1. Ngapi ga lizuvhire Malita?

MALITA kuna kugazara ntoko zampanzendi ezi va zedira nemanya. Age ana guwu unene. Kapi ana kuyipura asi mpanzendi Rasarusa ogu ga here ana fu. Apo pana piti mazuva gane kutunda apa ga fa mpanzendi, awo simpe kuna kulira nokutambura vagenda ava vana kuyavahengagwida.

2, 3. (a) Ngapi ga lizuvhire Malita apa ga mwene Jesus? (b) Yisinke da likidire nonkango domulyo edi ga uyungire Malita?

² Jesus makura ta ya siki. Malita makura ta guwu unene morwa ga divire asi Jesus kwa kere kaume kampanzendi ntani yige ngano ga vhulire kumuparura. Nye Malita ta gwana hena ehengagwido pokukara naJesus ponze zodoropa zaBetani. Nkenda zaJesus tazi hengagwida nokukorangeda Malita. Jesus ta pura Malita mapuro aga ga mu vaterere a pameke epuro lyendi nehuguvaro lyevhumbuko. Nzogera ozo za twaredesere Malita a uyunge nonkango domulyo unene asi: “Na pura asi nyove Kristusa, MunwaKarunga, ogu va tanta asi nga wiza mouzuni.”—Joh. 11:27.

³ Nonkango odo da likidire asi Malita kwa kere mukadi gepuro lyenene. Eyi azi tu tantere ko Bibeli kuhamena Malita kuvhura kutuvatera tu nkondopeke epuro lyetu. Mokuyikwata egano, tu tarurureni sihorokwa sokuhova moBibeli kuhamena Malita.

4. Wolye ga tungire nawo Malita, ntani elikwatakano musinke va kere nalyo naJesus?

⁴ Makwedi gongandi komeho Razarusa a ka fe, age kwa ndindilire kutambura mugenda gomulyo po, Jesus Kristusa, membo lyendi moBetani. Rasarusa naMalita naMariya kwa kere vezimo limwe ava va tungire membo limwe tupu. Kapi  tuna diva nsene asi va kwere. Awo kwa kere vakaume wovanene vaJesus. Apa Jesus nga zuvhisire moJudeya omu nga ligwanekere nomakwamakwamo nomarwaneso, age nga kara membo lyoMalita. Jesus nga hafere nkareso zongwa zemembo lyawo.

5, 6. (a) Morwasinke Malita ga ruganene unene apa Jesus ga ya va dingwire? (b) Yisinke ga rugene Mariya apa Jesus ga ya sikire membo?

⁵ Malita nga rugana unene mokuwapaika embo nokutambura vagenda. Apa Jesus ga wizire a ya va dingure, Malita kwa viyaukire unene. Makura ta tereke nondya dokulisiga-siga morwa mugenda gokulikarera ntani nava va wizire nendi. Momazuva gena, kutambura vagenda kwa kere sininke somulyo unene. Apa nga ya siki mugenda ngava mu tambura nencumito ano yicamakaku yendi ngava yi hutura ko, nompadi dendi ngava di kuhu, nohuki dendi ngava di kwita magadi gedumba lyewa. (Resa Rukasa 7:44-47.) Azo kwa kere mpo zokugava mararo nonondya komugenda yipo a lizuvhe nawa.

⁶ Malita naMariya kwa rugene unene mokuwapaikira mugenda gwawo Jesus. Nampili ngomu Mariya ava mu gazarere asi muntu tupu ga hara kulironga, nage ga vaterere mukurwendi. Nye apa ga ya sikire Jesus, tapa kara marunduruko. Jesus ta ruganesa mpito ozo a ronge ava va kere membo. Jesus nga likida efumadeko kovakadi ntani nga va rongo kuhamena Uhompa waKarunga, kapisi ngwendi vampitisili womaukarelikarunga. Mariya ta hageke kuvatera Malita makura ta hingire konompadi daJesus a purakene.

7, 8. Morwasinke Malita ga lizuvhire kukora komutjima, ntani ngapi ga pwagesere kukora kwendi?

⁷ Nampo Malita ga lizuvhire kukora komutjima. Morwa ga hepere kuwapaika nondya dononzi nokupakera mbili vagenda, makura ta kara nosinka sosinene. Apa ga mwene asi Mariya ana hingire kwato eyi ana kurugana, Malita nampo ga handukire. Malita kapi ga vhulire kurugana nayinye gelike.

