1, 2. (a) Maudigu musinke ga ligwanenekere nago Josefa nepata lyendi? (b) Mbudi musinke zondona Josefa ga tanterere mukadendi?

JOSEFA ta rondeke nomurongero posindongili. Ako kuna sovagana ano Josefa ta tundu momukunda gwaBeterehema age kuna kusinga sindongili sina simbi nomurongero. Age kuna kugazara rugendo rorure rokuza koEgipite. Ana kara nosinka nsene asi epata lyendi ngali ka yika nompo novantu neraka lyomosirongo oso.

² Ayo kapi ya kere ureru kwaJosefa mokutantera mukadendi Mariya mbudi zondona, nye ga yi rugene. Age kwa tanterere mukadendi nzodi omu muengeli ga mu tantererere mbudi zokutunda kwaKarunga asi: Hompa Herodesa kuna hara kudipaga munona! Awo va hepere kutjwayuka. (Resa Mateusa 2:13, 14.) Mariya kwa kere nosinka sosinene. Ngapi omu nava hara kudipaga munona ga hana nzo? Mariya naJosefa kapi va yi kwete egano eyi. Nye awo va huguvarere mwaJehova makura tava liwapaikire kuza koEgipite.

3. Faturura rugendo rwaJosefa nepata lyendi rokutunda moBeterehema. (Tara hena efano.)

³ Vantu womoBeterehema hava rarera, makura Josefa naMariya naJesus tava pwaga mo modoropa. Apa lya sire ezuva, Josefa ta tameke kugazara eyi yina kuvandindira komeho. Ngapi muhongi goyikungu nga vhura kupopera epata lyendi kwahompa gononkondo naSatana? Age nga vhura kupakera mbili epata lyendi ndi? Ngayi mu tompoka kusikisa mo situmbukira sosinene esi ga mu pere Jehova Karunga sokupakera mbili nokurera munona gokulikarera ndi? Josefa ta kara nosinka sosinene. Ngomu natu ka konakona omu Josefa ga sikisire mo noulimburukwi situmbukira sendi, natu ka nongonona eyi vaguhya nose natuvenye twa hepera kuhonena epuro lyaJosefa.

4, 5. (a) Ngapi omu eparu lyaJosefa lya rundurukire? (b) Ngapi omu muengeli ga korangedere Josefa a tambure situmbukira sosinene?

⁴ Eparu lyaJosefa kwa rundurukire apa tupu ga vandekerere Mariya. Josefa ga yi divire asi Mariya mukadona ga here Jehova nonompango dendi. Nye konyima ta ya zuvhu asi Mariya ana kara nomarutu gavali. Makura ta hara kuzumba Mariya mokahore-hore a mu popere keswau. * Nampili ngoso, muengeli ta mu monekere konzodi nokumufatwilira asi eyi yina kara mwaMariya, kompepo zokupongoka zaJehova ya tunda. Muengeli kwa gwederere ko asi munona ogu nga hampuruka “nga zowora muhoko gwendi kononzo dago.” Ntani age kwa tumbwidilire Josefa asi: “Wa ha tjira kugusa Mariya, a kare mukadoge.”—Mateusa 1:18-21.

⁵ Josefa mugara gomulimburukwi gomuhungami ta rugana moomu ga mu tanterere muengeli. Ta tambura situmbukira sosinene sokurera nokupakera mbili munona ogu ga kere nomulyo kwaKarunga. Konyima, kuliza nompangera zomupangeli gwaRoma, Josefa namukadendi gomarutu gavali tava zi koBeterehema va ka litjangese. Oko yiko va ka mu hampurukilire munona.

6-8. (a) Yisinke hena ya horokere eyi ya rundwilire eparu lyaJosefa nepata lyendi? (b) Ngapi omu tuna yi diva asi Satana yige ga tumine “mbungururu”? (Tara hena nonkango dokonhi.)

