Kutundilira kwanare, Jehova kwa harere mapata ga litulire po siruwo sokukara kumwe yipo va pameke elikwatakano lyawo nendi neli lyepata. (Deuteronomium 6:6, 7) Eyi yiyo Nombangi daJehova adi litulilire po siruwo nkenye sivike sokuzogera kumwe kuhamena Bibeli ntani neyi yina kuhoroka momaparu gawo. Nampili kwa tunga nyovelike, litulira po siruwo sokupameka elikwatakano lyoge naKarunga pokulironga Bibeli.

Siruwo sokuhedera pepi naJehova. “Hedeni Karunga pepi, nage a mu hede pepi.” (Jakopo 4:8) Ose kudiva nawa Jehova apa atu lirongo kuhamena yikara noyirugana yendi kupitira moBibeli. Nkedi zongwa zokutameka ukareli wepata kuna kara kuresa Bibeli kumwe, nampo kuvhura mu rese ereso lyomosivike eli ali kara melikwamo moMbapira zetu zekEpongo. Nkenye gumwe mepata kuvhura kumupa ko ruha a rese makura konyima tomu zogere eyi muna lirongere mo.

Siruwo sokureta epata kumwe. Valikwali novareti novanona kunkondopeka elikwatakano lyawo apa ava lirongo Bibeli ngepata. Elirongo olyo lya hepa kukara lyokuhafesa eli nava vhura kundindira nononkondo navenye vemepata. Vakurona kuvhura kuhorowora yirongwa eyi nava zogera kuliza nonomvhura dovana vawo, nampo pokuruganesa yirongwa yomoRuhungu ndi yimbapiratjangwa yapeke. Kuvhura kuzogera maudigu aga ava ligwanekere nago vana woge kosure nokuvavatera omu nava ga kohonona po. Ntani kuvhura mu tare kumwe elikwamo ava likida ko-jw tivi. Ndi kuvhura kuliyomberesa marusumo aga ngava ka dimba kepongo ntani konyima zoukareli wepata kuvhura kunwa ndi kulya ko yuma.

Kukara noukareli wepata nkenye sivike ngayi vatera navenye vemepata va hafere kulironga Nonkango daKarunga ntani age nga mu tungika kelituromo lyeni.—Episarome 1:1-3.

• Morwasinke atu litulilire po siruwo soukareli wepata?

• Ngapi vakurona nava rugana ukareli wepata yipo navenye va u hafere?