Ono hara kurugana epaparo o gwederere ediwo lyoge lyoBibeli ndi? Ono hara kudiva kuhamena etjangwa ndi muntu ndi evango ndi sininke esi va tumbura moBibeli ndi? Wa lipura nsene asi Nonkango daKarunga kuvhura di ku vatere nomaudigu aga wa kara nago ndi? Ruganesa bibiliyoteka zokoSinyanga soUhompa.

Amo kwa kara mo yimbapiratjangwa. Nampo kapi wa kara noyimbapiratjangwa nayinye yoBibeli eyi da tjanga Nombangi daJehova meraka lyeni. Nye bibiliyoteka zokoSinyanga soUhompa mwa kara yimbapiratjangwa yoyinzi. Amo mwa kara hena matoroko goNobibeli dokulisiga-siga, bukenkango, ntani nadimwe hena. Komeho ndi konyima zepongo, kuvhura o ruganese bibiliyoteka. Nsene moSinyanga seni kompiuta mo nampo mwa kara Watchtower Library. Eli kuna kara elikwamo lya kara noyimbapiratjangwa yetu yoyinzi ntani ureru kurugana epaparo lyosirongwa ndi nkango ndi etjangwa.

Mulyo kovagavi yiuyungwa mepongo Eparu noyirugana yetu yokuzuvhisa. Kuvhura o ruganese bibiliyoteka zokoSinyanga soUhompa o liwapaikire yiuyungwa yoge. Mutareli gepongo olyo yige a pakere mbili bibiliyoteka. Age yige a divilisa asi muna kara yimbapiratjangwa yoyipe ntani vana yi wapaike nawa. Mutareli gosikora ndi ogu a ku rongo Bibeli ngava ku likida omu no gwana mauzera aga ono hepa. Nye, mobibiliyoteka zomoSinyanga soUhompa kwato kupwagesa mo nobuke. Ntani twa hepa kuruganesa nawa nobuke ntani kapisi tu ture mo madidiliko.

Bibeli kwa faturura asi “mokulironga yokuhamena kwaKarunga,” twa hepa kupapara ediwo olyo ngwendi ‘emona lyokuhoreka.’ (Yisewe 2:1-5) Bibiliyoteka zokoSinyanga soUhompa ngazi ku vatera o rugane epaparo lyoge.

• Yimbapiratjangwa musinke ya kara mo mobibiliyoteka zokoSinyanga soUhompa?

• Yilye na ku vatera o ruganese bibiliyoteka?