Nsene udona una horoka, sinzi sovantu kulipura asi “morwasinke yina horokere?” Nye ose tuna hafa morwa Bibeli za limburura epuro olyo.

1. Yisinke ga rugene Satana dogoro udona u tameke mouzuni?

Satana Muzonaguli kwa rwanesere Karunga. Age kwa here kupangera, makura yipo ga pukisire Adamu naEva va lipakerere nage mokurwanesa Karunga. Satana kwa yi rugene eyi apa ga kumbagerere Eva. (Genesis 3:1-5) Age kwa ninkisire Eva a gazare asi Jehova kapi ga mu harera yininke yoyiwa. Age kwa va ninkisire va gazare asi awo ngava hafa nsene va dira kulimburukwa Karunga. Satana kwa tente yimpempa yokuhova apa ga tanterere Eva asi kapi nga fa. Eyi yiyo Bibeli azi tumbwire Satana asi: “Munayimpempa, age hena guhyayo.”—Johanesa 8:44.

2. Yisinke va tokwere kurugana oAdamu naEva?

Jehova kwa pere Adamu naEva yininke yoyinzi. Age kwa va tanterere asi kuvhura va lye yitji nayinye yomosikunino kugusa ko sitji simwe. (Genesis 2:15-17) Nye awo kwa tokwere kulya kositji esi va va nyokesere. Eva “makura ta gusa ko siyimwa simwe, ta li.” Konyima, Adamu “nage ta li.” (Genesis 3:6) Awo kapi va limburukwire Karunga. Mokumona asi Adamu naEva kwa kere vantu wokusikilira mo, ayo kwa kere ureru kwawo kurugana youhunga. Nye apa va dilire kulimburukwa Karunga, awo kwa zonene ntani kwa nyokere upangeli waKarunga. Eyi va rugene kwa va reterere ruhepo rorunene.—Genesis 3:16-19.

3. Ngapi omu ya tu kundama eyi va rugene oAdamu naEva?

Konyima zapa va zonene oAdamu naEva, awo kapi va kere hena vantu wokusikilira mo. Ano ruvharo rwawo naro kwa pinga kudira kusikilira mo. Bibeli kwa uyunga kuhamena Adamu asi: “Nzo, muntu gumwe tupu ga zi reta mouzuni. Ano nzo zendi kwa reta mo nomfa. Nomfa yiyo da lihanena movantu mudima.”—Varoma 5:12.

Ose kuhepa morwa nokonda dokulisiga-siga. Poyiruwo yimwe, ose kuhepa morwa matokoro gomadona aga atu tura po ndi matokoro gomadona aga ava tura po wopeke. Ano poyiruwo yimwe, morwa kukara pevango lyepuko posiruwo sepuko.—Resa Muudisi 9:11.

 LIRONGA KO YOYINZI

4. Ogu ga retesa po ruhepo rovantu

Sinzi sovantu kwa pura asi Karunga yige a pangere uzuni. Nye oyo usili ndi? Likida VIDIYO.

Resa Jakopo 1:13 ntani 1 Johanesa 5:19, makura zogereni epuro eli:

• Karunga yige a retesa po udona noruhepo ndi?

5. Yisinke ya horoka apa ga tameka kupangera Satana?

1. Adamu naEva kwa kere vantu wokusikilira mo ntani awo kwa tungire moParadisa. Nye awo kwa purakenene kwaSatana nokurwanesa Jehova

2.   Konyima zapa Adamu naEva va rwanesere, mouzuni kwa zura mo udona noruhepo ntani nomfa

3. Jehova nga ka gusa po udona, ruhepo ntani nonomfa. Komeho, vantu ngava ka sikilira mo ntani ngava tunga moParadisa

6. Jehova kapi ayi mu hafesa apa a tu mono kuna kuhepa

Karunga kapi ayi mu guvisa apa a tu mono kuna kuhepa ndi? Tara eyi ga tjenge hompa Ndafita ntani mupositoli Peturusa. Resa Episarome 31:7 ntani 1 Peturusa 5:7, makura zogereni epuro eli:

• Ngapi ono kulizuvha pokudiva asi Jehova kutumona apa atu ligwanekere noruhepo ntani kapi ayi mu hafesa?

 YINKE ONO LIRONGO?

Satana Muzonaguli ntani Adamu naEva yiwo va retesa po yininke yoyidona mouzuni. Jehova kapi ayi mu hafesa apa a tu mono kuna kuhepa ntani age nga gusa po ruhepo.

Erugururomo

• Yimpempa musinke Satana ga tanterere Eva?

• Mokumona asi Adamu naEva kapi va limburukwire, ngapi omu ya tu kundama?

• Ngapi omu twa yi diva asi Jehova kapi ayi mu hafesa apa a tu mono kuna kuhepa?