SIRONGWA 30
Vantu ava va fa ngava paruka hena
Apa muntu a fu, ayo kutuguvisa unene. Eyi yiyo Bibeli za tumbwira nomfa asi nkore. (1 Vakolinte 15:26) Mosirongwa 27, wa lirongere asi Jehova nga gusa po nomfa. Nye yisinke nga yi horokera vantu ava va fa nare? Mosirongwa esi no ka lironga yininke hena yimwe eyi ga tumbwidira Jehova. Age nga ka vhumbura vantu wovanzi yipo ngava paruke narunye pevhu. Ayo nga yi horoka sili ndi? Awo ngava va vhumbwira meguru ndi pevhu?
1. Yisinke nga rugana Jehova kovantu ava twa hara ava va dogoroka?
Jehova kuna kundindira nononkondo mokukavhumbura vantu ava va fa. Mugara gepuro gedina Joba kwa yi pulire asi Karunga nga mu diworoka apa nga fa. Joba kwa tanterere Karunga asi: “Makura ngo zigide nge, ame ngani ku limburure [montoko].”—Resa Joba 14:13-15.
2. Ngapi twa yi diva asi vafe ngava va vhumbura?
Apa Jesus ga kere pevhu, Karunga kwa mu pere nonkondo dokuvhumbura vantu. Jesus kwa pindwire mukadona gonomvhura 12 ntani muna mufisayendi gomugara. (Marukusa 5:41, 42; Rukasa 7:12-15) Konyima, Rasarusa kaume zaJesus kwa dogorokere. Nampili ngomu Rasarusa ga fire nokukara montoko mazuva gane, Jesus ga mu pindwire koufe. Konyima zokukanderera kwaKarunga, Jesus kwa zigilire asi: “Rasarusa, pwaga mo!” Makura “nakufa ta pwaga mo,” age muzuni. (Johanesa 11:43, 44) Gazara tupu omu va hefe vakaume vaRasarusa nekoro lyendi!
3. Ehuguvaro musinke twa kara nalyo kovantu ava va dogoroka?
Bibeli kwa tumbwidira asi vantu “ngava va pindura koufe.” (Yirugana 24:15) Vantu ava ga vhumbwire Jesus kapi va zire meguru. (Johanesa 3:13) Awo kwa hefe kweyi ga va vhumbwililire pevhu. Mokulifana, Jesus ntaantani nga ka vhumbure vantu wovanzi yipo ngava ka paruke narunye moparadisa pevhu. Age kwa tente asi “navenye ava va kara monontoko” ngava va vhumbura, kukwatera mo nava twa divara.—Johanesa 5:28, 29.
LIRONGA KO YOYINZI
Konakona maumbangi gomoBibeli aga ga likida asi Jesus ga kara nononkondo dokuvhumbura vafe. Lironga omu evhumbuko na li vhura kukuhengagwida nokukupa ehuguvaro.
4. Jesus ga likidire asi ga kara nononkondo dokuvhumbura vafe
Lironga eyi ga ruganene Jesus kaume kendi Rasarusa. Resa Johanesa 11:14, 38-44, makura zogereni mapuro aga:
-
Yisinke yina kulikida asi Rasarusa sili kwa fire?—Tara velise 39.
-
Ngano Rasarusa ga zire meguru, Jesus ngano ga mu vhumbwilire pevhu ndi?
5. Vantu wovanzi ngava va vhumbura
Resa Episarome 37:29, makura zogereni epuro eli:
-
Kupi ngava ka tunga vantu ava ngava vhumbura?
Jesus kapi tupu nga ka vhumbura vantu ava ngava karere Jehova. Resa Yirugana 24:15, makura zogereni epuro eli:
-
Yilye ono hara kukamona apa ngava vhumbura vantu?
Gazadara ko eyi: Jesus kuvhura kuvhumbura muntu noureru ngwendi moomu tupu guhya na pindura munendi ogu ana rara
6. Evhumbuko kuvhura kukuhengagwida nokukupa ehuguvaro
Sihorokwa samunaJairusa kwa hengagwida nokukorangeda vantu ava va kara noruguwo. Resa sihorokwa oso mwaRukasa 8:40-42, 49-56.
Komeho a vhumbure munaJairusa, Jesus kwa tanterere Jairusa asi: “Gwa ha ku pwaga! Pura tupu.” (Tara velise 50.) Ngapi omu ehuguvaro lyevhumbuko na li kuvatera . . .
-
nsene muntu ogu wa hara ana dogoroka?
-
nsene eparu lyoge mosiponga lina kara?
Likida VIDIYO, makura zogereni epuro eli nali kwama ko.
-
Ngapi omu ehuguvaro lyevhumbuko ali hengagwida nokukorangeda vakondi vaPhelicity?
VAMWE KUTANTA ASI: “Kapi na si huguvara asi evhumbuko yiko nga li kara.”
-
Ngapi ono kugazara?
-
Etjangwa musinke no ruganesa mokulikida asi evhumbuko yiko nga li kara?
YINKE ONO LIRONGO?
Bibeli kwa tumbwidira asi vantu wovanzi ava va fa ngava va vhumbura. Jehova ana hara ngava paruke hena ntani age kwa pa Jesus nonkondo dokuvhumbura vafe.
Erugururomo
-
Ngapi omu twa yi diva asi Jehova naJesus kuna kundindira nononkondo mokukavhumbura vantu?
-
Vantu ava ngava ka vhumbuka, ngava ka parukira meguru ndi pevhu? Morwasinke ono kuuyungira ngoso?
-
Yisinke yina kukuninkisa o yi pure asi muntu ogu wa hara ogu ga dogoroka nga vhumbuka?
MAUZERA GAMWE
Lironga eyi nayi kuvatera nsene kuna kara moruguwo.
“Evatero kwava vana guwu” (Awake! No. 3 2018)
Nompango domoBibeli kuvhura kuvatera ogu ana kara moruguwo ndi?
Yisinke nayi vatera vanona va lididimikire nomfa domuntu ogu va hara?
Koveli ava ngava ka vhumbwira meguru ndi? Wolye ngava dira kukavhumbura?
“Yisinke evhumbuko?” (Sirongwa sokoIntaneta)
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
