‘Vapositoli novakurona moJerusarema,’ kwa kere ngombungagendesi ezi za karerere po mbungakriste zovagwavekwa mokutura po matokoro gomanene. (Yirugana 15:2) Awo ngava konakona Matjangwa nokukwama egendeso lyompepo zaKarunga yipo va ture po matokoro. (Yirugana 15:25) Yiyo azi rugana mbungagendesi naina.

Karunga kuziruganesa a sikise mo mpango zendi. Vanavazinyetugara wovagwavekwa ava va kara moMbungagendesi awo kwa litura mo unene moNonkango daKarunga ntani va kara noudivi wokugendesa yirugana yetu. Awo kuponga kumwe nkenye sivike va zogere yihepwa yovanavazinyetu uzuni mudima. Ngwendi posiruwo sovapositoli, awo kugava mapukururo gomoBibeli kupitira monombilive ndi movatareli wokudingura ndi mwavamwe wopeke. Eyi kuvatera vantu vaKarunga va gazare nokuruganena mouumwe. (Yirugana 16:4, 5) Mbungagendesi kugendesa ewapaiko lyonondya dopampepo nokukorangeda navenye va ture sirugana sokuzuvhisa muhowo ntani kugendesa egawo lyoyitumbukira kovanavazinyetu.

Azo kukwama epitisiro lyompepo zaKarunga. Mbungagendesi kulimburukwa komavyukiso goMupangeli gwanayinye, Jehova, ntani goMupangeli gombungakriste, Jesus. (1 Vakolinte 11:3; Vaefeso 5:23) Awo kapi ava litara vene asi vapangeli wovantu vaKarunga. Kumwe novagwavekwa vakwaawo awo “kukwama Nzwigona [Jesus] nkenye oku zina vyuka.” (Ehororo 14:4) Mbungagendesi kuyihafera apa atu va tura momakanderero getu.

• Mosiruwo sovapositoli, wolye va kere mombungagendesi?

• Ngapi Mbungagendesi naina azi pura mavyukiso kwaKarunga?