1-3. Yisinke ga mwene Peturusa apa ga kere naJesus, ntani yisinke ya va horokerere masiku apa va dugire?

PETURUSA ta dugu wato nononkondo. Ago masasiku, keguru kuna sovagana. Mugongo nomapepe gendi kuna kukora morwa kuna dugu siruwo sosire. Mpepo kuna kupepera nononkondo mekurudiva lyaGalireya. Mankupi kuna kulitoona mowato, mema kuna kumurafaukira taga mu woreke. Age ta twikire kuduga.

² Peturusa novakwawo kwa sigire Jesus konontere dekurudiva. Ezuva olyo, va mwene omu Jesus ga kutikire mbunga zovantu nonomboroto nonomfi dononsesu. Makura vantu tava hara kutura Jesus a kare hompa, nye age kapi ga here kulihameka moupolitika. Age kwa rongere hena vasikuli vendi va dire kulihameka moupolitika. Apa ga mene kutuma mbunga zi tengauke, Jesus ta tantere varongwa vendi va perame mowato makura age ta zi gelike kondundu a ka kanderere.—Mar. 6:35-45; resa Johanesa 6:14-17.

³ Varongwa tava dugu masiku nagenye. Nye kapi va zire sinano sosire. Morwa kuduga wato ntani kwa kere ezogerero lyenene lyompepo neli lyomankupi awo kapi va vhulire kusimwitira. Siruwo esi va dugire age Peturusa kuna kugazadara.

4. Yisinke natu lirongera ko kwaPeturusa?

⁴ Peturusa yinzi ga vhulire kugazadara. Ta gazadara omu va ligwene naJesus gomoNasareta. Ga lirongerere ko yoyinzi kwaJesus nye simpe yinzi ga hepere kulironga. Natu ka lirongera ko  yoyinzi keharo lyendi lyokugusa po woma nomasinganyeko. Tu zeni tu ka tare.

5, 6. Yirugana musinke nga rugana Peturusa?

⁵ Peturusa kapi ga divarere ezuva lyokuhova eli va ligwene naJesus. Mumbyendi Andiliyasa yige ga hovere kumutantera asi: “Ose tuna gwana Mesiyasa.” Kutunda opo, eparu lyaPeturusa yipo lya rundurukire.—Joh. 1:41.

⁶ Peturusa kwa tungire moKaperenaumu, sitata sa kere korwaMuzogo gEkurudiva lyaGalireya. Nage namumbyendi Andiliyasa ngava rugana kumwe naJakopo naJohanesa, vana vaSebede, mokukwata nomfi. Peturusa kwa tungire kumwe namukadendi nongumweyi zendi ntani namumbyendi Andiliyasa. Ga hepere kurugana unene mokukwata nomfi a rere vemepata lyendi. Vagara owo ngava rugana masiku mudima va tege makwe gawo nokugazaura mo momema. Ntani ngava rugana siruwo sosire va hangure nomfi edi vana kwata nokudirandesa, nokuzeresa makwe gawo.

7. Yisinke Peturusa va mu tanterere kuhamena Jesus, ntani morwasinke za karerere mbudi zongwa?

⁷ Bibeli kututantera asi Andiliyasa kwa kere murongwa gwaJohanesa Mukuhwi. Peturusa nampo nga purakene apa Andiliyasa nga mu tantere kuhamena mbudi zaJohanesa. Ezuva limwe, Andiliyasa ta mono Johanesa kuna kulika Jesus Munasareta asi: “Tareni, Nzwigona zaKarunga ozo!” Makura Andiliyasa poopo ta kwama Jesus nokukatantera Peturusa mbudi zongwa asi: Tuna gwana Mesiyasa! (Joh. 1:35-40) Konyima zourwanesi womoEdeni, Jehova Karunga kwa tumbwidilire asi muntu gokulikarera nga ya zowora vantu. (Gen. 3:15) Andiliyasa ga gwene Muzowoli ndi Mesiyasa getumbwidiro! Makura Peturusa nage ta duka a ka mone Jesus.

