1, 2. (a) Morwasinke Hana ga guvilire apa ga liwapaikilire rugendo rwendi? (b) Yisinke natu lirongera ko kosihorokwa saHana?

HANA kuna kuliwapaikira rugendo rwendi nye ana guwu. Aro ngano rugendo rokuhafesa, morwa mugara gwendi Elikana nga twara epata lyendi rutatu momvhura kontembeli koSiro va ka karere Jehova. Jehova kwa harerere vantu va hafere yipito oyo. (Resa Deuteronomium 16:15.) Kutunda unona wendi Hana nga hafere yipito oyo. Nye yininke ya ya rundurukire ngomu sa pitire siruwo.

² Hana, mugara gwendi ga mu here. Nye Elikana ga kere nomukadi hena gumwe, edina lyendi Penina. Mukadi ogu kwa here kuguvisa Hana. Nampili poyipito yina, Penina kwa paparere nonkedi mokuzuvhisa kukora Hana. Monkedi musinke? Ngapi epuro lyaHana mwaJehova lya mu vaterere a lididimikire ukaro wendi woudigu? Nsene o kara nomaudigu gokukuguvisa, ngo gwanena mo uwa mosihorokwa saHana.

3, 4. Maudigu musinke gavali ga ligwanekerere nago Hana, ntani morwasinke ga mu retererere kukora?

³ Bibeli kwa hororora maudigu gavali gaHana. Kapi ga vhulire kugusa po maudigu gendi ogo. Udigu wokuhova, age kwa mu kwere masupareko nomukadi ogu ga mu nyengere. Udigu wauvali, age kwa kere nganze. Komukadi ana hara kureta, kukara nganze kuguvisa sili. Nye posiruwo saHana kwa kere eswau lyenene nsene mukadi nganze morwa nkenye epata kwa korere komunona yipo a tware edina komeho.

⁴ Penina ga gwederere hena koudigu waHana. Masupareko nkenye apa kureta maudigu mononkwara ngwendi mfudu kurumbasana ntani kukora komutjima. Kapisi Karunga ga tura  po masupareko morwa mosikunino saEdeni Karunga kwa pere mugara mukadi gumwe tupu. (Gen. 2:24) Bibeli kulikida asi masupareko kureta udigu ngwendi moomu tupu ya horokere mepata lyaElikana.

5. Morwasinke Penina ga harerere kukoresa Hana, ntani ngapi omu ga yi rugene?

⁵ Kuliza nompo zoVajuda pomuhowo Elikana kwa kwere Hana ntani konyima zonomvhura dongandi ta ya kwara Penina. Elikana kwa here unene Hana. Morwa oyo, Penina kwa fililire mfudu Hana, yiyo nga papara nonkedi dokumukoresa. Penina nga limonekesa morwa nga reta vana ano mukwawo nganze ga kere. Mevango lyokuhengagwida nokufira mukwawo nkenda, Penina nga zuvhisa mukwawo kukora. Bibeli kutanta asi Penina nga ‘swaura nokusandagura’ Hana. (1 Sam. 1:6) Penina nga zuvhisa kukora Hana mowina.

6, 7. (a) Morwasinke Hana ga dilire kutantera Elikana udigu wendi? (b) Morwa Hana nganze ga kere, eyi kutanta asi Jehova ga mu nyengere ndi? Faturura. (Tara nonkango dokonhi.)

⁶ Penina unene po nga zuvhisa Hana kukora apa ngava zi koSiro. Pokuzamba nonzambo kwaJehova, Elikana nga pe “vana” vaPenina nkenye gumwe nyama zendi. Nye Hana gonganze nga mu pe ruha rumwe tupu. Makura Penina nga sandagura Hana asi age nganze dogoro ta lilire mo nonondya nokulya si. Elikana ta dimburura asi mukadendi Hana, ogu ga here unene ana guwu ntani kapi ana kulya nondya. Makura ta mu hengagwida nokumupura asi: “Hana, yinke ono kulilira, neyi ono kudilira kulya, yinke? Mutjima goge yinke agu kerere nkenye apa neguwo? Nani ame koge kapi na pita vana wovagara murongo?”—1 Sam. 1:4-8.

