SIRONGWA 11
Ngapi no gwanena mo mauwa gomanzi pokuresa Bibeli?
Nove nampo wa hetekere kutameka sirugana sosinene nye to lizuvhu asi udigu ndi? Mokuninka asi si ku rerupire nampo wa hangwire sirugana oso momaruha gomanunu. Eyi ya lifana noku resa Bibeli. Kuvhura o lipure asi: ‘Kupi nani tamekera kuresa?’ Mosirongwa esi, tatu ka zogera yininke yimwe eyi no rugana, eyi nayi ku vatera o hafere kuresa Bibeli nokuzilironga.
1. Morwasinke natu resera Bibeli nkenye ezuva?
Muntu ogu a resa Bibeli ndi “Veta zaHOMPA” nkenye ezuva, nga hafa ntani ngayi mu tompoka meparu. (Resa Episarome 1:1-3.) Mokutameka, hetekera ko kuresa Bibeli pokuruganesa nominute dononsesu nkenye ezuva. Moomu ono kudiva Nonkango daKarunga, yimo ngo ya hafera ereso lyoge lyoBibeli.
2. Yisinke nayi ku vatera o gwanene mo uwa pokuresa Bibeli?
Mokugwanena mo uwa mereso lyetu lyoBibeli, ngomu tuna kuresa twa hepa kupwizumuka poyiruwo noyiruwo nokugazadara ko kweyi tuna kuresa. Natuvenye twa hepa kuresa Bibeli ‘nokuteda ko.’ (Josuwa 1:8) Apa no resa, lipura mapuro aga asi: ‘Yisinke yina ku ronga nge eyi kuhamena Jehova Karunga? Ngapi nani yi tura eyi pasirugana meparu lyange? Ngapi nani vhura kuruganesa novelise edi ni vatere wopeke?’
3. Ngapi no gwana siruwo sokuresa Bibeli?
Ove kukudigopera kugwana siruwo sokuresa Bibeli ndi? Kapisi nyovelike ayi horokere. Hetekera ko ‘kuruganesa nawa nkenye karuwo ono gwana.’ (Vaefeso 5:16) Kuvhura yi ku tompoke eyi nsene o litulira po siruwo songandi sokuresa Bibeli nkenye ezuva. Vantu vamwe kwa litulira po siruwo kongurangura zonene yipo va rese Bibeli. Ano vamwe kongurova ndi nampo posiruwo sawo sometaha. Ano vamwe hena kuresa Bibeli komeho zokurara. Ove siruwo musinke sosiwa koge?
LIRONGA KO YOYINZI
Lironga omu no hafera ereso lyoge lyoBibeli. Lironga kuliwapaikira nawa yipo o gwanene mo mauwa gomanzi mereso lyoge lyoBibeli.
Ngwendi moomu atu lirongo kuhafera nondya dokulisiga-siga, yimo hena natu lironga kuhafera kuresa Bibeli
4. Yisinke no vhura kurugana yipo o hafere kuresa Bibeli?
Ayo kapisi ureru kutameka kuresa Bibeli. Yipo nye, twa hepa kukara “nonzara” ndi neharo lyokuresa Bibeli ngwendi moomu atu kara neharo lyokumakera nondya edi twa dira kulya rumwe. Resa 1 Peturusa 2:2, makura zogereni epuro eli:
-
Omu ono kugazara, kuresa Bibeli nkenye ezuva tayi ku vatere o zi hafere nokuzihara ndi?
Likida VIDIYO a purakene omu vamwe va tamekere kuhafera kuresa Bibeli. Makura zogereni mapuro gana kukwama ko.
-
Kuliza novidiyo, maudigu musinke va fundire po vadinkantu?
-
Yisinke ya va vaterere va demenene kositambo sawo sokuresa Bibeli?
-
Yisinke va rugene yipo va hafere ereso lyawo lyoBibeli?
Magano aga naga ku vatera o tameke:
-
Horowora etoroko lyoureru. Heteka New World Translation nsene kukwata nawa egano Ruingilisa.
-
Pomuhowo, tameka kuresa maruha goBibeli aga naga kuvatera o hafere kuziresa. Komauzera gamwe, tara karata “Tameka kuresa Bibeli.”
-
Didilika eyi ono kuresa. Pokuruganesa karata “Ereso lyoge lyoBibeli” za kara mobuke ezi.
-
Ruganesa JW Library®app. Ako kuvhura o rese nokupurakena koBibeli nkenye ezi nsene wa kara noselefoni zokuza koIntaneta ndi kokompuita.
-
Ruganesa mbapira Mauzera gomoNonkango daKarunga. Amo kwa kara mo nokarata notukende eyi nayi kuvatera o hafere ereso lyoge lyoBibeli.
5. Liwapaikira elirongo lyoge lyoBibeli
Resa Episarome 119:34, makura zogereni epuro eli:
-
Morwasinke ya karera nomulyo kukanderera komeho zokuresa Bibeli ndi zokuliwapaikira elirongo lyoge lyoBibeli?
Ngapi no vhura kugwanena mo mauwa mwankenye sirongwa? Ngomu no liwapaikira nkenye sirongwa mobuke ezi, heteka nonkedi edi dina kukwama ko:
-
Resa noparagarafu dokuhova domosirongwa.
-
Tara matjangwa nokugaresa, ntani hetekera ko kukwata egano omu gana lizi nosirongwa.
-
Tenda nonkango edi da limburura nkenye epuro; ano eyi ngayi kuvatera mu zogere sirongwa oso kumwe nogu ana kukuronga Bibeli.
Wa yi diva ndi?
Nombangi daJehova kwa ruganesa matoroko gongandi gokulisiga-siga goNobibeli. Nampili ngoso, ose kuruganesa po unene New World Translation of the Holy Scriptures morwa azo ureru, za zera ntani kwa tumbura mo edina lyaKarunga—Tara sirongwa sokojw.org “Nombangi daJehova kwa kara noBibeli zavene ndi?”
VAMWE KUTANTA ASI: “Kulironga Bibeli udigu unene. Ntani kwato siruwo sayo.”
-
Ove ngapi ono kulizuvha kuhamena kulironga Bibeli?
YINKE ONO LIRONGO?
Mokugwanena mo mauwa gomanzi moBibeli, litulira po siruwo sokuziresa, nokukanderera o kwate egano eyi ono kuresa, ntani nokuliwapaikira elirongo lyoge lyoBibeli.
Erugururomo
-
Yisinke ngayi ku vatera o gwanene mo mauwa gomanzi moBibeli?
-
Ngapi no vhura kugwana siruwo sokuresa Bibeli nokuzilironga?
-
Morwasinke ya karera nomulyo kuliwapaikira elirongo lyoge lyoBibeli?
MAUZERA GAMWE
Rugurura magano gamwe aga naga vhura kukuvatera o gwanene mo mauwa mereso lyoge lyoBibeli.
“Ngapi no gwanena mo uwa wounzi mokuresa Bibeli?” (Ruhungu No. 1 2017)
Lironga nonkedi ntatu dokuresa Bibeli.
“Ngapi omu Bibeli nazi vatera nge?—Ruha 1: Diva nawa Bibeli zoge” (Sirongwa sokojw.org)
Lironga omu no hafera kuresa Bibeli.
“Ngapi omu Bibeli nazi vatera nge?—Ruha 2: Tovareka ereso lyoge lyoBibeli” (Sirongwa sokojw.org)
Gwana ko magano kovantu ava va resa Bibeli nomvhura dononzi.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
