SIRONGWA 44
Yipito nayinye kuhafesa Karunga ndi?
Jehova kuna tu harere tu hafere eparu ntani tu kare noyipito poyiruwo yimwe. Nye yipito nayinye kumuhafesa ndi? Ngapi natu likida asi twa hara Jehova posiruwo soyipito?
1. Morwasinke sinzi soyipito ayi dilire kuhafesa Jehova?
Ayo nayi kutetukisa pokudiva asi sinzi soyipito kwa tunda kovapagani. Yipito oyo kwa likwatakana noukarelikarunga woyimpempa. Ayo kuvhura yi likwatakane noumpure ndi kwa tundilira kegano asi koyili eyi ayi paruka apa a fu muntu. Ano yimwe kukorangeda kukarera yikarunga yerago. (Jesaya 65:11) Jehova kwa rondora vakareli vendi asi: “Tundeni mo mokatji kawo, . . . Mwa ha guma kweyi yokunyata.”—2 Vakolinte 6:17. a
2. Ngapi a lizuvhu Jehova kuhamena yipito eyi ayi gava efumano lyenene kovantu?
Jehova kuturondora tu dire ‘kuhuguvara movantu.’ (Resa Jeremiya 17:5.) Yipito yimwe kugava efumano kovapangeli ndi vakwayita. Vantu vamwe kudana yipito yipo va diworoke emanguruko lyosirongo. (1 Johanesa 5:21) Ano poyipito yimwe, kukorangeda upolitika nonombunga dimwe. Ngapi omu nga lizuvha Jehova nsene tu fumadeka unene vantu ndi mbunga ezi azi korangeda magano aga ga lisiga naga gendi?
3. Nkareso musinke azi ninkisa Karunga a dire kuhafera sipito?
Bibeli kwa silika “makurunwa noyipito yoyidona nomarumbasano gokunwa.” (1 Peturusa 4:3, NW) Poyipito yimwe, vantu kapi ava lipangere ntani kapi ava likida nkareso zongwa. Nsene tuna hara kukara vakaume vaJehova, twa hepa kulikara ure noyipito yangoso.
LIRONGA KO YOYINZI
Lironga omu no hafesa Jehova pokutura po matokoro gomawa kuhamena yipito.
4. Nyokera po yipito eyi ayi swaukisa Jehova
Resa Vaefeso 5:10, makura zogereni mapuro aga:
-
Yisinke twa hepa kudivilisa komeho tu dane sipito songandi?
-
Yipito musinke ya divikwa momukunda gweni?
-
Omu ono kugazara, yipito oyo kuhafesa Jehova ndi?
Pasihonena, wa gazadara ko omu Karunga a lizuvhu kuhamena yipito yehampuruko ndi? MoBibeli kapi va tumbura mo mukareli gwaJehova ogu ga dene sipito sehampuruko. Nye azo kwa tumbura yipito yehampuruko yivali yovantu ava ngava dili kukarera Karunga. Resa Genesis 40:20-22 ntani Mateusa 14:6-10. Makura zogereni mapuro aga:
-
Yininke musinke yokulifana ya horokere poyipito oyo?
-
Kuliza noyihorokwa oyo, ngapi ono kugazara omu a lizuvhu Jehova kuhamena yipito yehampuruko?
Nye kuvhura o lipure asi: ‘Ngapi nayi kundama Jehova nsene ni lihameka mosipito sehampuruko ndi moyipito yapeke?’ Resa Exodus 32:1-8. Ntani, likida VIDIYO makura zogereni mapuro aga naga kwama ko.
-
Morwasinke twa hepera kudiva eyi ayi hafesa Jehova?
-
Ngapi natu yi rugana?
Omu no diva nsene sipito kapi asi hafesa Karunga
-
Aso kulirwanesa noMatjangwa ndi? Mokugwana mauzera, konakona oku sa tundilira.
-
Aso kugava efumano lyenene kovantu ndi konombunga ndi? Ose kugava efumano kwaJehova kupitakana nayinye ntani ose kwa huguvara asi yige nga gusa po maudigu gomouzuni.
-
Eyi ava rugana posipito kulirwanesa nonoveta domoBibeli ndi? Ose twa hepa kukara tuna kuhuka monkareso zetu.
5. Vatera wopeke va fumadeke eyi wa pura
Ayo kuvhura yi tu digopere kunyoka apa vantu wopeke ava tu sininike tu lihameke moyipito eyi ayi dili kuhafesa Jehova. Faturura eyi wa pura nonondunge ntani lididimika. Mokugwana ko sihonena omu no yi rugana, likida VIDIYO.
Resa Mateusa 7:12, makura zogereni mapuro aga:
-
Kuliza novelise ezi, kuvhura o tantere vekoro ava va dira kupura va dire kulihameka mosilika songandi ndi?
-
Yisinke no rugana mokulikida ekoro lyoge asi nampili ngomu ono kudira kulihameka mosipito, ove wa va hara ntani awo mulyo?
6. Jehova ana hara tu hafe
Jehova kuna hara tu hafere kumwe novanekero ntani novakaume vetu. Resa Muudisi 8:15, makura zogereni epuro eli:
-
Ngapi omu velise ezi azi likida asi Jehova ana hara tu hafe?
Jehova kuna hara vantu vendi va hafere kumwe. Likida VIDIYO o tare omu va yi likida poyigongi yoyirongo.
Resa Vagarata 6:10, makura zogereni mapuro aga:
-
Hepero tu dane yipito eyi ya divikwa yipo tu ‘ruganene navenye uwa’ ndi?
-
Yisinke nayi kuhafesa? Kugava uhwi morwa sipito songandi ndi kugava uhwi kutundilira komutjima?
-
Poyiruwo yimwe, Nombangi kuwapaikira vana vawo mapongasano ntani kuvapa mauhwi va hana kuyindindira. Nsene wa kara novana, yininke musinke yoyiwa eyi no va ruganena?
VAMWE KUTANTA ASI: “Kapi ya kara nomulyo kudiva oku sa tundilira sipito songandi. Yomulyo po kuhafera kumwe novanekoro ntani novakaume.”
-
Ngapi no limburura?
YINKE ONO LIRONGO?
Jehova kuna hara tu hafere kumwe novanekoro ntani novakaume. Nye age kuna hara tu nyokere po yipito eyi ayi dili kumuhafesa.
Erugururomo
-
Mapuro musinke naga tu vatera tu dive nsene asi sipito songandi kapi asi hafesa Jehova?
-
Ngapi natu vatera vanekoro novakaume va kwate egano eyi twa tokora kuhamena sipito songandi?
-
Ngapi ono yi diva asi Jehova ana hara tu hafere eparu?
MAUZERA GAMWE
Tara yipito yimwe eyi ava dili kudana Vakriste.
“Morwasinke Nombangi daJehova adi dilire kudana yipito yimwe?” (Sirongwa sokoIntaneta)
Tara nokonda ne deyi twa pulira asi yipito yehampuruko kapi ayi hafesa Karunga.
“Morwasinke Nombangi daJehova adi dilire kudana sipito sehampuruko?” (Sirongwa sokoIntaneta)
Tara eyi ga rugene mudinkantu gumwe apa vakwawo wokosure ngava mu ninkagura morwa eyi ga pura kuhamena sipito soKrismesa.
Mamiliyona goVakriste kapi ava dana sipito soKrismesa. Ngapi ava lizuvhu kuhamena etokoro lyawo?
“Awo kwa horowora po yomulyo” (Ruhungu, 1 Sindimba 2012)
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
