SIRONGWA 08
Kuvhura o kare kaume kaJehova
Jehova ana hara o mu dive nawa. Morwasinke? Age ga yi diva asi nsene o lironga kuhamena yikara nonompango dendi ntani nositambo sendi, kuvhura o hare kukara kaume kendi. Kuvhura sili o kare kaume kaKarunga ndi? (Resa Episarome 25:14.) Yisinke no rugana yipo o kare kaume kendi? Bibeli kulimburura mapuro ogo ntani kulikida asi kutulisa po ukaume naJehova yiso sininke somulyo po.
1. Yisinke ana hara Jehova o rugane?
“Hedeni Karunga pepi, nage a mu hede pepi.” (Jakopo 4:8) Yisinke lina tamba etjangwa eli? Jehova ana hara o kare kaume kendi. Vamwe kuvadigopera kutulisa po ukaume naKarunga morwa kapi ava mu mono. Nye moBibeli, Jehova ga horora nayinye eyi twa hepa yipo tu mu dive nokumuhedera pepi. Nampili ngomu twa dira kumumona, nsene tu resa mbudi zomoBibeli ukaume wetu naJehova ngau nkondopara.
2. Morwasinke Jehova na karera kaume gomuwa po unene koge?
Kwato ogu ga ku hara ngwendi moomu ga ku hara Jehova. Age ana hara o hafe ntani o uyunge nage nkenye apa ono hepa evatero. Ove kuvhura ‘o mu pe yinka yoge nayinye, yeeyi age kukupakera mbili.’ (1 Peturusa 5:7) Jehova ga liwapaikira nkenye apa kuvatera vakaume vendi nokuvahengagwida ntani kuvapurakena.—Resa Episarome 94:18, 19.
3. Yisinke ana harere Jehova vakaume vendi va rugane?
Jehova kwa hara vantu navenye, nye age kutulisa po ukaume wounene ndi “kulikwata ukwawo nava ava mu limburukwa.” (Episarome 25:14) Jehova kuna hara vakaume vendi va hetekere ko kurugana yininke eyi a tara asi yiwa ntani va nyokere po eyi a tara asi yidona. Vamwe kulizuvha asi kapi tava vhuru kusikisa mo eyi ana va harere Jehova va rugane ntani va nyokere po yininke nayinye yoyidona. Nye Jehova nkenda ntani kukwata egano vantu. Jehova kutambura nkenye ogu ga mu hara sili ntani ogu a hetekere ko paapa ga hulira kurugana eyi ayi mu hafesa.—Mapisarome 147:11; Yirugana 10:34, 35.
LIRONGA KO YOYINZI
Lironga ko yoyinzi omu no tulisa po ukaume naJehova ntani neyi ga karera kaume gomuwa po.
4. Abirahamu kwa kere kaume kaJehova
Sihorokwa somoBibeli saAbirahamu (ogu ngava tumbura pomuhowo asi Abiramu) kuturonga eyi ayi tanta kukara kaume kaKarunga. Resa kuhamena Abirahamu mwaGenesis 12:1-4. Makura zogereni mapuro aga:
-
Yisinke ga tanterere Jehova Abirahamu a rugane?
-
Yisinke ga mu tumbwidilire Jehova?
-
Yisinke ga rugene ko Abirahamu?
5. Yisinke a ndindire ko Jehova kovakaume vendi?
Ose kundindira ko kovakaume vetu yininke yongandi.
-
Yininke musinke wa hara vakaume woge va ku ruganene?
Resa 1 Johanesa 5:3, makura zogereni epuro eli:
-
Yisinke a ndindire ko Jehova kovakaume vendi?
Mokulimburukwa Jehova, twa hepa kutjindja nkareso noyikara yetu. Resa Jesaya 48:17, 18, makura zogereni epuro eli:
-
Morwasinke a tanterere Jehova vakaume vendi va ture po malitjindjo?
Kaume gomuwa kutudiworokesa yininke yoyiwa eyi nayi tu popera ntani tu gwanene mo mauwa. Jehova nage yiyo a rugana kovakaume vendi
6. Yisinke a rugana Jehova mokuvatera vakaume vendi?
Jehova kuvatera vakaume vendi va lididimikire maudigu. Likida VIDIYO, makura zogereni epuro lina kukwama ko.
-
Ngapi omu Jehova ga vaterere mukadi movidiyo a funde po malizuvho gokuguva-guva?
Resa Jesaya 41:10, 13, makura zogereni mapuro aga:
-
Yisinke ga tumbwidira Jehova eyi nga ruganena vakaume vendi?
-
Omu ono kugazara, Jehova kuvhura a kare kaume gomuwa ndi? Morwasinke?
Vakaume wovanene kugava evatero nsene ono li hepa. Jehova nove nga ku vatera
7. Ukaume naJehova kwa hamena mo kuuyunga nage ntani kumupurakena
Kuuyunga kumwe kunkondopeka ukaume. Resa Episarome 86:6, 11, makura zogereni mapuro aga:
-
Ngapi omu natu uyunga naJehova?
-
Ngapi omu Jehova a uyunga nose?
Ose kuuyunga naJehova kupitira mekanderero, ano age kuuyunga nose kupitira moBibeli
VAMWE KUTANTA ASI: “Kapi to vhuru kutulisa po ukaume naKarunga.”
-
Etjangwa musinke no ruganesa mokulikida asi ose kuvhura tu kare kaume kaJehova?
YINKE ONO LIRONGO?
Jehova ana hara o kare kaume kendi ntani age nga kuvatera o mu hedere pepi.
Erugururomo
-
Ngapi a vatere Jehova vakaume vendi?
-
Morwasinke a tanterere Jehova vakaume vendi va ture po malitjindjo?
-
Omu ono kugazara, udigu kukara kaume kaJehova ndi? Morwasinke ono kuuyungira ngoso?
MAUZERA GAMWE
Ngapi ukaume woge naKarunga nau kundama eparu lyoge?
“Jehova, age Karunga ogu twa hepa kudiva” (Ruhungu, 15 Murongankuru 2003)
Lironga omu no tulisa po ukaume naKarunga.
“Ngapi nani kara kaume kaKarunga?” (Questions Young People Ask—Answers That Work, Ruha 2, egaununo 35)
Koneka eyi ya vaterere mukadi gumwe a lizuvhe asi ukaume wendi naJehova wa mu popera.
Purakena eyi va uyunga ko vadinkantu omu ava lizuvhu kuhamena Jehova.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