⁷ Elikana ga yi dimbwilire asi Hana kuna guwu morwa kukara kwendi nganze. Nonkango dombili daElikana ga di pungwire komutjima. * Nye Elikana kapi ga tumbwire kuhamena Penina. Hana nage kapi ga tumbwire eyi nga mu rugana Penina, morwa nampo ga yi divire asi udigu kuvhura u  ligwederere. Ndi asi Elikana kwato eyi na vhura kurugana ko. Ntani Penina nampo kuvhura a mu nyenge kupita pwanare ntani vana novakareli vendi nampo kuvhura va mu rugane yokulifana.

8. Nsene gumwe a ku koresa, yisinke wa hepa kudiworoka kuhamena Jehova?

⁸ Yi kare asi Elikana ga divire mfudu ezi ga kere nazo Penina ndi hawe, Jehova Karunga ga yi mwene. Bibeli kulikida asi Jehova kumona nayinye. Alyo kuna kara erondoro kwankenye ogu ga hara kukoresa mukwawo morwa mfudu nonyengo. Nye vantu wovawa wombili, ngwendi Hana, kuvahengagwida mokudiva asi Karunga gomuhungami nga rugana ko yuma kuliza nosiruwo sendi nomonkedi omu ga yi harera. (Resa Deuteronomium 32:4.) Nampo Hana ga yi divire oyo, makura ta hundire ekwafo kwaJehova.

9. Yisinke natu lirongera ko kwaHana ogu ga zire koSiro nampili ngomu ga yi divire asi Penina na mu hepeka?

⁹ Momasasiku, epata lyaElikana tava pinduka va lirongikide rugendo. Rugendo rokuza koSiro rure unene, nokilometa dokupitakana po-30. Awo va hepa kutavakana sirongo sonondundu saEfurayimi, * tayi va gusa ezuva limwe ndi gavali va ka sike. Hana ana diva asi Penina na mu hepeka. Nye nampili ngoso Hana ta zi kumwe nawo. Age kwa tulisa po sihonena sosiwa kovakareli vaKarunga naina. Ayo kapi ya wapa kupulisira nonkareso dovakwetu donondona di donganese ukareli wetu kwaKarunga. Nsene tu yi pulisira oyo, kapi ngatu gwana matungiko aga twa hepa yipo tu lididimikire maudigu getu.

10, 11. (a) Morwasinke Hana ga zililire konkongoronzugo? (b) Monkedi musinke Hana ga pwagesere ruguwo rwendi kwaJehova?

¹⁰ Konyima zokugenda ezuva nalinye, Elikana nepata lyendi tava hara kusika moSiro. Tava pwizumuka tanko pondundu. Hana ta gazadara eyi na ka hundira Jehova mekanderero. Tava siki koSiro, makura tava li kumwe. Konyima Hana ta tundu po a ze konkongoronzugo zaJehova. Morwa sinka sendi sokukanderera kwaKarunga, Hana kapi ga mwene Eli, mupristeli gomunene, ogu ga hingilire pevero lyonkongoronzugo. Age ga lizuvhire umanguruki kukanderera konkongoronzugo morwa ga kere nehuguvaro asi Guhyetu gemeguru na kwata  egano maudigu gendi. Morwa ga guvire unene makura ta tameke kulira.

¹¹ Hana ta kanderere momutjima age kuna kupikauka. Nomurungu dendi kuna kuligumagura. Ta kanderere siruwo sosire a pwagese ruguwo rwendi kwaJehova. Hana kapi tupu ga hundilire Karunga a mu pe muna. Kapi tupu ga here Karunga a mu tungike nye nage kwa here kugava. Ta gana asi nsene nga kara nomuna nga mu gava mosirugana saJehova.—1 Sam. 1:9-11.

