SIRONGWA 23
Ekuho kuna kara sitambo somulyo!
Jesus kwa tente asi mokukara Mukriste wa hepa kugwana ekuho. (Resa Mateusa 28:19, 20.) Nye yisinke ekuho? Ntani yisinke na rugana muntu yipo a gwane ekuho?
1. Yisinke ekuho?
Nkango “kukuhwa” kwa tunda konkango zoRugereka ezi azi tanta asi “kudivida” momema. Apa Jesus va mu kuhwire, age kwa mu dividire momukuro gwaJorodana makura ta ‘zauka momema.’ (Marukusa 1:9, 10) Mokulifana, apa Vakriste wousili ava gwana ekuho, nawo kuvadivida momema.
2. Yisinke a likida muntu apa a gwana ekuho?
Apa muntu a gwana ekuho, age kulikida asi ana ligava kwaJehova Karunga. Ngapi omu muntu a ligava kwaKarunga? Komeho a gwane ekuho, age kukanderera nokutantera Jehova asi ana hara kumukarera eparu lyendi nalinye. Age kutumbwidira asi nga karera tupu Jehova gelike ntani sininke somulyo po meparu lyendi kuna kara kusikisa mo eyi ga hara Karunga. Age kwa tokora ‘kulidina nokukwama’ sihonena saJesus nomarongo gendi. (Mateusa 16:24) Kuligava nokugwana ekuho kupa muntu mpito zokukara nelikwatakano lyenene naJehova ntani nava ava mu karere.
3. Yisinke na rugana muntu yipo a gwane ekuho?
Komeho muntu a gwane ekuho, ga hepa kulironga kuhamena Jehova nokutunga epuro mwendi. (Resa Vahebeli 11:6.) Ngomu ono kudiva Jehova, epuro lyoge nga li nkondopara ntani ngo mu hara unene. Eyi nga yi kuninkisa o hare kusikisa mo nompango daJehova nokutantera ko wopeke kumuhamena. (2 Timoteusa 4:2; 1 Johanesa 5:3) Nsene muntu a tameka kuparuka “moomu ga hara Hompa,” age kuvhura nga tokore kuligava kwaKarunga nokugwana ekuho.—Vakorosi 1:9, 10. a
LIRONGA KO YOYINZI
Tara eyi no lirongera ko kekuho lyaJesus ntani nomu no liwapaikira etokoro eli lyomulyo.
4. Kuvhura tu lirongere ko kekuho lyaJesus
Resa Mateusa 3:13-17 yipo o lironge yoyinzi kuhamena ekuho lyaJesus. Makura zogereni mapuro aga:
-
Jesus kwa gwene ekuho apa ga kere mukeke ndi?
-
Ngapi omu va mu kuhwire? Age kwa mu sense mema ndi?
Konyima zapa ga gwene ekuho, Jesus kwa tamekere sirugana esi ga mu pere Karunga. Resa Rukasa 3:21-23 ntani Johanesa 6:38, makura zogereni epuro eli:
-
Konyima zapa Jesus ga gwene ekuho, sirugana musinke ga tulire muhowo meparu lyendi?
5. Kuvhura o sikise mo sitambo sokugwana ekuho
Kuligava kwaKarunga nokugwana ekuho kuvhura yi moneke ngwendi udigu pomuhowo. Nye nsene o twikira kulironga kuhamena Jehova nokumudiva nawa, ayo ngayi kuvatera o ture po etokoro olyo lyomulyo. Tara vantu vamwe ava va yi rugana, pokulikida VIDIYO.
Resa Johanesa 17:3 ntani Jakopo 1:5, makura zogereni epuro eli:
-
Yisinke nayi vatera muntu yipo a liwapaikire kugwana ekuho?
-
Ose kuligava kwaJehova pokumutantera asi nga tu mu karera eparu lyetu nalinye
-
Apa atu gwana ekuho, ose kuyilikida moyitarameho yovantu asi twa ligava kwaKarunga
6. Apa atu gwana ekuho ose kuhamena kepata lyaJehova
Apa atu gwana ekuho, ose kuhamena kepata eli lya kara mouumwe. Nampili ngomu twa tunda komavango gokulisiga-siga, natuvenye kwa pura yokulifana ntani kuparuka monkedi zokulifana. Resa Episarome 25:14 ntani 1 Peturusa 2:17, makura zogereni epuro eli:
-
Ngapi omu ekuho ali kundama elikwakatano lyomuntu naJehova ntani nava ava mu karere?
VAMWE KUTANTA ASI: “Kapi nina liwapaikire kugwana ekuho.”
-
Nove yimo ono kulizuvha ngoso ndi? Ngapi ono kugazara, kugwana ekuho mulyo ndi?
YINKE ONO LIRONGO?
Jesus kwa tente asi mokukara Mukriste, wa hepa kugwana ekuho. Komeho muntu a gwane ekuho, ga hepa kunkondopeka epuro lyendi mwaJehova ntani ga hepa kuparuka kuliza nonompango dendi nokuligava kwendi.
Erugururomo
-
Yisinke ekuho ntani morwasinke lya karera nomulyo?
-
Yisinke a likida muntu apa a gwana ekuho?
-
Yisinke ga hepa kurugana muntu komeho a ligave nokugwana ekuho?
MAUZERA GAMWE
Lironga eyi ya hamena mo mokugwana ekuho ntani neyi ya dira kuhamena mo.
“Yisinke ekuho?” (Sirongwa sokoIntaneta)
Tara eyi nayi vatera muntu a gwane ekuho.
“Kuhara Jehova ngayi kutumangeda o gwane ekuho” (Ruhungu, Nsinano 2020)
Resa kuhamena mugara gumwe ogu ga tokwere kugwana ekuho.
“Awo kwa here ni limonene nyamwange eyi azi rongo Bibeli” (Ruhungu, 1 Nsinano 2013)
Tara eyi ya karera nomulyo kugwana ekuho nomu no liwapaikira.
“Ni gwane ekuho ndi?” (Questions Young People Ask—Answers That Work, Volume 2, egaununo 37)
a Nampili muntu va mu kuhwire moukarelikarunga wawo wanare, simpe ga hepa kugwana ekuho. Morwasinke? Morwa ukarelikarunga owo kapi ngau rongo usili womoBibeli.—Tara Yirugana 19:1-5 ntani sirongwa 13.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
