EGAUNUNO 7
“Kwa kulilire moyirugana yaJehova”
1, 2. Moudigu musinke va kere Vaisraeli, ntani morwasinke Samwere ga va uyungisire?
SAMWERE kuna pongeke Vaisraeli mositata saGiligali. Age kwa kere muporofete nomupanguli gwawo nomvhura dononzi. Kwa kere ngwendi kwedi kwaKudumonkuru naPembagona, siruwo sokuteza-teza. Vantu navenye kuna mwena teete. Ngapi na va uyungisa Samwere?
2 Vantu kapi va dimbwilire asi moudigu wounene vana kara. Awo kwa sininikire va kare nahompa gomuntu ogu na va pangera. Kapi va likidire efumadeko kwaKarunga gwawo, Jehova nomuporofete gwendi. Kwa monekere ngwendi kuna kunyoka Jehova ngaHompa gwawo! Yisinke Samwere na rugana yipo va litezurure?
Tatu lirongere ko kosihonena saSamwere, kutundilira kounona wendi omu natu pameka epuro lyetu mwaJehova nampili wopeke va rugane yoyidona
3, 4. (a) Morwasinke Samwere ga diworokere udinkantu wendi? (b) Morwasinke sihonena saSamwere sepuro sina karere nomulyo kwetu?
3 Samwere ta uyunga asi: “Ame na kurupa nomvhi vau, . . . Ame kwa kara mugendesi gweni kutunda koudinkantu wange dogoro ntaantani.” (1 Sam. 11:14, 15; 12:2) Nampili ngomu Samwere ga kurupire, kapi ga divarere eyi ga rugene moudinkantu wendi. Matokoro aga ga tulire po age simpe mudinkantu ga mu vaterere a kare nepuro nokulimburukwa eparu lyendi nalinye, Karunga gwendi Jehova.
4 Nampili ngomu ga tungire novantu wokudira epuro wovahalimburukwi, Samwere ga twikilire kunkondopeka epuro lyendi. Ngwendi naina, kapisi ureru kwetu kukara nepuro lyokupama, morwa twa kara mouzuni woudona wovantu wokudira epuro. (Resa Rukasa 18:8.) Tu zeni tu ka tare omu natu lirongera ko kosihonena saSamwere, kutundilira kounona wendi.
‘Ngomumati Samwere nga karere’ Jehova
5, 6. Ngapi Samwere va mu rerere, ntani ngapi vakondi vendi va divire asi ngava mu pakera mbili konkongoronzugo?
5 Samwere kwa mu rerere mwapeke. Apa tupu ga tovere age nampo nomvhura ntatu ngoso, ta tameke kuruganena Jehova konkongoronzugo koSiro, ure wonokilometa 30 kutunda kembo lyawo koRama. Vakondi vendi Elikana naHana kwa mu geve a ka ruganene Jehova mosirugana sokulikarera ngoMunasili eparu lyendi nalinye. * Eyi kutanta asi vakondi vendi kapi va mu here ndi?
6 Hawe! Awo va yi divire asi munawo ngava ka mu pakera mbili koSiro. Samwere nga rugana kumwe nomupristeli gomunene Eli ogu nga mu pakere mbili. Ntani pwa kere vakadi ava ngava vatere konkongoronzugo.—Ex. 38:8; Vap. 11:34-40.
7, 8. (a) Ngapi vakondi vaSamwere ngava mu korangeda nkenye mvhura? (b) Yisinke vakurona nava lirongera ko kovakurona vaSamwere?
7 Hana naElikana kapi va divarere mbeli zawo. Hana kwa kandererere kwaKarunga a mu pe muna gomugara, nokutumbwidira asi nga mu gava kwaKarunga mosirugana sendi sokupongoka. Nkenye mvhura ngava mu dingura ano Hana nga mu honzere erwakanigona. Mumatigona ogu nga hafere madinguro ogo. Age nga hafere makorangedo nomapukururo govakurona vendi apa ngava mu rongo mulyo gokukarera Jehova monzugo zendi.
