SIRONGWA 38
Likida rupandu kouhwi weparu
Yininke yoyiwa yinzi eyi natu vhura kuhafera, morwa ose kuna kuparuka. Nampili apa atu ligwanekere nomaudigu, ose simpe kuhafera yimwe meparu. Ngapi natu likida rupandu kouhwi weparu? Ntani morwasinke natu yi ruganena?
1. Morwasinke natu likidira rupandu kouhwi weparu?
Twa hepa kulikida rupandu, morwa eparu kuna kara uhwi wokutunda kwaGuhyetu geharo, Jehova. Age yige “ntundiliro zomwenyo,” kutanta asi yige ga sita yinamwenyo nayinye. (Episarome 36:9) “Age yige a pe nayinye mwenyo nomunku noyininke nayinye.” (Yirugana 17:25, 28) Jehova kutupa eyi twa hepa yipo tu twikire kuparuka. Ntani age kutupa hena yininke eyi ayi tu ninkisa tu hafere eparu.—Resa Yirugana 14:17.
2. Ngapi natu likida Jehova asi twa kara norupandu kouhwi weparu?
Jehova kwa tamekere kutupakera mbili kutunda apa twa kere mezimo. Mekanderero limwe eli lya kara moBibeli, mukareli gwaJehova Ndafita, kwa tanterere Karunga asi: “Wa mwene nge ame simpe nokuhampuruka nge si.” (Episarome 139:16) Jehova kutara eparu lyoge asi mulyo unene. (Resa Mateusa 10:29-31.) Ayo ngayi mu guvisa unene nsene gumwe a dipaga mukwawo mowina ndi a lidipage mwene. a (Exodus 20:13) Ayo ngayi guvisa hena Jehova nsene tu tura eparu lyetu mosiponga ndi nsene tu dira kurugana ko yuma yipo tu popere eparu lyovantu wopeke. Nsene tu takamesa eparu lyetu neli lyovakwetu, ose ngatu likida Jehova asi ose twa kara norupandu kouhwi weparu.
LIRONGA KO YOYINZI
Tara nonkedi dimwe omu no likida rupandu kouhwi weparu.
3. Pakera mbili ukanguki woge
Mokumona asi vakriste kwa ligava kwaKarunga, awo kuruganesa eparu lyawo nalinye mokukarera Jehova. Awo ngwendi kugava marutu gawo ngonzambo kwaKarunga. Resa Varoma 12:1, 2, makura zogereni mapuro aga:
-
Konda musinke nazi kuninkisa o pakere mbili ukanguki woge?
-
Mononkedi musinke dimwe no vhura kuyirugana?
4. Rugana ko yuma yipo o nyokere po siponga ndi nomfa
Bibeli kutukorangeda tu nyokere po yininke yosiponga. Likida VIDIYO o tare yininke yimwe eyi no rugana yipo o nyokere po siponga.
Resa Yisewe 22:3, makura zogereni omu nomu nyokera po yiponga . . .
-
membo.
-
koyirugana.
-
nsene kuna kulihameka momaudano.
-
nsene kuna rondo metuwa ndi kuna kusinga.
5. Fumadeka eparu lyomukeke ogu ana kara mezimo
Ndafita kwa fatwilire asi Jehova kwa kara nosinka komukeke ogu ana kukura mezimo. Resa Episarome 139:13-17, makura zogereni epuro eli:
-
Kuliza naJehova, eparu lyomukeke kutameka apa a kara mezimo ndi apa ava mu hampuruka?
Jehova kwa pere Vaisraeli veta ezi ngazi popere mukadi namunendi ogu ana kara mezimo. Resa Exodus 21:22, 23, makura zogereni mapuro aga:
-
Ngapi omu Jehova ga tere muntu ogu ga dipagere mukeke ogu ana kara mezimo momponyo?
-
Ngapi omu Jehova na lizuvha nsene muntu ayi ruganena mowina? b
-
Mokumona asi Jehova yimo a lizuvhu ngoso, ngapi ono kulizuvha?
Nampili mukadi ogu ga fumadeka eparu, kuvhura a lizuvhe asi ga hepa kuligusa ezimo. Resa Jesaya 41:10, makura zogereni mapuro aga:
-
Nsene mukadi kuna kumukondjesa a liguse ezimo, kupi na gwana evatero? Morwasinke?
VAMWE KUTANTA ASI: “Mukadi ga kara nononkondo dokutokora nsene asi ta ligusa ezimo, morwa aro rutu rwendi.”
-
Yisinke yina kukuninkisa oyi pure asi Jehova kutara eparu lyomukeke ogu ana kara mezimo ntani nozina asi mulyo?
YINKE ONO LIRONGO?
Bibeli kuturonga asi tu hare nokufumadeka nokupopera uhwi weparu ou ga tu pa Jehova. Eyi kwa kwatera mo eparu lyetu neli lyovantu wopeke.
Erugururomo
-
Morwasinke eparu lyomuntu lya karera mulyo unene kwaJehova?
-
Ngapi a lizuvhu Jehova apa muntu a dipaga mukwawo mowina?
-
Yisinke o hafere kuhamena uhwi weparu?
MAUZERA GAMWE
Ngapi natu pandura Jehova kouhwi weparu ou ga tu pa?
Gwana elimbururo kepuro eli asi Karunga kuvhura a gusire po mukadi ogu ga ligusa ezimo ndi?
“Yisinke za uyunga Bibeli kuhamena kuligusa ezimo?” (Sirongwa sokoIntaneta)
Lironga omu Jehova a tara yininke yipo yi tu vatere tu nyokere po yilihafeso eyi nayi tura eparu lyetu mosiponga.
“‘Kuvhura tu lihameke momaudano gosiponga ndi?’”(Awake!, 8 Sikukutu 2000)
Ngapi nsene muntu kuna kugazara kulidipaga? Tara omu Bibeli nazi vhura kukuvatera.
“Bibeli kuvhura zi vatere nge nsene nina hara kulidipaga ndi?” (Sirongwa sokoIntaneta)
a Jehova ga kara nosinka kovantu ava ava dompo mutjima. (Episarome 34:18) Age kukwata egano malizuvho aga aga ninkisa vantu va hare kulidipaga ntani ana hara kuvavatera. Mokutara omu Jehova a vatere vantu vangoso, resa sirongwa “Bibeli kuvhura zi vatere nge nsene nina hara kulidipaga ndi?” esi sina kara koruha Mauzera gamwe mosirongwa esi.
b Ava va ligusa ezimo, kapisi hepero va lizuvhe unzoni, Jehova kuvhura ava gusire po. Mokugwana mauzera, tara sirongwa “Yisinke za uyunga Bibeli kuhamena kuligusa ezimo?” esi sina kara koruha, Mauzera gamwe mosirongwa esi.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