12. Ngwendi omu sina yi likida sihonena saHana, yisinke twa hepa kudiworoka kombinga zomakanderero?

¹² Hana kwa tura po sihonena sosiwa kovakareli navenye vaKarunga kombinga zokukanderera. Jehova kuna kuzigida vantu vendi va mu hedere nemanguruko va hana kusinganyeka, va pwagese yinka yawo ngwendi moomu munona a uyungisa vakondi vendi. (Resa Episarome 62:8; 1 Vatesaronika 5:17.) Mupositoli Peturusa kwa tjenge nonkango edi dokuhengagwida kuhamena kukanderera kwaJehova asi: “Mu peni yinka yeni nayinye, yeeyi age kumupakera mbili.”—1 Pet. 5:7.

13, 14. (a) Yisinke Eli ga gazarerere Hana? (b) Ngapi Hana ga tulisire po sihonena sepuro lyokupama?

¹³ Jehova age Karunga gonkenda, age kukwata egano maudigu getu. Nye vantu kapisi yimo va kara. Eli mupristeli gomunene kuna kutarera eyi ana kurugana Hana. Age simpe kuna kukanderera nokulira, Eli ta mu tantere asi: “Wene unkorwe woge nye usimbu tupu ngo u siga? Siga kunwa koge ngo wape ko!” Eli ga mwene nomurungu daHana kuna kuligumagura ntani ta lili. Mevango lyokumupura eyi yina kuhoroka age ta mu gazarere asi ana korwa.—1 Sam. 1:12-14.

¹⁴ Nonkango daEli da koresere Hana, kapi ga yi ndindilire asi mupristeli gomunene kuvhura a mu uyungire ngoso. Nye nampili ngoso, Hana ga tulisire po sihonena sepuro lyokupama. Kapi ga pulisilire kudira kusikilira mo komuntu ku donganese ukareli wendi kwaJehova. Age kwa limbwilire Eli nefumadeko nokumufatwilira ukaro wendi. Apa Eli ga dimbwilire epuko lyendi, ta tanta asi: “Zende nombili. Karunga gwaIsraeli ngano ta ku pe eyi ono mu hundire.”—1 Sam. 1:15-17.

15, 16. (a) Konyima zokupwagesa malizuvho gendi kwaJehova nokumukarera konkongoronzugo zendi, ngapi ga lizuvhire Hana? (b) Nsene maudigu gana tu vhukire ndi tuna guwu, ngapi natu kwama sihonena saHana?

¹⁵ Konyima zokupwagesa malizuvho gendi kwaJehova  nokumukarera konkongoronzugo zendi, ngapi ga lizuvhire Hana? Bibeli kutanta asi: “Hana ta zi ta ka lya, makura sipara sendi tasi runduruka.” (1 Sam. 1:18) Hana ga gwene ehengagwido. Age kwa gusire udigu wendi nokuutwika gumwe ga kara nononkondo dononene, Guhyetu gemeguru Jehova Karunga. (Resa Episarome 55:22.) Jehova kuvhura kusimba nkenye udigu!

¹⁶ Nsene maudigu gana tu vhukire ndi tuna guwu, tu temwinineni sihonena saHana nokuuyunga nemanguruko kwaJehova ogu a ‘zuvhu makanderero.’ (Epis. 65:2) Nsene tu kanderera mepuro, ngatu kara hena noruhafo ‘nombili zaKarunga, ezi za pitakana unene nondunge nadinye.’—Fil. 4:6, 7.

17, 18. (a) Ngapi Elikana ga yi likidire asi ga kwatesere ko mugano gwaHana? (b) Yinke hena Penina ga dilire kurugana Hana?

¹⁷ Ezuva lyokukwama ko, Hana ta zi hena konkongoronzugo naElikana. Hana ga tanterere mugara gwendi kuhamena eyi ga hundilire nomugano gwendi. Kuliza noVeta zaMosesa, mugara ga kere nononkondo dokuteza po mugano ogu ga tulire po mukadendi pwa hana epulisiro lyendi. (Num. 30:10-15) Nye Elikana kapi ga tezere po mugano gwaHana. Tava karere Jehova kumwe konkongoronzugo, makura tava tengura koSiro.