⁶ Josefa nepata lyendi kapi va tengwire hena koNasareta. Awo tava tungu moBeterehema, konyara nokilometa 10 kutunda koJerusarema. Awo nohepwere va kere, nye Josefa nga rugana unene a pakere mbili nokupopera Mariya naJesus. Mwa za siruwo, tava gwana embo lyokutunga. Apa ga kere Jesus ngwendi mvhura zimwe, eparu lyawo tali runduruka hena.

⁷ Mbunga zovagara wovakonentu wonombungururu tazi tundu koUpumezuva koBabironi zi ya va dingure. Awo kwa kweme mbungururu ezi za va twere dogoro kembo lyaJosefa naMariya, ano awo kwa paparere munona ogu ngano ga ya kere hompa goVajuda. Vagara owo kwa kere nefumadeko lyenene.

⁸ Yi kare asi va yi divire ndi hawe, vakonentu wonombungururu kwa tulire Jesus mosiponga sosinene. “Mbungururu” pomuhowo kwa va vyukisire koJerusarema nye kapisi koBeterehema. * Oko tava ka tantera hompa Herodesa asi awo kuna kupapara  munona ogu nga kara hompa goVajuda. Hompa Herodesa ta handuka unene.

9-11. (a) Ngapi Karunga ga yi likidire asi ga kara nononkondo dononene kupitakana daHerodesa ndi daSatana? (b) Masanseko musinke goyimpempa kuhamena rugendo rwaJosefa nepata lyendi rokuza koEgipite?

⁹ Nampili ngoso, Karunga kwa kara nononkondo dononene kupitakana daHerodesa ndi daSatana. Apa vakonentu va ya sikire membo, tava mono Jesus nozina makura tava va pe mauhwi, ano awo kapi va ndindilire asi va va fute. Josefa naMariya va tetukire pokumona asi vana gwana ‘ngorodo nomanganganga gokututumikidisa nomira’ va hana kuyindindira! Vakonentu owo kwa here kutengura va ka tantere hompa Herodesa oku va ka gwene munona. Nye, Jehova ta rugana ko yuma. Monzodi, age kwa tanterere vakonentu owo va tengure kwawo nonzira zapeke.—Resa Mateusa 2:1-12.

¹⁰ Apa va tengwire vakonentu, Josefa ta gwana erondoro lyokutunda komuengeli gwaJehova asi: “Pinduka, o guse munona nozina, o tjwayukire koEgipite, o ka kare nawo kooko dogoro noku ngani ka ku tantera, yeeyi Herodesa kuna kupingira a papare munona, aya mu dipage.” (Mat. 2:13) Ngomu tuna yi tumbura ketamekero lyosirongwa esi, Josefa ga limburukwire. Age kwa here kupopera munona makura ta twara epata lyendi koEgipite. Mauhwi aga va gwene kovakonentu ga vaterere Josefa nepata lyendi morugendo rwawo rokoEgipite.

¹¹ Masanseko goyimpempa kwa uyunga kuhamena rugendo rokoEgipite pokutanta asi mukeke Jesus kwa supipikire rugendo pasitetu, nokulipopera kovakorokotji ntani asi kwa nyongwere yitji yipo ozina va guse ko enyango. * Nye usili kuna kara asi rugendo oro kwa kere rorure ntani romaudigu.

12. Yisinke nava lirongera ko kwaJosefa vakurona ava vana kurera vanona mouzuni ou woudona?

¹² Vakurona kuvhura kulirongera ko yoyinzi kwaJosefa. Age kwa sigire sirugana sendi nokulizambera yipo a popere epata lyendi kosiponga. Yosili, age kwa tere epata lyendi asi uhwi wokutunda kwaJehova. Naina vakurona kuna kurera vana vawo mouzuni ou woudona woyininke yokunyata yokuvhura  kupukisa ndi kuzonagwisa vanona. Ayo kuhafesa apa vazinya novaguhya ava rugana nonondunge ngwendi Josefa, pokupopera vana vawo koyininke yangoso!