8. Yisinke ali tanta edina eli Jesus ga rukire Peturusa, ntani yisinke vamwe ava uyunga kuhamena Peturusa?

⁸ Peturusa ngava mu tumbura asi Simoni. Nye Jesus ta mu tara, ta tanta asi: “‘Nyove Simoni zaJohanesa. Ngava ku tumbura asi Kefasa’ (kuninka asi Peturusa, emanya).” (Joh. 1:42) Nonkango daJesus kwa kere dopauporofete. Jesus ga mwene asi Peturusa nga ya kara musikuli ngwendi gokuvhura kuhuguvara gokupama ngwendi emanya. Yimo ga lizuvhire ngoso Peturusa ndi? Hawe. Nampili vantu vamwe ava ava resa Mavangeli kapi ava gazara asi Peturusa kwa kere muntu gokuvhura kuhuguvara  gokupama ngwendi emanya. Vamwe kutanta asi ga kere muntu gowoma gomasinganyeko.

9. Yisinke Jehova naMunwendi ava tara mwetu, ntani morwasinke natu va huguvarera?

⁹ Peturusa ga tulire mapuko. Ano Jesus ga yi divire. Ngwendi oGuhwe Jehova, Jesus nkenye apa nga tara yikara yoyiwa movantu. Jesus ga yi divire asi Peturusa ga kere noyikara yoyiwa, ntani ga here kumuvatera a likide yikara oyo monkedi zongwa. Jehova naMunwendi kutara yikara yoyiwa mwetu. Nampili kapi natu vhura kuyipura oyo, awo kumona yikara yoyiwa mwetu. Ngwendi Peturusa, twa hepa kuhuguvara mwaJehova naJesus nokukara neharo lyokutudeura nokutuwapaika.—Resa 1 Johanesa 3:19, 20.

10. Yisinke Peturusa ga mwene Jesus ana kurugana, ntani kosinke ga tengwire hena?

¹⁰ Peturusa ga tamekere kuza naJesus moyirugana yokuzuvhisa. Age ga mwene Jesus kuna kurugana sitetu sendi sokuhova sokusitunukisa mema ga kare vhinyu posipito sononkwara moKana. Ntani ga zuvhire mbudi zongwa zokuhamena Uhompa waKarunga. Nampili ngoso, konyima zosiruwo Peturusa ga hagekere kukwama Jesus, makura ta tengwire kosirugana sendi sokukwata nomfi. Konyima zomakwedi gongandi, Peturusa ga ya ligwene hena naJesus, makura Jesus ta mu zigida a mu kwame siruwo nasinye.

11, 12. (a) Yisinke ya horokere ezuva limwe apa Peturusa ga here kukwata nomfi? (b) Apa Peturusa ga purakenene kwaJesus, yisinke ga lipulire?

¹¹ Ezuva limwe, Peturusa kwa rugene masiku nagenye nye kapi ya mu tompokere. Nage novakwawo tava tege makwe gawo nye kapi va kwete nomfi. Nampo Peturusa ga hetekerere ko kuruganesa nondunge dendi a papare evango lyewa oku adi kara nomfi dononzi. Age nampo ga lizuvhire ngwendi a mbwitire tupu momema a gwane nomfi dononzi makura a di singire mekwe. Peturusa ga nyegenyene morwa ga divire asi kwato eyi na rugana yipo nomfi di ze mekwe. Age kapi nga kwata nomfi a lihafese tupu nye nga reresa ko epata lyendi. Makura tava hegeke wato. Tava tameke kukuhwa makwe gawo. Jesus ta ya va gwana awo kuna kukuhwa makwe.

¹² Mbunga zovantu tazi lirombere yipo zi zuvhe nonkango daJesus. Makura Jesus ta perama mowato waPeturusa, ta va ninke va sure wato u ligore ko nakauke konontere. Jesus makura  ta tameke kuronga mbunga zovantu. Peturusa ta purakene nawa, ngwendi moomu za yi rugene mbunga ezi za kere konontere dekurudiva. Age kapi za mu setere mbudi zaJesus kuhamena Uhompa waKarunga. Peturusa nampo ga gazarere omu ya kara mfumwa zokuvatera Kristusa mokuhanesa mbudi zongwa ozo uzuni mudima. Ngapi nayi mu vhulika? Ngapi ngano na vhura kurera epata lyendi? Nampo Peturusa ga gazarere asi udigu kuzuvhisa mbudi zongwa naJesus ano posiruwo sooso a kwate nomfi.—Ruk. 5:1-3.

13, 14. Sitetu musinke Jesus ga ruganenene Peturusa, ntani yisinke ga rugene Peturusa?

