SIRONGWA 04
Yilye Karunga gosili?
Kutundilira kwanare, vantu ngava karere yikarunga yokulisiga-siga. Nye Bibeli za tumbura Karunga gumwe tupu ogu ga ‘pitakana vakarunga navenye.’ (2 Histoli 2:5) Karunga musinke ogo? Ntani yisinke ayi mu ninkisa a pitakane vakarunga navenye? Mosirongwa esi, to ka lironga eyi Karunga ana harere o mu dive.
1. Edina lyaKarunga yilyo yilye, ntani ngapi omu tuna yi diva asi ana hara tu li dive?
Karunga ga litumbura mwene moBibeli. Age kwa tanta asi: “Nyame Jehova. Yilyo edina lyange.” (Resa Jesaya 42:5, 8, NW.) Nkango “Jehova” kwa tunda kedina lyoRuhebeli eli ali tanta asi “Age kuninka yi kare po.” Jehova ana hara tu dive edina lyendi. (Exodus 3:15) Ngapi omu tuna yi diva eyi? MoBibeli edina lyendi kwa moneka mo yikando yokupitakana 7 000! a Nye “Karunga geguru nevhu” edina lyendi, Jehova.—Deuteronomium 4:39.
2. Yisinke Bibeli azi tu tantere kuhamena Jehova?
Bibeli kutanta asi koyikarunga nayinye eyi ava karere vantu, Jehova yige gelike Karunga gosili. Morwasinke? Pwa kara nokonda dononzi. Jehova age Munankondo nadinye ntani “mupangeli gomunene gouzuni mudima!” (Resa Episarome 83:18.) “Munankondo nadinye” kutanta asi ga kara nononkondo dokurugana nkenye eyi ana hara. Age yige “ga sita nayinye,” eyi ya kara mouzuni. (Ehororo 4:8, 11) Jehova yige gelike ga karerera po narunye ntani yimo ngorooro nga kara dogoro narunye.—Episarome 90:2.
LIRONGA KO YOYINZI
Tara elisigo lya kara pokatji koyitumbwisiso yaKarunga nedina lyendi. Natu ka lironga hena eyi ga divisira edina lyendi koge.
3. Karunga ga kara noyitumbwisiso yoyinzi, nye edina lyendi limwe tupu
Mokumona elisigo lya kara pokatji kositumbwisiso nedina, likida VIDIYO, makura zogereni epuro lina kukwama ko.
-
Elisigo musinke lya kara po pokatji kedina ntani situmbwisiso ngwendi “Hompa”?
Bibeli kuuyunga asi vantu kukarera yikarunga novahompa wovanzi. Resa Episarome 136:1-3, makura zogereni epuro eli:
-
Yilye Karunga “ogu ga pitakana vakarunga navenye” ntani ‘novahompa navenye’?
4. Jehova ana hara o dive nokuruganesa edina lyendi
Yisinke yina kulikida asi Jehova ana hara o dive edina lyendi? Likida VIDIYO, makura zogereni mapuro gana kukwama ko.
-
Omu ono kugazara, Karunga ana hara tu dive edina lyendi ndi? Ntani morwasinke?
Karunga ana hara vantu va ruganese edina lyendi. Resa Varoma 10:13, makura zogereni mapuro aga:
-
Morwasinke ya karera nomulyo tu ruganese edina lyaKarunga?
-
Ngapi omu o lizuvhu apa muntu a diworoka nokuruganesa edina lyoge?
-
Omu ono kugazara, ngapi omu Karunga a lizuvhu apa o ruganesa edina lyendi?
5. Jehova ana hara o hedere pepi nendi
Mukadi gomoCambodia gedina Soten kwa tanta asi kudiva edina lyaKarunga kwa mu retera ruhafo “rorunene meparu.” Likida VIDIYO, makura zogereni epuro lina kukwama ko.
-
Kuliza novidiyo, ngapi omu kudiva edina lyaKarunga ya kundamene Soten?
Komeho o tulise po ukaume nomuntu, pomuhowo wa hepa kudiva edina lyendi. Resa Jakopo 4:8a, makura zogereni mapuro aga:
-
Yisinke ana hara Jehova o rugane?
-
Ngapi omu kudiva edina lyaKarunga nokuliruganesa nayi ku vatera o mu hedere?
VAMWE KUTANTA ASI: “Karunga gumwe tupu, kapisi hepero o dive edina lyendi.”
-
Nove wa yi pura asi Jehova edina lyaKarunga ndi?
-
Ngapi omu no yi faturura asi Karunga ana hara tu ruganese edina lyendi?
YINKE ONO LIRONGO?
Jehova kuna kara edina lyaKarunga gosili. Age ana hara tu dive edina eli nokuliruganesa yipo tu mu hedere pepi.
Erugururomo
-
Ngapi omu Jehova ga lisiga noyikarunga nayinye eyi ava karere vantu?
-
Morwasinke natu ruganesera edina lyaKarunga?
-
Yisinke yina kulikida asi Jehova ana hara o hedere pepi nendi?
MAUZERA GAMWE
Konakona nokonda ntano deyi natu pulira asi Karunga yipo ga kara.
“Karunga yipo ga kara ndi?” (Sirongwa sokojw.org)
Yisinke ayi tu ninkisa tu yi pure asi Karunga yipo ga kara kutunda kwanare?
“Yilye ogu ga sita Karunga?” (Ruhungu, Sitarara-Sikukutu 2014)
Lironga eyi natu ruganesera edina lyaKarunga nampili ngomu twa dira kudiva nawa-nawa omu ngava li tumbura moyiruwo yanare.
“Yilye Jehova?” (Sirongwa sokojw.org)
Ya kara nawa-nawa hepero kutumbura Karunga kedina ndi? Tara eyi natu uyungira asi ga kara nedina limwe tupu lyokulikarera.
“Madina gangapi ga kara nago Karunga?” (Sirongwa sokojw.org)
a Komauzera gomanzi kuhamena eyi ali tanta edina lyaKarunga ntani eyi va li gusira mo moNobibeli dimwe, tara mbapira Mauzera gomoNonkango daKarunga.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
