1, 2. Ngapi uzuni wa rundurukire kutundilira momazuva gaNowa, ntani ngapi Abiramu ya mu kundamene?

ABIRAMU ta tara ntembeli zonene ezi za kara mositata sawo saUru. * Vantu kuna kuzogera montembeli ozo ano musi kuna kututumuka. Vapristeli wokukarera sikarunga sokwedi kuna kuzamba nonzambo dawo. Abiramu ta piruka nokulipuka komutwe morwa kapi yina kumuhafesa. Apa ana kupita mositata aze kembo, ta gazara omu ukareli woyikarunga woyimpempa una vhuka moUru kutundilira momazuva gaNowa.

² Nowa kwa fire nomvhura mbali komeho Abiramu va ya mu hampuruke. Apa Nowa nepata lyendi va pwege memuwato konyima zoruhanzo, ta zamba nzambo kwaJehova Karunga makura Jehova ta tura ekongoro komaremo. (Gen. 8:20; 9:12-14) Posiruwo sina, mouzuni mudima kwa kere mo ukareli wousili tupu. Nye konyima zonomvhura dononzi, vantu va hagekere kukarera Jehova. Vantu ngava karere vakarunga wovapagani. Nampili Tera, oguhwe vaAbiramu, ngava karere yikarunga yoyimpempa, nampo vene ngava yi hongo.—Jos. 24:2.

3. Sikara musinke ga tungire po Abiramu, ntani yisinke natu lirongera ko?

³ Abiramu ga lisigire kovantu navenye, morwa age ga kere nepuro mwaKarunga. Konyima, mupositoli Paurusa kwa tumbwire Abiramu asi “guhyanavenye ava ava pura” (Resa Varoma 4:11.) Tu konakoneni eyi ya vaterere Abiramu a kondopeke epuro lyendi. Nose kuvhura tu lirongere ko omu natu nkondopeka epuro lyetu.

4, 5. Kwalye Abiramu ga lirongere kuhamena Jehova, ntani ngapi tuna yi diva?

⁴ Ngapi Abiramu ga ya lirongere kuhamena Jehova Karunga? Twa diva asi Jehova ga kere novakareli wovalimburukwi pevhu momazuva gena. Sema kuna kara gumwe gwawo. Nampili ngomu ga dilire kukara mbeli zaNowa, nkenye apa age kumutumbura gokuhova, morwa kwa kere mugara gepuro. * Konyima zoruhanzo, Nowa kwa tumbwire Jehova asi: “Karunga gwaSema.” (Gen. 9:26) Sema kwa likidire efumadeko kwaJehova nokoukareli wousili.

⁵ Abiramu ga divire Sema ndi? Yimo, ga mu divire. Apa Abiramu ga kere mumati, Sema kwa kere nonomvhura 400. Sema ga simwitilire Abiramu omu ga mwene udinikarunga komeho zEkuruhanzo, nomu lya zonagwire po vantu wovadona pevhu, nomu vantu va ya vhukire hena pevhu, ntani nomu Nimuroto ga kere murwanesi nokutunga ruhungu rwaBabironi. Sema kapi ga lihamekere mo metungo lyoruhungu, yipo nye apa Jehova ga piyaganekere maraka govatungi woruhungu, Sema nepata lyendi kwa twikilire kuuyunga eraka lyokuhova eli nga uyunga Nowa. Abiramu kwa kere gemezimo lyaSema. Abiramu nga fumadeke Sema. Sema naAbiramu kwa kere kumwe dogoro moukurupe wawo. Yipo nye Abiramu nampo ga lirongere kuhamena Jehova kwaSema.

6. (a) Ngapi Abiramu ga yi likidire asi ga kwete egano eyi lya horokerere Ekuruhanzo? (b) Eparu musinke ga haferere Abiramu kumwe naSarayi?

