Vantu wovanzi va hageka kuza konongereka morwa kapi ava gwana malimbururo komapuro gawo. Morwasinke no zira komapongo goNombangi daJehova? Yisinke ngo ka gwana ko komapongo gawo?

Ngo ka gwana ruhafo rokukara mokatji kovantu wovawa wombili. Mosiruwo sovapositoli, Vakriste ngava pongo monombungakriste va karere Karunga nokulironga Matjangwa nokulikorangeda-korangeda. (Vahebeli 10:24, 25) Pokuponga kumwe awo ngava lizuvhu asi awo kuna kara novanavanzinyawo. (2 Vatesaronika 1:3; 3 Johanesa 14) Nose kukwama sihonena sovapositoli ntani kugwana mo ruhafo rokulifana.

Ngo ka lironga omu no sikisa mo nompango doBibeli. Posiruwo sanare, vagara novakadi novanona ngava pongo kumwe. Varongi wokuwapera kuruganesa Bibeli va tu vatere tu dive omu natu sikisa mo nompango doBibeli meparu lyetu. (Deuteronomium 31:12; Nehemiya 8:8) Pokugava malimbururo nokudimba kumwe kutupa mpito tu singonone ehuguvaro eli twa kara nalyo.—Vahebeli 10:23.

Epuro lyoge mwaKarunga ngali nkondopara. Mupositoli Paurusa kwa tanterere mbungakriste zimwe asi: “Na hara kumumona, . . . natuvenye ngatu ya gwanene simwe ekwafo: one li ya mu kwafe epuro lyange, ano ame name li ya kwafe nge lyeni.” (Varoma 1:11, 12) Kukara komapongo kumwe novanavanzinyetu kunkondopeka epuro lyetu ntani kutuvatera tu tokomene kuparuka kuliza nonompango doBibeli.

Kuna kukuzigida ngo ya ponge kumwe nose yipo ngo ya limonene ko nyamoge mauwa aga tuna tumbura. Kapi atu pura mfuto komapongo getu.

• Sihonena salye atu kwama komapongo getu?

• Ngapi natu gwanena mo uwa pokukara momapongo goSikriste?