13, 14. Morwasinke Josefa naMariya va tengwilire koNasareta va ka rere vana vawo?

¹³ Josefa nepata lyendi kapi va ka tungire siruwo sosire moEgipite, morwa muengeli ga mu divisire asi Herodesa ana fu. Makura Josefa ta tengwida epata lyendi kosirongo sawo. Uporofete kwa pumbire nare asi Jehova nga zigida Munwendi a “tunde mo moEgipite.” (Mat. 2:15) Josefa ga sikisire mo uporofete owo, nye kupi ga ka tungire?

¹⁴ Josefa kwa kere ana vangarara. Age kwa tjilire hompa Arukerausi gonyanya gomudipagi ogu ga pinganene mo Herodesa. Josefa ta kwama epukururo lyaKarunga makura ta twara epata lyendi koNasareta mosirongo saGalireya. Oko yiko Josefa naMariya va ka rerere vana vawo.—Resa Mateusa 2:19-23.

15, 16. Sirugana musinke nga rugana Josefa ntani yiruganeso musinke nga ruganesa?

¹⁵ Awo kapi va wekere yoyinzi. Bibeli kwa tumbura Josefa asi muhongi goyikungu, sirugana oso kwa kwatera mo kuhonga yipirangi, kuteta yitji yipo va yi ruganese kononzugo nokomawato nokonontopagona nokoturukara nokomakoso nokonondjoko ntani noyiruganeso yokulisiga-siga younandima. (Mat. 13:55) Aso kwa kere sirugana soudigu. Mosiruwo sina, muhongi goyikungu nga ruganene pepi nembo ndi nositora sendi.

¹⁶ Josefa nga ruganesa yiruganeso yoyinzi, yimwe nampo kwa yi gwene koguhwe. Nampo nga ruganesa yimeteso nonohamara doyitji nedi doyivera nomakuva noyitjaha nonontjindjo nonombora nonorayima dokulisiga-siga nonomboha, nampili ngomu ya kere ndiro.

17, 18. (a) Yisinke Jesus ga lirongere koguhwe Josefa? (b) Morwasinke Josefa ga heperere kurugana unene?

¹⁷ Ngomumatigona, Jesus nga tarere oguhwe omu vana kurugana.  Age nga tetuka nonkondo doguhwe apa ngava damuna yuma posipepe nomu vana kuruganesa mawoko gawo. Nampo Josefa ga tamekere kuronga munwendi yirugana yokulisiga-siga eyi ya hamena mouhongi.

¹⁸ Jesus ga dimbwilire asi oguhwe kapi tupu va kere nononkondo dokuteta yitji, nye awo hena ngava pakere mbili ozina novamumbya vendi. Kugusa ko Jesus, Josefa naMariya kwa kere novanona ntazimwe ndi kupita opo. (Mat. 13:55, 56) Makura Josefa ga hepere kurugana unene a rere epata lyendi.

19. Ngapi Josefa nga pakere mbili epata lyendi li kare nelikwatakano naKarunga?

¹⁹ Nampili ngoso, Josefa ga yi dimbwilire asi sirugana sendi somulyo kwa kere sokupakera mbili elikwatakano lyepata lyendi naKarunga. Yipo nye nga ruganesa siruwo sendi a ronge vana vendi kuhamena Jehova Karunga nonoveta dendi. Nage naMariya nkenye apa ngava twara vana vawo kosinagoge, oku ngava resa Veta nokuzifaturura. Jesus nampo nga pura mapuro gomanzi ano Josefa nga hetekere ko kugalimburura. Josefa nga twara hena epata lyendi koyipito youkarelikarunga koJerusarema. PoPaska, Josefa nampo nga gendi yivike yivali nokilometa 120 a ka kare posilika oso nokukatengura.