⁶ Abiramu ga kwete egano eyi Ekuruhanzo lya horokerere. Yipo ga tokomenene kukara momalikwatakano naKarunga ngwendi moomu ga yi rugene Nowa. Oyo yiyo Abiramu ga nyokerere kukarera yikarunga yoyimpempa nokulisiga novantu nekoro lyendi womoUru. Konyima ta ya gwana mukadi. Ta kwara Sarayi, mukadi gomuwa ogu ga kere nepuro  mwaJehova. * Nampili ngomu ga kere nganze, awo va hefe kumwe kukarera Jehova. Awo kwa rerere hena Roto, munwagona gwaAbiramu.

7. Ngapi vasikuli vaJesus nava honena Abiramu?

⁷ Abiramu kapi ga sigire Jehova nokukarera yikarunga yoyimpempa yomoUru. Nage naSarayi kapi ngava honene eyi ngava rugana vantu womositata oso. Nsene tuna hara kukara nepuro lyokupama, twa hepa kukara nonkareso zangoso. Nose twa hepa kulisiga novantu womouzuni. Jesus kwa tente asi vasikuli vendi kapi ngava “hamena kouzuni” makura uzuni ngau va nyenga. (Resa Johanesa 15:19.) Nsene ekoro lyoge ndi womomukunda va ku nyenga morwa etokoro lyoge lyokukarera Jehova, wa ha lizuvha udona asi nyovelike ono kara. Ove kuna kara momalikwatakano naKarunga moomu ga yi rugene Abiramu naSarayi.

8, 9. (a) Yisinke ya mu horokerere Abiramu ezuva limwe? (b) Mbudi musinke ga gwene Abiramu kwaJehova?

⁸ Ezuva limwe, Abiramu ta gwana mbudi zokutunda kwaJehova Karunga. Bibeli kapi za uyunga momunene omu Abiramu ga gwene mbudi ozo, nye kwa tanta tupu asi “Karunga gouyerere” kwa monekerere mugara ogo gepuro. (Resa Yirugana 7:2, 3.) Nampo kupitira momuengeli, Abiramu ga mwene uyerere woMupangeli gwanayinye. Abiramu ga tetukire pokumona malisigo pokatji kaKarunga gomunamwenyo noyikarunga yoyimpempa eyi ngava karere vantu.

⁹ Mbudi musinke Jehova ga tanterere Abiramu? “Tunda mo mosirongo seni nemekoro lyeni, o ze kosirongo esi ngani ku likida.” Jehova kapi ga tanterere Abiramu sirongo esi na za. Abiramu ga hepere kusiga sirongo sawo nekoro lyendi. Mompo zawo, ekoro kwa kere mulyo unene. Posiruwo sina, muntu nsene a diruka a sige ekoro lyendi kwa kere etokoro lyedona unene.

10. Morwasinke ya karerere udigu kwaAbiramu naSarayi kusiga sirongo sawo Uru?

¹⁰ Ya kere udigu kwaAbiramu kusiga sirongo sawo saUru. Aso kwa kere sitata soungawo. (Tara kakende “ Sitata esi ga sigire Abiramu naSarayi.”) Kuliza novasimaguli, moUru kwa  kere mo mambo gomawa, gamwe kwa kere nononkondwa dononzi mokukara epata novakareli vawo, neharango va lyalyakanesa nomamanya. Mositata saUru mwa kere nomuliu domema noyikasaise. Abiramu naSarayi kapisi vadinkantu va kere, age kwa kere konomvhura dokoyiha 70 ano mukadendi koyiha 60. Age kwa here kupakera mbili Sarayi, ngwendi moomu mugara gomuwa na yi harera mukadendi. Gazara tupu mapuro aga va lipulire nosinka esi va kere naso kuhamena mbudi ezi va gwene. Abiramu ga hefe apa Sarayi ga tambwire mbudi ozo. Ngwendi Abiramu, Sarayi nage ga liwapaikilire kusiga sirongo sawo.

11, 12. (a) Mawapaiko nomatokoro musinke va hepere kutura po komeho va sige Uru? (b) Yisinke ya horokere apa lya sikire ezuva lyokukatuka?

