Ava va kara koBeteli kurugana yirugana yokulisiga-siga eyi ayi kwatesa ko yirugana yokuzuvhisa moyirongo yokulisiga-siga. Vamwe kutoroka, kurugana yimbapiratjangwa, kuyirongera momapakote nomononzugopungwiro, ntani vamwe kukwateka nodividi dokutarera ndi dokupurakena ndi kurugana yirugana yapeke.

Komitiye zoBeteli kugendesa yirugana yokuzuvhisa. Mbungagendesi kugava yirugana yokoBeteli momawoko goKomitiye zoBeteli, amo kwa kara mo vakuronambunga vatatu ndi wokupitakana opo. Komitiye kudivisa Mbungagendesi kuhamena yirugana yokuzuvhisa mwankenye sirongo ntani nankenye udigu una kuhoroka. Nombudi dangoso kuvatera Mbungagendesi zi dive asi yirongwa musinke nava vhura kutura mo moyimbapiratjangwa ndi moyiuyungwa yokomapongo nokoyigongi. Vakareli po woMbungagendesi kuvatuma va ka dingure Nobeteli nokukagava mavyukiso koKomitiye zoBeteli omu nava sikisa mo yirugana yawo. (Yisewe 11:14) Awo kugava yiuyungwa yokukorangeda konombungakriste da kara mosirongo oso.

Kuvatera nombungakriste. Pwa kara vanavazinyetugara wokoBeteli ava va pa situmbukira sokupulisira eturopo lyonombungakriste donompe. Vamwe kugendesa yirugana yovazuvhisi wokukarerera nava wosiruwo nasinye, yovatumwa ntani yovatareli wonombungakriste. Vamwe kuwapaika yigongi nokugendesa matungo goYinyanga yoUhompa yoyipe ntani nokudivilisa asi yimbapiratjangwa vana yi tumu konombungakriste. Nayinye eyi ava rugana koBeteli kuyirugana monkedi zongwa zokuliza zokukwatesa ko sirugana sokuzuvhisa.—1 Vakolinte 14:33, 40.

• Ngapi Komitiye zoBeteli azi vatere Mbungagendesi?

• Yisinke ava rugana ko koBeteli?