20. Ngapi vanturagumbo woVakriste nava honena Josefa?

²⁰ Vanturagumbo woVakriste nawo naina kukwama sihonena oso. Nampili ngomu ava rugana unene va rere mapata gawo, nye yomulyo po kwawo yokuronga vana vawo kuhamena Jehova. Awo kurugana ukareli wepata nokutwara vana vawo komapongo nokoyigongi. Ngwendi Josefa, awo va yi diva asi yomulyo po kuna kara kuronga vana vawo kuhamena Jehova.

21. Yisinke nga rugana Josefa nepata lyendi apa ngasi siki sipito saPaska, ntani siruwoke Josefa naMariya va dimbwilire asi Jesus mwato mombunga?

²¹ Apa ga kere Jesus nonomvhura 12, Josefa ta twara epata lyendi hena koJerusarema. Aso kwa kere siruwo soPaska, siruwo soruhafo, ano mapata gomanzi ngaga gendi kumwe monombunga dononene. Apa va ka sikire pepi naJerusarema, wovanzi tava tameke kudimba mapisarome. (Epis. 120-134) Sitata tasi  zura mayovi gomanzi govantu. Apa sa pwire sipito, vantu tava tengura konomukunda dawo. Josefa naMariya, nampo kwa kere noyirugana yoyinzi, makura tava gazara asi Jesus mweli mombunga. Tava gendi ezuva mudima ntani nye va ya dimbwilire asi Jesus mwato mombunga.—Ruk. 2:41-44.

22, 23. Yisinke ga rugene Josefa naMariya apa va dimbwilire asi munwawo ana zumbana, ntani yisinke ga uyungire Mariya apa va ka gwene munona?

²² Makura tava tengura koJerusarema va ka papare Jesus. Awo vana tukuka tava gendagura moyitarata va mu papare. Kupi ga kere Jesus? Mezuva lyautatu lyokumupapara, nampo Josefa ga lizuvhire asi kapi ana sikisa mo situmbukira sendi ga mu pere Jehova. Moruhura, tava zi kontembeli. Tava ka mu papara dogoro  tava ka mu gwana ana hingire monzugo kumwe novalirongi womatjangwa. Gazadara tupu ruhafo oru ga lizuvhire Josefa naMariya!—Ruk. 2:45, 46.

²³ Jesus kwa purakenene varongi oku ta va puragere. Vagara owo kwa va tetwire nondunge nomalimbururo gendi. Mariya naJosefa, makura tayi va tetura. Josefa kapi ga uyungire yuma. Nye Mariya kwa uyungire asi: “Munwange, yinke ono tu ruganene ngesi? Tara, oguhwo name omu tuna ku papara nompwagetjima.”—Ruk. 2:47, 48.

24. Yisinke za likida Bibeli eyi ya hamena mo kukara mureti?

²⁴ Sihorokwa esi somoBibeli kulikida eyi ya hamena mo kukara mureti. Aso situmbukira soudigu nampili munona ga  sikilira mo. Kukara mureti mouzuni ou woudona kureta ‘mpwagetjima,’ nye vaguhya novazinya kuvhura kugwana ehengagwido pokudiva asi Bibeli za tumbura maudigu aga vana kuligwanekera nago.

25, 26. Ngapi Jesus ga limbwilire vakurona vendi, ntani ngapi Josefa ga lizuvhire kuhamena nonkango damunwendi?

²⁵ Konda zeyi Jesus ga karerere montembeli morwa ga lizuvhire asi ana kara pepi noguhwe vemeguru Jehova ntani ga hafererere kulironga kuvahamena. Age ta limburura vakurona vendi asi: “Yinke eyi muna paparere nge? Kapi mwa diva asi, nyame tupu kukara mweyi yaTate ndi?”—Ruk. 2:49.

²⁶ Josefa kwa gazadarere ko yikando yoyinzi nonkango odo. Nampo nonkango odo da mu hafesere. Age nga rongo nkenye apa munwendi a hare Jehova Karunga. Elikwatakano eli ga kere nalyo Jesus noguhwe Josefa lya mu vaterere a hare Jehova.