¹¹ Etokoro eli ga tulire po Abiramu naSarayi, mwa hamenene yirugana yoyinzi. Awo va hepere kurongera nokuliwapaikira rugendo rwawo. Yisinke va hepere kusimba morugendo rwawo neyi va hepere kusiga? Ngapi kuhamena ekoro lyawo, ngwendi Tera, oguhwe vaAbiramu, ava va kurupire? Awo kwa tokwere kupitura Tera va ka mu pakere mbili. Tera ga kwatesere ko etokoro lyaAbiramu, morwa Bibeli kwa tumbura asi Tera kwa gusire epata lyendi va tunde mo moUru. Tera ga zumbire yikarunga yoyimpempa. Roto, munwagona gwaAbiramu nage kwa zire nawo.—Gen. 11:31.

¹² Ezuva lyokukatuka tali siki. Tava rondeke nomurongero dawo poyidongili nonongameru. Ta va pongeke yiunda yawo, ano vemepata novakareli vana liwapaikire. * Awo kuna kundindira Abiramu a gave mpangera va katuke. Siruwo tasi siki, navenye tava tameke kugenda va sige sitata saUru.

13. Ngapi sinzi sovakareli vaJehova naina vana kulikida mpepo sokulifana ngwendi zaAbiramu naSarayi?

¹³ Naina, sinzi sovakareli vaJehova kutokora kudirukira oku kuna kara hepero zovazuvhisi woUhompa. Vamwe kutokora kulironga eraka lyapeke yipo va lihameke unene moyirugana yokuzuvhisa. Ndi kuvhura va tokore kuheteka marupe gapeke gokuzuvhisa. Matokoro gangoso ga hepa mpepo zelizambero neharo lyokusiga eparu lyewa. Ava ava likida mpepo zangoso kutura po sihonena sosiwa ngwendi Abiramu  naSarayi. Nsene tu likida epuro lyangoso, tatu kara nehuguvaro asi Jehova nkenye apa nga tu pa yoyinzi kupitakana eyi atu mu pe. Age kufuta ava va kara nepuro. (Heb. 6:10; 11:6) Ga futire Abiramu ndi?

14, 15. Ngapi rwa kere rugendo rokoUru dogoro koHarani, ntani morwasinke Abiramu ga tokwerere kukara tanko moHarani?

¹⁴ Tava gendi mazuva gomanzi. Abiramu naSarayi pamwe tava gendi pamwe tava rondo poyindongili ndi nongameru dawo, oku tava zogere ano nongenzo doyimuna kuna kungwerengwendja. Navenye tava ya yiki kudika notenta nokudizungurura ntani nokuvatera Tera a hingire nawa pongameru ndi posindongili. Tava kwama mukuro gwaEufurata. Tava gendi yivike noyivike.

¹⁵ Konyima zokugenda nokilometa 960, tava ya siki koHarani, sitata soungawo. Makura tava kara mo siruwo songandi. Nampo Tera ga kurupire unene kapi ga vhulire kutwikira morugendo.

16, 17. (a) Egwanekero musinke lya nkondopekere Abiramu? (b) Ngapi Jehova ga tungikire Abiramu apa ga kere moHarani?

 ¹⁶ Tera ta fu age nomvhura dendi 205. (Gen. 11:32) Apa Abiramu ga fisire oguhwe, ga gwene ehengagwido apa Jehova ga uyungire nendi hena. Ta ruguruka mapukururo ga mu pere age moUru, nokugwederera ko asi Abiramu nga kara “muhoko gomunene,” ano mwendi yimo nga tungikira nomuhoko nadinye domouzuni. (Resa Genesis 12:2, 3.) Egwanekero eli Karunga ga tulire po naAbiramu lya mu nkondopekere, makura ta katuka a twikire norugendo rwendi.

¹⁷ Jehova kwa tungikire Abiramu noyiweka yoyinzi apa ge kere moHarani. Age ga hepere kurongera ‘emona lyawo nalinye eli va kongere, novapika navenye ava va wekere moHarani.’ (Gen. 12:5) Mokukara muhoko gomunene, Abiramu ga hepere kukara nemona novakareli wovanzi. Jehova kapi a ngawopeke nkenye apa vakareli vendi, nye age kuvapa eyi vana hepa yipo va sikise mo mpango zendi. Abiramu makura ta twikire norugendo rwendi.

