Mazuva gongandi komeho zonomfa dendi, Jesus kwa zogerere novarongwa vendi vane, Peturusa naJakopo naJohanesa naAndiliyasa. Apa ga tumbwire sidiviso sekaropo lyendi momazuva gopouhura, age kwa pulire epuro lyomulyo asi: “Yilye nani mukareli gokulimburukwa gonondunge, ogu ga tumbire hekurwendi a kare mutunini govantu vendi, a va paape nondya posiruwo sado?” (Mateusa 24:3, 45; Marukusa 13:3, 4) Jesus kwa tumbwidilire varongwa vendi asi ‘ngahekurwawo,’ age nga tumba ava ngava pa vasikuli vendi nondya dopampepo pomazuva gopouhura. Wolye nye va hamena mo momukareli?

Awo vasikuli vaJesus wovagwavekwa. “Mukareli” kugava nondya dopampepo kovakareli vakwawo vaJehova. Ose kwa korera momukareli gokulimburukwa a tu pe “nondya posiruwo sado.”—Rukasa 12:42.

Awo kugendesa embo lyaKarunga. (1 Timoteusa 3:15) Jesus kwa pere mukareli situmbukira sosinene sokugendesa yirugana yepevhu yombunga zaJehova. Mukareli kutakamesa yiweka yombunga nokugendesa yirugana yokuzuvhisa ntani kuturonga kupitira monombungakriste detu. Mokutupa eyi twa hepa posiruwo sayo, “mukareli gokulimburukwa gonondunge” kuna kugavera nondya dopampepo kupitira moyimbapiratjangwa eyi atu ruganesa pokuzuvhisa, ntani kupitira moyiuyungwa eyi atu zuvhu komapongo nokoyigongi.

Mukareli kulimburukwa pokukwaterera kousili womoBibeli nokosirugana esi va mu pa sokuzuvhisa mbudi zongwa ntani age kutakamesa nonondunge yiweka yaKristusa apa pevhu. (Yirugana 10:42) Jehova kuna kutungika yirugana yendi nokumuvatera a tu pe nondya dononzi dopampepo.—Jesaya 60:22; 65:13.

• Jesus, yilye ga tumbire a pe varongwa vendi nondya dopampepo?

• Mononkedi musinke mukareli ga kara noulimburukwi nonondunge?