¹³ Jesus ta mana kuuyunga, makura ta tantere Peturusa asi: “Dugira petondo, makura mu ka tege makwe geni, mu kwate.” Peturusa ta singanyeke. Ta tanta asi: “Murongi, ose kuna rugana masiku mudima, nye nayimwe si tuna kwata. Nye konkango zoge nani li tegera ekwe.” Morwa Peturusa ga mene nare kukuhwa makwe, kapi ga here hena kugateka. Ntani aso kapi sa kere siruwo sokuwapera kukwata nomfi. Nye ta tambura epukururo, ta tantere vakwawo womowato wapeke nawo va tege.—Ruk. 5:4, 5.

¹⁴ Peturusa ta zuvhu udigu apa ga tamekere kudera ekwe. Ta dere sili unene, ga ya tara ko, nomfi dononzi dina kuparapapa mekwe. Ta tukuka, makura ta rapa vakwaawo ava va kere mowato wapeke va ya va kwafe. Nye nomfi kapi da gwanekere mo mowato umwe. Tava zwida nomfi momawato gavali, ano mawato gana hara kudama. Peturusa ta tetuka unene. Apa ngesi, Peturusa ga mwene nonkondo daKristusa. Age ga mwene asi Jesus ga kere nononkondo dokuhwilida nomfi momakwe. Peturusa tau mu kwata woma. Ta ligandere konongoro daJesus, ta tanta asi: “Tunda po pwange, Hompa, morwa ame mugara gomunanzo.” Peturusa ga lizuvhure asi kapi ga wapera kukwama muntu ogu ga kara nononkondo daKarunga dokurugana sitetu sangoso.—Resa Rukasa 5:6-9.

15. Yisinke Jesus ga tanterere Peturusa yipo a dire kukara nowoma nomasinganyeko?

¹⁵ Makura Jesus ta tanta asi: “Neisi nagu ku pwagera; kutunda apa, ove ngo kwata nye vantu.” (Ruk. 5:10, 11) Peturusa kapi hena ga hepere kukara nomasiganyeko ndi nowoma. Age ga hepere kudemenena kosirugana somulyo sokuzuvhisa mevango  lyokukara nomasinganyeko nsene asi nga vhura kurera vemepata lyendi ndi nsene asi nga vhura kuzuvhisa. Jesus kwa kere nosirugana sosinene, esi sa kundamene meho zovantu. Age nga karere Karunga ogu a dili ‘kulikata-kata kudongwenena po.’ (Jes. 55:7) Peturusa ga hepere kuhuguvara mwaJehova asi nga mu vatera a rere epata lyendi nokuzuvhisa.—Mat. 6:33.

16. Yisinke ga rugene Peturusa naJakopo naJohanesa apa ga va zigidire Jesus, ntani morwasinke lya karerere etokoro lyomulyo?

¹⁶ Peturusa ta limburukwa kwaJesus, ngwendi moomu va yi rugene Jakopo naJohanesa. Bibeli kutanta asi: ‘Mawato tupu va ga hegeka, makura nayinye tava zumbu, va kwame Jesus.’ (Ruk. 5:11) Monkedi zangesi, Peturusa ga likidire asi ga kere nepuro mwaJesus naKarunga. Alyo kwa kere etokoro lyomulyo. Naina,  Vakriste ava va gusa po masiganyeko nowoma yipo va karere Karunga nawo kulikida epuro. Jehova nkenye apa kupakera mbili ava ava mu huguvara.—Epis. 22:4, 5.

17. Yihorokwa musinke ga gazarere Peturusa?

¹⁷ Tapa piti nomvhura mbali kutunda apa Jesus va ligwene naPeturusa. Ngwendi moomu tuna yi tumbura ketamekero lyosirongwa esi, Peturusa kwa dugire masiku nagenye mekurudiva lyaGalireya. Yihorokwa yinzi ga vhulire kugazadara. Nampo ta gazara omu ngumweyi zendi ga mu verwire Jesus. Ntani nEudiso lyopoNdundu eli ga geve Jesus. Ta gazara hena omu Jesus ga yi likidire kupitira merongo nomoyitetu asi Jehova yige ga mu horowere a kare Mesiyasa. Mwa za makwedi, Peturusa ga lirongere kugusa po woma nomasinganyeko. Jesus ga mu horowere a kare gumwe govapositoli vendi 12. Ngamoomu natu ka yi mona, Peturusa simpe ga kere nowoma nomasinganyeko.

18, 19. (a) Yisinke ga mwene Peturusa pEkurudiva lyaGalireya? (b) Yisinke Jesus ga pulisilire Peturusa a rugane?

