SIRONGWA 17
Ngapi ga kara Jesus?
Moomu tuna kulironga yininke eyi ga uyungire Jesus neyi ga rugene pevhu, ose ngatu diva yikara eyi nayi tu vatera tu mu hedere pepi ntani noGuhwe Jehova. Yikara musinke oyo? Ntani ngapi natu honena Jesus?
1. Ngapi Jesus ga kara ngwendi oGuhwe?
Apa Jesus ga kere meguru, age nga nomene oGuhwe ntani ga lirongere yoyinzi kwawo nomvhura dononzi. Eyi kwa mu vaterere a gazare nokulizuvha ntani nokurugana ngwendi oGuhwe. (Resa Johanesa 5:19.) Jesus kuhonena nawa-nawa yikara yoGuhwe. Eyi yiyo ga uyungilire asi: “Ogu ga mona nge, ga mona hena Tate.” (Johanesa 14:9) Moomu ono kulironga kuhamena Jesus, ove ngo diva nawa Jehova. Pasihonena, monkedi omu Jesus nga tekura vantu, kulikida omu Jehova a lizuvhu kukuhamena.
2. Ngapi omu Jesus ga likidire asi ga hara Jehova?
Jesus kwa tente asi: “Ame kurugana moomu ga tantera nge Tate, asi uzuni u dive asi ame nani kwa hara Tate.” (Johanesa 14:31) Apa Jesus ga kere pevhu, age kwa likidire asi ga hara unene oGuhwe pokuvalimburukwa nampili apa ya kere udigu kuyirugana. Age kwa here hena kuuyunga kuhamena oGuhwe ntani nokuvatera vantu va tulise po ukaume kumwe nawo.—Johanesa 14:23.
3. Ngapi omu Jesus ga likidire asi ga hara vantu?
Bibeli kutanta asi Jesus “kwa hara vantu.” (Yisewe 8:31, NW) Age kwa likidire eharo lyendi kovantu pokuvakorangeda nokuvavatera. Yitetu eyi ga rugene kapi tupu ya likidire nonkondo dendi, nye ayo kwa likidire hena nkenda zendi. (Marukusa 1:40-42) Age nga tekura nawa vantu ntani kapi ga peke mpongo. Nonkango dendi ngadi hengagwida vantu ava ngava mu purakene ntani nga di va pe ehuguvaro. Jesus kwa ligeve yipo va ya mu hepeke nokumudipaga, morwa age kwa hara vantu. Nye unene po, age kwa hara ava ava kwama marongo gendi.—Resa Johanesa 15:13, 14.
LIRONGA KO YOYINZI
Lironga yoyinzi kuhamena Jesus. Ntani lironga omu no likida eharo nougavi ngwendi Jesus.
4. Jesus kwa hara oGuhwe
Sihonena saJesus kuturonga omu natu likida eharo kwaKarunga. Resa Rukasa 6:12 ntani Johanesa 15:10; 17:26. Konyima zokuresa nkenye etjangwa, zogereni epuro eli:
-
Ngwendi Jesus, ngapi natu likida asi twa hara Jehova?
Jesus kwa here oGuhwe ntani nga uyunga nawo nkenye apa mekanderero
5. Jesus nga pakere mbili ava va hepere evatero
Jesus kwa tulire yihepwa yovakwawo muhowo. Nampili apa nga roroka, age nga ruganesa siruwo nononkondo dendi a vatere vantu. Resa Marukusa 6:30-44, makura zogereni mapuro aga:
-
Kuliza netjangwa eli, ngapi Jesus ga likidire asi ga hara vantu?—Tara velise 31, 34, 41, ntani 42.
-
Yisinke ya tumangedere Jesus a vatere vantu?—Tara velise 34.
-
Mokumona asi Jesus kuhonena yikara yaJehova, yisinke yina kukuronga eyi kuhamena Jehova?
-
Ngwendi Jesus, ngapi natu likida eharo kovantu?
6. Jesus kwa kara nougavi
Nampili ngomu Jesus ga dilire kukara neyi yoyinzi, age kwa kere nougavi ntani kutukorangeda nose tu kare nougavi. Resa Yirugana 20:35, makura zogereni epuro eli:
-
Kuliza naJesus, ngapi natu gwana ruhafo?
Likida VIDIYO, makura zogereni epuro eli nali kwama ko.
-
Nampili kapi twa kara neyi yoyinzi, nye mononkedi musinke natu vhura kugava?
Wa yi diva ndi?
Bibeli kuturonga asi tu kanderere kwaJehova kupitira mwaJesus. (Resa Johanesa 16:23, 24.) Apa atu kanderere monkedi ezi, ose kuyilikida asi twa kara norupandu kweyi ga rugana Jesus mokutuvatera tu kare vakaume vaJehova.
VAMWE KUTANTA ASI: “Karunga kapi ga kara nosinka kwetu.”
-
Mokumona asi Jesus kuhonena yikara yoGuhwe, ngapi eyi ga rugene ayi likida asi Jehova ga tu hara?
YINKE ONO LIRONGO?
Jesus ga hara Jehova ntani ga hara vantu. Jesus kwa kara ngwendi oGuhwe. Nsene o diva Jesus, ove ngo diva hena Jehova.
Erugururomo
-
Ngwendi Jesus, ngapi natu yi likida asi twa hara Jehova?
-
Ngwendi Jesus, ngapi natu yi likida asi twa hara vantu?
-
Sikara musinke saJesus wa hara po unene?
MAUZERA GAMWE
Lironga yikara yimwe yaJesus eyi natu vhura kuhonena.
“Honena Jesus po . . .” (Jesus—The Way, the Truth, the Life, epenuno 317)
Lironga eyi twa hepera kukanderera kupitira mwaJesus.
“Morwasinke no kanderera kupitira mwaJesus?” (Ruhungu, 1 Murongankuru 2008)
Bibeli za tumbura omu ga fene Jesus ndi?
“Ngapi omu ga fene Jesus?” (Sirongwa sokoIntaneta)
Yisinke natu lirongera ko monkedi omu Jesus nga tekura vakadi?
“Mepangero lyoUhompa waKarunga ngamu ka kara efumadeko” (Ruhungu, 1 Sitarara 2012)
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