8 Vakurona kuvhura va lirongere ko yoyinzi kwaHana naElikana. Naina vakurona wovanzi kudemenena mokugava yihepwa yopanyama kovana vawo nokuncenuna kuvavatera va kare nelikwatakano lyewa naJehova. Nye vakurona vaSamwere kwa demenenene kelikwatakano lyawo naJehova ano oyo kwa kundamene Samwere monkedi zongwa.—Resa Yisewe 22:6.
9, 10. (a) Ngapi za fene nkongoronzugo, ntani ngapi ga lizuvhire mumati Samwere kuhamena evango olyo lyokupongoka? (Tara hena nonkango dokonhi.) (b) Yitumbukira musinke yimwe eyi ga kere nayo Samwere, ntani ngapi naina vadinkantu nava temwinina sihonena sendi?
9 Ngomunona Samwere nga gendagura konondundu domoSiro. Nampo apa nga sikama kondundu nga tara sitata nomuramba gwaso, ayo ngayi mu hafesa unene pokumona nkongoronzugo zaJehova. Nkongoronzugo kwa kere evango lyokupongoka. * Azo kwa zi tungire mepitisiro lyaMosesa nomvhura 400 komeho zehampuruko lyaSamwere. Yilyo lyelike lya kere evango lyoukareli wousili uzuni mudima.
10 Ngomunona Samwere ga here nkongoronzugo. Bibeli kutanta asi: “Age mumati Samwere kuna kukerera ngorooro HOMPA, ana dwara siteta sokupongoka solina.” (1 Sam. 2:18) Sikoverero oso kwa kere sidimbwiliso asi Samwere nga vatere vapristeli konkongoronzugo. Nampili ngomu ga dilire kukara gemezimo lyovapristeli, Samwere kwa kere noyitumbukira ngwendi kuzegurura ngurangura mavero geharango nokuvatera Eli. Age nga hafere yitumbukira yendi, nye mwaza siruwo koyili yimwe ngayi mu koresa komutjima. Poyili eyi ya dilire kuwapa monzugo zaJehova.
Kwa kere ana kuhuka mokatji koukaro woudona
11, 12. (a) Nkareso musinke ga kere nazo Hofini naPinehasa? (b) Udona musinke ga rugene Hofini naPinehasa konkongoronzugo? (Tara nonkango dokonhi.)
11 Age simpe mumati, Samwere nga mono yininke yoyidona. Eli kwa kere novana wovagara vavali, Hofini naPinehasa. Bibeli kutanta asi: “Vana wovagara vaEli kwa kere nompote. Awo kapi ngava pakere mbili HOMPA.” (1 Sam. 2:12) Hofini naPinehasa “kwa kere nompote” morwa kapi ngava fumadeke Jehova. Awo ngava ncenuna nompango dendi douhunga. Eyi ya va twaredesere va ture nonzo dimwe hena.
12 Veta zaKarunga kwa likidire omu ngano ngava rugana vapristeli nokugava nonzambo konkongoronzugo zendi. Nonzambo odo kwa kere nomulyo, morwa ado kwa karerere po mawapaiko gaKarunga gokugusira po nonzo yipo vantu va kare vana zere kosipara sendi a va hafere nokuvatungika. Nye Hofini naPinehasa kwa pukisire vapristeli vakwawo va dire kufumadeka nonzambo. *
13, 14. (a) Ngapi ngava va tekura vantu wovawa ava ngava zi konkongoronzugo? (b) Ngapi Eli ga dilire kusikisa mo situmbukira sendi ngaguhya nomupristeli gomunene?
13 Mumati Samwere nga mono yininke nayinye oyo yoyidona kuna kuyisigilira yi horoke. Age nga mono vantu wovawa kuna kuwiza konkongoronzugo. Nye mevango lyokugwana evatero nehengagwido, ngava va koresa komutjima nokuvaswaura. Ntani Samwere ya mu koresere komutjima apa ga dimbwilire asi Hofini naPinehasa kuna kuteza po veta zaJehova pokuhondera novakadi vamwe ava ngava rugana konkongoronzugo. (1 Sam. 2:22) Samwere ga ndindilire asi Eli na rugana ko yuma.