⁸ Makura Malita kapi ga vhulire kulididimikira momutjima. Ta donganesa nzogera zaJesus nokutanta asi: “Hompa, nani nokuyifira si mbili, eyi ana sigi nge ogo mumbyange, ni rugane nyamelike? Mu tantera nye a ya kwafe nge!” (Ruk. 10:40) Odo kwa kere nonkango domukumo. Malita kwa here Jesus a tantere Mariya a ka rugane.

9, 10. (a) Ngapi Jesus ga limbwilire Malita? (b) Jesus kwa tere yirugana yaMalita yokuwapaika nondya asi kwato mulyo ndi?

 ⁹ Elimbururo lyaJesus nampo lya tetukisire Malita, ntani novaresi woBibeli. Age kwa limbwilire nombili asi: “Malita, Malita, yinzi ono lipakere sinka, ove hena ono piyagana. Nye sininke simwe po yiso sohepero. Mariya kuna horowora po age ruha roruwa, oru ngava dira kumugusa.” (Ruk. 10:41, 42) Yisinke ga tembe Jesus? Age ngoso kwa tembe asi Malita kwa here yininke yopanyama kupitakana Karunga ndi? Age kwa tere yirugana yaMalita yokuwapaika nondya donongwa asi kwato mulyo ndi?

¹⁰ Hawe. Jesus ga yi mwene asi Malita kwa yi ruganene kutundilira komutjima. Jesus kapi ga tembe asi epuko kuwapaika nondya dononzi. Morwa sikando simwe ga zire ‘kosipito sosinene’ esi ga wapaikire Mateusa. (Ruk. 5:29) Kapi ya kere epuko Malita a wapaike nondya. Nye udigu kwa kere asi age kwa demenene unene kuwapaika nondya makura ta zumbanesa yininke yomulyo po. Yininke musinke oyo?

11, 12. Monkedi musinke Jesus ga vyukisire Malita?

¹¹ Jesus, MunwaJehova Karunga a huru thi, kwa zire membo lyoMalita a ka ronge usili. Erongo olyo kwa kere nomulyo kupitakana nondya donongwa. Jesus ya mu guvisire morwa Malita kwa zumbanesere mpito zokunkondopeka epuro lyendi ntani ga sigire Malita a tokore eyi ana hara kurugana. * Makura kapi ya wepe Malita a hundire Jesus asi tantere Maliya a ka mu vatere.

¹² Makura Jesus ta vyukisa Malita nombili, pokurugurura kumutumbura kedina nokumuhengagwida asi kapisi a ‘lipakere sinka neyi yoyinzi.’ Kapi ya kere hepero kuwapaika nondya dononzi morwa pwa kere nare nondya dononzi dopampepo. Yipo nye, Jesus kapi ga vhulire kugusa Mariya ‘ruha roruwa’ oru ga horowere rokupurakena komarongo gendi!

13. Yisinke natu lirongera ko konkedi ezi Jesus ga vyukisire Malita?

 ¹³ Naina, sihorokwa esi kuna kara nomulyo unene kovasikuli vaKristusa. Kapisi tu pulisire nkenye eyi yi tu guse ko kokusikisa mo ‘yihepwa yetu yopampepo.’ (Mat. 5:3, NW) Yimo, twa hepa kuhonena ugavi waMalita nokurugana unene, nye kapisi ‘tu lipakere sinka’ noyininke oyo makura tu zumbanese yomulyo po. Ose kukara kumwe novapuli vakwetu, kapisi nositambo tupu sokugava ndi sokutambura nondya dononzi, nye sokulikwafa-kwafa nokulipaapa mauhwi gopampepo. (Resa Varoma 1:11, 12.) Nampili nondya dononunu kuvhura kuninkisa siruwo oso si kare sokutunga.

14. Ngapi tuna yi diva asi Malita ga tura po sihonena sokutambura mapukururo?

¹⁴ Malita ga tambwire evyukiso lyaJesus nokulirongera ko ndi? Nhi. Morwa mupositoli Johanesa apa ga tjenge kuhamena evhumbuko lyaRasarusa, kwa tente asi: ‘Jesus kwa here Malita namumbyendi gomukadi naRasarusa.’ (Joh. 11:5) Eyi kulikida asi Malita kapi ga handukire ndi a kare nonkoko naJesus morwa epukururo lyeharo eli ga mu pere. Age kwa li tambwire nomutjima nagunye. Age kwa tu tulira po sihonena sosiwa sepuro, morwa natuvenye twa hepa mavyukiso.

