Kovanavazinyetu wokuhara:

MoRuhungu rokuhanesa 1 Murongagona 2008 kwa pwege mo sirongwa sosiparatjangwa asi: “Honena epuro lyawo.” Kutunda kwedi oko, sirongwa oso kwa pwege moRuhungu rwankenye kwedi kwautatu.

Yisinke va uyunga ko varesi kosirongwa oso? Mukadi gumwe apa ga mene kuresa sirongwa saMalita, kwa tjenge asi: “Ame kwa zorere apa na resere sirongwa oso morwa ame kwa kara ngwendi Malita, ame kwa hara kutambura vagenda nokurugana unene makura kulidivara kuhingira ni zogere nawo.” Mudinkantu gonomvhura 15 kwa resere sihorokwa saEsitera, makura ta tanta asi: “Ose vantu kwa hara unene yidwara ntani nankenye mode. Yimo, twa hepa kuliwapaika nawa, nye kapisi tu pitakanese.” Ta tanta hena asi: “Jehova age kutara eyi ya kara monomutjima detu.” Sihorokwa somupositoli Peturusa kwa tumangedere munazinyetukadi gumwe a tante asi: “Apa na si resere ame kwa litulire mo mosihorokwa oso. Tani lizuvhu ngwendi nyame yina kuhorokera. Ame kwa litulire mo yipo ni dive eyi sina tamba sirongwa oso!”

Varesi ava ntani navamwe kwa gava rupandu rwawo kosirongwa “Honena epuro lyawo,” awo kukwatesa ko eyi ga tjenge mupositoli Paurusa asi: “Nkenye eyi va tjangera momatjangwa, kwa yi tjangera asi yi tu ronge.” (Rom. 15:4) Jehova kwa tulira yihorokwa oyo moBibeli yipo tu lirongere ko yirongwa yomulyo. Natuvenye, yi kare asi nomvhura dingapi twa kara mousili, kuvhura tu lirongere ko koyihorokwa oyo.

Kuna kukukorangeda o rese buke ezi apa no zi gwana. Zi ruganesa moUkareli weni wepata, ano vanona ngava zi hafera! Apa ngava zi ruganesa mElirongo lyoBibeli lyoMbunga, wa ha dumwa po nampili sivike simwe. Zi resa kuliwora, wa ha genderera. Litura mo nyamoge mwankenye sihorokwa. Lizuvha ngwendi nyove yina kuhorokera eyi ya horokerere ava va tumbura moBibeli. Hetekera ko kukoneka eyi va rugene apa va kere momaudigu neyi nove no vhura kurugana.

Ose tuna hafa mokukupa buke ezi. Ngano ngo gwanene mo mauwa nepata lyoge. Tambura makundo neharo lyetu.

Mbungagendesi zoNombangi daJehova