Udona ngava va rugana vana vaEli ngau tanganesa Samwere komutjima
14 Eli ga kere nonokondo dokuhagekesa po udigu owo, morwa ngomupristeli gomunene ga kere nositumbukira sokugendesa nayinye monkongoronzugo. Ngaguhya, ga kere nositumbukira sokuvyukisa vana vendi ava ngava hepeke vakwawo. Nye Eli kapi ga sikisire mo yitumbukira yendi ngaguhya nomupristeli gomunene. Age kwa va piswire tupu kanunu. (Resa 1 Samwere 2:23-25.) Nye vana vendi va hepere episuro lyenene. Morwa awo kwa tulire nonzo edi ngano da va twaredesere konomfa.
15. Mbudi musinke zononkondo Jehova ga tumine kwaEli, ntani ngapi epata lyendi lya tere erondoro olyo?
15 Ukaro kwa donapere sili unene Jehova yipo ga tumine “muporofete” ogu va dira kutumbura kedina a ze kwaEli mokukagava mbudi zompanguro. Jehova kwa pulire Eli asi: “Yinke yokufumadekera vana woge kupitakana nge ame”? Karunga makura ta pumbu asi vana vaEli wovadona ngava fa ezuva limwe tupu, ano epata nalinye lyaEli ngali hepa unene, nokuzumbanesa situmbukira soupristeli. Nampili ngomu va gwene erondoro lyononkondo, Eli novana vendi kapi va tulire po marunduruko.—1 Sam. 2:27–3:1.
16. (a) Yisinke za uyunga Bibeli kuhamena mumati Samwere? (b) Ngapi omu ono kulizuvha kweyi za uyunga Bibeli kuhamena Samwere?
16 Ngapi omu nkareso zaEli novana vendi za kundamene mumati Samwere? Nampili ngomu ngava rugana yoyidona, Samwere eparu lyendi kwa demenenene kosirugana saKarunga. Mwa-1 Samwere 2:18, tatu resa asi: ‘Mumati Samwere nga kerere ngorooro HOMPA.’ Movelise 21 megaununo lyoolyo, tatu resa yininke yokuguma mutjima asi: “Mumati Samwere kwa kulilire moyirugana [yaJehova, NW].” Ngomu ga kulire, elikwatakano lyendi naGuhwe gemeguru kwa nkondopere unene. Elikwatakano lyangoso naJehova alyo kwa mu poperere ko yininke yoyidona.
17, 18. (a) Ngapi vadinkantu woVakriste nava temwinina sihonena saSamwere nampili wopeke tava rugana yoyidona? (b) Yitundwamo musinke ya kere apa Samwere ga limburukwire Jehova?
17 Samwere ngano ga vhulire kugazara asi nsene mupristeli gomunene novana vendi kuna kutura nonzo dononene, nage kuvhura kurugana yokulifana. Nye nsene vantu tava rugana yoyidona, nampili ava va kara noyitumbukira mombungakriste, kapi yina kutupa epulisiro asi nose tu rugane yoyidona. Naina, Vakriste wovadinkantu wovanzi kukwama sihonena saSamwere ‘nokukura moyirugana yaHOMPA’ nampili vapeke va dire kutura po sihonena sosiwa.
18 Yitundwamo musinke ya kere apa Samwere ga limburukwire Jehova? Tatu resa asi: “Mumati Samwere ta kuru ngorooro, ta wapere HOMPA novantu.” (1 Sam. 2:26) Samwere kwa mu here, unene po ava ngava rugana yoyiwa. Jehova nage kwa here mumati ogu morwa ulimburukwi wendi. Samwere ga divire asi ezuva limwe Karunga gwendi nga rugana ko yuma koyininke nayinye yoyidona yina kuhoroka poSiro.
“Uyunga, HOMPA, mukereli goge ta zuvhu”
19, 20. (a) Yisinke ya horokerere Samwere momasasiku ponkongoronzugo? (b) Ngapi Samwere ga ya divire ntundiliro zombudi ntani ngapi ga tekwire Eli?
19 Ezuva limwe, momasasiku, azo ramba zomonkongoronzugo simpe kuna kutwera, Samwere ta zuvhu ezwi lina kuzigida edina lyendi. Age ta gazara asi Eli ana kumuzigida. Samwere makura “ta duka” a ze kwaEli. Age ta duka nompadi-mpadi a ka zuvhe eyi ana kumuzigidira Eli. Posiruwo sina Eli kwa kurupire unene ntani kapi nga mono nawa. Nampili ngomu Eli ga rugene yoyidona, Samwere ga mu fumadekere nokumutekura nawa, morwa Eli kwa kere simpe mupristeli gomunene gwaJehova.—1 Sam. 3:2-5.
