SIRONGWA 36
Hungika mwanayinye
Vantu navenye kwa hara kukara novakaume ava ava hungike. Jehova nage kwa hara vakaume vendi va hungike. Nye ayo kapisi ureru mouzuni omu mwa kara vantu wovanzi ava ava dili kuhungika. Mauwa musinke natu gwanena mo nsene tu hungika mwanayinye?
1. Morwasinke natu hungikira?
Apa atu hungike, ose kulikida asi twa hara Jehova ntani twa mu fumadeka. Jehova ga diva eyi atu gazara ntani neyi atu rugana. (Vahebeli 4:13) Age kutumona apa atu hungike ntani kumuhafesa. Nonkango dendi kutanta asi: “Yeeyi HOMPA kwa tonda ava ava rugana udona, nye vahungami ta va tura mougami wendi.”—Yisewe 3:32.
2. Mononkedi musinke dimwe natu hungika?
Jehova kuna hara asi tu “liuyungire yousili.” (Sakaliya 8:16, 17) Yisinke yina kutanta eyi? Ose kapi atu kumbagere ndi tu gave nombudi depuko kovanekoro, kovarugani vakwetu, kovapuli vakwetu ndi kwava vemepangero. Vantu ava ava hungike kapi ava vaka ndi va fukire vakwawo. (Resa Yisewe 24:28 ntani Vaefeso 4:28.) Ntani awo kufuta mutero gwawo. (Varoma 13:5-7) Mononkedi edi ntani na dimwe, ose “kuhungika mwanayinye.”—Vahebeli 13:18.
3. Mauwa musinke natu gwanena mo nsene tu hungika?
Nsene tu hungika, vantu wopeke ngava tu huguvara. Vantu womombungakriste ngava lizuvha epopero ngwendi lyeli lya kara mepata. Ose ngatu kara nezwi lyewa lyokomutjima. Nsene tu hungika, ose ngatu ‘fumbura erongo lyaKarunga, Muzowoli gwetu’ nokukoka vantu va hare kukarera Jehova.—Titusa 2:10.
LIRONGA KO YOYINZI
Tara omu kuhungika aku kundama Jehova nomu ayi tu vatere. Lironga omu no hungika momaukaro gokulisiga-siga.
4. Kuhungika kuhafesa Jehova
Resa Episarome 44:21 ntani Marakiya 3:16, makura zogereni mapuro aga:
-
Morwasinke ya karera ugova kugazara asi kuvhura tu horoke usili?
-
Ngapi a lizuvhu Jehova apa atu tanta usili nampili yi kare udigu kuyirugana?
Apa vanona ava uyunga usili, ayo kuhafesa vakurona vawo. Apa atu uyunga usili, ayo kuhafesa Jehova
5. Hungika nkenye apa
Sinzi sovantu kwa pura asi kapi to vhuru kuhungika nkenye apa. Nye tara eyi ya karera nomulyo kuhungika nkenye apa. Likida VIDIYO.
Resa Vahebeli 13:18, makura zogereni omu natu hungika . . .
-
kovanekoro.
-
koyirugana ndi kosure.
-
momaukaro gamwe.
6. Kuhungika kuturetera mauwa
Kuvhura tu ligwanekere nomaudigu morwa kuhungika. Nye mwaza siruwo, ose ngatu dimburura asi alyo kuna kara etokoro lyewa. Resa Episarome 34:12-16, makura zogereni epuro eli:
-
Ngapi omu kuhungika a ku tu retere mauwa meparu?
-
Valikwali ava ava hungike kunkondopeka nonkwara dawo
-
Varugani ava ava hungike kwa va huguvara koyirugana
-
Vantu ava ava hungike mosirongo kwa va huguvara vemepangero
VAMWE KUTANTA ASI: “Yimpempa yoyinunu kapi ya kara epuko.”
-
Morwasinke wa yi pulira asi Jehova kwa nyenga yimpempa nayinye?
YINKE ONO LIRONGO?
Jehova kuna hara vakaume vendi va hungike mwanayinye eyi ava rugana neyi ava uyunga.
Erugururomo
-
Mononkedi musinke dimwe natu hungika?
-
Morwasinke ya karera ugova kugazara asi kuvhura tu horoke usili?
-
Morwasinke ono harere kuhungika nkenye apa?
MAUZERA GAMWE
Ngapi omu vakondi nava ronga vana vawo yipo va hungike?
Mauwa musinke natu gwanena mo nsene tu sikisa mo eyi tuna tumbwidire?
Tara eyi natu futira mutero nampili kuna kuyiruganesa momudona.
“Kuvhura tu fute mutero ndi?” (Ruhungu, 1 Siwogedi 2011)
Yisinke ya ninkisire mugara ogu nga dili kuhungika a rundurure nkareso zendi?
“Jehova munankenda ntani kutugusira po” (Ruhungu, 1 Pembankuru 2015)
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
