SIRONGWA 40
Ngapi natu kuhuka kosipara saKarunga?
Gazadara ko zinya ogu ana kuwapeka munendi gomumati yipo a ze kosure. Age kudivilisa asi munendi ana zogana ntani yikoverero yendi yina zere. Eyi kumuninkisa a kare ana kanguka ntani ayo kulikida asi vakondi vendi kumupakera mbili. Mokulifana, Guhyetu geharo Jehova, ana hara tu zere parutu ntani monkareso zetu. Nsene tu kara tuna zere, ayo ngayi tu vatera ntani ngayi yererepeka Karunga.
1. Ngapi omu natu kuhuka parutu?
Jehova kututantera asi: “Omu kare vapongoki.” (1 Peturusa 1:16) Mokukara tuna pongoka, twa hepa kukuhuka parutu ntani nomonkareso zetu. Ose kuvhura tu kuhuke parutu nsene tu zogana nkenye apa nokukuhwa yikoverero yetu nomatuwa getu ntani nokuzeresa mambo getu. Kuvhura hena tu zerese Sinyanga setu soUhompa. Nsene tu kuhuka parutu, ose ngatu yererepeka Jehova.—2 Vakolinte 6:3, 4.
2. Yisinke natu nyokera po yipo tu kare tuna kuhuka?
Bibeli kutukorangeda asi: “Atu lizereseni nyamwetu kwanayinye eyi ayi nyateke korutu nokomwenyo.” (2 Vakolinte 7:1) Yipo nye, twa hepa kukondja mokunyokera po nkenye eyi nayi vhura kunyateka rutu rwetu ndi magazaro getu. Magazaro getu ga hepa kuhafesa Jehova, yipo nye, twa hepa kunyokera po magazaro gomadona. (Episarome 104:34) Ose hena kukondja yipo tu ruganese nonkango donongwa.—Resa Vakorosi 3:8.
Yininke musinke hena yimwe eyi nayi tu ninkisa tu dire kukuhuka parutu ndi monkareso zetu? Yininke yimwe kuvhura kunyateka rutu rwetu. Yipo nye, twa hepa kunyokera po makanya, yikwaepangwe ntani kuruganesa nomutji monkedi zondona. Nsene tu yi nyokera po, ose ngatu kara tuna kanguka ntani ngatu likida asi twa fumadeka eparu. Ose kukondja hena tu kuhuke monkareso pokunyokera po kulidanesa koyilyo yonomuga ntani kutarera mafano goruhonda. (Episarome 119:37; Vaefeso 5:5) Ayo kapisi ureru kunyokera po yirugana oyo, nye Jehova kuvhura a tu vatere.—Resa Jesaya 41:13.
LIRONGA KO YOYINZI
Lironga omu atu yererepeke Jehova pokukara tuna kuhuka ntani nomu natu nyokera po yirugana yokunyata.
3. Ose kuyererepeka Jehova nsene tu kuhuka parutu
Nsene tu konakona noveta daJehova edi ga pere Vaisraeli, ose ngatu diva omu Jehova a tara ukuhuki. Resa Exodus 19:10 ntani 30:17-19, makura zogereni mapuro aga:
-
Ngapi omu novelise odo adi likida omu Jehova a tara ukuhuki?
-
Yisinke no rugana nkenye apa yipo o kare ono kuhuka parutu?
Twa hepa kuruganesa siruwo nononkondo detu yipo tu kare tuna kuhuka parutu. Natuvenye kuvhura tu yi sikise mo yi kare asi kupi twa tunga ndi ruhepo. Likida VIDIYO, makura zogereni epuro eli nali kwama ko.
-
Morwasinke vantu ava atu zuvhisire ngava fumadekera Jehova unene nsene va mona yininke yetu yina zere?
4. Hageka yirugana yoyidona
Jehova kuvhura a tu vatere tu hageke yirugana yoyidona
Nsene asi ove kukoka ndi kuruganesa yikwaepangwe, ove wa yi diva asi ayo udigu kuyihageka. Yisinke nayi kuvatera? Gazadara ko omu ayi kukundama yirugana oyo. Resa Mateusa 22:37-39, makura zogereni omu makanya noyikwaepangwe ayi kundama . . .