¹⁸ Siruwo musinke ga yi dimbwilire Penina asi ya mu sumpilire kuguvisa Hana? Bibeli kapi za yi tumbura, nye konyima zokukanderera kwaJehova ‘makura sipara saHana tasi runduruka,’ ga hefe kapi hena nga kara noruguwo. Penina kapi ga vhulire hena kukoresa Hana. Bibeli kapi azi tumbura edina lyendi hena.

19. Etungiko musinke ga gwene Hana, ngapi omu ga likidire rupandu kogu ga mu tungikire?

¹⁹ Konyima zomakwedi gongandi, Hana ta kara noruhafo ronene. Ta kara nezimo! Hana kapi ga divarere ogu ga mu tungikire. Ta hampuruka munona gomugara ta mu ruku Samwere, kutanta asi “Edina lyaKarunga.” Monomvhura ntatu edi da kweme ko, Hana kapi ga zire naElikana nepata lyawo koSiro. Apa ga tovere munwendi ta liwapaikire kumugava a ka rugane konkongoronzugo.

20. Ngapi Hana naElikana va sikisire mo etumbwidiro lyawo eli va geve kwaJehova?

 ²⁰ Ayo kwa kere kwendi udigu kuligaunuka namunwendi. Hana ga yi divire asi Samwere ngava ka mu pakera mbili vakadi wokurugana konkongoronzugo. Nye Samwere munona simpe ga kere ntani ayo kukara udigu kwankenye zinya a sige munwendi. Nye nampili ngoso, Hana naElikana tava twara munwawo konkongoronzugo noruhafo. Tava zamba nzambo zawo konzugo zaKarunga, makura tava gava Samwere kwaEli nokumudiworokesa etumbwidiro eli ga geve Hana monomvhura da ka pita.

21. Ngapi ekanderero lyaHana lya likida epuro lyendi lyokupama? (Tara kakende “ Makanderero gavali gomulyo.”)

²¹ Hana makura ta kanderere, nonkango dendi mulyo unene, yiyo Karunga ga di tulire moBibeli. Apa no resa 1 Samwere 2:1-10, no yi dimburura asi ga kere nepuro lyokupama. Age kwa hamberere Jehova kononkondo dendi dononene mokununupika valinenepeki nokutungika ava vana kara momaudigu nokupopera vantu. Age kwa mu hambererere morwa ukuhuki nouhungami noulimburukwi wendi. Hana kwa tente asi: “Kutupu mugameni ngaKarunga gwetu.” Jehova kuvhura kumuhuguvara, ntani age kugamena wokuhepa nava wokuguva ava ava hundire ekwafo kwendi.

22, 23. (a) Ngapi omu ga yi divire Samwere asi vakurona vendi va mu here? (b) Ngapi Jehova ga ya tungikire hena Hana?

²² Samwere ga kere nomfumwa zokukara nozina ava va kere nepuro lyokupama mwaJehova. Nampili ngomu ga va rongwere apa ga kulire nye kapi va mu divarere. Nkenye mvhura Hana  nga zi koSiro a twarere Samwere erwakanigona, eli nga honzo mwene. (Resa 1 Samwere 2:19.) Gazadara tupu omu Hana nga dwareke munwendi erwakanigona nokumutara nemenyamenyo nokumuuyungisa nombili nononkango dokumukorangeda. Hana kwa kere zinya gomuwa ano Samwere kwa reterere uwa vakondi vendi ntani mbunga zoVaisraeli.

²³ Hana nage si kapi va mu divarere. Jehova kwa mu tungikire makura ta retere Elikana vana vatano hena. (1 Sam. 2:21) Ntani ga gwene hena etungiko lyokukara nelikwatakano lyewa naJehova eli lya nkondoparere mwaza siruwo. Ngano nove yi ku horokere, ngomu no honena epuro lyaHana.