SIRONGWA 52
Morwasinke ya karera nomulyo eyi atu dwara nomu atu moneka?
Natuvenye kwa hara kuhorowora eyi natu dwara nomu natu moneka. Nsene tu kwama nompango domoBibeli, ose ngatu dwara eyi twa hara ntani ngatu hafesa Jehova. Ngesi tatu ka konakona nompango dimwe domoBibeli.
1. Nompango musinke nadi tu vatera pokuhorowora yikoverero ntani nomu natu liwapeka?
Twa hepa ‘kuliwapeka monkedi zefumadeko nokudwara yidwara yokuwapera’ ntani twa hepa kuzera yipo vantu va mone asi ose ‘kukarera Karunga.’ (1 Timoteusa 2:9, 10, NW) Konakona nompango edi ne: (1) Yidwara yetu ya hepa kukara “yokuwapera.” Ngomu wa yi mona kepongo, vantu vaJehova kudwara yokulisiga, nye ndwareso zetu nomonkedi ezi atu wapeke nohuki detu, kulikida asi ose kwa fumadeka Karunga. (2) Kudwara “monkedi zefumadeko” kutanta asi kapisi tu dware monkedi ezi nazi ninkisa wopeke va kare nomagazaro gomadona ndi tu limonekese. (3) Ose kulikida asi ose ‘kugazara nawa’ pokudira kukwama nkenye eliwapeko nondwareso ezi zina kuwiza momode. (4) Emoneko lyetu lya hepa kulikida nkenye apa asi ose ‘kukarera Karunga,’ yipo vantu va dimburure asi ose kukarera Karunga gousili.—1 Vakolinte 10:31.
2. Ngapi emoneko lyetu ali kundama vapuli vakwetu?
Nampili ngomu twa kara noumanguruki wokuhorowora eyi natu dwara, twa hepa kugazadara ko omu nayi kundama wopeke. Ose kukondja unene yipo tu ‘pakere mbili vakwetu nokuvaruganena uwa yipo va kure mepuro,’ mevango lyokuvapundukisa.—Resa Varoma 15:1, 2.
3. Ngapi emoneko lyetu nali vhura kukokera vantu koukareli wousili?
Ose kuhetekera ko kudwara nawa nkenye oku tuna kara, nye unene po, ose kukondja tu moneke nawa nsene kuna kara komapongo ntani mokuzuvhisa. Ose kapi tuna hara emoneko lyetu li ninkise vantu va dire kupurakena kombudi zongwa. Nye ose tuna hara emoneko lyetu li ninkise vantu va hare kulironga usili ‘nokufumbura erongo lyaMuzowoli gwetu.’—Titusa 2:10.
LIRONGA KO YOYINZI
Lironga o dive ndwareso nemoneko eli lya wapera Vakriste.
Emoneko lyetu kulikida nsene asi twa fumadeka vapangeli ndi hawe. Nampili ngomu Jehova a mono eyi ya kara momutjima gwetu, emoneko lyetu lya hepa kulikida asi twa mu fumadeka
4. Emoneko lyewa kulikida efumadeko kwaJehova
Konda musinke zomulyo zeyi natu karera nosinka kuhamena emoneko lyetu? Resa Episarome 47:2, makura zogereni mapuro aga:
-
Mokumona asi ndwareso zetu kuvhura kukokera vantu kwaJehova, ngapi nayi kundama ndwareso zetu?
-
Ayo mulyo tu kare nosinka kuhamena emoneko lyetu apa atu zi komapongo ntani mokuzuvhisa ndi? Morwasinke ono kuuyungira ngoso?
5. Eyi nayi tu vatera tu tokore eyi natu dwara nomu natu liwapeka
Yi kare asi yikoverero yetu yondiro ndi yombiliha, ya hepa kuzera nokuwapera moukaro ou tuna kara. Resa 1 Vakolinte 10:24 ntani 1 Timoteusa 2:9, 10. Makura zogereni konda zeyi natu nyokera po yikoverero . . .
-
yoyinene ndi kulindjambeka.
-
yokupata korutu, yokumonekesa rutu ndi yokuninkisa vantu va kare nomagazaro gomadona.
Nampili ngomu Vakriste va dira kukara moVeta zaMosesa, nye kuvhura va lirongere ko omu Jehova a tara yininke. Resa Deuteronomium 22:5, makura zogereni epuro eli:
-
Morwasinke natu nyokerera po ndwareso neliwapaiko eli ali ninkisa vagara va moneke ngwendi vakadi, ano vakadi va moneke ngwendi vagara?
Resa 1 Vakolinte 10:32, 33 ntani 1 Johanesa 2:15, 16, makura zogereni mapuro aga:
-
Morwasinke natu karera nosinka nsene asi emoneko lyetu kuvhura li pundukise womombungakriste ndi womomukunda gwetu?
-
Ngapi ava dwara nokuliwapaika vantu womomukunda gweni?
-
Ngapi ono kugazara, ndwareso ozo kuvhura zi wapere Vakriste ndi? Morwasinke ono kuuyungira ngoso?
Kuvhura tu dware nokuliwapaika mononkedi dokulisiga-siga ntani tu hafese Jehova
VAMWE KUTANTA ASI: “Ame kuvhura ni dware nkenye eyi nina hara.”
-
Nove yimo o lizuvhu ngoso? Morwasinke ono kuuyungira ngoso?
YINKE ONO LIRONGO?
Apa atu tura po matokoro gomawa kuhamena emoneko lyetu, ose kulikida asi twa fumadeka Jehova ntani wopeke.
Erugururomo
-
Morwasinke ya karera nomulyo kwaJehova eyi atu dwara nomu atu moneka?
-
Nompango musinke nadi tu vatera pokuhorowora yikoverero ntani nomu natu liwapeka?
-
Ngapi emoneko lyetu ali kundama monkedi omu vantu ava tara ukareli wousili?
MAUZERA GAMWE
Tara eyi nava vhura kugazara vantu apa ava mono ndwareso zoge.
“Ngapi omu ani moneka?” (Sirongwa sokoIntaneta)
Lironga eyi ya karera nomulyo kugazadara ko komeho zokulitjanga Tattoo.
“Yisinke za uyunga Bibeli kuhamena noTattoo?” (Sirongwa sokoIntaneta)
Konakona nompango ne edi nadi tu vatera nsene kuna kutura po matokoro.
“Ndwareso zoge kufumadekesa ko Karunga ndi?” (Ruhungu, Sitarara 2016)
Yisinke ya vaterere mukadi gumwe ogu ga here kuhafesa Karunga a tambure ndwareso zovakwawo?
“Maliwapaiko nondwareso zovantu ngazi pundukisa nge” (Awake!, 22 Sindimba 2003)
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
