kwaJehova?

¹⁹ Kapi wa hepa kukara gokusikilira mo mokuligava kwaJehova. Age kapi a tu pura tu rugane eyi natu dira kuvhura kurugana. (Episarome 103:14) Nga ku gamena nokukuvatera. (Jesaya 41:10) Huguvara mwaJehova nomutjima goge nagunye, age nga “ku likida nzira zouhunga.”—Yisewe 3:5, 6.

20. Konyima zokuligava kwaKarunga, yisinke wa hepa kurugana?

²⁰ Ono liwapaikire kuligava nyamoge kwaJehova ndi? Konyima zokuligava kwaJehova mekanderero, wa hepa kugwana ekuho.

21, 22. Ngapi no ‘gava undipo’ wepuro lyoge moyitarameho?

²¹ Divisa muwapaiki gombunga zovakuronambunga asi ono ligava kwaJehova mekanderero, ntani ono hara kugwana ekuho. Age nga wapaika vakuronambunga vamwe mokurugana nove mapuro gamwe kuhamena marongo gopomuhowo goBibeli. Nsene vakuronambunga owo va yi kwatesa ko asi ono wapere kugwana ekuho, ngava ku tantera asi ngo gwana ekuho  posigongi soNombangi daJehova. Posigongi kugava po siuyungwa esi asi faturura eyi ali tanta ekuho. Muuyungi kupura vagwani ekuho navenye mokulimburura mapuro gavali. Pokulimburura mapuro ogo ove ‘kugava undipo’ wepuro lyoge moyitarameho.—Varoma 10:10.

 ²² Makura ngo gwana ekuho pokukudivida momema rutu roge narunye. Ekuho kulikida kwanavenye asi ove ono ligava kwaJehova ntani ove ngesi gumwe goNombangi daJehova.

23. Yisinke ayi tanta kukuhwira “medina lyaGuhwe neli lyoMuna neli lyoMpepo zoKupongoka”?

²³ Jesus kwa tente asi varongwa vendi ngava va kuhwira “medina lyaGuhwe neli lyoMuna neli lyoMpepo zoKupongoka.” (Resa Mateusa 28:19.) Yisinke ayi tanta eyi? Kutanta asi ono dimburura unankondo waJehova nositumbukirwa saJesus mositambo saKarunga, nomu Karunga a ruganesa mpepo zokupongoka mokusikisa mo mpango zendi.—Episarome 83:18; Mateusa 28:18; Vagarata 5:22, 23; 2 Peturusa 1:21.

24, 25. (a) Yisinke ali fanekesa ekuho? (b) Yisinke ngatu ka zogera megaununo lyokuhulilira?

²⁴ Ekuho kufanekesa sininke somulyo unene. Pokukudivida momema, kufanekesa asi ove ono fu ndi ono sigi nkareso zoge zanare. Pokuzauka momema, to tameke neparu lyepe lyokurugana mpango zaKarunga. Ekuho kulikida asi ngo karera Jehova kutunda opo. Diworoka hena asi ove kuna ligava kwaJehova mwene, kapisi kosirugana ndi kombunga ndi kovantu.

²⁵ Eligawo ngali ku vatera o tunge po ukaume naKarunga. (Episarome 25:14) Nye kapi yina kutanta asi nsene muntu ta gwana ekuho nga gwana mwenyo gwanarunye. Mupositoli Paurusa kwa tjenge asi: “Kovekedeni nye mokuruganena eparu lyeni noutjirwe nekankamo.” (Vafilipi 2:12) Ekuho alyo kuna kara etameko. Ngapi no vhura kutwikira kukara pepi naJehova? Egaununo lyokuhulilira mobuke ezi ngali ka limburura epuro olyo.