20 Samwere ta pindura Eli asi: “Nyame ogu, ogu muna zidiga.” Nye Eli ta mu tantere asi kapi ana mu zigida a tengure a ka rare. Tayi horoka hena yikando yivali! Makura Eli ta dimburura asi Jehova ana kuzigida Samwere. Morwa udona ngau horoka monkongoronzugo, Jehova ga hagekere kugava mamoneko ndi nombudi kovantu vendi. Eli ta yi dimburura asi ngesi Jehova kuna hara hena kuuyungisa vantu vendi kupitira momumati ogu. Makura Eli ta tantere Samwere a tengura a ka rare nokumutantera omu na ka limburura monkedi zongwa. Samwere ta limburukwa. Konyima ta zuvhu ezwi lina kuzigida asi: “Samwere! Samwere!” Samwere ta limburura asi: “Uyunga, HOMPA, mukereli goge ta zuvhu.”—1 Sam. 3:1, 5-10.
21. Ngapi natu purakena kwaJehova naina, ntani morwasinke yina karere nohepero tu yi rugane?
21 Jehova ga kere hena nomukareli moSiro ogu nga mu purakene. Eparu lyendi nalinye Samwere nga purakene kwaJehova. Nove kupurakena nkenye apa kwaJehova ndi? Ezwi lyaJehova kapi tatu li zuvhu ngwendi moomu ga li zuvhire Samwere. Naina, ose kuzuvha ezwi lyaKarunga kupitira moNonkango dendi, Bibeli. Nsene tu purakena kwaKarunga pokuresa Bibeli nkenye apa nokutura pasirugana eyi tuna kulironga, epuro lyetu ngali pama ngwendi lyaSamwere.
Nampili ngomu ga kere nowoma, Samwere ga tanterere Eli mpanguro zokutunda kwaJehova
22, 23. (a) Ngapi mbudi ezi Samwere ga tanterere Eli za sikire mo? (b) Ngapi vantu va yi dimbwilire asi Samwere yige muporofete?
22 Masiku gena, Samwere yipo ga tamekere kukara nelikwatakano lyenene naJehova, ta kara muporofete gwaKarunga nomuuyungili po gwendi. Pomuhowo, mumati Samwere ta kara nowoma kutantera Eli asi Jehova nga futisa epata lyendi. Nye konyima zosiruwo, ta hedere Eli a mu tantere, ano Eli ta tambura mbudi zaJehova. Nayinye eyi ga pumbire Jehova kwa sikire mo. Vaisraeli kwa zire koyita noVafilisiti ano Hofini naPinehasa kwa va dipagere mezuva limwe. Ano Eli kwa fire apa ga zuvhire asi sikesa saJehova vana si twara Vafilisiti.—1 Sam. 3:10-18; 4:1-18.
23 Makura vantu tava tameke kuyipura asi Samwere yige muporofete. Bibeli kutanta asi: “HOMPA kwa kere pwendi, ta ninki nkenye eyi nga tanta Samwere yi sike mo.”—Resa 1 Samwere 3:19.
‘Samwere ta kanderere’
24. Etokoro musinke Vaisraeli va tulire po, ntani morwasinke lya karere nzo zonene?
24 Vaisraeli va tambwire Samwere ngomuporofete gwawo nokulimburukwa kwaJehova ndi? Hawe. Konyima va ya tokwere asi kapi vana hara muporofete a kare mupanguli gwawo. Vaisraeli kwa here kufana ngwendi nomuhoko dapeke mokukara nahompa ogu na va pangera. Jehova ga tanterere Samwere a rugane eyi va hundilire nokuvatantera asi awo kuna kutura nzo zonene. Kapisi Samwere va nyokere, nye Jehova. Samwere makura ta zigida vantu va ya ponge koGiligali.