-
elikwatakano lyomuntu naJehova.
-
vemepata ntani novantu wopeke.
Rugana ko yuma yipo o hageke yirugana yoyidona. a Likida VIDIYO.
Resa Vafilipi 4:13, makura zogereni epuro eli:
-
Ngapi omu kukanderera nokulironga Bibeli ntani nokuza komapongo nayi vatera muntu a hageke yirugana yoyidona?
5. Nyokera po magazaro noyirugana yoyidona
Resa Vakorosi 3:5, makura zogereni mapuro aga:
-
Ngapi twa yi diva asi kutarera mafano goruhonda nokutuma yininke yokudira kuwapera koserefoni ntani kulidanesa koyilyo yonomuga kwa nyata kosipara saJehova?
-
Ngapi ono kugazara, Jehova ga wapeka kweyi ga tu harera tu kare tuna kuhuka ndi? Morwasinke?
Lironga omu no nyokera po magazaro gokunyata. Likida VIDIYO.
Jesus kwa ruganesere sifanekeso esi asi likida asi twa hepa kurugana ko yuma usimbu yipo tu kare tuna kuhuka. Resa Mateusa 5:29, 30, makura zogereni epuro eli:
-
Jesus kapi ga tembe asi twa hepa kuliremeka nyamwetu, nye age kwa likidire asi twa hepa kurugana ko yuma. Yisinke na rugana muntu yipo a nyokere po magazaro gomadona?
Nsene kwa kukondja mokunyokera po magazaro gomadona, Jehova kumuhafesa eyi ono kurugana. Resa Episarome 103:13, 14, makura zogereni epuro eli:
-
Nsene kuna kukondja nonkareso zokunyata, ngapi omu etjangwa eli nali ku vatera o zi nyokere po?
Wa ha hageka nsene ono lipuka
Vamwe kulizuvha asi nampo va hageke morwa vana lipuka. Nye gazara ko sifanekeso esi: Apa muduki a punduka nokuliganda, eyi kapi yina kutanta asi ga hepa kukatamekera ko ndi kapi ta vhuru hena kufunda. Mokulifana, nsene ono lipuka kapi yina kutanta asi kapi ngo funda yirugana yoyidona. Ntani kapi yina kutanta asi eyi wa rugana yoyiwa kwa lihepeka tupu. Komeho zokuhageka yirugana yoyidona, ose ngatu lipuka yikando yongandi. Wa ha hageka! Jehova nga ku vatera o hageke yirugana yoyidona.
VAMWE KUTANTA ASI: “Kapi tani vhuru kuhageka, morwa na yi yika unene.”
-
Etjangwa musinke no ruganesa mokulikida muntu gwangoso asi Jehova nga mu vatera a hageke yirugana yoyidona?
YINKE ONO LIRONGO?
Ose kuhafesa Jehova nsene tu kuhuka parutu, momagazaro ntani monkareso zetu.
Erugururomo
-
Morwasinke ukuhuki wa karera nomulyo?
-
Ngapi natu kuhuka parutu?
-
Yisinke no rugana yipo o kare ono kuhuka momagazaro ntani monkareso?
MAUZERA GAMWE
Yininke musinke youreru eyi no rugana yipo o kuhuke parutu nampili kapi wa kara neyi yoyinzi?
Lironga yininke yimwe eyi no rugana yipo o hageke kukoka makanya.
“Omu no hageka kukoka makanya” (Awake!, Kudumonkuru 2010)
Konakona eyi ya karera siponga kutarera mafano goruhonda.
Tara omu mugara gumwe ga hagekere kutarera mafano goruhonda.
“Kwa kondjere yikando yoyinzi ntani yina kutompoka nge” (Ruhungu No. 4 2016)
a Sirongwa “Omu no hageka kukoka,” esi sina kara koruha Mauzera gamwe kwa faturura eyi no rugana yipo o hageke kukoka.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