27. Ngaguhya, situmbukira musinke wa kara naso, ntani morwasinke no diworokera sihonena saJosefa?

²⁷ Nsene vaguhya va hara vanona nokuvapopera, ngayi vatera vanona va tare Jehova asi guhyawo gemeguru ntani asi age ga va hara nokuvapopera. Ntani hena, nsene wa kara nomuna gositumbwena ndi kuna kurera munona ga hana asi goge, diworoka sihonena saJosefa ntani tekura nkenye munona monkedi zongwa. Vatera vanona owo va hedere pepi naGuhyawo gemeguru, Jehova Karunga.—Resa  Vaefeso 6:4.

28, 29. (a) Nonkango da kara mwaRukasa 2:51, 52, yisinke adi likida kuhamena Josefa? (b) Ngapi Josefa ga vaterere munwendi a kure moukonentu?

²⁸ Bibeli kapi za tumbura mauzera gomanzi geparu lyaJosefa, nye ago mulyo kugakonakona. Azo kutanta asi Jesus ‘nga zuvhu’ vakurona vendi. Ntani asi Jesus  “ta kuru moukonentu nomorutu nomokuwapera Karunga novantu.” (Resa Rukasa 2:51, 52.) Nonkango odo kuhorora yoyinzi kuhamena Josefa. Ado kulikida asi Josefa ga twikilire kugendesa epata lyendi ano munwendi gokusikilira mo ga fumadekere upangeli woguhwe nokuvalimburukwa.

²⁹ Tuna lirongo hena asi Jesus kwa twikilire kukura moukonentu. Josefa ga rugene unene a vatere munwendi a kure moukonentu. Momazuva gena, pwa kere sisewe esi va here Vajuda. Aso kwa tanta asi vagara ava ava gwana siruwo yiwo tupu ava kara vakonentu, nye varandesi novahongi woyikungu novanandima novahambuli “kapi tava vhuru kukara vapanguli ndi va uyunge nonkango doyisewe.” Konyima Jesus ga ya yi likidire asi sisewe oso kapisi usili. Nampili ngomu oguhwe va kere muhongi goyikungu, Jesus nkenye apa nga va zuvhu kuna kuronga nawa kuhamena eyi ya hungama neyi ya dira kuhungama kosipara saJehova.

30. Sihonena musinke Josefa ga tulira po vanturagumbo?

³⁰ Nkareso zaJosefa kwa kundamene unene ekuro lyaJesus. Morwa epakero mbili lyewa, Jesus kwa kulire nawa ntani kwa kere mugara gononkondo. Josefa kwa dewire munwendi a kare noudivi mosirugana sendi. Jesus kapi tupu ga divikwire asi munwamuhongi goyikungu nye mwene hena nage kwa kere “muhongi goyikungu.” (Mar. 6:3) Edeuro lyaJosefa lya sikire mouta wa kora. Vanturagumbo wonondunge kuhonena Josefa pokudeura nawa vana vawo yipo ngava vhure kukalirera vene.

31. (a) Yisinke aga likida maumbangi kuhamena siruwo esi ga fire Josefa? (Tara hena  kakende.) (b) Sihonena musinke ga tu sigira Josefa?

³¹ Apa atu resa moBibeli kuhamena siruwo apa Jesus ga gwene ekuho ponomvhura 30, Josefa opo kapi vana kumutumbura hena. Maumbangi kulikida asi Mariya kwa kere mufisayendi apa Jesus ga tamekere nosirugana sendi sokuzuvhisa. (Tara kakende  “Siruwoke ga fire Josefa?”) Nye, Josefa kuna kara guhya gosihonena sosiwa sokupopera epata lyendi nokulipakera mbili nokukwaterera koulimburukwi dogoro konomfa. Vaguhya novanturagumbo noVakriste, ya wapa kuhonena epuro lyaJosefa.