Ehuliso
“Omu honene wokupinga eyi ga tumbwidira Karunga epuro noudidimiki wawo moudigu.”—VAHEBELI 6:12.
1, 2. Morwasinke ya karera nomulyo tu tunge po epuro? Gava sihonena.
EPURO kuna kara kara sikara sosiwa. Nsene o zuvha nkango epuro wa hepa kugazara kuhamena nkango zimwe hena: “Ngenderera!” Nsene kapi tuna kara nepuro, twa hepa kugenderera kurugana ko yuma tu kare nalyo. Ano nsene twa kara nalyo, twa hepa kurugana ko yuma pangendera yipo tu li gamene nokulinkondopeka. Morwasinke?
2 Gazara asi ove kuna kugenda momburundu. Ano ono hepa mema gokunwa. Apa no ga gwana, to ga popere komutenya. Ove no vheta gomanzi yipo ga ka ku sikise oku ono tamba. Naina, ose kuna ngwendi momburundu mouzuni omu vantu vana dili kukara nepuro. Moomu twa hepa mema tu paruke, pwa hana epuro kapi tatu kara nelikwatakano naJehova.—Rom. 1:17.
3. Yisinke ga tu pa Jehova yipo tu tunge po epuro, ntani yininke musinke yivali twa hepa kudiworoka?
3 Jehova ga diva asi twa hepa epuro pangenderera, ntani ga diva asi naina udigu kutunga po nokunkondopeka epuro. Yiyo ga tu pera yihonena eyi natu hepa kuhonena. Jehova kwa gendesere mupositoli Paurusa a tjange asi: “Omu honene wokupinga eyi ga tumbwidira Karunga epuro noudidimiki wawo moudigu.” (Heb. 6:12) Ntani yiyo mbunga zaJehova zina kutukorangeda tu kondje unene tu honene yihonena yovagara novakadi ngwendi ava va tumbura mobuke ezi. Yisinke twa hepa kurugana ngesi? Tu diworokeni yininke yivali eyi: (1) Twa hepa kutwikira kunkondopeka epuro lyetu; (2) twa hepa kutwikira kudemenena kehuguvaro lyetu.
4. Ngapi Satana ga kara nkore zepuro, ntani morwasinke natu dilira kukara nowoma?
4 Twikira kunkondopeka epuro lyoge. Satana nkore zonene zepuro. Mupangeli gouzuni ou kutudigopekesera kutunga po epuro. Age nonkondo unene kutupita. Ngoso twa hepa nye kukara nowoma asi kapi natu vhura kutunga po epuro lyetu nokulinkondopeka ndi? Hawe! Jehova age Kaume gomunene gowo ava papara epuro lyene-lyene. Age ga tu tumbwidira asi nga tu vatera tu nyokere po Muzonaguli yipo a tu suwurukwe. (Jak. 4:7) Ose kunyokera po Muzonaguli pokulitulira po siruwo nkenye ezuva tu tunge po nokunkondopeka epuro lyetu. Monkedi musinke natu yi rugana oyo?
5. Ngapi omu vagara novakadi vepuro va gwene sikara sepuro? Faturura.
5 Vagara novakadi vepuro ava va tumbura moBibeli kapi va va retere nosikara oso. Awo kwa tungire po sikara sepuro nevatero lyompepo zokupongoka zaJehova. (Gar. 5:22, 23) Awo ngava kanderere, ano Jehova ga twikilire kunkondopeka epuro lyawo. Nose tu ruganeni yokulifana pokudiworoka asi Jehova kugava mpepo zendi kwava ava zi hundire nokuparuka kuliza nomakanderero gawo. (Ruk. 11:13) Koyili hena yimwe twa hepa kurugana ndi?
6. Ngapi natu gwanena mo uwa moyihorokwa yomoBibeli?
6 Mobuke ezi, ose kwa lironga tupu yihonena yongandi yava va kere nepuro. Nye simpe pwa kara yihonena yoyinzi! (Resa Vahebeli 11:32.) Yinzi natu vhura kulirongera ko kovantu vepuro ava va tumbura moBibeli. Nsene tupu tu genderesa kuresa yihonena oyo, kapi ngatu nkondopeka nawa epuro lyetu. Mokugwanena mo uwa kweyi tuna kuresa, twa hepa kulitulira po siruwo sokukonakona nawa yihorokwa oyo yomoBibeli. Nsene tu diworoka nkenye apa asi vagara novakadi owo wokudira kusikilira mo kwa kere nomalizuvho “ngwendi nyose,” ngatu lirongera ko koyihonena yawo. (Jak. 5:17) Twa hepa kulizuvha omu va lizuvhire apa va ligwanekerere nomaudigu ngwendi aga tuna kuligwanekera nago.