15, 16. (a) Yisinke ga rugene Malita apa Rasarusa ga verere? (b) Ngapi omu ehuguvaro lyaMalita naMariya lya dilire kutompoka?

¹⁵ Apa ga verere mpanzendi, Malita ga litulire mo mokumupakera mbili. Age ga rugene paapa ga vhulira mokumuhengagwida nokumuvatera a veruke. Nye Rasarusa uvera kwa mu dekere unene. Nkenye ezuva vampanza vendi ngava kara kumwe nendi va mu pakere mbili. Ee, omu tupu nga tara Malita mpanzendi nokudiworoka omu ngava hafa kumwe nomvhura dononzi!

¹⁶ Apa Malita naMariya va mwene asi kapi tava vhuru kuvatera mpanzawo, makura tava tumine Jesus mbudi. Oku ga zuvhisilire Jesus kwa kere ure worugendo romazuva gavali. Mbudi zawo kwa kere asi: “Hompa, ko tara si, ogu wa hara ta vere.” (Joh. 11:1, 3) Awo va yi divire asi Jesus kwa here mpanzawo, ntani va kere nepuro asi age na ya rugana ko yuma mokuvatera kaume kendi. Awo ngoso kwa kere nehuguvaro asi Jesus na ya sika usimbu ndi? Nsene yimo, ehuguvaro lyawo kapi lya tompokere. Rasarusa ga fire.

17. Yisinke ya piyaganekere Malita, ntani yisinke ga rugene apa ga zuvhire asi Jesus ta wiza?

¹⁷ Malita naMariya kwa lilire mpanzawo nokuwapaika evhumbiko lyendi nokutambura vagenda wovanzi ava va tundire koBetani nokonomukunda dazo. Nye kwato simpe eyi va zuvhire ko kuhamena Jesus. Ngomu sa pitire siruwo, Malita ga kere ngwendi kuna piyagana. Konyima zomazuva gane gonomfa daRasarusa, Malita ta zuvhu asi Jesus ta wiza. Nampili ngomu ga kere meguwo, Malita ga simbagwilire Jesus ga hana kutantera ko Mariya.—Resa Johanesa 11:20.

18, 19. Ehuguvaro musinke ga kere nalyo Malita, ntani morwasinke epuro lyendi lya kere lyokutetukisa?

 ¹⁸ Apa ga mwene Jesus, Malita ta pwagesa malizuvho aga va kere nago naMariya asi: “Hompa, ngano yipo ko kere, ngano mpanzange kapi ka fire.” Nye, Malita simpe ga kere nehuguvaro. Age ta twikire ko asi: “Nantaantani si na diva asi, nkenye eyi no hundira Karunga, Karunga na yi ku pa.” Makura Jesus ta nkondopeke ehuguvaro lyendi asi: “Mpanzoge na vhumbuka.”—Joh. 11:21-23.

¹⁹ Malita kwa gazarere asi Jesus kwa tembe kevhumbuko lyokomeho, yipo ga limbwilire asi: “Na yi diva asi, nga vhumbuka pevhumbuko lyezuva lyouhura.” (Joh. 11:24) Age kwa kere nepuro lyokupama mevhumbuko. Vampitisili vamwe womaukarelikarunga goVajuda, ava ngava tumbura asi Vasadukayi, kwa patanene asi kwato evhumbuko lyovafe, nampili  ngomu lya kere erongo lyokuzera lyomoMatjangwa. (Ndan. 12:13; Mar. 12:18) Nye Malita ga yi divire asi Jesus nga rongo ehuguvaro lyevhumbuko ntani ga vhumbwire vamwe. Nye Malita kapi ga divire eyi nayi horoka.

20. Yisinke adi tanta nonkango daJesus domulyo ntani nelimbururo lyaMalita ngomu va yi tjanga mwaJohanesa 11:25-27.

²⁰ Makura Jesus ta uyunga nonkango domulyo asi: “Nyame evhumbuko nomwenyo.” Jehova Karunga kwa pa Munwendi nonkondo dokukavhumbura vantu navenye. Jesus ta pura Malita asi: “Ono yi pura eyi ndi?” Yipo ga limbwilire nonkango tuna tumbura ketameko lyosirongwa esi. Age ga pulire asi Jesus yige Kristusa ndi Mesiyasa, MunwaJehova Karunga ntani asi mauporofete ga yi pumbire asi nga wiza mouzuni.—Joh. 5:28, 29; resa Johanesa 11:25-27.