Samwere kwa kanderere mepuro ano Jehova ta mu limburura pokutuma nombadi nomvhura
25, 26. Ngapi Samwere ga vaterere vantu vendi va dimburure unene wounzoni wawo?
25 Tu tareni eyi ya horokere apa ga uyungisire Vaisraeli poGiligali. Samwere kwa diworokesere Vaisraeli ulimburukwi wendi. Bibeli kutanta asi: “Samwere makura ta kanderere.” Age ta pura Jehova a tume nombadi nomvhura.—1 Sam. 12:17, 18.
26 Aso kwa kere sinema sorukukutu, mvhura ngano kapi za vhulire kuroka. Vantu nampo va mu zorere. Nye hararasi maremo taga tameke kulipongaika keguru. Mpepo tazi tameke kupepa. Sindundumo somaruvadi naso tasi tameke. Makura mvhura tazi roko. Ngapi vantu va lizuvhire? “Mbunga mudima tazi tjira HOMPA naSamwere.” Makura mbunga tazi dimburura unene wounzoni wawo.—1 Sam. 12:18, 19.
27. Ngapi Jehova ana kulizuvha kuhamena ava vana kuhonena epuro lyaSamwere?
27 Pokurokesa mvhura, Jehova Karunga ga gumine nomutjima dawo douhalimburukwi. Kutundilira unona dogoro moukurupe wendi, Samwere ga huguvarere mwaKarunga gwendi. Jehova ga mu tungikire. Nampili momazuva getu, Jehova kapi ga runduruka. Age kuvatera ava ava honene epuro lyaSamwere.
^ para. 5 Vanasili kwa kere momugano gwa kwaterere mo kudira kunwa nkenye yikorwesa nokudira kuteta nohuki dawo. Vamwe ngava tura po mugano ogo karuwogona tupu, nye vamwe ngwendi Simisoni naSamwere naJohanesa Mukuhwi awo kwa kere Vanasili eparu lyawo nalinye.
^ para. 9 Nkongoronzugo kwa kere tenta zonene ezi va tulire poyipirangi. Tenta kwa zi rugene noyipapa nomakehe gondiro noyitji eyi va kwitire nondombo zosisiliveli nongorodo. Nkongoronzugo kwa kere meharango omu mwa kere sizambero. Mwa za siruwo, va tungilire ko notenta dimwe edi ngava ruganesa vapristeli. Kumoneka asi Samwere nga rara mwazimwe zonotenta odo.
^ para. 12 Kapi ngava fumadeke nonzambo mononkedi mbali. Zokuhova, Veta kwa tumbwire nyama ezi va vhulire kugusa vapristeli va ka lye. (Deut. 18:3) Nye konkongoronzugo, vapristeli wovadona ngava rugana yokulisiga. Ngava tumu vakareli vawo va ka twe mokayiga kana kuvira norutugo rononyara ntatu va ka guse mo nkenye nyama. Nkedi zauvali, apa vantu ngava twara nonzambo dawo, vapristeli wovadona ngava tumu vakareli vawo va ya guse nyama zombihu kovantu ago magadi simpe kapi gana pu kuswakerera kwaJehova.—Lev. 3:3-5; 1 Sam. 2:13-17.
Kuvhura o hafere hena
HONENA EPURO LYAWO
Samwere ga lididimikilire maudigu
Natuvenye kuligwanekera nomaudigu aga aga heteke epuro lyetu. Yisinke no lirongera ko kelididimikiro lyaSamwere?
HONENA EPURO LYAWO
Hana kwa pwagesere malizuvho gendi kwaKarunga
Epuro lyaHana mwaJehova lya mu vaterere a lididimikire ukaro ou ga kere nawo.
Yisinke no lirongera ko koyihorokwa yomoBibeli?
Jehova ta uyunga naSamwere
Vana vavali wovagara womupristeli gomunene gedina Eli ava va kere vapristeli ponkongoronzugo, kapi ngava limburukwa konoveta daKarunga. Nye mumati Samwere ga lisigire nawo, ntani Jehova ga uyungire naSamwere.
YIRONGWA YOMOBIBELI
Yiruganeso yelirongo lyoBibeli
Horowora yiruganeso yelirongo lyoBibeli eyi nayi kuvatera o kwate egano eyi nolironga.
