SIRONGWA 46
Morwasinke no ligavera nokugwana ekuho?
Kuligava kwaJehova kutanta asi kumutumbwidira kupitira mekanderero asi ngo mu karera gelike nokutura mpango zendi muhowo meparu lyoge. (Episarome 40:8) Konyima, to gwana ekuho. Pokugwana ekuho, ove ngo likida wopeke asi ove wa ligava kwaJehova. Kuligava kwaJehova kuna kara etokoro lyomulyo po eli natu vhura kutura po meparu lyetu. Yisinke nayi kutumangeda o ture po etokoro olyo lyomulyo?
1. Yisinke ayi tumangeda muntu a ligave kwaJehova?
Eharo lyetu kwaJehova yilyo ali tu tumangeda tu ligave kwendi. (1 Johanesa 4:10, 19) Bibeli kututumangeda asi: “O hare Hompa Karunga goge nomutjima goge nagunye, nomwenyo goge nagunye nonondunge doge nadinye nononkondo doge nadinye.” (Marukusa 12:30) Ose kulikida Karunga asi twa mu hara kupitira mweyi atu uyunga ntani neyi atu rugana. Ngwendi moomu tupu vantu ava likwara morwa va lihara, eharo lyetu kwaJehova kututumangeda tu ligave kwendi nokugwana ekuho.
2. Matungiko musinke a gava Jehova koNombangi edi da gwana ekuho?
Nsene ngo gwana ekuho, ove ngo ya hamena kepata lyaJehova lyoruhafo. Ove ngo ya limonena eharo lyendi mononkedi dokulisiga-siga ntani ngo hedera unene pepi nage. (Resa Marakiya 3:16-18.) Mokumona asi ove ngo hamena kepata lyaJehova, ove ngo kara nekoro lyopampepo mouzuni mudima eli lya hara Jehova ntani eli lya kuhara. (Resa Marukusa 10:29, 30.) Nye wa hepa kurugana ko yuma yipo ngo gwane ekuho. Wa hepa kulironga kuhamena Jehova nokumuhara ntani nokupura mwaMunendi. Ano konyima ntani no ligava kwaJehova. Nsene o rugana yininke oyo, ove ngo ka paruka narunye. Nonkango daKarunga kwa tanta asi: “Ekuhwo eli lina kumuparura ntaantani.”—1 Peturusa 3:21.
LIRONGA KO YOYINZI
Lironga eyi ya karera mulyo kuligava kwaJehova nokugwana ekuho.
3. Natuvenye twa hepa kuhorowora ogu natu karera
Mosiruwo soVaisraeli, vantu vamwe kwa gazarere asi kuvhura va karere Jehova ntani sikarunga Bara. Nye Jehova kwa tumine muporofete Eliya a ka va pukurure. Resa 1 Vahompa 18:21, makura zogereni epuro eli:
-
Etokoro musinke va hepere kutura po Vaisraeli?
Ngwendi Vaisraeli, nose twa hepa kutokora ogu natu karera. Resa Rukasa 16:13, makura zogereni mapuro aga:
-
Morwasinke natu dilira kukarera Jehova noyininke yapeke posikando simwe?
-
Ngapi natu likida asi ose twa horowora kukarera Jehova?
4. Gazadara ko omu ga ku hara Jehova
Jehova kwa tu pa mauhwi gomanzi. Yisinke natu vhura kumupa? Likida VIDIYO.
Mononkedi musinke ga kulikida Jehova asi ga ku hara? Resa Episarome 104:14, 15 ntani 1 Johanesa 4:9, 10, makura zogereni mapuro aga:
-
Mauhwi musinke ga kupa Jehova aga wa hara po unene?
-
Mokumona asi Jehova ga ku pa mauhwi ogo, ngapi o kulizuvha kumuhamena?
Apa muntu a tu pe uhwi ou twa hara, ayo kutuninkisa tu likide rupandu kogu ana u tu pe. Resa Deuteronomium 16:17, makura zogereni epuro eli:
-
Nsene o gazadara ko nayinye eyi ga ku pa Jehova, yisinke nayi kutumangeda o rugane?
5. Kuligava kwaJehova kureta matungiko
Sinzi sovantu kwa pura asi awo ngava hafa nsene va divikwa nokugwana yirugana yoyiwa ndi yimaliwa. Nye ayo usili ndi? Likida VIDIYO, makura zogereni mapuro aga naga kwama ko.
-
Nampili ngomu mugara gwina ga here kudana mbara, morwasinke ga hagekerere?
-
Age kwa tokwere kuligava kwaJehova, nye kapisi koudano wombara. Omu ono kugazara, age kwa tulire po etokoro lyewa ndi? Morwasinke?
Mupositoli Paurusa nga kondjere sirugana sosinene komeho a kare Mukriste. Murongi ogu ga divikwa, yige ga mu rongere veta zoVajuda. Nye age ga yi sigire yipo a kare Mukriste. Paurusa ga liverere ndi? Resa Vafilipi 3:8, makura zogereni mapuro aga:
-
Morwasinke Paurusa ga uyungilire asi yininke eyi nga rugana komeho a ya kare Mukriste kuna kara “yininke yomawoko-woko” ndi yihando?
-
Yisinke ga gwanene mo?
-
Yipi yoyiwa po, kuruganesa eparu lyoge mokukarera Jehova ndi kuliruganesa koyininke yapeke?
Apa Paurusa ga ya kere Mukriste, age kwa gwene yoyinzi kupitakana eyi ga sigire
VAMWE KUTANTA ASI: “Ayo udigu kuligava kwaKarunga.”
-
Morwasinke ono kugazarera asi kuligava kwaJehova kuna kara etokoro lyewa?
YINKE ONO LIRONGO?
Eharo lyetu kwaJehova kututumangeda tu ligave kwendi nokugwana ekuho.
Erugururomo
-
Morwasinke natu karerera Jehova nomutjima gwetu nagunye?
-
Ngapi Jehova a tungike Nombangi edi da ligava kwendi?
-
Ono hara kuligava kwaJehova ndi?
MAUZERA GAMWE
Tara eyi ya ninkisire mbimbi gumwe nomudani gombara va tokore kuligava kwaJehova.
Vadinkantu tava pura—Yisinke nani ruganesa eparu lyange? —Eparu lyawo lyanare (6:54)
Lironga nokonda dimwe edi nadi kuvatera o ligave kwaJehova.
“Morwasinke no ligavera kwaJehova?” (Ruhungu, 15 Murongagona 2010)
Momusika ogu, tara ruhafo oru va kara naro ava va ligava kwaJehova.
Tara eyi ya tumangedere mukadi gumwe a konakone yitambo yendi, mesimwititi “Ame ngani lipura asi ‘Morwasinke va sitilira vantu?’”
“Bibeli kurundurura eparu lyovantu” (Ruhungu, 1 Mangundu 2012)
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