21, 22. (a) Ngapi Jesus ga likidire ruguwo rwendi? (b) Faturura evhumbuko lyaRasarusa.

²¹ Jehova Karunga naMunwendi Jesus Kristusa, va tere epuro lyaMalita asi mulyo ndi? Eyi ya horokere kulikida asi yimo. Malita kwa gendererere a ka simbe Mariya. Konyima zoyo, age kwa mwene omu Jesus ga kere neguwo ngomu ga uyungire naMariya nava va va guvisire ko. Ntani hena ga mwene omu Jesus ana kuganda mahodi a likide ruguwo rwendi rorunene oru adi retesa po nomfa. Ga zuvhire apa Jesus ga tente asi va tundise ko emanya kontoko zampazendi.—Joh. 11:28-39.

²² Malita ta mu patana nokuuyunga asi kuna kunuka morwa rutu kuna kara mazuva gane montoko, runa woro. Jesus yipo ga mu diworokesere asi: “Amesi na ku tantere asi, nsene o pura, no mona uyerere waKarunga.” Age ga kere nepuro ntani ga mwene uyerere waJehova Karunga. Poopo tupu, Jehova kwa nkondopekere Munwendi mokuvhumbura Rasarusa, makura Jesus ta zigire asi: “Rasarusa, pwaga mo!” Tava zuvhu muhagaro montoko. Rasarusa ta pwaga, age vana mu dingire makehe. Jesus ta pangere asi: “Mu dingununeni a ze.” Noruhafo rorunene Malita naMariya tava lidingilire mpanzawo. (Resa Johanesa 11:40-44.) Malita kapi ga kere hena nosinka, ntani kapi ga divarere sihorokwa esi.

23. Yisinke Jehova naJesus vana hara kukuruganena, ntani ove yisinke wa hepa kurugana?

²³ Sihorokwa esi kulikida asi evhumbuko lyovafe kapisi egazaro tupu, nye kuna kara erongo eli azi rongo Bibeli ntani  ya horokere nawa-nawa. (Joba 14:14, 15) Jehova naMunwendi kwa hara kufuta ava va kara nepuro, ngomu va yi rugene koMalita naMariya naRasarusa. Nove ngava ku tungika nsene o tunga po epuro lyokupama.

24. Nonkango musinke dokuhulilira dokuhamena Malita va tjanga moBibeli?

²⁴ Bibeli kwa tumbura hena Malita. Kwa kere ketamekero lyosivike sokuhulilira separu lyaJesus pevhu. Pokudiva asi udigu kuna kumuhedera pepi, Jesus kwa zire hena koBetani oku nga kara-kara. Kutunda opo nga gendi nokilometa ntatu a ze koJerusarema nokutengura hena. Jesus naRasarusa kwa lire membo lyaSimoni, ntani yimo va uyunga nonkango dokuhulilira kuhamena Malita asi: “Malita ta zakura.”—Joh. 12:2.

25. Ngapi nombungakriste va di tungika morwa kukara novakadi ngwendi Malita?

²⁵ Yosili, age kwa kere mukadi gokurugana unene! Apa atu resa sihorokwa sendi moBibeli kulikida asi age murugani gomunene mokupakera mbili yihepwa yovakwawo. Naina, monombungakriste dovasikuli vaKristusa kwa di tungika novakadi ngwendi Malita, awo nkenye apa kutura epuro lyawo pasirugana pokuligava vene. Malita nage ga twikilire kurugana yokulifana. Nkareso zangoso za ya mu vaterere, morwa konyima ga ya ligwanekerere nomaudigu.

26. Monkedi musinke Malita lya mu vaterere epuro lyendi?

²⁶ Konyima zomazuva gongandi, Malita kwa lididimikilire nomfa dokukoresa doMurongi gwendi gokuhara, Jesus. Mokugwederera ko, vayilipaki ava va dipagere Jesus kwa tokomenene hena kudipaga Rasarusa, morwa evhumbuko lyendi kwa nkondopekere epuro lyovantu wovanzi. (Resa Johanesa 12:9-11.) Moruhura, nomfa da ya gawinine elikwatakano eli lya kere pokatji koMalita novanavazina. Kapi twa diva asi ngapi ndi siruwoke ya horokere, nye tuna si huguvara asi: Epuro lyokulikarera lyaMalita lya mu vaterere a lididimikire dogoro kouhura. Eyi yiyo Vakriste vanaina vana kuvakorangedera va honene epuro lyaMalita.