SIRONGWA 12
Yisinke nayi ku vatera o twikire kulironga Bibeli?
Kulironga Bibeli kapisi ureru, nye kureta yitundwamo yoyiwa. Poyiruwo yimwe, kuvhura o lipure nsene asi kuvhura ngo twikire kulironga Bibeli. Morwasinke ya karera nomulyo o twikire kulironga Bibeli? Yisinke nayi ku vatera o twikire kulironga nampili momaudigu?
1. Morwasinke elirongo lyoBibeli lya karera nomulyo?
Bibeli kutanta asi: “Nonkango daKarunga kwa kara nomwenyo nononkondo.” (Vahebeli 4:12) Bibeli mulyo morwa kuhorora magazaro gaKarunga nomu a lizuvhu kukuhamena. Azo kukuvatera o kare nediwo nounongo ntani nehuguvaro. Unene po, kukuvatera o kare kaume kaJehova. Apa o lirongo Bibeli, ove ngoso kuna kupulisira nonkondo dazo di wapukurure eparu lyoge.
2. Morwasinke ya karera nomulyo kudimburura omu usili womoBibeli nau ku vatera?
Usili womoBibeli kwa fana ngwendi emona lyokuhorama. Eyi yiyo Bibeli azi tu korangedere tu ‘rande usili, nye twa ha u randesa.’ (Yisewe 23:23) Apa atu dimburura mulyo gousili womoBibeli, ayo kututumangeda tu twikire kuzilironga nampili tu ligwanekere noyilimbikiso.—Resa Yisewe 2:4, 5.
3. Ngapi Jehova na ku vatera o twikire kulironga Bibeli?
NgoMusiti gomunene ntani Kaume, Jehova ana hara kukuvatera o mu dive. Age kuvhura kukupa ‘nonkondo dokusikisa mo eyi ga panga.’ (Resa Vafilipi 2:13.) Yipo nye, poyiruwo yimwe nsene ono hepa etumangedo lyokulironga ndi o ture pasirugana eyi ono kulironga, age kuvhura kukuvatera. Ano nsene ono hepa nonkondo dokulididimikira yilimbikiso ndi marwaneso, age nga di ku pa. Pura Jehova nkenye ezuva mekanderero a ku vatere o twikire kulironga Bibeli.—1 Vatesaronika 5:17.
LIRONGA KO YOYINZI
Lironga omu no twikira kulironga Bibeli nampili ngomu wa kara noyirugana yoyinzi ndi o ligwanekere nomarwaneso gokutundilira kwava wopeke. Makura koneka omu Jehova na ku vatera o twikire kulironga Bibeli.
4. Elirongo lyoge lyoBibeli li kare sininke somulyo po
Poyiruwo yimwe, ose kukara noyirugana ndi noyinka yoyinzi eyi ayi tu ninkisa tu dire kugwana siruwo sokulironga Bibeli. Yisinke nayi tu vatera? Resa Vafilipi 1:10, makura zogereni mapuro aga:
-
Yininke musinke o tara asi yiyo “yoyiwa po” ndi yomulyo po meparu lyoge?
-
Yisinke no rugana eyi nayi likida asi elirongo lyoge lyoBibeli mulyo koge?
-
Nsene o hova kutura evhu mosindeyindeyi makura o heteke kutura mo hena mamanya, kapi tayi gwaneke mo
-
Nye nsene o hova kutura mo mamanya, makura o ture mo hena evhu tayi gwaneke mo. Mokulifana, nsene o “horowora po yoyiwa po” ndi yomulyo po meparu lyoge, ngayi ku tompoka ntani ngo gwana siruwo sokurugana hena yimwe yapeke
Kulironga Bibeli kutuvatera tu dive Karunga nokumukarera. Resa Mateusa 4:4, makura zogereni epuro eli:
-
Mauwa musinke atu gwanene mo apa atu tura elirongo lyetu lyoBibeli li kare sininke somulyo po?
5. Twikira nampili momarwaneso
Poyiruwo yimwe, vantu kuvhura va ku korangede o hageke kulironga Bibeli. Tarera sihonena saFrancesco. Likida VIDIYO, makura zogereni mapuro gana kukwama ko.
-
Kuliza novidiyo, ngapi omu vakaume nozina vaFrancesco va lizuvhire apa ga va tantere asi kuna kulironga Bibeli?
-
Yitundwamo musinke ga limonenene morwa kutwikira kulironga?
Resa 2 Timoteusa 2:24, 25, makura zogereni mapuro aga:
-
Ngapi omu vemepata ntani vakaume woge ava lizuvhu kweyi ono kulironga Bibeli?
-
Kuliza nonovelise edi, ngapi no limburura muntu ogu ana kudira kuhafera eyi ono kulirongera Bibeli? Ntani morwasinke?
6. Huguvara mwaJehova a ku vatere
Ngomu tuna kuhedera Jehova pepi, yimo eharo lyetu lyokuhara kumuhafesa ngali nkondopara. Nye, ayo kuvhura yi tu digopere kutura po marunduruko meparu lyetu tu paruke kuliza nomu ga yi harera Jehova. Nsene yimo o lizuvhu ngoso, ya ha kudompesa. Jehova nga ku vatera. Likida VIDIYO, makura zogereni mapuro gana kukwama ko.
-
Kuliza novidiyo, marunduruko musinke ga tulire po Jim mokuhafesa Jehova?
-
Yisinke ono hafere mosihonena sendi?
Resa Vahebeli 11:6, makura zogereni mapuro aga:
-
Yisinke Jehova nga ruganena “ava ava mu papara” ndi ava ava hetekere ko kumudiva nokumuhafesa?
-
Yisinke yina kukuronga eyi kuhamena omu a lizuvhu Jehova apa a ku mono kuna kulitura mo mokulironga Bibeli?
GUMWE KUVHURA A KU PURE ASI: “Morwasinke ono kulirongera Bibeli?”
-
Ngapi omu no limburura?
YINKE ONO LIRONGO?
Nampili ngomu ya dira kukara ureru, kulironga Bibeli kuvhura yi ku vatere ngo hafere eparu narunye. Twikira kuhuguvara Jehova yipo nga ku tungike.
Erugururomo
-
Morwasinke mausili gomoBibeli ga karera nomulyo koge?
-
Ngapi omu no vhura ‘kuhorowora yoyiwa po’ ndi yomulyo po?
-
Morwasinke no hundilira Jehova a ku vatere o twikire kulironga Bibeli?
MAUZERA GAMWE
Koneka nonkedi ne edi da vatera vantu wovanzi va ruganese nawa siruwo sawo.
“Omu no ruganesa nawa siruwo soge” (Awake!, Murongankuru 2014)
Koneka omu Jehova ga vaterere mukadi ogu mugara gwendi ga dilire kumukwata egano eyi ga litulire mo unene mokuhafesa Karunga.
Tara omu mugara gumwe ga gwanenene mo uwa morwa mukadendi kwa twikilire kulironga Bibeli.
Poyiruwo yimwe vantu kuuyunga asi Nombangi daJehova kutezesa po mapata. Nye eyi usili ndi?
“Nombangi daJehova kutezesa po mapata ndi?” (Sirongwa sokojw.org)
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
