SIRONGWA 47
Ono liwapaikire kugwana ekuho ndi?
Ove wa lironga yininke yoyinzi moBibeli kuhamena Jehova. Ove nampo wa tameka kutura pasirugana eyi wa lironga. Nye nampo koyili yina kukukondera yipo o dire kuligava kwaJehova nokugwana ekuho. Sirongwa esi nasi ka zogera yininke yimwe eyi ayi kondere vantu va dire kugwana ekuho nomu no yi funda po.
1. Yokuhura kupi wa hepa kudiva komeho o gwane ekuho?
Mokugwana ekuho, wa hepa kukara ‘nediwo lyousili.’ (1 Timoteusa 2:4) Nye eyi kapi yina kutanta asi wa hepa kudiva malimbururo komapuro nagenye kuhamena Bibeli komeho o gwane ekuho. Nampili Vakriste ava va gwana nare ekuho, nawo kutwikira kulironga. (Vakorosi 1:9, 10) Nye wa hepa kukwata egano marongo gamwe gomoBibeli. Vakuronambunga ngava kuvatera o dive nsene wa kara nediwo lyokugwanena po komeho o gwane ekuho.
2. Yininke musinke yimwe wa hepa kurugana komeho o gwane ekuho?
Komeho o gwane ekuho, wa hepa ‘kulitezurura nokutengura kwaKarunga.’ (Resa Yirugana 3:19.) Eyi kutanta asi wa hepa kulivera koyininke yoyidona eyi ngo rugana nokuhundira Jehova a ku gusire po. Ntani wa hepa kunyokera po yirugana yoyidona nokuparuka monkedi ezi azi hafesa Karunga. Wa hepa hena kuza komapongo nokukara muzuvhisi gokudira kugwana ekuho.
3. Morwasinke no dilira kutjira kugwana ekuho?
Vantu vamwe kutjira asi kapi ngava vhura kusikisa mo eyi va tumbwidira Jehova. Yimo, poyiruwo yimwe ove ngo tura po mapuko. Vagara novakadi wovalimburukwi ava va tumbura moBibeli, nawo kwa tulire mapuko. Nye Jehova kapi a ndindire vakareli vendi va sikilire mo. (Resa Episarome 103:13, 14.) Age kuhafa apa o kondjo paapa wa hulira, ntani age nga ku vatera. Jehova kwa tu tumbwidira asi kwato eyi ngayi tu “gusa mo meharo [lyendi].”—Resa Varoma 8:38, 39.
LIRONGA KO YOYINZI
Tara omu kudiva Jehova nokutambura evatero lyendi nayi ku vatera yipo o funde po eyi yina kukukondera kugwana ekuho.
4. Diva nawa Jehova
Yokuhura kupi wa hepa kudiva kuhamena Jehova komeho zokugwana ekuho? Wa hepa kumudiva nawa yipo ngayi kutumangede o mu hare nokumuhafesa. Likida VIDIYO o tare omu va yi rugana varongwa woBibeli uzuni mudima. Makura zogereni epuro eli nali kwama ko.
-
Kuliza novidiyo, yisinke ya vaterere vamwe va liwapaikire kugwana ekuho?
Resa Varoma 12:2, makura zogereni mapuro aga:
-
Ove kusinganyeka eyi azi rongo Bibeli ndi nsene asi Nombangi daJehova kuronga usili ndi?
-
Nsene yimo, yisinke no rugana ko?
5. Funda po eyi yina kukukondera kugwana ekuho
Natuvenye kuligwanekera nomaudigu apa atu tokora kuligava kwaJehova nokugwana ekuho. Tara sihonena, pokulikida VIDIYO, makura zogereni mapuro aga naga kwama ko.
-
Kuliza novidiyo, maudigu musinke ga hepere kufunda po Narangerel yipo a karere Jehova?
-
Ngapi eharo lyendi kwaJehova lya mu vaterere a funde po maudigu ogo?
Resa Yisewe 29:25 ntani 2 Timoteusa 1:7, makura zogereni epuro eli:
-
Yisinke ayi tu pe uradi yipo tu funde po maudigu getu?
6. Huguvara asi Jehova nga ku vatera
Jehova nga ku vatera yipo o vhure kumuhafesa. Likida VIDIYO, makura zogereni mapuro aga naga kwama ko.
-
Kuliza novidiyo, yisinke ya ninkisire murongwa goBibeli a dire kuhara kugwana ekuho?
-
Yisinke ya mu vaterere a huguvare unene mwaJehova?
Resa Jesaya 41:10, 13, makura zogereni epuro eli:
-
Morwasinke no karera nehuguvaro asi ngo sikisa mo eligawo lyoge?
7. Kara norupandu keharo lyaJehova
Nsene o gazadara ko unene omu Jehova ga ku hara, ayo ngayi kuvatera o kare norupandu ntani ngayi kutumangeda o hare kumukarera narunye. Resa Episarome 40:5, makura zogereni epuro eli:
-
Matungiko musinke gaJehova wa hara po unene?
Muporofete Jeremiya kwa here Jehova nononkango dendi, ntani age kwa likidire rupandu kositumbukira sokutantera vantu kuhamena Jehova. Age kwa tente asi: “Ame koge na hama, ove HOMPA Karunga Munankondo. Ano nonkango doge kuna zwida mutjima gwange epemburo nehafo.” (Jeremiya 15:16) Limburura mapuro aga:
-
Morwasinke no lizuvhira mfumwa mokukara gumwe goNombangi daJehova?
-
Ono hara kugwana ekuho yipo o kare gumwe goNombangi daJehova ndi?
-
Koyili yina kukukondera mokugwana ekuho ndi?
-
Yisinke no rugana yipo o sikise mo sitambo sokugwana ekuho?
VAMWE KUTANTA ASI: “Kapi na si huguvara asi ngani sikisa mo mugano gekuho.”
-
Nove yimo o lizuvhu ndi?
YINKE ONO LIRONGO?
Jehova nga ku vatera o funde po eyi yina kukukondera mokugwana ekuho.
Erugururomo
-
Yokuhura kupi wa hepa kudiva komeho o gwane ekuho?
-
Marunduruko musinke no tura po komeho o gwane ekuho?
-
Morwasinke no dilira kutjira kugwana ekuho?
MAUZERA GAMWE
Tara eyi nayi kuninkisa o tokore kugwana ekuho.
“Ono liwapaikire kugwana ekuho ndi?” (Ruhungu, Nsinano 2020)
Lironga omu no funda po eyi yina kukukondera mokugwana ekuho.
“Yinke hena nayi limba po kukuhwa nge?” (Ruhungu, Nsinano 2019)
Tara eyi ya vaterere mugara gumwe a funde po eyi ya mu konderere mokugwana ekuho.
Mugara gedina Ataa kwa likata-katere pomuhowo kugwana ekuho. Tara eyi ya mu ninkisire a ture po etokoro lyokugwana ekuho.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
