SIRONGWA 49
Ngapi omu epata lyoge nali kara noruhafo?—Ruha 1
Sinzi sovalikwali wovape kwa hara va twikire kukara noruhafo oru va kere naro apa va likwere. Awo kuvhura yi va tompoke. Vakriste ava va likwara siruwo sosire ntani ava va tura pasirugana nompango domoBibeli, va yi diva asi ayo kuvhura kutompoka.
1. Mapukururo musinke azi gava Bibeli kovanturagumbo?
Jehova kwa horowora vagara va kare mutwe gepata. (Resa Vaefeso 5:23.) Jehova kundindira vagara va ture po matokoro aga naga vatera epata. Bibeli kuvakorangeda asi: “Omu hare vakadi veni.” (Vaefeso 5:25) Yisinke ayi tanta eyi? Nturagumbo geharo kutekura mukadendi nombili, yi kare asi kembo ndi mokatji kovantu. Age kumupopera koyiponga ntani kumupakera mbili panyama nopamalizuvho. (1 Timoteusa 5:8) Nye unene po, age kupakera mbili yihepwa yamukadendi yopampepo. (Mateusa 4:4) Pasihonena, age kukanderera nokuresa Bibeli kumwe namukadendi. Apa mugara a pakere mbili mukadendi, elikwatakano lyendi naJehova kunkondopara.—Resa 1 Peturusa 3:7.
2. Mapukururo musinke azi gava Bibeli kovakadi?
Nonkango daKarunga kutanta asi: “Mukadi hena a fumadeke yendi.” (Vaefeso 5:33) Ngapi omu nayi rugana? Age kuvhura a gazadare ko koyikara yoyiwa yamugara gwendi nomu a rugana unene yipo a mu pakere mbili novana vawo. Age hena kuvhura a likide efumadeko pokukwatesa ko matokoro gamugara gwendi ntani pokuuyunga nombili nage ndi kumuuyunga momuwa, nampili kapi a karere Jehova.
3. Ngapi omu valikwali nava nkondopeka nonkwara dawo?
Bibeli kwa tanta asi valikwali “va kare nye rutu rumwe tupu.” (Mateusa 19:5) Eyi kutanta asi va hepa kukondja yipo va nyokere po yininke eyi nayi va gaununa. Awo kuyirugana oyo pokukara kumwe ntani pokulitantera eyi vana kugazara nomu vana kulizuvha. Kugusa ko Jehova, awo kapi ava pulisire nkenye eyi ndi nkenye ogu, a kare nomulyo kwawo kupitakana mulikwali gwawo. Ntani hena, awo kapi ava tulisa po elikwatakano lyokudira kuwapera nagumwe.
LIRONGA KO YOYINZI
Lironga nompango domoBibeli edi nadi vhura kunkondopeka nonkwara deni.
4. Vanturagumbo, hareni nokupakera mbili vakadi veni
Bibeli kutanta asi: “Vagara nawo ava hare vakadi vawo moomu va hara marutu gavene.” (Vaefeso 5:28, 29) Yisinke ayi tanta eyi? Likida VIDIYO, makura zogereni epuro eli nali kwama ko.
-
Mononkedi musinke na likida nturagumbo asi ga hara mukadendi ntani kumupakera mbili?
Resa Vakorosi 3:12, makura zogereni epuro eli:
-
Ngapi omu nturagumbo na likida yikara eyi mononkwara dendi?
5. Vakadi, hareni nokufumadeka vagara veni
Bibeli kukorangeda mukadi a fumadeke mugara gwendi, yi kare asi mugara gwendi kukarera Jehova ndi hawe. Resa 1 Peturusa 3:1, 2, makura zogereni mapuro aga:
-
Nsene asi ove kwa kwara mugara gomuhapuli, ove nampo ono hara a tameke kukarera Jehova. Nkedi musinke zongwa zokuvhura kumuvatera? Kumuzuvhisira nkenye apa ndi kumulikida yikara yoyiwa nokumufumadeka? Morwasinke?
Valikwali kuvhura va ture po matokoro gomawa kumwe. Nye poyiruwo yimwe, mukadi kuvhura a dire kukwatesa ko etokoro lyamugara gwendi. Poyiruwo yangoso, age kuvhura a pwagese malizuvho gendi monkedi zombili ntani zefumadeko. Nye ga hepa kudiworoka asi Jehova kwa pa mugara situmbukira sokutura po matokoro gemepata. Yipo nye, ga hepa kukwatesa ko etokoro lyamugara gwendi. Nsene ayi rugana oyo, age nga gwederera koruhafo rwemepata. Resa 1 Peturusa 3:3-5, makura zogereni epuro eli:
-
Ngapi a lizuvhu Jehova apa mukadi a fumadeke mugara gwendi?
6. Kuvhura o kohonone po maudigu gomononkwara doge
Kwato nonkwara edi da sikilira mo. Yipo nye, valikwali va hepa kuruganena kumwe yipo va kohonone po maudigu gawo. Likida VIDIYO, makura zogereni mapuro aga naga kwama ko.
-
Kuliza novidiyo, yininke musinke yimwe eyi ya likidire asi nonkwara dawo kapi dina nkondopara?
-
Yisinke va rugene mokunkondopeka nonkwara dawo?
Resa 1 Vakolinte 10:24 ntani Vakorosi 3:13. Konyima zokuresa nkenye etjangwa, zogereni epuro eli:
-
Ngapi omu nayi nkondopeka nonkwara nsene tu sikisa mo mpango ezi?
Bibeli kutanta asi twa hepa kulilikida efumadeko. Ayo kwa kwatera mo kutekura muntu nombili. Resa Varoma 12:10, makura zogereni mapuro aga:
-
Yilye na hova kulikida po mukwawo efumadeko, mugara ndi mukadi? Morwasinke ono kuuyungira ngoso?
VAMWE KUTANTA ASI: “Name nomulikwali gwange kapi tuna lihara ngwendi nare.”
-
Ngapi no va fatwilira asi Bibeli kuvhura zi va vatere?
YINKE ONO LIRONGO?
Valikwali kuvhura va kare noruhafo nsene va lihara nokulifumadeka ntani nokutura pasirugana nompango domoBibeli.
Erugururomo
-
Ngapi nturagumbo na gwederera koruhafo romononkwara?
-
Ngapi omu mukadi na gwederera koruhafo romononkwara?
-
Nsene wa kwara, mpango musinke zomoBibeli nazi kuvatera o nkondopeke nonkwara doge?
MAUZERA GAMWE
Tara magano aga naga kuvatera yipo mu kare noruhafo mepata.
Tarera musika govidiyo omu va likida mauwa aga natu gwana nsene tu tura pasirugana nompango daKarunga.
Lironga eyi ya hamena mo mokufumadeka upangeli womugara.
“Vakadi, morwasinke nomu limburukwira koupangeli?” (Ruhungu, 1 Kudumonkuru 2010)
Tara omu naga kuvatera mapukururo gomoBibeli gokuhamena nonkwara.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