¹⁸ Momasasiku Peturusa ta hageke kuduga makura ta hingire. Ta mono koure sininke sina kuligumagura. Mankupi ga yeraukire ndi? Hawe, aso kwa kere sininke sokuvyukilira. Muntu ga gendere pomema! Apa muntu ga hederere pepi, ta kara ngwendi kuna kuvapitakana. Varongwa tau va kwata woma, tava gazara asi sinkisauke. Muntu ogu ta va tantere asi: “Gu mu dame, nyame gwa ha mu pwaga.” Nani kwa kere Jesus!—Mat. 14:25-28.

¹⁹ Makura Peturusa ta tanta asi: “Hompa, nsenesi nyove, ninka nge name ni gende pomema, ni wize koge.” Peturusa pomuhowo ga kere nouradi. Ta hafa sili unene kositetu sokugenda nage pomema. Ntani ga here kulikida asi ga kere nepuro. Makura Jesus ta zigida Peturusa. Makura age ta humburuka mo mowato ta lyata pomema. Gazareni omu ga lizuvhire Peturusa apa ga lyatere nokusikama pomema. Age ga lizuvhire uwaawa apa ga gendere a ze kwaJesus. Nye haruka ko, Peturusa ta lizuvhu mwapeke.—Resa Mateusa 14:29.

20. (a) Morwasinke Peturusa ga karere nowoma, ntani yisinke ya horokere? (b) Sitwa musinke somulyo Jesus ga tanterere Peturusa?

²⁰ Peturusa ga hepere kunwika meho gendi kwaJesus. Morwa Jesus kwa ruganesere nonkondo daJehova a vatere Peturusa ga dire kumuganda mankupi. Jesus kwa yi ruganene oyo yipo Peturusa a likide epuro mwendi. Nye Peturusa kapi ga nwikire  kwaJesus. Bibeli kutanta asi: “Apa ga mwene epepo tali koro, tagu mu pwaga.” Peturusa ta mono omu mamunkupi gana kulitoona mowato nokurafura mema. Age ta gazara asi ta dama. Ta lizuvhu woma wounene makura epuro lyendi tali sesupa. Mugara ogu va rukire asi Emanya morwa ga pama, ta tameke kudama ngwendi emanya morwa kudira epuro. Peturusa ga divire kuzoga, nye sikando esi kapi ga yi vhulire. Makura ta zigire asi: “Hompa, popera nge!” Jesus ta gonyonona kuwoko kwendi ta mu nyangura mo. Awo simpe pomema, Jesus ta tantere Peturusa sitwa somulyo asi: “O munepurogona ove, wa singanyekera yisinke?”—Mat. 14:30, 31.

21. Morwasinke kusinganyeka za karera nkareso zosiponga, ntani ngapi natu vhura kuzinyokera po?

²¹ ‘Kusinganyeka’ kuna kara nkareso zosiponga ezi nazi vhura kuzonagura muntu. Nsene tu kara nomasinganyeko, epuro lyetu tali sesupa makura tayi zonagura elikwatakano lyetu naJehova. Twa hepa kunyokera po nkareso zomasinganyeko. Monkedi musinke? Pokudemenena koyininke yoyiwa. Nsene tu demenene koyininke yokuvhura kuturetera woma nomadompeso ndi yokutugusa ko kwaJehova naMunwendi, ose nkenye apa ngatu kara nomasinganyeko. Nye nsene tu demenena kweyi a tu ruganene Jehova naMunwendi, neyi nga ruganena ava va mu hara, ose ngatu nyokera po masinganyeko.

22. Morwasinke no honenena epuro lyaPeturusa?

²² Peturusa naJesus tava rondo mowato. Makura Ekurudiva lyaGalireya tali mwena teete. Makura Peturusa nava va kere mowato tava tanta asi: “Hawe, yosili nani o MunwaKarunga.” (Mat. 14:33) Apa lya sire, Peturusa tali zuvhu ruhafo. Ga lirongere kunyokera po masinganyeko nowoma. Age ga hepere kutura po marunduruko gomanzi komeho a ya kare nosikara sokupama ngwendi emanya esi ga mwene Jesus mwendi. Peturusa ga tokomenene kutura po marunduruko. Nove wa kara netokomeno lyangoso ndi? Peturusa ga tura po sihonena sepuro esi no vhura kuhonena.