SIRONGWA 21
Ngapi omu mbudi zongwa vana kuzizuvhisa?
Jehova nga gusa po maudigu getu nagenye kupitira moUhompa wendi. Kapi tuna hara kulitulikira mbudi ozo zongwa unene. Jesus kwa here vasikuli vendi va tantere ko vantu wopeke mbudi ezi. (Mateusa 28:19, 20) Ngapi omu Nombangi daJehova adi sikisa mo mpangera zaJesus?
1. Ngapi omu etjangwa lyaMateusa 24:14 lina kusika mo naina?
Jesus kwa tente asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima.” (Mateusa 24:14) Nombangi daJehova kuna kurugana sirugana esi somulyo noruhafo. Ose kuna kuzuvhisa mbudi zongwa uzuni mudima momaraka gokupitakana 1 000. Sirugana esi sosinene sa hepa elituromo ntani newapaiko lyewa. Ose kapi tatu vhuru kusisikisa mo twa hana evatero lyaJehova.
2. Ngapi omu atu zuvhisire vantu?
Ose kuzuvhisira nkenye oku atu gwana vantu. Ngwendi Vakriste womosiruwo sovapositoli, nose kuzuvhisira ‘momambo.’ (Yirugana 5:42) Nkedi ozo kutuvatera tu zuvhisire mamiliyona govantu nkenye mvhura. Mokumona asi vantu kapi ava kara nkenye apa momambo gawo, ose kuzuvhisira hena komavango oku ava kara vantu. Ose kupapara nompito yipo tu tantere ko wopeke kuhamena Jehova ntani neyi nga ka rugana.
3. Wolye va hepa kuzuvhisa mbudi zongwa?
Vakriste navenye wousili va hepa kutantera ko wopeke mbudi zongwa. Ose kutara sirugana esi asi mulyo unene, ntani kulitura mo unene mosirugana esi kuliza noukaro wetu, morwa twa yi diva asi amo kwa hamena mo eparu lyovantu. (Resa 1 Timoteusa 4:16.) Ose kapi ava tu futu, morwa Bibeli kwa tanta asi: “Mawoko-woko muna yi gwana, none ka yi gaveni mawoko-woko.” (Mateusa 10:7, 8) Kapisi vantu navenye ava tambura mbudi zetu. Nye ose kutwikira kuzuvhisa morwa tuna hara kulimburukwa Jehova nokumuhafesa.
LIRONGA KO YOYINZI
Lironga yoyinzi omu Nombangi daJehova adi zuvhisa uzuni mudima nomu Jehova a tu vatere.
Kuzuvhisira mouzuni mudima: (A) Costa Rica, (B) Amerika, (C) Benin, (D) Thailand, (E) Yap, (F) Sweden
4. Ose kurugana unene yipo tu zuvhisire vantu navenye
Nombangi daJehova kulizambera yipo va ka zuvhisire nkenye oku va tunga vantu. Likida VIDIYO, makura zogereni epuro eli nali kwama ko.
-
Yisinke yina kukutetukisa kuhamena elizambero eli adi tura po Nombangi daJehova yipo di zuvhise?
Resa Mateusa 22:39 ntani Varoma 10:13-15, makura zogereni mapuro aga:
-
Ngapi omu sirugana setu asi likida asi ose twa hara vantu?
-
Ngapi omu Jehova a lizuvhu kuhamena vantu ava ava zuvhisa mbudi zongwa?—Tara velise 15.
5. Ose kurugana kumwe naKarunga
Yihorokwa yoyinzi kulikida asi Jehova yige ana kupitisira sirugana setu. Pasihonena, munazinyetu gomoNew Zealand gedina Paul, kwa gwene mukadi apa ga zuvhisire metaha, tunda embo zende embo. Mukadi ogo kwa kanderere kwaKarunga ngurangura yipo gumwe a ya mu dingure. Mekanderero lyendi, age kwa ruganesere edina lyaKarunga Jehova. Paul kwa tente asi: “Konyima zonovili ntatu, yipo na ka mu gwene.”
Resa 1 Vakolinte 3:9, makura zogereni epuro eli:
-
Ngapi omu yihorokwa ngwendi somoNew Zealand asi likida asi Jehova yige ana kupitisira sirugana sokuzuvhisa?
Resa Yirugana 1:8, makura zogereni epuro eli:
-
Morwasinke twa hepera evatero lyaJehova yipo tu sikise mo sirugana setu?
Wa yi diva ndi?
Nkenye sivike, mepongo lyomokatji kosivike, ose kutudeura omu natu zuvhisa. Nsene wa za rumwe komapongo ogo, ngapi omu ono kulizuvha kuhamena edeuro olyo?
6. Ose kulimburukwa mpangera zaKarunga zokuzuvhisa
Mosiruwo sovapositoli, varwanesi kwa hetekerere ko kuhagekesa vasikuli vaJesus mokuzuvhisa. “Pokukoreka mbudi zongwa” paveta, Vakriste vanare va kere nononkondo dokutwikira kuzuvhisa. (Vafilipi 1:7) Nombangi daJehova nado kurugana yokulifana naina. a
Resa Yirugana 5:27-42, makura zogereni epuro eli:
-
Morwasinke ngatu dilira kuhageka kuzuvhisa?—Tara velise 29, 38, ntani 39.
GUMWE KUVHURA A PURE ASI: “Morwasinke Nombangi daJehova adi zuvhisire tunda embo zende embo?”
-
Ngapi no limburura?
YINKE ONO LIRONGO?
Jesus kwa tanterere vasikuli vendi va zuvhise mbudi zongwa kovantu navenye. Jehova kuna kuvatera vantu vendi va sikise mo sirugana esi.
Erugururomo
-
Ngapi omu mbudi zongwa vana kuzizuvhisa?
-
Ngapi omu sirugana setu sokuzuvhisa asi likida asi ose twa hara vantu?
-
Sirugana sokuzuvhisa kuturetera ruhafo ndi? Morwasinke?
MAUZERA GAMWE
Tara omu Nombangi daJehova adi zuvhisire vantu moyitata yoyinene.
Yisinke da rugana Nombangi daJehova mokuvatera vatjwayuki?
Tara omu gumwe ga gwana ruhafo morwa kulihameka unene mokuzuvhisa.
Lironga kuhamena nompanguro edi twa funda, edi da pulisira sirugana setu sokuzuvhisa.
“Vazuvhisi woUhompa tava zi kompanguro”(Uhompa waKarunga kuna kupangera!, egaununo 13)
a Karunga yige ga tu pangera tu zuvhise. Yipo nye, Nombangi daJehova kapi da hepa epulisiro lyokutunda komapangero di zuvhise mbudi zongwa.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
