SIRONGWA 06
Ngapi lya tameka eparu?
Karunga yige “ntundiliro zomwenyo” ndi yige ga retesa po eparu. (Episarome 36:9) Nove wa yi pura ndi? Vantu vamwe kugazara asi eparu kwa wiza po lyene. Nsene asi owo usili, ose ngoso kwa wiza po pomponyo. Nye nsene asi Jehova yige ga sita eparu, alyo lya kara nositambo. a Koneka eyi za tumbura ko Bibeli omu lya tamekere eparu ntani neyi natu yi pulira.
1. Ngapi wa wiza po uzuni?
Bibeli kutanta asi: “Pomuhowo Karunga kwa sitire eguru nevhu.” (Genesis 1:1) Valirongi kwa yi pura asi uzuni kwa u sita. Ngapi omu Karunga ga u sitire? Age kwa ruganesere “mpepo” zokupongoka ndi nonkondo dendi, mokusita yininke nayinye yomouzuni ngwendi nomuraravili, nombungururu ntani noplaneta.—Genesis 1:2.
2. Morwasinke Karunga ga sitira evhu?
Jehova ‘kapi ga sita uzuni ndi evhu li kare ngorooro, siporongwa, nye kwa tura mo vantu va kare mo.’ (Jesaya 45:18) Age kwa sita evhu likare embo lyewa lyovantu ntani va tunge po narunye nanarunye. (Resa Jesaya 40:28 ntani 42:5.) Unsitwe kuhorora asi evhu kwa li sita nawa. Azo yizo zelike planeta ezi za divikwa ava vhuru kuparukira vantu.
3. Elisigo musinke lya kara po pokatji koyikorama novantu?
Konyima zapa ga sitire evhu, Jehova yipo ga sitilire po yinamwenyo. Pomuhowo, age kwa sitilire po yitji ntani yikorama. Makura “Karunga ta ungu nye vantu; muntu kwa mu ungire a fane Karunga.” (Resa Genesis 1:27.) Yisinke ayi ninkisa vantu va lisige noyikorama? Ose twa kara nevhuliko lyokulikida yikara yaKarunga ngwendi eharo nouhungami, morwa kwa tu sita tu mu fane. Age kwa tu sita hena tu lironge maraka, tu hafera yininke yoyiwa nonomusika. Mokulisiga noyikorama, ose kuvhura kukarera Musiti gwetu.
LIRONGA KO YOYINZI
Koneka maumbangi aga aga likida asi eparu kwa li sita ntani neyi natu pulira eyi za uyunga ko Bibeli kuhamena esito. Lironga eyi yikara yovantu ayi tu rongo kuhamena Karunga.
4. Eparu kwa li sita
Vantu kugwana efumano koyininke eyi va temwinina kounsitwe. Nye yilye lya fira efumano olyo? Likida VIDIYO, makura zogereni epuro lina kukwama ko.
-
Yisinke va rugana vantu eyi va temwinina kounsitwe?
Nkenye embo muntu ga li tunga ndi ga li dika. Nye yilye ga sita nayinye atu mono mounsitwe? Resa Vahebeli 3:4, makura zogereni mapuro aga:
-
Yisinke ayi ku tetura mounsitwe?
-
Kuvhura tu yi pure asi nayinye ya kara mouzuni kwa yi sita ndi? Morwasinke?
“Nkenye embo muntu a li tungu, nye mutungi gwanayinye, yige Karunga”
5. Eyi Bibeli za uyunga ko kuhamena unsitwe usili
MwaGenesis egaununo 1, Bibeli kwa faturura omu eparu lya tamekere pevhu. Kuvhura tu pure eyi lya tanta egaununo olyo ndi alyo esimwititi tupu? Likida VIDIYO, makura zogereni mapuro gana kukwama ko.
-
Yisinke Bibeli za uyunga ko kuhamena erongo eli asi uzuni kwa u sitire momazuva ntazimwe gonovili 24?
-
Omu ono kugazara, eyi za uyunga Bibeli kuhamena unsitwe usili ndi? Nsene yimo ndi hawe, morwasinke?
Resa Genesis 1:1, makura zogereni epuro eli:
-
Valirongi kutanta asi uzuni kwa kara netameko. Ngapi eyi va uyunga neyi wa resa moBibeli ya lifana?
Vantu vamwe kugazara asi Karunga kwa ruganesere elisinto mokusita eparu. Resa Genesis 1:21, 25, 27, makura zogereni mapuro aga:
-
Bibeli za kwatesa ko asi Karunga kwa sitire sinamwenyo simwe yipo si lisintunuke yikorama novantu nonomfi ndi? Ndi age kwa sitire yininke nayinye kuliza ‘nomarudi’ gayo? b
6. Vantu kuna kara yisitwa yaKarunga yokulikarera
Ose twa lisiga noyikorama eyi ga sita Jehova. Resa Genesis 1:26, makura zogereni epuro eli:
-
Ose kulikida yikara ngwendi eharo nonkenda morwa kwa tu sita tu fane Karunga, ngapi yikara oyo ayi likida nkareso zaKarunga?
VAMWE KUTANTA ASI: “Eyi Bibeli za uyunga kuhamena unsitwe yipempa.”
-
Ove ngapi o yi tara? Ntani morwasinke?
YINKE ONO LIRONGO?
Jehova kwa sita uzuni noyinamwenyo nayinye.
Erugururomo
-
Yisinke azi rongo Bibeli kuhamena omu wa wiza po uzuni?
-
Karunga kwa sitire sininke esi sa twaredesere kelisinto ndi age kwa sitire yininke nayinye kuliza nomarudi gayo?
-
Ngapi omu vantu va lisiga noyikorama?
MAUZERA GAMWE
Tara yihonena eyi ayi likida asi pwa kara Musiti.
“Yisinke au tu rongo unsitwe?” (Awake!, Sitarara 2006)
Tara omu guhya ana kufatwilira munendi eyi Bibeli za uyunga kuhamena unsitwe.
Konakona eyi ava uyunga vantu kuhamena elisinto nsene sili ya liza noBibeli.
“Karunga kwa ruganesere elisinto mokusita yinamwenyo ndi?” (Sirongwa sokojw.org)
Tarurura maumbangi kuhamena ekonakono eli va rugene valirongi nsene asi eparu kwa li sita ndi kwa wiza po tupu lyene.
Mapuro gatano gomulyo kuhamena ntundiliro zeparu (mbapira)
a Sirongwa 25 ngasi ka zogera sitambo saKarunga kovantu.
b MoBibeli nkango ‘yomarudi’ kwa kwatera mo yinamwenyo nayinye.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
