SIRONGWA 37
Eyi za uyunga Bibeli kuhamena yirugana noyimaliwa
Nove wa lizuvha rumwe sinka sosinene morwa yirugana noyimaliwa ndi? Ayo kuvhura yi tu digopere kupakera mbili yihepwa yetu ntani nokukarera Jehova monkedi ezi ga yi harera. MoBibeli kwa kara mo magano gomawa aga naga tu vatera.
1. Yisinke za uyunga Bibeli kuhamena yirugana?
Karunga kuna tu harere tu hafere yirugana yetu. Bibeli kutanta asi: “Sosiwa po esi ga hepa kurugana mugara . . . a bodjane eyi ga pongaika.” (Muudisi 2:24) Jehova kurugana unene. Nsene tu mu honena pokurugana unene, ose nga tu mu hafesa ntani nose ngatu hafa.
Yirugana mulyo. Nye kapisi yi kare mulyo kupitakana kukarera Jehova. (Johanesa 6:27) Age kwa tumbwidira asi nsene tu mu tura muhowo, age nga pakera mbili yihepwa yetu.
2. Ngapi omu natu tara yimaliwa?
Bibeli kutanta asi yimaliwa kutupopera, nye azo kuturondora hena asi yimaliwa yelike kapi ta yi tu retere ruhafo. (Muudisi 7:12) Eyi yiyo ava tu korangedere tu dire kuhara yimaliwa, nye ‘yi tu gwanene yeeyi twa kara nayo.’ (Resa Vahebeli 13:5.) Nsene yi tu gwanena po eyi twa kara nayo, ose kapi ngatu kara nosinka sokupapara yapeke. Ose ngatu nyokera po makongo. (Yisewe 22:7) Ntani kapi ngatu lihameka moyikwaukarata ntani monongesefa dokuhara kungawopa usimbu.
3. Ngapi omu natu ruganesa yimaliwa monkedi zongwa?
Jehova, Karunga gougavi. Ose kuvhura tu mu honene nsene tu kara ‘nougavi nokupa ko vakwetu.’ (1 Timoteusa 6:18) Kuvhura tu ruganese yimaliwa yetu monkedi zongwa pokukwatesa ko mbungakriste nokuvatera wopeke, unene po vapuli vakwetu ava vana hepa evatero. Jehova kumuhafesa eharo lyetu lyokugava, nye kapisi sivaro soyimaliwa eyi atu gava. Apa atu gava kutundilira komutjima, ose kuhafa ntani ayo kuhafesa Jehova.—Resa Yirugana 20:35.
LIRONGA KO YOYINZI
Tara uwa wokukara nehetakano lyewa koyirugana ntani nokukara yina tu gwanene po.
4. Yererepeka Jehova kupitira moyirugana yoge
Ukaume wetu naJehova kukundama omu atu tara yirugana. Likida VIDIYO, makura zogereni mapuro aga naga kwama ko.
-
Kuliza novidiyo, yisinke yina kutetukisa kuhamena nkareso ezi ga likidire Jason koyirugana?
-
Yisinke ana rugana eyi yina kulikida asi ga kara nehetakano lyewa koyirugana?
Resa Vakorosi 3:23, 24, makura zogereni epuro eli:
-
Morwasinke mutaro gwetu kuhamena yirugana gwa karera nomulyo?
Yirugana mulyo. Nye kapisi yi kare mulyo kupitakana kukarera Jehova
5. Nsene yi tu gwanena po yininke, ngayi tu retera uwa
Sinzi sovantu kuhetekera ko kulipongaikira yimaliwa yoyinzi. Nye Bibeli kutukorangeda tu rugane yapeke. Resa 1 Timoteusa 6:6-8, makura zogereni epuro eli:
-
Yisinke azi tu korangeda Bibeli tu rugane?
Kuvhura tu hafe nampili kapi twa kara neyi yoyinzi. Likida VIDIYO, makura zogereni epuro eli nali kwama ko.
-
Nampili ngomu va kara noyimaliwa yoyisesu, yisinke ayi ninkisa mapata aga ga kare noruhafo?
Ngapi nsene twa kara neyi yokugwanena po, nye simpe twa hara yoyinzi? Jesus kwa geve sifanekeso esi asi likida eyi ya karera siponga. Resa Rukasa 12:15-21, makura zogereni epuro eli:
-
Yisinke ono lirongere ko kosifanekeso saJesus? —Tara velise 15.
Resa nokuhetakanesa Yisewe 10:22 ntani 1 Timoteusa 6:10. Makura zogereni mapuro aga:
-
Yisinke yomulyo po, kukara nelikwatakano naJehova ndi kukara noyimaliwa yoyinzi? Morwasinke?
-
Maudigu musinke ava ligwanekere nago vantu ava va hara yimaliwa yoyinzi?
6. Jehova nga pakera mbili yihepwa yetu
Apa atu kara nomaudigu goyirugana ndi apa atu dili kukara noyimaliwa yokugwanena po, ayo kutuvatera tu dimburure nsene twa huguvara Jehova. Likida VIDIYO o tare eyi natu rugana nsene kuna kuligwanekera nomaudigu ogo, makura zogereni mapuro aga naga kwama ko.
-
Kuliza novidiyo, udigu musinke ga ligwanekerere nawo munazinyetu?
-
Ngapi omu ga lididimikilire maudigu ogo?
Resa Mateusa 6:25-34, makura zogereni epuro eli:
-
Yisinke ga tumbwidira Jehova vantu ava ava mu tura muhowo?
VAMWE KUTANTA ASI: “Na hepa kurugana unene yipo ni pakere mbili epata lyange. Kapi tani vhuru kuza komapongo nkenye sivike.”
-
Etjangwa musinke ali kuvatere oyi pure asi kutura Jehova muhowo kuna kara etokoro lyewa po?
YINKE ONO LIRONGO?
Yirugana noyimaliwa mulyo, nye twa ha yi pulisira yi tu donganese mokukarera Jehova.
Erugururomo
-
Yisinke nayi kuvatera o kare nomutaro gomuwa koyirugana?
-
Uwa musinke ngo gwanena mo nsene yi kugwanena po eyi wa kara nayo?
-
Ngapi no likida asi wa huguvara eyi ga tumbwidira Jehova vantu vendi?
MAUZERA GAMWE
Konakona nsene asi Bibeli kwa tanta asi yimaliwa yidona.
“Yimaliwa ntundiliro zomaudona nagenye ndi?” (Sirongwa sokoIntaneta)
Lironga omu natu ruganesa yimaliwa yipo tu hafese Karunga.
“Yisinke za uyunga Bibeli kuhamena kugava?” (Sirongwa sokoIntaneta)
Yikwaukarata kwato siponga ndi?
“Eyi azi uyunga Bibeli kuhamena yikwaukarata” (Awake!, Nsinano 2015)
Tara eyi ya tumangedere mugara gumwe ogu nga vaka nokulihameka moyikwaukarata a rundurure nkareso zendi.
“Ame kwa here unene marumbasano gononkambe” (Ruhungu, 1 Mangundu 2011)
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