18. (a) Ezuva musinke lya kara nomulyo kovakareli vaJehova Karunga? (b) Monomvhura da ya kweme ko, yihorokwa musinke yomulyo ya ya horokere mwaNisani 14? (Tara kakende “ Ezuva lyomulyo va tumbura moBibeli.”)

¹⁸ Konyima zomazuva gongandi tava ka sika koKarekemisi, oku vantu ngava rutire mukuro gwaEufurata. Abiramu kwa rutire mukuro mezuva 14 mokwedi kwaNisani nomvhura 1 943 komeho zokuwiza Kristusa pevhu. (Ex. 12:40-43) Ezuva olyo kuna kara ezuva lyomulyo kovakareli vaJehova Karunga. Egwanekero eli Karunga ga tulire po naAbiramu tali tameke kukara mosirugana mezuva olyo.

19. Yisinke Jehova ga tumbwidilire Abiramu, ntani kosinke ya mu diworokesere?

¹⁹ Abiramu makura ta gendi a vyuke koMbindakano, makura tava pwizumuka pousivi waMore, ou wa kere pepi naSikemu. Jehova ta uyunga hena  nendi. Karunga ta tumbwidire Abiramu asi nga pa ruvharo rwendi sirongo oso. Nampo etumbwidiro olyo kwa diworokesere Abiramu uporofete ou ga uyungire Jehova moEdeni, kuhamena ‘ruvharo’ oru ngaru zowora vantu. (Gen. 3:15; 12:7) Age ga tamekere kukwata egano asi nage ga hamenene mo mositambo saJehova.

20. Ngapi Abiramu ga likidire rupandu kositumbukira esi ga mu pere Jehova?

²⁰ Abiramu ga likidire rupandu kositumbukira esi ga mu pere Jehova. Ta gendi mosirongo soVakanani, ta dike yizambero kwaJehova, pomuhowo pepi nousivi waMore ntani pepi noBeteli. Age ta kugu edina lyaJehova, nokumupandura kuhamena ruvharo rwendi rokomeho. Age nampo ga zuvhisilire ko Vakanani. (Resa Genesis 12:7, 8.) Abiramu simpe ga ligwanekerere nomaheteko gomanzi. Nye Abiramu kapi ga gazararere keparu lyewa eli ga sigire moUru. Age kwa demenene komatumbwidiro gaJehova. Vahebeli 11:10 kutanta asi: “Age kwa ndindilire sitata esi sa kara nomatateko, ano musundi nomutateki gwaso, Karunga.”

21. Yisinke tuna diva kuhamena Uhompa waKarunga eyi ga dilire kudiva Abiramu, ntani yisinke ono tokomene kurugana?

²¹ Ose tuna kukarera Jehova naina tuna diva ko yoyinzi kuhamena sitata ndi Uhompa waKarunga ou ga ndindilire Abiramu. Ose twa diva asi Uhompa kuna kupangera ngesi meguru ano ntaantani ngau ka rete uhura kouzuni ou. Ntani ruvharo rwaAbiramu oru va mu tumbwidilire, Jesus Kristusa, kuna kupangera ngesi moUhompa owo. Ngatu ka hafa posiruwo apa Abiramu nga ka vhumbuka. Posiruwo oso, Abiramu nga ka kwata egano nawa-nawa sitambo saJehova. Ono hara kukamona omu Jehova nga sikisa mo matumbwidiro gendi nagenye ndi? Nsene yimo, twikira kuhonena Abiramu. Likida mpepo zelizambero zoulimburukwi ntani likida rupandu momakanderero goge kosirugana esi ga ku pa Jehova. Ngomu ono kuhonena epuro lyaAbiramu, “guhyanavenye ava ava pura,” nage nga kara guho!