7-9. (a) Ngapi ngano va lizuvhire vagara novakadi vepuro ava va tumbura moBibeli pokuvapa yirugana yaJehova eyi tuna kurugana naina? (b) Morwasinke natu nkondopekera epuro lyetu kupitira moyirugana?
7 Ose kunkondopeka hena epuro lyetu kupitira momatokoro getu neyi atu rugana. Morwa “nepuro nalyo nsene li pira yirugana lya fa.” (Jak. 2:26) Gazara tupu omu ngano nava hafa vagara novakadi va tumbura mobuke ezi nsene va va pa yirugana eyi ana kutupa naina Jehova!
8 Pasihonena, gazara tupu omu Abirahamu ngano ga lizuvhire pokumutantera asi age kapi na karera Jehova momburundu poyizambero va rugana nomamanya, nye ta mu karere kumwe nombunga zovakareli poSinyanga soUhompa nokoyigongi yoyinene oku ava faturura matumbwidiro aga ga ‘monenene koure.’ (Resa Vahebeli 11:13.) Gazara tupu omu ngano Eliya ga lizuvhire pokumutantera asi sirugana sendi kapi ngasi hamena mo kudipaga vaporofete wovadona vaBara ndi a karere Jehova mepangero lyahompa gomudona, nye sokutwarera vantu mbudi zehengagwido zehuguvaro moukaro wombili. Yosili, vagara novakadi vepuro ava va tumbura moBibeli ngano nava tambura usimbu-simbu sirugana saJehova.
9 Tu twikireni kunkondopeka epuro lyetu kupitira moyirugana. Nsene tu yi rugana, ose ngatu tura pasirugana eyi va rugene vagara novakadi vepuro ava va tumbura moBibeli. Ngamoomu va yi tumbura metwaromo, awo ngava kara ngwendi vakaume vetu vene-vene. Ukaume owo ntaantani ngau ka sike mouta wa kora.
10. Ruhafo musinke ngatu ka kara naro moParadisa?
10 Twikira kudemenena kehuguvaro lyoge. Vagara novakadi vepuro kugwana nonkondo kehuguvaro eli ga gava Karunga. Nove yimo o yi rugana ndi? Pasihonena, gazara tupu koruhafo ngatu ka kara naro pokukamona vakareli vaKarunga vepuro kuna ‘kuvapindura koufe.’ (Resa Yirugana 24:15.) Mapuro musinke ono hara ngo ka va pure?
11, 12. Mouzuni woupe, mapuro musinke nampo ngo ka pura (a) Abeli? (b) Nowa? (c) Abirahamu? (d) Rutu? (e) Abigayili? (f) Esitera?
11 Apa ngomu ka ligwana naAbeli, ngo ka mu pura asi ngapi omu va fene vakondi vendi? Ndi nampo ngo ka mu pura asi: “Ngo uyunga novakerubi ava ngava takamesa sikunino saEdeni ndi? Ngava ku limburura ndi?” Ngapi kuhamena Nowa? Kuvhura ngo ka mu pure asi: “Wa tjilire mamuturungu ndi? Ngapi omu wa takamesere yikorama nayinye ya kere memuwato?” Nsene ngo ka ligwana naAbirahamu, kuvhura ngo ka mu pure asi: “Wa mu mwene Sema munwaNowa ndi? Yilye ga ku rongere kuhamena Jehova? Ya kere ureru koge kudiruka mositata saUru ndi?”
12 Kuvhura o gazadare ko mapuro aga ono hara kukapura vakadi vepuro ava ngava ka vhumbura. “Rutu, yisinke ya ku tumangedere o kare mukareli gwaJehova?” “Abigayili, wa kere nowoma kutantera Nabali omu wa vaterere Ndafita ndi?” “Esitera, apa sihorokwa seni esi va tumbura moBibeli sa ya hege, yisinke ya ya ku horokerere nove naMoredekayi?”
13. (a) Mapuro musinke nampo ngava ka ku pura owo ngava ka vhumbura? (b) Ngapi ono kulizuvha kukamona vagara novakadi wovalimburukwi ava va tumbura moBibeli?
13 Vagara novakadi owo nawo ngava ka ku pura mapuro. Awo ngava hara kukadiva kuhamena mazuva gopouhura nomu Jehova ga tungikire vantu vendi moyiruwo yoyidigu. Awo ngava ka hafa pokukadiva omu Jehova ga sikisire mo matumbwidiro gendi nagenye. Mouzuni woupe kapi ngayi ka kara hepero kugazara kuhamena vakareli wovalimburukwi vaKarunga ava va tumbura moBibeli. Morwa nawo ngatu ka kara moParadisa! Yipo nye, twikira kurugana ko yuma yipo o dive vantu owo. Twikira kuhonena epuro lyawo. Ngano o hafere kukarera Jehova kumwe nawo ngovakaume woge vanarunye!
